Ko e hā ʻoku mahuʻinga ai ke faitotonú?

ʻOku ʻuhinga ʻa e faitotonú ko e fili ke ʻoua ʻe loi, kaihaʻa, kākā pe fakakeheʻi ʻi ha faʻahinga founga pē. ʻI heʻetau faitotonú, ʻoku tau fakatupulaki ha mālohi ke ne fakaʻatā ke tau tokoni lahi ki he ʻOtuá pea ki he niʻihi kehé. ʻOku tapuekina kitautolu ʻaki ʻa e nonga ʻo e fakakaukaú mo e fakaʻapaʻapaʻi kitá pea ʻe falala mai ʻa e ʻEikí mo e niʻihi kehé.

Teuteuʻi fakalaumālie koe

Ko e hā ha ngaahi folofola mo e maʻuʻanga tokoni kehe te ne tokoniʻi e kau finemuí ke nau ongoʻi e mahuʻinga ʻo e faitotonú?

Saame 101:7; Lea Fakatātā 12:22; 2 Kolinitō 4:2; ʻEfesō 4:29; ʻAlamā 27:27; Ngaahi Tefito ʻo e Tuí 1:13 (Faitotonu mo angatonu ʻi he meʻa kotoa pē)

Ngāue 5:1–10 (He ʻikai ke tau lava ʻo loi ki he ʻEikí)

2 Nīfai 9:34; ʻAlamā 12:1-5 (Ko e taʻe faitotonú ko ha angahala ʻoku mamafa hono ngaahi nunuʻá)

Siosefa Sāmita—Hisitōlia 1:21–25 (Ko e faitotonu ʻa Siosefa ʻi he taimi ne fehangahangai ai mo e fakatangá)

Thomas S. Monson, “ʻOku ʻOmi ʻe he Teuteú ʻa e Ngaahi Tāpuakí,” Ensign pe Liahona, Mē 2010, 64–67

Robert C. Gay, “Ko e hā ʻe Foaki ʻe ha Tangata ke Fetongi ʻaki Hono Laumālié? ” Ensign pe Liahona, Nōvema 2012, 34–36

Ann M. Dibb, “ʻOku ou Tui ʻoku Totonu ke Faitotonu mo Angatonu,” Ensign pe Liahona, Mē 2011, 115–18

“Faitotonú mo e Angatonú,” Ki Hono Fakamālohia ʻo e Toʻu Tupú (2011), 19

“Faitotonú,” Tuʻu Maʻu ʻi he Tuí (2004), 16

Vitiō: “Faitotonú: Tui Leva Ki ai”

4:47

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ‘o e uike ní:

Kole ki he kau finemuí ke nau lau e talanoa kau ki hono fakatau mai ha ngaahi tikite heleʻuhila ʻi he lea ʻa ʻEletā Lōpeti C. Keí “Ko e hā ʻe Foaki ʻe ha Tangata ke Fetongi ʻaki Hono Laumālié?” Fakaafeʻi ke nau fakamatalaʻi fakanounou ʻa e talanoá mo fevahevaheʻaki e meʻa ʻoku nau ako mei he talanoa kau ki he mahuʻinga ʻo e faitotonú.
Fakaafeʻi e kau finemui ke nau sio he “Faitotonú: Tui Leva Ki ai” Kole ke nau hiki e ngaahi founga te nau lava ʻo teuteu ai he taimí ni ke lavaʻi e ʻahiʻahi ke kākaá ki muʻa pea hoko ha meʻa peheé. Fakaafeʻi ke nau vahevahe ʻenau fakakaukaú mo e toenga ʻo e kalasí.

4:47

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he kau finemuí hono mahuʻinga ʻo e faitotonú. Muimui ʻi he ueʻi ʻa e Laumālié ʻo fili ha taha pe toe lahi ange ʻe ngāue lelei taha ki hoʻo kalasí:

Lau ki he kau finemuí e talanoa ʻo e tangata kaihaʻa koané mei he lea ʻa ʻAna M. Tipí “ʻOku ou Tui ʻoku Totonu ke Faitotonu mo Angatonu.” Taʻofi hoʻo laú kimuʻa pea toki pehē ʻe he kiʻi tamasiʻí, “Tangataʻeikí, ʻoku ʻi ai e feituʻu ʻe taha ne teʻeki ke ke sio ki ai!” Fehuʻi ki he kau finemuí pe ko e hā nai ʻe lea ʻaki ʻe he kiʻi tamasiʻí ki heʻene tangataʻeikí. Pea toki lau ʻene leá. Kole ki he kau finemuí ke aleaʻi e ngaahi fili te nau fehangahangai mo iá ʻa ia kuo pau ke nau fili ai ke faitotonu.
Lau ko ha kalasi e “Faitotonú mo e Angatonú” ʻi he Ki Hono Fakamālohia ʻo e Toʻu Tupú. Kole ki he kau finemuí ke nau feinga ke ʻiloʻi e ngaahi tāpuaki ʻo e faitotonú pea hiki kinautolu he palakipoé. ʻOku kaunga ʻa e faitotonú ki heʻenau malava ke fai lelei ki he niʻihi kehé mo e ʻEikí? Ko e fē e taimi ne tāpuekina ai e kau finemuí ʻi heʻenau faitotonú? Kole ki he kau finemuí ke nau fakakaukau ki ha ngaahi tūkunga ne ʻahiʻahiʻi ai kinautolu ke nau taʻe faitotonu (ʻe lava ke nau sio ki he ngaahi tuʻunga moʻui ʻi he Ki Hono Fakamālohia ʻo e Toʻu Tupú ke maʻu ai ha ngaahi fakakaukau). Ko e hā te nau lava ʻo fai ʻi he ngaahi tūkunga ko ʻení ke tauhi maʻu ʻenau faitotonú?
Vahe ki he finemui takitaha ha taha ʻo e ngaahi potufolofola mei he lēsoni ko ʻení. Kole ke nau hiki ha foʻi lea ʻe taha ki he fā ʻokú ne fakafofongaʻi e meʻa ʻoku akoʻi ʻe he potufolofolá kau ki he faitotonú. Fakaafeʻi ke nau vahevahe e meʻa kuo nau tohí pea fakahaaʻi ʻenau ongó mo e ngaahi meʻa kuo nau aʻusia kau ki he faitotonú. ʻOku kaunga fēfē ʻenau angatonú ki honau vā fetuʻutaki mo e niʻihi kehé?
Lau ko ha kalasi e Siosefa Sāmita—Hisitōlia 1:21–25, pea fehuʻi ki he kau finemuí e meʻa ʻoku nau ako mei he talanoá ni kau ki he faitotonú. ʻOku tāpuekina fēfē kinautolu koeʻuhí ko e tuʻu maʻu ʻa Siosefa ʻi he meʻa naʻá ne aʻusiá mo e meʻa ne kole ange kiate ia ʻe he Tamai Hēvani mo Sīsū Kalaisí? Ko fē e taimi ne fie maʻu ai ʻe he faitotonú e kau finemuí ke nau loto-toʻá? Naʻe tāpuekina fēfē nai kinautolu ʻi heʻenau faitotonú?
Tā ha foʻi laine mei ʻolunga ki lalo ʻi loto-mālie he palakipoé. Tohiʻi he tafaʻaki ʻe tahá, “Kapau ʻoku [ou] faitotonu…” pea tohiʻi he tafaʻaki ʻe tahá, “Kapau ʻoku [ou] taʻe faitotonu…” Kole ki he kau finemuí ke nau sio ki ha ngaahi founga ke fakakakato ai e ngaahi sētesí ni ʻi heʻenau lau e konga ʻoku ui ko e “Faitotonú” ʻi he Tuʻu Maʻu ʻi he Tuí pea mo e talanoa ʻo e tamasiʻi ako taʻe faitotonú ʻi he lea ʻa Palesiteni Tōmasi S. Monisoni “ʻOku ʻOmi ʻe he Mateuteú e Ngaahi Tāpuakí.” Ko e hā ha ngaahi fakakaukau kehe te nau lava ʻo toe tānaki mai? Fakaafeʻi e kau finemuí ke nau vahevahe e founga kuo nau mamata ai ki he ngaahi meʻá ni ʻi heʻenau moʻuí. Kole ki he kalasí ke nau vahevahe ha ngaahi founga ʻoku fakatonuhiaʻi ai ʻe he kakaí he taimi ʻe niʻihi ʻenau taʻe faitotonú. ʻOku nau fakamatalaʻi fēfē ki he niʻihi kehé ʻa e ʻuhinga ʻoku nau faitotonu aí?

Kole ki he kau finemuí ke nau vahevahe e meʻa ne nau ako ʻi he ʻaho ní. ʻOku mahino nai kiate kinautolu e mahuʻinga ʻo e faitotonú? Ko e hā ha faʻahinga ongo pe ngaahi fakakaukau ʻoku nau maʻu? ‘Oku ‘i ai nai haʻanau toe ngaahi fehuʻi kehe? ʻE ʻaonga ke fakamoleki ha toe taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui ʻaki fēfē nai ʻa e meʻa kuo nau ako he ʻaho ní. Hangē ko ʻení, te nau lava ʻo:

Fakatukupaaʻi ke nau faitotonu heʻenau fengāueʻaki kotoa pē mo e niʻihi ʻoku nau feohí.
Palani pea akoako e meʻa te nau fai pe lea ʻakí he taimi ʻoku feinga ai ha taha ke fakalotoʻi kinautolu ke nau fai ha meʻa ʻoku taʻe totonú.
Fakakakato ha taha ʻo e ngaahi meʻa ke aʻusia pe ngaahi ngāue he Angatonú ʻi he Fakalakalaka Fakatāutahá.