Ko e hā ʻoku fekauʻi ai kitautolu ke tauhi e Sāpaté ke māʻoniʻoní?

Kuo foaki mai ʻe he ʻEikí ʻa e ʻaho Sāpaté ke lelei kiate kitautolu pea kuó Ne fekau ke tau tauhi ia ke māʻoniʻoni. ʻOku fakahaaʻi heʻetau tauhi e Sāpaté ʻa ʻetau tukupā ke tauhi mo hū ki he ʻOtuá pea tauhi ʻetau ngaahi fuakavá. Te ne ʻomi ai ke tau ofi ange ki he ʻEikí mo hotau fāmilí. Te ne ʻomi kiate kitautolu ha fakakaukau ki he taʻengatá mo ha mālohi fakalaumālie. ʻOku toe fakaʻatā ai kitautolu ʻe he Sāpaté ke tau mālōlō mei heʻetau ngaahi ngāue fakatuʻasinó kae hū ki he ʻEikí.

Teuteuʻi fakalaumālie koe

Ko e hā e ngaahi tāpuaki ʻokú ke fiefia ai koeʻuhí ko hoʻo tauhi e ʻaho Sāpaté ke māʻoniʻoní? ʻOkú ke ʻiloʻi fēfē e meʻa ʻoku taau pe ʻikai taau ʻi he Sāpaté? Ko e hā ʻoku mahuʻinga ai ke ke ʻalu ki hoʻo ngaahi fakataha he Sāpaté?

Ko e hā ʻoku mahuʻinga ai ke mahino ki he kau finemuí e ʻuhinga ʻoku ʻi ai ai ʻa e ʻaho Sāpaté? Te ke tokoniʻi fēfē ke fakatōkakano ʻiate kinautolu ha holi ke tauhi e ʻaho Sāpaté? Te ke tokoniʻi fēfē ke fakapapauʻi ʻe he kau finemuí e ngaahi ʻekitivitī ʻoku taau mo e ʻaho Sāpaté?

Ko e hā ha ngaahi potufolofola mo ha ngaahi maʻuʻanga tokoni kehe ʻe tokoni ke mahino ki he kau finemuí e mahuʻinga ʻo e ʻaho Sāpaté mo hono tauhi ia ke māʻoniʻoní?

Sēnesi 2:2 (Tupuʻanga ʻo e ʻaho Sāpaté)

ʻEkesōtosi 20:8–11; 31:13 (Tauhi e ʻaho Sāpaté ke māʻoniʻoni)

ʻĪsaia 58:13–14 (Ko e ngaahi tāpuaki ʻo hono tauhi e Sāpaté)

Luke 23:55–24:1 (Naʻe tatali e kau fafine ne nau tākai e sino ʻo Sīsuú hili Hono Tutukí ke toki fai ia hili ʻa e Sāpaté)

T&F 59:9–13 (ʻOku tokoni hono tauhi ʻo e Sāpaté ke maʻa ange mei māmani)

Mosaia 13:16–19 (ʻOku fekauʻi ke tau tauhi e ʻaho Sāpaté)

Henry B. Eyring, “Loto Houngaʻia he ʻAho Sāpaté,”EnsignpeLiahona,Nōvema. 2016, 99-102

Russell M. Nelson ”ʻOku Fakafiefia ʻa e ʻAho Sāpaté” Ensign pe Liahona, Mē 2015, 129–32

Kevin S. Hamilton, “Kei Pikitai Pē,” Ensign pe Liahona, Nōvema 2013

“Sāpaté,” Tuʻu Maʻu ʻi he Tuí (2004), 175–76

“Tauhi ʻo e ʻAho Sāpaté,” Ki Hono Fakamālohia ʻo e Toʻu Tupú (2011), 30–31

Vitiō: “He Learned Compassion in His Youth”

1:16

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ‘o e uike ní:

Kole ki he kau finemuí ke nau hiki e ngaahi tāpuaki kuo nau maʻu mei hono tauhi ʻo e Sāpaté. ʻOku nau tauhi fēfē e Sāpaté ke māʻoniʻoní?

Ako fakataha

ʻE tokoni e ngaahi ʻekitivitī takitaha ʻi laló ke mahino ki he kau finemuí e taumuʻa ʻo e ʻaho Sāpaté. Muimui ʻi he ueʻi ʻa e Laumālié ʻo fili ha meʻa ʻe taha pe lahi ange ʻe tokoni lelei taha ki hoʻo kalasí:

Fakaafeʻi e finemui takitaha ke nau fekumi ki he lea ʻa Palesiteni Henry B. Eyring “Loto Houngaʻia he ʻAho Sāpaté” pea faʻu ha lisi ʻo e ngaahi meʻa ne lave ki ai ʻa Palesiteni Eyring te tau malava ʻo fakafetaʻi ai koeʻuhí ko e Sāpaté. Tuku ki he kau finemuí ke nau fakafehoanaki ʻenau lisí mo vahevahe e meʻa ne nau maʻú. Lau fakataha e fakaafe ʻa Palesiteni Eyring ʻi he konga fakaʻosi ʻo ʻene leá, pea fakatukupaaʻi e kau finemuí ke nau ngāueʻi ia.
Vahevahe ʻa e lea “ʻOku Fakafiefia ʻa e ʻAho Sāpaté” ki ha konga ʻe tolu pe fā. Fakaafeʻi e kau finemuí ke nau lau e ngaahi kongá, ʻo fakakulupu iiki pe fakafoʻituitui. Ko e hā ha ngaahi ʻilo ʻoku nau maʻu ai ki he founga ke hoko ai e Sāpaté ko ha meʻa fakafiefiá? Ko e hā ha founga ʻe fakapapauʻi ʻaki ʻe he kau finemuí ʻe iku ʻenau tōʻonga ʻi he Sāpaté ki he fiefiá mo e nēkeneká?
Vahevahe e kau finemuí ke tautau toko ua. Fakaafeʻi ha finemui mei he hoa takitaha ke ne lau e T&F 59:9–15 pea hiki e meʻa ʻoku kole mai ke tau fai he Sāpaté. Kole ki he finemui ʻe tahá ke ne kumi ʻi he veesi 16–19 ʻa e ngaahi tāpuaki naʻe talaʻofa mai he taimi ʻoku tau tauhi ai e ʻaho Sāpaté ke māʻoniʻoní. Kole ke nau fevahevaheʻaki e meʻa ʻoku nau ʻiló pea talanoa ki he mahuʻinga ʻo hono tauhi e ʻaho Sāpaté. Fakaafeʻi e kalasí ke nau aleaʻi e ʻuhinga ne ʻomai ai ʻe he ʻEikí e ʻaho Sāpaté kiate kitautolú. Kole ki he finemui takitaha ke ne fakakaukau ki ha meʻa te ne lava ke fakapapauʻi ai ʻokú ne fakahoko e ngaahi taumuʻa ʻa e ʻEikí ki he ʻaho Sāpaté ʻi heʻene moʻuí.
Fehuʻi ki he kau finemuí pe te nau ʻilo fēfē ʻoku feʻunga ha ʻekitivitī ke fai he Sāpaté. Fakaafeʻi ke nau sio ki he T&F 59:9–13 pea ʻi he Ki Hono Fakamālohia ʻo e Toʻu Tupú (peesi 30–31) ki ha ngaahi tefitoʻi moʻoni te ne lava ʻo tokoniʻi kinautolu. Fakaafeʻi e finemui takitaha ke fakakaukau ki heʻene ngaahi ʻekitivitī he Sāpaté pea sio pe ʻoku nau fenāpasi mo e ngaahi tefitoʻi moʻoni ko ʻení. Poupouʻi e kau finemuí ke nau fai ha faʻahinga liliu pē ʻoku nau ongoʻi ʻoku fie maʻu ke fai.
Tufa ki he kau finemuí ha tatau ʻo e Ki Hono Fakamālohia ʻo e Toʻu Tupú, pea kole ke nau kumi ki he konga ʻoku ui ko e “Tauhi ʻo e ʻAho Sāpaté” ki he ʻuhinga mo e founga ʻo ʻetau tauhi e ʻaho Sāpaté. Kole ke nau fakakaukau pea vahevahe e founga ʻe fakaʻaongaʻi ai ʻa e ngaahi meʻá ni ki heʻenau moʻuí. Fakaafeʻi ke nau vahevahe ha aʻusia ki hono tauhi e ʻaho Sāpaté ke māʻoniʻoní. Poupouʻi ke nau fakakaukauloto ki hano fakaafeʻi kinautolu ʻe ha kaungāmeʻa ke kau ʻi ha ʻekitivitī ʻoku ʻikai feʻunga mo e Sāpaté. Te nau tokoniʻi fēfē nai honau kaungāmeʻá ke mahino ki ai e ʻuhinga ʻo e ʻaho Sāpaté pea mo e ngaahi ʻuhinga ʻoku nau fili ai ke tauhi ia ke māʻoniʻoní?
Fakahā pe fakafekauʻaki e talanoa kau ki he tamai ʻa ʻEletā Kēvini S. Hamilitoní ʻi he ʻuluaki palakalafi ʻe ua ʻo ʻene lea “Kei Pikitai Pē.” Ko e hā ʻoku ako ʻe he kau finemuí mei he talanoá ni kau ki he mahuʻinga ʻo e tauhi e Sāpaté? ʻOange ki he kau finemuí ha ngaahi tatau ʻo e palakalafi mei he lea ʻa ʻEletā Hamilitoní ʻoku kamata ʻaki e kupuʻi lea ko e “ʻOku lahi e fili ke tau takitaha fai.” Kole ange ke nau lau e palakalafi mo ngāue tauhoa fakataha ke hiki ha lisi ʻo e ngaahi ʻekitivitī “lelei,” “lelei ange,” mo e “lelei taha” ʻi he Sāpaté. Fakaafeʻi ke nau fakamatalaʻi ʻenau ngaahi fakakaukaú ki he kalasí.

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino nai kiate kinautolu e ngaahi tāpuaki ʻo hono fakaʻapaʻapaʻi e ʻaho Sāpaté? Ko e hā haʻanau ngaahi ongo pe fakakaukau? ‘Oku ‘i ai nai haʻanau toe ngaahi fehuʻi kehe? ʻE ʻaonga ke fakamoleki ha toe taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui ʻaki fēfē nai ʻa e meʻa kuo nau ako he ʻaho ní. Hangē ko ʻení, te nau lava ʻo:

Hiki ʻi heʻenau tohinoá ha liliu ʻe taha ʻoku fie maʻu ke nau fai ke nau lava ʻo tauhi lelei ange ai e ʻaho Sāpaté ke māʻoniʻoní.
Hiki e ngaahi foʻi lea “ʻOku hanga ʻe he ʻekitivitī ko ʻení ʻo ʻomi ke u ofi ange ai ki he Tamai Hēvaní?” ʻi ha laʻipepa pea tuku ia ʻi ha feituʻu ʻilonga ʻi honau ʻapí ko ha fakamanatu ki he ngaahi ʻekitivitī ʻoku fai he Sāpaté.