Ko e hā ʻoku tau ʻaukai aí?

Ko e ʻaukaí ko haʻate loto fie mālie ke taʻe kai pe inu ʻi ha vahaʻa taimi pau. ʻE lava e ʻaukaí mo e lotu fakamātoató ʻo tokoniʻi koe ke ke mateuteu mo e niʻihi kehé ke maʻu e ngaahi tāpuaki ʻa e ʻOtuá. Ko ha maʻuʻanga ia ʻo ha mālohinga fakalaumālie. ʻE lava ke tau toe ofi ange ki he Tamai Hēvaní mo fakamālohia ʻetau fakamoʻoní ʻi he ʻaukaí. ʻOku toe kau foki ʻi he ʻaukaí ha foaki ʻaukai fie foaki ke tokoniʻi kinautolu ʻoku faingataʻaʻiá.

Teuteuʻi fakalaumālie koe

Ko e hā ha niʻihi ʻo e ngaahi ʻuhinga kuó ke ʻaukai aí, pea ko e hā e ola ne maʻu ʻi hoʻo ʻaukaí? Ko e hā te ke faí ke ʻuhingamālie ai ʻa e ʻaukaí?

Ko e hā ʻoku mahuʻinga ai ke mahino ki he kau finemuí e tefitoʻi moʻoni ʻo e ʻaukaí? Ko e hā e ngaahi faingataʻa ʻoku fehangahangai mo e kau finemuí ʻi he fiefia he ngaahi tāpuaki kakato ʻo e ʻaukaí?

Ko e hā ha ngaahi potufolofola mo ha ngaahi maʻuʻanga tokoni kehe te nau tokoni ke mahino ki he kau finemuí ʻa e ʻaukaí mo e ngaahi tāpuaki ʻoku maʻu mei aí?

ʻĒseta 4:10–17; Mātiu 4:1–11; ʻAlamā 17:1–3, 9; T&F 59:12–14 (Ko e ʻaukaí ko ha maʻuʻanga ivi fakalaumālie ia)

ʻIsaia 58:3–12; Mātiu 6:16–18 (Ko hono fakamatalaʻi ʻe he ʻEikí hono fakahoko totonu ʻo e ʻaukaí, kau ai ʻa e foaki ʻaukaí)

Mosaia 27:18–24; ʻAlamā 6:6 (ʻOku tokoni e ʻaukaí ke faitāpuekina ai e niʻihi kehé)

ʻAlamā 5:45–46; Hilamani 3:35 (ʻOku tokoni e ʻaukaí ke fakamālohia e fakamoʻoní)

Henry B. Eyring, “‘Ikai Ko ʻeni ʻa e ʻAukai Kuó u Filí?’” Ensign pe Liahona, Mē 2015, 22–25

Dean M. Davies, “Ko e Fono ʻo e ʻAukaí: Ko ha Fatongia Fakatāutaha ke Tokangaʻi ʻa e Masivá mo e Faingataʻaʻiá,” Ensign pe Liahona, Nōvema 2014, 53–55

“ʻAukaí mo e Ngaahi Foaki ʻAukaí,” Tuʻu Maʻu ʻi he Tuí (2004), 218–20

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ‘o e uike ní:

Vahevahe ki he kau finemuí e talanoa mei he lea ʻa ʻEletā L. Tomu Peuli kau ki ha fefine naʻe ʻaukai “Ko e Hā ʻOku [Mou] Kumí? ” Kole ke nau fakafanongo ki he ngaahi tāpuaki ʻoku maʻu mei he ʻaukaí. Ko e hā ha ngaahi tāpuaki kehe ʻoku nau ʻilo ʻoku maʻu mei he ʻaukaí?
Fakaafeʻi e kau finemuí ke nau fakakaukauloto ki ha fie ʻilo ʻa ha kaungāmeʻa mei ha tui fakalotu kehe ki he ʻuhinga e ʻaukaí mo e ʻuhinga ʻoku nau fakahoko ai iá. Te nau fakamatalaʻi fēfē nai ʻa e tefitoʻi moʻoni ʻo e ʻaukaí ki honau kaungāmeʻá? Aleaʻi e kehekehe ʻo e ʻaukaí mo e nofo taʻe kaí (vakai, T&F 59:13–14).

Ako fakataha

ʻE tokoni e ngaahi ʻekitivitī takitaha ʻi laló ke mahino ki he kau finemuí ʻa e ʻuhinga ʻo e ʻaukaí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

Fakaafeʻi e kau finemuí ke nau lau pe mamata fakatokolahi ʻi he lea ʻa Palesiteni Henry B. Eyring “ʻIkai Ko ʻeni ʻa e ʻAukai Kuó u Filíʻ” ʻI heʻenau lau pe sio aí, kole ange ke nau kumi e tali ki he ngaahi fehuʻi hangē ko e, “Ko e hā e ʻuhinga ʻo e ʻaukaí?” “Ko e hā e ngaahi taumuʻa ʻo e ʻaukaí?” mo e “Ko e hā ʻa e ngaahi tāpuaki ʻo e ʻaukaí?” Fakaafeʻi e kau finemuí ke nau vahevahe ʻa e founga kuo faitāpuekina ai ʻenau moʻuí ʻe he ʻaukaí pea mo e meʻa te nau fai ke fakaleleiʻi ʻaki ʻenau ʻaukaí.
Faʻu mo e kalasí ha lisi ʻo e ngaahi faingataʻa angamaheni ʻe lava ke fehangahangai mo e kau finemuí. Fakaafeʻi e kau finemuí ke nau lau e ngaahi potufolofola ʻoku nau fakamatalaʻi e ngaahi tāpuaki ʻo e ʻaukaí, hangē ko ia ʻoku hiki atu ʻi he fokotuʻutuʻu ko ʻení. Kole ange ke nau hiki he palakipoé e ngaahi tāpuaki ʻo e ʻaukai ʻoku fakahoko totonú. ʻE tokoniʻi fēfē nai ʻe he ngaahi tāpuakí ni ʻa e kau finemuí ke nau ikunaʻi e ngaahi faingataʻa ʻo e moʻuí? ʻE tokoniʻi fēfē nai kinautolu [ʻe he ngaahi tāpuakí ni] ʻi honau ngaahi fatongia he kahaʻú, kau ai e hoko ko ha uaifi mo ha faʻeé? Fai ha fakamoʻoni ki he ngaahi tāpuaki ʻo e ʻaukaí.
Kole ki he kau finemuí ke ʻai ha saati kōlomu ʻe tolu ʻi ha laʻipepa pea fakahingoa e ngaahi kōlomú, “Ko e Hā ʻOku Totonu Ke Tau Faí?” “Ko e Hā e Meʻa ʻOku Totonu Ke Tau Fakaʻehiʻehi Mei Hono Faí?” mo e “Ko e Hā e Ngaahi Tāpuaki ʻOku Talaʻofa Mai ʻe he ʻOtuá?” Fakaafeʻi ke nau tohi e ngaahi tali ʻoku nau maʻu fekauʻaki mo e ʻaukaí ʻi he {5}ʻIsaia 58:3–12. (Kapau ʻe fie maʻu, fakamatalaʻi ko e ʻaukaí ko ha founga ia ʻe taha ʻoku tau “tufaki ai [ʻetau] maá ki he fiekaiá,” pea ʻoku malava ke totongi ʻe he kau finemuí ʻa e ngaahi foaki ʻaukaí.) Poupouʻi kinautolu ke vahevahe ʻenau talí pea mo e ngaahi tāpuaki kuo nau maʻu ʻi hono fai e ʻaukaí ʻi he founga ʻa e ʻEikí.
Fakaafeʻi ha mēmipa ʻo e kau pīsopelikí ke ne fakamatalaʻi ki he kalasí e founga ʻoku tokoni ai ʻa e ngaahi foaki ʻaukaí ke tokangaʻi ʻa e masivá mo e faingataʻaʻiá. Ke hoko ko ha konga ʻo e fealeaʻaki ko ʻení, ʻe lava ke toe vakaiʻi ʻe he kau finemuí ʻa e meʻa ʻoku akoʻi ʻe Pīsope Dean M. Davies ʻi heʻene lea kau ki he ngaahi foaki ʻaukaí “Ko e Fono ʻo e ʻAukaí: Ko ha Fatongia Fakatāutaha ke Tokangaʻi ʻa e Masivá mo e Faingataʻaʻiá.” Fehuʻi ange ki he kau finemuí pe ʻoku fēfē ʻenau ongo ki he fakamatalá ni fekauʻaki mo e faingamālie ke ʻaukaí.

Kole ki he kau finemuí ke nau vahevahe ʻa e meʻa naʻa nau ako ʻi he ʻaho ní. ʻOku mahino nai kiate kinautolu e ʻuhinga ʻo e ʻaukaí? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke toe tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui ʻaki fēfē nai ʻa e meʻa kuo nau ako he ʻaho ní. Hangē ko ʻení, te nau lava ʻo:

Teuteuʻi ha lisi ʻo ha ngaahi tōʻonga mo e ʻulungaanga ʻe fakahokoʻaki ha ʻaukai totonú pea fakaʻaongaʻi ia he Sāpate ʻaukai hono hokó pe ko ha ʻaukai fakatāutaha.
Vahevahe ha meʻa ne nau ako ʻo kau ki he ʻaukaí ʻi ha efiafi fakafāmili ʻi ʻapi pe kalasi semineli.