ʻOku uesia fēfē ʻe he meʻa ʻoku ou lea ʻakí au mo e niʻihi ʻoku mau feohí?

ʻOku fakahaaʻi mai ʻe heʻetau founga fetuʻutakí ʻetau mahino ki hotau tuʻungá ʻi heʻetau hoko ko e fānau ʻa e ʻOtuá. ʻOku lava ʻe heʻetau leá ʻo hiki hake pe poupouʻi ʻa e niʻihi kehé, pe ko ʻene fakalaveaʻi pe fakaʻitaʻi kinautolu. ʻI heʻetau fakaʻaongaʻi ʻa e lea langaki moʻuí, ʻoku tau fakaafeʻi ke ʻiate kitautolu ʻa e Laumālie Māʻoniʻoní.

Teuteuʻi fakalaumālie koe

Fakakaukau ki he mālohi ʻo e leá. Kuó ke fakaʻaongaʻi fēfē nai e leá ʻi hoʻo moʻuí ke ueʻi fakalaumālie, akoʻi, fakafiemālieʻi pea mo e fetuʻutakí? Kuo liliu fēfē nai ʻa e tuʻunga ʻo e lea lelei ʻa e māmaní lolotonga hoʻo moʻuí?

Fakakaukau ki he founga fetuʻutaki ʻa e kau finemuí kuó ke mamata aí. Te ke tokoni fēfē nai ke mahino kiate kinautolu e mahuʻinga hono fakaʻaongaʻi ʻo e lea langaki moʻuí mo tāú?

Ko e hā ha ngaahi potufolofola mo ha ngaahi lea ʻe tokoni ke ongoʻi ʻe he kau finemuí e mahuʻinga ʻo e lea ʻoku nau fakaʻaongaʻi ki he fetuʻutaki mo e niʻihi kehé?

Lea Fakatātā 15:1–4; 16:24; 1 Tīmote 4:12; Sēmisi 3:2–10; ʻAlamā 31:5; T&F 25:12; 108:7 (ʻOku lava ke hoko ʻetau ngaahi leá ko e ivi mālohi ki he niʻihi kehé)

ʻEkesōtosi 20:7; Mātiu 12:34-37; 15:11; Luke 12:2–3; 1 Tīmote 5:13; T&F 42:27 (ʻOku fakamamahi ki he ʻOtuá mo e niʻihi kehé ʻa e lea taʻe feʻungá, ngutu laú, lea koví, mo e lea ʻitá)

ʻEfesō 4:29–32; 2 Nīfai 32:2–3; T&F 63:61–64 (ʻE malava ke uesia ʻe he lea ʻoku ou fakaʻaongaʻí ʻa ʻeku malava ko ia ke maʻu ha fakahinohino mei he Laumālie Māʻoniʻoní)

Mōsaia 4:30 (ʻOku totonu ke tau tokanga ki he ngaahi lea ʻoku tau fakaʻaongaʻí)

Jean B. Bingham, “Te u ʻOmi e Maama ʻo e Ongoongoleleí ki Hoku ʻApí,” Ensign pe Liahona, Nōvema 2016, 6–9

Jeffrey R. Holland, “Ko e Lea ʻa e Kau ʻĀngeló,” Ensign pe Liahona, Mē 2007, 16–18

W. Craig Zwick, “Ko e Hā Hoʻo Fakakaukaú?”Ensign pe Liahona, Mē 2014

“Leá,” Ki Hono Fakamālohia ʻo e Toʻu Tupú (2011), 20–21

“Lea Taʻe Feʻungá,” Tuʻu Maʻu ʻi he Tuí (2004), 105–06

Vitiō: “Kalapu Tapu Kapekapé”; “Bullying—Stop It”

4:57

10:13

Ko e faiako ‘i he founga ‘a e Fakamo‘uí

Naʻe fai ʻe he Fakamoʻuí ha ngaahi fehuʻi ʻo fakatupu ai ke fakakaukau loloto mo ongoʻi moʻoni ʻe he kakaí. Naʻá Ne mahuʻingaʻia moʻoni ʻi heʻenau ngaahi talí. Naʻá Ne ʻoange ha faingamālie ke nau fehuʻi pea vahevahe ʻenau ngaahi fakakaukaú, pea naʻá Ne tali ʻenau fehuʻí mo fakafanongo ki heʻenau ngaahi aʻusiá. Te ke muimui fēfē ki he sīpinga ʻa e Fakamoʻuí ʻi hoʻo akoʻi e kau finemuí fekauʻaki mo e mahuʻinga ʻo e ngaahi meʻa ʻoku nau lea ʻakí?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ‘o e uike ní:

Kole ʻi ha ngaahi ʻaho siʻi kimuʻa, ha kau finemui ke nau haʻu mateuteu ke vahevahe ʻa e ngaahi talanoa ʻo e pōpaó pea mo e talavou naʻe manukuʻi heʻene kei talavoú, mei he lea ʻa Sisita Jean B. Bingham “Te u ʻOmi e Maama ʻo e Ongoongoleleí ki Hoku ʻApí.” Ko e hā ʻoku ako ʻe he kau finemuí mei he ngaahi talanoa ko ʻení ʻo kau ki he founga ʻoku hanga ai ʻe heʻetau leá ʻo uesia e niʻihi kehé?
Hiki e kupuʻi lea ko ʻení he palakipoé: Ngaahi lea ʻoku tau laú. Ngaahi lea ʻoku tau fanongo ki aí. Ngaahi lea ʻoku tau tohí. Ngaahi lea ʻoku tau lea ʻakí.Kole ki ha finemui ke ne lau e ʻEfesō 4:29–32 pea fakamatalaʻi e founga ʻoku fekauʻaki ai mo e ngaahi kupuʻi lea ʻe fā he palakipoé. Fakaafeʻi e kau finemuí ke nau fakalaulauloto ki he ngaahi fehuʻí ni: ʻOkú ke ongoʻi fēfē kau ki he faʻahinga lea ʻokú ke laú, fanongo ki aí, mo ngāue ʻakí? ʻOku fakaafeʻi pe taʻofi fēfē ʻe he leá e fakahinohino mei he Laumālie Māʻoniʻoní?

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he kau finemuí e mahuʻinga hono ngāue ʻaki ʻo e lea leleí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe toe lahi ange ʻe ʻaonga taha ki hoʻo kalasí:

Fakaafeʻi e kau finemuí ʻi ha ngaahi ʻaho kimuʻa ke nau haʻu ki he kalasí mo ha kupuʻi lea langaki moʻui ʻoku manako aí. Kole ki he finemui takitaha ke ne vahevahe ʻene kupuʻi leá pea fakamatala ki heʻene hoko ko e ivi takiekina ʻi heʻene moʻuí. Fakaafeʻi e kalasí ke nau kumi ki ha ngaahi sīpinga mei he folofolá ʻoku fakahaaʻi ai e ivi takiekina mālohi mo lelei ʻe lava heʻetau leá ʻo fai ki he niʻihi kehé (hangē ko ʻení, ko e ʻEikitau ko Molonaí mo e fuka ʻo e tauʻatāiná [vakai, ʻAlamā 46:11–22], ko e Fakamoʻuí mo e fefine tono malí [vakai, Sione 8:1–11], pe ko ʻApinetai mo ʻAlamā [vakai, ʻAlamā 5:9–12]). Ko e hā ʻoku akoʻi ʻe he ngaahi sīpingá ni ki he kau finemuí fekauʻaki mo e mālohi ʻe lava ke ne uesia ʻa e niʻihi kehé ʻi heʻenau ngaahi leá?
Lau fakakātoa ʻe he kalasí e lea ʻa ʻEletā Jeffrey R. Holland “Ko e Lea ʻa e Kau ʻĀngeló.” Fakaafeʻi e kau finemuí ke nau hiki e ngaahi meʻa ʻoku nau saiʻia aí pe ko ia ʻoku nau loto ke liliu ʻi he founga ʻo ʻenau fetuʻutaki mo e niʻihi kehé. Kole ki ha kau finemui ʻe niʻihi ke vahevahe ʻenau ngaahi fakakaukaú, ʻi he taimi totonú.
Hiki he palakipoé “Kapau ʻoku lava ha tangata ʻo mapuleʻi hono ʻeleló, te ne lava ʻo mapuleʻi ________.” Fakaafeʻi e kau finemuí ke nau kumi he Sēmisi 3:2–10 pea fakafonu e konga ʻoku fakaʻataá. Vahe ki he finemui takitaha ke ne lau ha taha ʻo e ngaahi talanoa fakatātā ne ngāue ʻaki ʻe Sēmisí (piti ʻo e hōsí, veesi 2–3; vaká, veesi 4; vao ʻakau velá, veesi 5–6; koná, veesi 7–8; matavai moʻuí, veesi 10–11). Fakaafeʻi e finemui takitaha ke ne teuteu ke akoʻi e toenga ʻo e kalasí fekauʻaki mo e meʻa ʻoku akoʻi he talanoa fakatātaá kau ki hono mapuleʻi ʻetau ngaahi leá. Fakaafeʻi e kau finemuí ke nau vahevahe e meʻa te nau lava ʻo fai ke mapuleʻi ai ʻenau leá.
Vahe ki he finemui takitaha ha potufolofola kehe mei he ʻuluaki potufolofola ʻi he fokotuʻutuʻu ko ʻení. Fakaafeʻi ia ke ne tā ha kiʻi fakatātā faingofua pe fakatātā te ne fakafofongaʻi e pōpoaki mei he potufolofolá. Tuku ke ne fakaʻaliʻali ʻene fakatātaá, pea fakaafeʻi e kau mēmipa kehe ʻo e kalasí ke nau mateʻi e meʻa ʻoku akoʻi ʻe he fakatātaá ʻo kau ki he fetuʻutaki mo e niʻihi kehé. Ko e hā ha ngaahi aʻusia ʻe lava ke vahevahe ʻe he kau finemuí ʻa ia ʻoku fakatātaaʻi ai e ngaahi moʻoni naʻe akoʻi he ngaahi potufolofola ko ʻení?
Huluʻi ha taha ʻo e ngaahi vitiō ʻi he lēsoni ko ʻení, pea kole ki he kau finemuí ke nau vahevahe e meʻa ʻoku nau ako mei he vitioó. Fakaafeʻi kinautolu ke nau fakalaulauloto ki ha founga te nau lava ke tākiekina e niʻihi kehé ke nau fetuʻutaki ʻi he ngaahi founga ʻoku fakaafeʻi mai ai e Laumālie ʻo e ʻEikí. Hangē ko ʻení, te nau tokoniʻi fēfē ha kaungāmeʻa ʻokú ne ʻulungaanga ʻaki hono fakaʻaongaʻi ʻo e lea koví? Pe te nau fakaʻaongaʻi fēfē ʻa e fetuʻutaki fakaʻilekitulōniká ke langaki hake mo fakamālohia ai e niʻihi kehé? Fakaafeʻi ke nau kumi ha ngaahi tali ʻi heʻenau lau ʻa e konga ko e “Leá” ʻi he Ki Hono Fakamālohia ʻo e Toʻu Tupú. Kole ange ke nau vahevahe ʻenau fakakaukaú.
Fakaafeʻi e kau finemuí ke nau lau ʻa e 1 Nīfai 5:1–7 pea vahevahe e meʻa ʻoku nau ako mei he ngaahi sīpinga ʻa Selaia mo Līhaí fekauʻaki mo e anga hono uesia kitautolu mo e niʻihi kehé ʻi heʻetau ngaahi leá. Kole ange ke nau lau ʻa e fakamatala ʻa ʻEletā W. Craig Zwick fekauʻaki mo e fakamatala ko ʻení ʻi heʻene lea “Ko e Hā Hoʻo Fakakaukaú?” Ko e hā ha ngaahi ʻilo lahi ange ʻoku maʻu ʻe he kau finemuí mei he lea ko ʻení? Poupouʻi kinautolu ke nau vahevahe ha ngaahi founga ʻe lava ke nau muimui ai ki he sīpinga ʻa Līhaí ʻi heʻenau fengāueʻaki mo e kau mēmipa ʻo e fāmilí mo e niʻihi kehé.

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino nai kiate kinautolu e mahuʻinga hono ngāue ʻaki e lea ʻoku maʻa, mo langaki moʻuí? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:

Fakakakato ʻa e meʻa ʻoku fie maʻu ke aʻusia fika 2 he tuʻunga ʻulungaanga mahuʻinga ʻo e Faitotonú ʻi he Fakalakalaka Fakatāutahá.
Fakamamaʻo mei he ngutu laú pea toʻo e ngaahi lea koví mei heʻenau leá mo e fakakaukaú. Fakakaukau ke ngūnguuʻi ha foʻi himi manakoa he taimi ʻoku hoko mai ai e ʻahiʻahí.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.