Te u maluʻi fēfē hoku angamaʻá?

Ko e angamaʻá ko ha sīpinga ia ʻo e fakakaukaú mo e ʻulungaanga ʻoku fakatefito ʻi he ngaahi tuʻunga moʻui maʻa mo māʻolungá. ʻOku kau ai e moʻui maʻá. ʻOku tau moʻui ʻi ha māmani ʻoku fakamoʻulaloaʻi mo ʻohofi ai e angamaʻá. ʻE lava ke tau maluʻi hotau angamaʻá ʻaki ʻetau fakaʻehiʻehi mei he ngaahi fakakaukau, lea mo e tōʻonga ʻoku taʻe maʻá. ʻOku matuʻaki fakatuʻutāmaki e ponokalafí. ʻI heʻetau “ʻai kiate [kitautolu] ʻa e mahafu tau kotoa ʻo e ʻOtuá” (vakai, ʻEfesō 6:11–17) pea fakafalala ki he mālohi ʻo e ʻEikí, te tau lava ʻo maluʻi kitautolu mei he ʻohofi ʻe he filí ʻa e angamaʻá pea tauhi ʻetau fakakaukaú mo e tōʻongá ke maʻa.

Teuteuʻi fakalaumālie koe

Fakakaukau ki he founga ʻoku ʻoatu ai ʻe he moʻui angamaʻá e nongá kiate koé. Ko e hā e nunuʻa ʻo e ponokalafí ʻi he māmaní mo e ngaahi fāmilí? Kuó ke hoko fēfē nai ko ha maluʻi ʻo e angamaʻá?

ʻOku uesia fēfē nai e niʻihi kehé ʻe he lea, tōʻonga mo e fōtunga ʻo e kau finemuí? Ko e hā ha founga ʻe malava ke fehangahangai ai e kau finemuí mo e ponokalafí? Ko e hā ha ngaahi tefitoʻi moʻoni ʻo e ongoongoleleí mo ha ngaahi meʻa fakatokanga ʻe lava ʻo tokoni kiate kinautolu ke tauhi ke maʻa ʻenau ngaahi fakakaukaú mo e tōʻongá?

Ko e hā ha ngaahi potufolofola mo ha ngaahi lea ʻe tokoni ke maʻa ai e ngaahi fakakaukau mo e tōʻonga ʻa e kau finemuí?

Sēnesi 39:1–12; Loma 12:21; 2 Tīmote 2:22; Molonai 10:30; T&F 27:15–18; 121:45–46 (Kuo pau ke tau fakamamaʻo he vave tahá mei he fakatauele ki he holi fakakakanó kae fakafonu hotau ʻatamaí ʻaki ha fakakaukau ʻoku maʻá)

ʻIsaia 1:18; Hilamani 12:23; T&F 58:42–43 (ʻE lava ke fakamolemoleʻi kitautolu kapau te tau fakatomala)

Mātiu 5:27–28; Loma 6:12; ʻAlamā 39:3–9; T&F 42:23 (Ko e holi fakakakanó ko ha angahala ʻoku mamafa hono nunuʻá)

1 Nīfai 17:3; Mosaia 24:14; ʻAlamā 26:12 (ʻE fakamālohia kitautolu ʻe he ʻOtuá ʻi heʻetau feinga ke tauhi e ngaahi fekaú)

Jeffrey R. Holland, “ʻIkai ha Feituʻu moʻó e Fili ʻo Hoku Laumālié,” Ensign pe Liahona, Mē 2010, 44–46; vakai foki ki he foʻi vitiō “Tokangaʻi Ho Laká”

2:47

ʻEletā Quentin L. Cook, “ʻOku Mou Lava Ke Ongoʻi Pehē Nai he Taimí ni?” Ensign pe Liahona, Nōvema 2012, 6–9

Elaine S. Dalton, “Kau Maluʻi ʻo e Angamaʻá,” Ensign pe Liahona, Mē 2011, 121–24; vakai foki ki he foʻi vitiō “Kau Maluʻi ʻo e ʻAngamaʻá”

2:1

Linda S. Reeves, “Maluʻi mei he Ponokalafí—ko ha ʻApi ʻOku Fakatefito ʻia Kalaisi,”Ensign pe Liahona, Mē 2014

“Fakafiefiá mo e Mītiá” pea mo e “Ko e Haohaoa Fakasekisualé,” Ki Hono Fakamālohia ʻo e Toʻu Tupú (2011), 35–37

“Angamaʻá,” Tuʻu Maʻu ʻi he Tuí (2004), 7–12

“Ponokalafí,” Tuʻu Maʻu ʻi he Tuí (2004), 166–67

Vitiō:“Angamaʻá: Ko e Hā Hono Ngaahi Fakangatangatá?”

NaN:NaN

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ‘o e uike ní:

Tohi he palakipoé, “ʻE lava ke tau maluʻi hotau angamaʻá ʻaki ʻetau fakaʻehiʻehi mei he ngaahi fakakaukau, lea mo e tōʻonga ʻoku taʻe maʻá.” Ko e hā ha faleʻi ʻe fai ʻe he kau finemuí ke tokoniʻi ai ha taha ke ne moʻui angamaʻa ʻi ha māmani ʻoku lahi ai e takiekina ʻoku koví?
Lau fakataha e talanoa kau ki ha finemui ʻokú ne fai ha faleʻi ki ha tokotaha foʻou he Punungahoné mei he lea ʻa Sisitā ʻAna M. Tipi “Ke ke Loto-toʻa.” Fehuʻi ki he kau finemuí pe ko e hā e meʻa te nau faí ʻi he taimi ʻoku ʻākilotoa ai kinautolu ʻe he ngaahi ivi takiekina ʻoku ʻikai leleí.

Ako fakataha

ʻE tokoni ʻa e ngaahi ʻekitivitī takitaha ʻi laló ke ako ai e kau finemuí ki hono tauhi ʻenau fakakaukaú mo e tōʻongá ke maʻá. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

Vahevahe e kau finemuí ki ha ngaahi kulupu iiki, pea vahe ki he kulupu takitaha ha taha ʻo e ngaahi potufolofola ʻoku ʻoatu ʻi he fokotuʻutuʻu ko ʻení. Kole ange ke nau lau e ngaahi potufolofola ne vahe angé pea vahevahe mo e toenga ʻo e kalasí e meʻa ʻoku nau ako mei he ngaahi potufolofolá ni kau ki he tauhi maʻu ʻo e angamaʻá.
Fakaafeʻi e kau finemuí ke sio he foʻi vitiō “Kau Maluʻi ʻo e Angamaʻá” pe lau ha lea ʻoku tefito tatau mo ia. Vahevahe e kau finemuí ki ha kulupu ʻe tolu, kimuʻa he kalasí. Fekau ki he kulupu ʻuluakí ke nau fekumi pe ko e hā hono ʻuhinga ke hoko ko ia ko ha tokotaha maluʻi ʻo e angamaʻá, ko e kulupu fika uá ke fekumi ki he faleʻi ʻoku ʻomi ʻe Sisitā Tolotoní, pea fekumi e kulupu fika tolú ki he ngaahi tāpuaki ʻoku maʻu ʻe he kau maluʻi ʻo e angamaʻá. Fakaafeʻi ha finemui ʻe taha mei he kulupu takitaha ke ne hiki he palakipoé e meʻa ne maʻu ʻe heʻene kulupú, pea ʻai ke vahevahe ʻe he kulupú ʻene ʻuhinga kiate kinautolú. Ko e hā e meʻa ʻoku nau ako mei he pōpoaki ʻa Sisitā Tolotoní ʻa ia ʻe tokoni ke nau tauhi ʻenau ngaahi fakakaukaú mo e tōʻongá ke maʻá? ʻOku ʻuhinga ki he hā ke “ʻoua naʻa taau pē ho valá, ka ʻi hoʻo leá, hoʻo tōʻongá, mo hoʻo fakaʻaongaʻi ʻo e mītia fakasōsialé”?

2:1
Fehuʻi ki he kau finemuí pe ko e hā e ʻuhinga ʻoku nau fakakaukau ai ʻoku fakatuʻutāmaki e ponokalafí ki he laumālié. Lau fakakātoa ʻe he kalasí e vahe fekauʻaki mo e ponokalafí ʻi he Tuʻu Maʻu ʻi he Tuí. ʻI he fakaʻosinga ʻo e palakalafi takitaha, tuku ha taimi ke aleaʻi ai e mahuʻinga ʻo e konga ne laú. (Hangē ko ʻení, te ke lava ʻo aleaʻi mo e kau finemuí ha ngaahi feituʻu pe tūkunga kehekehe ʻe lava ke nau fehangahangai ai mo e ponokalafí. Ko e hā te nau lava ʻo fai ke maluʻi ai kinautolu mei he ponokalafí? Fakaafeʻi kinautolu ke palani e meʻa te nau faí ʻi ha taimi te nau fetaulaki fakatuʻupakē ai mo iá.) Hili e palakalafi hono tolú, aleaʻi e mālohi ʻo e Fakaleleí mo e founga ʻoku kau mai ai e pīsopé pe palesiteni fakakoló ʻi he founga ʻo e fakatomalá. Fakaafeʻi e kau finemuí ke nau sio ki he pīsopé kapau kuo nau fihia ‘i he ponokalafí.
ʻOange ki he finemui takitaha ha tatau ʻo e lea ʻa ʻEletā Sefilī R. Hōlani ko e “ʻIkai ha Feituʻu moʻó e Fili ʻo Hoku Laumālié,” pe lea ʻa Sisitā Linitā S. Liivi ko e “Maluʻi mei he Ponokalafí—ko ha ʻApi ʻOku Fakatefito ʻia Kalaisi,” pea ʻai ke nau fakakaukauloto ʻoku nau talanoa mo honau ʻofefine taʻu 12 he kahaʻú ki he ʻuhinga ʻoku fakatupu ʻauha ai e ponokalafí mo e founga ke fakaʻehiʻehi mei aí. Tuku ke nau kumi ha fakamatala ʻe tokoni kiate kinautolu ʻi hono aleaʻi e meʻá ni. Fakaafeʻi kinautolu ke nau tauhoa pea vahevahe e ngaahi tali ʻoku nau maʻú. Fakaafeʻi ke nau hiki e meʻa te nau fai ke fakaʻehiʻehi ai mei he ponokalafí he toenga ʻenau moʻuí.
Fakaafeʻi e kau finemuí ke nau fakakaukauloto ne nau maʻu ha faingamālie ke fakahā ai ki ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá e ngaahi faingataʻa ʻoku fekuki mo e toʻu tupú fekauʻaki mo e ponokalafí. Ko e hā e meʻa te nau talaange kiate iá? ʻOange ki he finemui takitaha ha tatau ʻo e palakalafi ʻe ono mei he lea ʻa ʻEletā Kuenitini L. Kuki ko e “ʻOku Mou Lava ke Ongoʻi Pehē Nai he Taimí Ni?” ʻo kamata ʻaki e kupuʻi lea ko e “ʻOku maumauʻi ʻe he anga ʻuli fakasekisualé mo e ngaahi fakakaukau ʻulí.” Kole ki he vaheua ʻo e kalasí ke nau kumi mo vahevahe e meʻa ne ako ʻe ʻEletā Kuki mei ha talavou taʻu 15, pea kole ki he vaheua ʻe tahá ke nau kumi mo vahevahe e faleʻi ʻoku ʻomi ʻe ʻEletā Kukí. Ko e hā ʻe lava ʻe he kau finemuí ʻo fai ke tokoni ke hoko honau ʻapí ko ha “hufangaʻanga malu” mei he ponokalafí?
Fakaafeʻi e kau finemuí ke nau fakakaukauloto ʻoku ʻi ai honau kaungāmeʻa ʻoku fefaʻuhi mo e ponokalafí. Ko e hā e meʻa te nau talaange ke tokoniʻi ai iá? Kole ki he finemui takitaha ke ne lau e “Fakafiefiá mo e Mītiá” ʻi he Ki Hono Fakamālohia ʻo e Toʻu Tupú pe fanga kiʻi konga mei he vahe ʻoku ui “Ko Hono Maʻu ha Mālohi ke Siʻaki ʻa e Angahalá” mei he kiʻi tohi tufa ko e Tuku ke Ngaohi ke Fakaʻofoʻofa ʻe he Angamaʻá ʻa Hoʻo Ngaahi Fakakaukaú. Ko e hā e meʻa ʻe vahevahe ʻe he kau finemuí ki honau kaungāmeʻá mei he konga ko ʻení? Ko e hā ha ngaahi potufolofola kehe ʻe lava ke tokoni ki ha taha ʻoku fefaʻuhi mo e ponokalafí? (Hangē ko ʻení, sio ki he ngaahi potufolofola ʻoku ʻoatu ʻi he fokotuʻutuʻu ko ʻení.)

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino nai kiate kinautolu e founga ke tauhi ai ʻenau fakakaukaú mo e tōʻongá ke maʻá? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui ʻaki fēfē nai ʻa e meʻa kuo nau ako he ʻaho ní. Hangē ko ʻení, te nau lava ʻo:

Fakakakato ʻa e meʻa ke aʻusia fika 2 mo e 4 he Angamaʻá ʻi he Fakalakalaka Fakatāutahá.
Palani e meʻa te nau fai kapau te nau fehangahangai mo ha faʻahinga meʻa te nau takiekina ʻenau ngaahi fakakaukaú ke taʻe maʻa.