Te u lava fēfē ke ʻi he māmaní kae ʻikai ʻo e māmaní?
“Kuo ʻosi atu e taimi ia naʻe meimei fenāpasi lelei ai e tuʻunga moʻui ʻa e Siasí pea mo e sosaietí, ka kuó na faikehekehe lahi ʻeni kinaua, pea ʻoku fakaʻau pē ke toe lahi ange” (Thomas S. Monson, “Mālohi ʻo e Lakanga Fakataulaʻeikí,” Ensign pe Liahona, Mē 2011, 66). ʻOku finangalo e ʻEikí ke tau tuʻu maʻu Heʻene ngaahi tuʻunga moʻuí pea ʻoua ʻe kau ki he ngaahi kovi ʻo e māmaní. ʻI he taimi tatau, ʻokú Ne ʻamanaki mai ke tau hoko ko ha ivi takiekina lelei ki he niʻihi ʻoku tau feohí.
Teuteuʻi fakalaumālie koe
Ko e hā ha ngaahi tuʻunga moʻui ʻe niʻihi ʻa e sosaietí ʻoku ʻikai ke fenāpasi ia mo e ngaahi tuʻunga moʻui ʻa e Siasí? Ko fē e taimi naʻá ke fili ai ke tuʻu maʻu he meʻa ʻoku totonú? Kuo kaunga fēfē hoʻo tōʻongá ki hoʻo moʻuí pea mo e moʻui ʻa e niʻihi kehé?
ʻOku feinga fēfē ʻa e māmaní ke ne tākiekina e anga ʻo e vakai ʻa e kau finemuí ki he ngaahi tuʻunga moʻui ʻa e ʻEikí? Te ke tokoniʻi fēfē e kau finemuí ke nau mateuteu ke tekeʻi e ʻahiʻahí? Te nau maʻu fēfē ha mālohi mo ha loto-toʻa ke tuʻu toko taha?
Ko e hā ha ngaahi potufolofola mo ha ngaahi maʻuʻanga tokoni kehe te nau tokoniʻi e kau finemuí ke nau ʻilo ʻoku hanga ʻe heʻenau sīpingá ʻo tokoniʻi e niʻihi kehé ke nau tuʻu ʻaliʻaliaki ʻi he ngaahi tuʻunga moʻui ʻa e ʻEikí?
2 Ngaahi Tuʻi 6:14–17 (ʻOku ʻilo ʻe he tamaioʻeiki ʻa ʻIlaisá ʻoku ʻikai ke ne tuenoa)
Mātiu 5:14–16 (ʻOku totonu ke tuku ʻetau māmá ke ulo atu)
Sione 15:19; 1 Nīfai 8:24–28 (ʻOku faʻa manukiʻi mo fehiʻanekinaʻi ʻe he māmaní ʻa kinautolu ʻoku muimui kia Kalaisí)
1 Nīfai 15:23–25; ʻAlamā 34:39;Hilamani 5:12; T&F 10:5; 27:15–18; 87:8 (Ko e founga ke ʻi māmani ai kae ʻikai ʻo e māmaní)
Neil L. Andersen, “Ko hono Ikunaʻi ʻo e Māmaní,” Ensign pe Liahona, Mē 2017, 58-62
Mark A. Bragg, “Ngingila Ange kae ʻOua ke Aʻu ki he ʻAho Haohaoá,” Ensign pe Liahona, Mē 2017, 36–38
Neill F. Marriott, “Ko Hono Vahevahe Hoʻo Māmá,” Ensign pe Liahona, Nōvema 2014, 117–20
“Pōpoaki ki he Toʻu Tupú mei he Kau Palesitenisī ʻUluakí,” Ki Hono Fakamālohia ʻo e Toʻu Tupú (2011), ii–iii
Vitiō: “Matala he Feituʻu ʻOkú ke ʻI aí” “Pole ke Tuʻu Toko Tahá,” “Ko e Peesi Molé,” “Ngaahi Kofu ʻe 195”
Ko e faiako ‘i he founga ‘a e Fakamo‘uí
Naʻe fakaafeʻi ʻe he Fakamoʻuí ʻa Pita ke fakamoʻoni ʻaki hano fai kiate ia ha fehuʻi, “ʻOku mou peheé ko hai au?” ʻI heʻene talí, naʻe ongo e Laumālié ki hono lotó pea fakamālohia ai ʻene fakamoʻoní. Ko e hā ha ngaahi fehuʻi te nau fakaafeʻi e kau finemui ʻi hoʻo kalasí ke nau fakamoʻoni mo fakaʻatā e Laumālié ke ne fakamālohia ʻenau fakamoʻoní?
Vahevahe ʻo e ngaahi aʻusiá
Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.
Fakafeʻiloaki e tokāteliné
Fili mei he ngaahi fakakaukau ko ʻení pe fakakaukau pē ʻaʻau ke fakafeʻiloaki ʻaki e lēsoni ‘o e uike ní:
-
Fehuʻi ki he kau finemuí pe kuo nau fanongo nai ʻi he kupuʻi lea “ʻOku totonu ke tau ʻi he māmaní kae ʻikai ʻo e māmaní.” Ko e hā hono ʻuhinga ʻeni kiate kinautolú? Ko e hā ha ngaahi aʻusia te nau lava ʻo vahevahe kau ki he tefitoʻi moʻoni ko ʻení? Fakaafeʻi ke nau vahevahe e ngaahi founga ne ʻi māmani ai e Fakamoʻuí ka naʻe ʻikai ke Ne ʻo e māmaní. Ko e fē taimi naʻá Ne fehangahangai ai mo e ʻahiʻahí pea ikunaʻi iá? Poupouʻi ke nau vahevahe e ngaahi potufolofola ʻoku ʻasi ai e founga ne tekeʻi ʻaki ʻe Sīsū Kalaisi e ʻahiʻahí. ʻOku ueʻi fakalaumālie fēfē ʻe Heʻene sīpingá ʻa e kau finemuí?
-
Huluʻi ha taha ʻo e ngaahi foʻi vitiō ʻoku fokotuʻu atu ʻi he lēsoni ko ʻení pea fakaafeʻi e kau finemuí ke nau fakalaulauloto ki he fehuʻi ko ʻení lolotonga ʻenau mamata ʻi he foʻi vitioó: ʻE founga fēfē haʻanau moʻui ʻi he māmaní kae ʻikai ʻo e māmaní? Tuku ange ha taimi ke nau aleaʻi ai ʻenau talí pea vahevahe e ngaahi aʻusia naʻa nau maʻu ʻoku fekauʻaki mo e vitioó.
Ako fakataha
ʻE tokoni ʻa e ngaahi ʻekitivitī takitaha ʻi laló ke mahino ki he kau finemuí e founga te nau lava ai ke ʻi he māmaní kae ʻikai ʻo e māmaní. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:
-
Tohi ʻi he palakipoé ʻa e “Ko hono ikunaʻi ʻo e māmaní ʻa e … ” mo e “Ko e ola hono ikunaʻi ʻo e māmaní ko e … ” Kole ki he kau finemuí ke nau ako e lea ʻa ʻEletā Neil L. Andersen “Ko Hono Ikunaʻi ʻo e Māmaní” pea fekumi ki he ngaahi founga ke fakakakatoʻaki ʻa e ngaahi sētesi ko ʻení. Aleaʻi e meʻa ʻoku nau maʻú. Fakaafeʻi kimuʻa ha taha ʻo e kau finemuí ke haʻu mateuteu ke vahevahe ʻa e talanoa fekauʻaki mo ʻEletā Bruce D. Porter mei he lea ʻa ʻEletā ʻEnitasení (pe mamataʻi hono fakamatalaʻi ʻe ʻEletā ʻEnitaseni ʻa e talanoá ʻi he vitiō ʻo ʻene leá). Ko e hā ha meʻa ne mei fakahoko ʻe he niʻihi kehé ʻi he faingataʻa tatau mo ʻení? Naʻe ikunaʻi fēfē ʻe ʻEletā Poota ʻa e māmaní?
-
Ko ha founga ʻe taha ke tokoniʻi e kau finemuí ke mahino kiate kinautolu ʻa e founga ke maʻu ai ha maama ʻi ha māmani ʻoku fakaʻau ke fakapoʻulí, ko hano ʻomi ha kasa ʻe tolu ki he kalasí. Vahevahe ʻa e kalasí ki ha ngaahi kulupu ʻe tolu pea vahe ki he kulupu takitaha ke nau lau e taha ʻo e ngaahi konga ʻi he lea ʻa ʻEletā Mark A. Bragg “Ngingila Ange kae ʻOua ke Aʻu ki he ʻAho Haohaoá.” Hili hono ako ʻe he kau finemuí e leá, tamateʻi ʻa e ʻuhilá pea ʻoange ki he kulupu takitaha ʻa e taha ʻo e ngaahi kasá. ʻI heʻenau vahevahe ʻa e meʻa kuo nau akó, te nau lava ʻo fakamoʻui ʻenau kasá ʻo fokotuʻu ia ʻi he lotolotonga ʻo e lokí. ʻOku tokoniʻi fēfē kitautolu ʻe he maʻuʻanga maama takitaha, ʻi ha māmani fakapoʻuli?
-
Kole ki he kau finemuí ke nau hiki ha lisi ʻi he palakipoé ʻa e ngaahi feituʻu ʻoku nau ongoʻi ʻoku māʻoniʻoní. Lau fakataha ʻa e Tōkateline Mo e Ngaahi Fuakava 87:8 pea kole ki he kau finemuí ko e hā ʻenau fakakaukau ki he ʻuhinga ko ia ke tuʻu ʻi he ngaahi potu māʻoniʻoní. Fakaafeʻi kinautolu ke nau fakalaulauloto ki he fehuʻi ko ʻení ʻi heʻenau mamataʻi ʻa e taha ʻo e ngaahi vitiō ʻoku fokotuʻu atu ʻi he fakamatalá ni. Ko e hā ha toe ngaahi fakakaukau ʻoku nau maʻu kau ki he tuʻu ʻi he ngaahi potu māʻoniʻoní? Ko e hā te nau lava ʻo fai ke hoko honau fāmilí, honau ʻapiakó, pe ko honau koló ko ha feituʻu māʻoniʻoni angé?
-
Fakaafeʻi e kau finemuí ke nau lau e ngaahi potufolofola ʻoku hiki atu ʻi he fokotuʻutuʻu ko ʻení (fakafoʻituitui pe ko e kalasí fakakātoa) pea aleaʻi e meʻa ʻoku nau ako kau ki hono ikunaʻi e ngaahi ʻahiʻahí. Te nau moʻui ʻaki fēfē e ngaahi tuʻunga moʻui ʻa e ʻEikí he taimi ʻoku feinga ai e māmaní ke ʻoua te nau fai pehē, pe fakakata ʻaki kinautolu koeʻuhí ko ʻenau ngaahi tuʻunga moʻui māʻolungá? Kuo nau ongoʻi fēfē nai ʻi heʻenau moʻui ʻaki e ngaahi tuʻunga moʻui ʻa e ʻEikí mo matuʻuaki e ngaahi ʻahiʻahí? Ko e hā ha faʻahinga aʻusia te nau lava ʻo vahevahe?
-
Fakaafeʻi e finemui takitaha ke ne fili ha taha ʻo e ngaahi tuʻunga moʻui ʻi he Ki Hono Fakamālohia ʻo e Toʻu Tupú pe taha ʻo e ngaahi tuʻunga ʻulungaanga mahuʻinga ʻi he Fakalakalaka Fakatāutahá. Kole ange ke ne ako ʻene tuʻunga moʻuí pe tuʻunga ʻulungaanga mahuʻingá pea vahevahe mo e kalasí ʻi hano fakamatala fakanounouʻi ʻo e meʻa ko iá mo e founga kuo tokoniʻi ai ia ʻi hono moʻui ʻakí ke ʻi he māmaní kae ʻikai ʻo e māmaní.
-
Kole ki ha finemui ke haʻu mateuteu ke vahevahe ʻa e meʻa ʻoku akoʻi ʻe Sisitā Neill F. Marriott kau ki he ivi tākiekina ʻoku maʻu ʻe he ngaahi temipalé ki honau ngaahi feituʻú ʻi heʻene lea “Ko Hono Vahevahe Hoʻo Māmá.” Fakaafeʻi e kau finemuí ke kumi ʻi he lea ʻa Sisitā Meliotí ʻa e ngaahi sētesi ʻoku nau ueʻi kinautolu ke nau hoko ko ha maama ki he niʻihi kehé ʻi ha māmani ʻoku hangē ʻoku tupulaki ai e fakapoʻulí. ʻOange ha faingamālie ke nau lau leʻolahi ai ʻenau ngaahi sētesí pea vahevahe ʻa e ʻuhinga ʻoku nau pehē ai ʻoku mahuʻingamālié. Mahalo pē te ke fili ke mou palani fakataha ha ʻekitivitī ʻa e Mutualé ke ʻai ai ʻe he kau finemuí ha pousitā te ne fakahaaʻi ʻa e ngaahi sētesi kuo nau filí.
Kole ki he kau finemuí ke nau vahevahe ʻa e meʻa naʻa nau ako ʻi he ʻaho ní. ʻOku mahino nai kiate kinautolu ke ʻi māmani kae ʻikai ʻo e māmaní? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke toe tuku ha taimi lahi ange ʻi he tokāteline ko ʻení?
Moʻui ʻaki e meʻa ʻoku tau akó
Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:
-
Ngāue ʻi he meʻa ʻoku fie maʻu ke aʻusia fika 2 pe fika 3 ʻi he tuʻunga ʻulungaanga mahuʻinga ko e Tauʻatāina ke Filí mo e ʻEkeʻi Meiate Kita e Meʻa ʻOkú te Fai pe Taʻe Faí ʻi he Fakalakalaka Fakatāutahá.
-
Sio pe vahevahe e ngaahi vitiō ʻoku lisi atu he lēsoni ko ʻení mo ha mēmipa ʻo e fāmilí pe kaungāmeʻa pea vahevahe ʻenau ongo kau kiate kinautolú.
Kapau ʻe ʻaonga, fakaafeʻi e kau finemuí ke nau vahevahe e meʻa ʻoku ueʻi fakalaumālie ke nau faí ko e tupu mei he lēsoni ko ʻení.
Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.
Ngaahi ʻEkitivitī Felāveʻi mo e Toʻu tupú
Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.