Te u tokoni fēfē ki hoku kaungāmeʻa māmālohí ke nau foki mai ki he lotú?

Ko e konga ʻo ʻetau tukupā ke “tuʻu ko e kau fakamoʻoni ʻo e ʻOtuá ʻi he taimi kotoa pē pea ʻi he meʻa kotoa pē, pea ʻi he feituʻu kotoa peé” (Mosaia 18:9), ko ʻetau tokoni ki he ngaahi kaungāmeʻa mo e kaungāʻapi Siasi ʻoku ʻikai ke nau ō mai ki he lotú. Te tau lava ʻo tokoni kiate kinautolu ʻaki haʻatau fakapapauʻi ʻoku nau ongoʻi ʻetau ʻofa mo e tokanga moʻoní ʻaki hono vahevahe ʻetau fakamoʻoní ʻi he anga ʻetau leá mo e tōʻongá pea mo hono fakakau kinautolu ʻi heʻetau ngaahi ʻekitivitií.

Teuteuʻi fakalaumālie koe

Ko e hā ʻokú ke fai ke aʻu atu ki he kau mēmipa māmālohi ʻokú ke ʻiló? Ko e hā ha ngaahi meʻa kuó ke aʻusia te ke lava ʻo vahevahe mo e kau finemuí?

ʻOku fēfē e fakafeangai ʻo e kau finemuí mo e kau mēmipa ʻo ʻenau kalasí ʻoku māmālohi? Ko e hā ha ngaahi founga te nau lava ʻo tokoni ai ki he kau finemui ko ʻení?

Koe hā ha ngaahi potufolofola mo ha ngaahi lea ʻe tokoni ki he kau finemuí ke nau ʻilo ʻa e founga ke tokoniʻi honau kaungāmeʻa māmālohí?

Luke 15 (Ngaahi talanoa fakatātā ʻo e sipi heé, paʻanga kuo molé, mo e foha maumau koloá)

Luke 22:32; Sione 21:15–17; 1 Pita 5: 2–4 (ʻOku fekauʻi kitautolu ʻe he ʻEikí ke fefakamālohiaʻaki)

ʻAlamā 31:34–35; T&F 18:10–16 (ʻOku mahuʻinga lahi ʻa e ngaahi laumālié)

S. Mark Palmer, “Pea Sio Ki ai ʻa Sīsū mo ʻOfa Kiate Ia,” Ensign pe Liahona, Mē 2017, 114–16

Mervyn B. Arnold, “Ke Tau Fakahaofi: Te Tau Lava ʻo Fai Ia,” Ensign pe Liahona, Mē 2016, 53–55

Brent H. Nielson, “Ko e Tatali ki he Foha Maumau Koloá,” Ensign pe Liahona, Mē 2015, 101-3

Vitiō: “Tokoniʻi e Niʻihi Kehé ke Nau Foki Mai ki he Siasí,” “Ko e Tui ʻa e Toʻu Tupú: Ko e Fāmili ʻĒnisí”

1:54

3:35

Ko e faiako ‘i he founga ‘a e Fakamo‘uí

Naʻe tokoniʻi ʻe he Fakamoʻuí ʻa kinautolu naʻá Ne akoʻí, ke tupulaki fakalaumālie pea ului, ʻaki hono fakaafeʻi kinautolu ke nau ngāue ʻi he tuí. Te ke fakahaaʻi fēfē ki he kau finemui ʻokú ke akoʻí, ʻokú ke loto falala ki heʻenau malava ke moʻui ʻaki e ongoongoleleí?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki hono mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ‘o e uike ní:

Huluʻi ha taha ʻo e ngaahi vitiō ʻoku fokotuʻu atu he lēsoni ko ʻení, pea kole ki he kau finemuí ke vahevahe ʻenau fakakaukau fekauʻaki mo hono tokoniʻi ʻo e niʻihi kehé ke foki mai ki he siasí.
Hiki ʻa e tefito ʻo e lēsoní ʻi he palakipoé. Fakaafeʻi e kau finemuí ke nau hiki ʻi ha laʻipepa ha founga ʻe taha ʻe lava ke nau tokoni'i ke foki ʻa e ngaahi kaungāmeʻa māmālohí ki he lotú. Tānaki e ngaahi laʻipepá pea tufa ki ha kau finemui kehekehe. Fakaafeʻi kinautolu ke nau vahevahe ʻa e ngaahi fakakaukau mei he ngaahi laʻipepá. Kole ki he kau finemuí ke fakakaukau lolotonga e lēsoní ki ha taha ʻoku nau ʻiloʻi ʻoku māmālohi ʻi he Siasí pea kumi ha ngaahi founga ʻe lava ke ke nau tokoniʻi ai e tokotaha ko iá.

Ako fakataha

ʻE tokoni e ʻekitivitī takitaha ʻi laló ke mahino ki he kau finemuí ʻa e founga ke tokoniʻi honau ngaahi kaungāmeʻa māmālohí ke nau foki ki he lotú. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

Fakaʻaliʻali ki he kau finemuí ha fakatātā ʻo ha tauhisipi mo ha sipi, hangē ko e fakatātā Ko Hono Fua ʻe Sīsū e Lami naʻe Heé (Gospel Art Book [2009], no. 64). Kole ki he kau finemuí ke nau fakafanongo ki he ngaahi foʻi lea pe kupuʻi lea ʻokú ne fakamatalaʻi e ʻofa ʻoku maʻu ʻe Sīsū Kalaisi ki Heʻene fanga sipí, ʻi heʻenau hivaʻi pe lau e fakalea ʻo e himi, “ ʻOku ʻOfa ʻa e Tauhí” (Ngaahi Himi, fika 128). Ke tokoni ki hono ʻilo ʻe he kau finemuí e ngaahi founga te nau lava ʻo tokoni ai ki he Fakamoʻuí ke tānaki mai ʻa kinautolu kuo hē pe molé, ʻe lava ke ke kole ange ke nau fakamanatu e ngaahi lēsoni ʻe fā naʻe vahevahe mai ʻe ʻEletā S. Mark Palmer, he fakaʻosinga ʻo ʻene lea “Pea Sio Ki ai ʻa Sīsū mo ʻOfa Kiate Ia.” ʻE tokoni fēfē e ngaahi lēsoni ki heʻetau ala atu ʻo tokoniʻi hotau fāmili mo e kaungāmeʻa ʻoku māmālohí? Ko e hā ha ngaahi tefitoʻi moʻoni kehe ʻe lava ke fakakaukau ki ai e kau finemuí, ʻe ala tokoni?
Kole ki he kau finemuí ke nau fakakaukau ki ha taimi ne mole ai hanau meʻa mahuʻinga. Ko e hā naʻa nau fai ke feinga ke ʻiloʻi ai iá? Vahe ki he finemui takitaha ha taha ʻo e talanoa fakatātā ʻe tolu ʻi he Luke 15. Kole ange ke ne toe fakamatalaʻi ʻa e talanoa fakatātā ʻi he lea pē ʻaʻana, ʻo vahevahe ha kupuʻi lea mei he talanoa fakatātaá ʻokú ne fakamatalaʻi fakanounou e meʻa naʻe akoʻi ʻe he Fakamoʻuí ʻi he talanoa fakatātā. Ko e hā ʻoku ako ʻe he kau finemuí mei he ngaahi ngāue ʻa e tauhi-sipi, fefine, mo e tamai ʻi he talanoa fakatātā ko ʻení? Te nau muimui fēfē ki he ngaahi sīpinga ko ʻení ʻi heʻenau feinga ke tokoniʻi ʻa kinautolu ʻoku “hē” mei he Siasí? Kole ki he kau finemuí ke nau vahevahe ha ngaahi meʻa naʻe aʻusia ʻe hanau kaungāmeʻa pe mēmipa ʻo e fāmilí ʻa ia kuo foki mai hili ʻene māmālohí, ʻo kapau ʻoku nau ongoʻi fiemālie ke fai ia.
Fakaafeʻi ha finemui ʻi ha taimi lahi kimuʻa, ke ne lau e lea ʻa ʻEletā Mervyn B. Arnold “Ke Tau Fakahaofi: Te Tau Lava ʻo Fai Ia.” Kole ange ke haʻu mateuteu ke vahevahe ha talanoa ʻe taha pe ua mei he leá naʻe ongo kiate ia. Fakaafeʻi e kau finemuí ke aleaʻi e founga ʻe tokoni ai e ngaahi talanoa ko ʻení kiate kinautolu ko ha kalasí. Ko hai ʻoku nau ʻilo ʻoku teʻeki haʻu ki he lotú? Te nau ngāue fakataha fēfē ko ha kalasi ke tokoniʻi e tokotaha ko iá ke ofi ange ki he Fakamoʻuí? Te ke lava foki ʻo toe fakaafeʻi e kau finemuí ke fekumi ki he ngaahi tefitoʻi moʻoni ʻe fā ʻi he lea ʻa ʻEletā Arnold. ʻOku nau ʻilo nai ha kakai ʻoku nau moʻui ʻaki e ngaahi tefitoʻi moʻoni ko ʻení? Ko e hā te nau lava ʻo fai ke nau hoko ko e faʻahinga kakai ko ʻení?
Vahevahe ʻa e talanoa ʻo e tuofefine ʻa ʻEletā Brent H. Nielson mei heʻene lea “Ko e Tatali ki he Foha Maumau Koloá” pe vahevahe ha meʻa naʻá ke ʻausia ʻi hono tokoniʻi ha kaungāmeʻa māmālohi pe ko ha mēmipa ʻo ha fāmili ke foki mai ki he siasí. Fakaafeʻi e kau finemuí ke lau e ʻAlamā 31:34–35 mo e T&F 18:10–16. Ko e hā ʻoku akoʻi mai ʻe he ngaahi potufolofola ko ʻení fekauʻaki mo e ongo ʻa e Tamai Hēvaní ki Heʻene fānaú? Tokoni ki he kau finemuí ke hiki ha lisi ʻo e kau finemui māmālohi ʻi he uōtí, pea aleaʻi fakakalasi ʻa e mahuʻinga lahi ʻo kinautolu kotoa mo e ngaahi meʻa te nau lava ʻo fai ke fakaafeʻi ʻa e kau finemuí ke nau foki mai.
Huluʻi e foʻi vitiō “Tokoniʻi e Niʻihi Kehé ke Nau Foki Mai ki he Siasí.” Fakaafeʻi e kau finemuí ke nau kumi ʻa e ngaahi tefitoʻi moʻoni ʻoku akoʻi ʻe ʻEletā Bednar te ne tokoniʻi ai kinautolu ke toe lelei ange ʻenau fakaafeʻi honau kaungāmeʻa māmālohí ke foki ki he lotú. Ko e hā ʻoku hoko ai e ngāue hisitōlia fakafāmilí ko ha founga lelei ke fakaafeʻi ʻaki e kaungāmeʻa māmālohí ke nau kau mai ki he lotú? Ko e hā mo ha toe ngaahi ʻekitivitī kehe te ne lava ʻo fakahoko e meʻa ʻoku fakamatalaʻi ʻe ʻEletā Petinaá?

1:54

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. Ko e hā haʻanau ngaahi ongo pe fakakaukau? ʻOku mahino kiate kinautolu ʻa e founga ke tokoniʻi honau kaungāmeʻa māmālohí? ʻOku toe ʻi ai nai haʻanau ngaahi fehuʻi kehe? ‘E ‘aonga nai ke tuku ha taimi lahi ange ʻi he kaveinga ko ‘ení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau ki he founga te nau moʻui ʻaki ai e meʻa kuo nau ako he ʻaho ní. Hangē ko ʻení, ʻe lava ke nau:

Fakakakato e meʻa ʻoku fie maʻu ke aʻusia fika 7ʻi he tuʻunga ʻulungaanga mahuʻinga ʻo e Ngaahi Ngāue Leleí ʻi he Fakalakalaka Fakatāutahá.
Lotua ke maʻu ha ueʻi fakalaumālie ki ha founga ke tokoniʻi ha kaungāmeʻa pe mēmipa ʻo e fāmilí ke foki ki he lotú pea fakaafeʻi ʻa e tokotaha ko iá ke haʻu ki he lotú pe ko ha ʻekitivitī Mutuale.
Muimuiʻi ha ngaahi palani naʻa nau fokotuʻu he ʻahó ni ke tokoni ai ki ha mēmipa vaivai ʻi he kalasí.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.