Sau, Mulimuli Mai ia te A’u
O le a le finagalo o le Tama Faalelagi ia te au i le faaaogaina o au meaalofa faaleagaga?

O le a le finagalo o le Tama Faalelagi ia te au i le faaaogaina o au meaalofa faaleagaga?

O meaalofa faaleagaga o ni faamanuiaga po o gafatia e tuuina mai e le mana o le Agaga Paia. I le avea ai ma fanau a Tama Faalelagi, ua ia i tatou uma ni meaalofa faaleagaga. Ua tuuina mai e le Atua ia i tatou nei meaalofa ina ia mafai ona tatou auauna atu ai i isi ma fesoasoani i le fausia o Lona malo. Ua Ia poloaiina i tatou e saili ma le filiga ma atiae a tatou meaalofa faaleagaga.

Saunia oe lava ia faaleagaga

O a meaalofa faaleagaga o loo e maua? Na faapefea ona latou faamanuiaina oe ma isi? Na faapefea ona faamanuiaina oe e meaalofa faaleagaga a isi? Na faapefea ona e iloaina au meaalofa?

Aisea e taua ai mo tamaitai talavou ona iloa a latou meaalofa faaleagaga? O le a faapefea e lenei mea ona fesoasoani e saunia i latou mo a latou matafaioi, aiga, ma auaiga i le lumanai?

O a mau ma isi punaoa o le a fesoasoani i tamaitai talavou e malamalama ai i meaalofa faaleagaga ma o le a le finagalo o le Tama Faalelagi ia i latou i le faaaogaina o na meaalofa?

1 Korinito12:3–27; Moronae10:8–18; MF&F 46:13–25 (Faataitaiga o meaalofa faaleagaga)

MF&F 46:8–10 (Aisea ua tuuina mai ai ia i tatou meaalofa faaleagaga)

MF&F 46:11–12 (Ua tuuina atu i tagata uma meaalofa faaleagaga)

Mataupu Faavae o le Faatuatua 1:7 (Matou te talitonu i meaalofa faaleagaga)

Henry B. Eyring, “Fesoasoani ia i Latou e Faatutu ni Sini Maualuluga,” Ensign po o le Liahona, Nov. 2012

David A. Bednar, “Ia Atamai,” Ensign, Dec. 2006, 31–36; po o leLiahona, Tes. 2006, 14–20

“Meaalofa Faaleagaga,” Faamaoni i le Faatuatua (2004), 109–11

“O Meaalofa a le Agaga,” Mataupu Faavae o le Talalelei (2009), 135en}143

Vitio: “Meaalofa Maoae”

4:22

Aoao atu i le ala a le Faaola

Na faaaoga e le Faaola ia tusitusiga paia e aoao atu ai ma molimau atu e uiga i Lana misiona. E faapefea ona e faaaogaina mau i lau lesona e aoao atu ai ma molimau atu i le ala e finagalo le Tama Faalelagi i tamaitai talavou e faaaoga ai a latou meaalofa faaleagaga?

Vitio: “Valaaulia i Matou e Molimau Atu”

3:42

Matamata atili

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

  • Tusi fesili nei i le laupapa: O a meaalofa faaleagaga? E faapefea ona ou iloa au meaalofa faaleagaga? O le a le finagalo o le Tama Faalelagi ia te au i le faaaogaina o au meaalofa faaleagaga? Valaaulia tamaitai talavou e fautua mai ni tali mo nei fesili. Valaaulia i latou e vaai mo manatu faaopoopo i le taimi atoa o le lesona.

  • Aumai i le vasega se atigi pusa ua afifi faameaalofa ma le “Mataupu Faavae ma Feagaiga 46:8” ua tusia i se fasi pepa o loo i totonu. Valaaulia tamaitai talavou e vaai faalemafaufau pe mata o le a le mea o loo i totonu o le atigi pusa. Fai atu i se tasi o i latou e tatala le atigi pusa ma faitau le mau. O a “meaalofa silisili”? Fautuaina tamaitai talavou e mafaufau i le fesili lenei i le taimi o le lesona.

Aoao faatasi

O gaoioiga taitasi nei e mafai ona fesoasoani i tamaitai talavou e aoao ai e uiga i meaalofa o le Agaga. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

  • Tusi i le laupapa fesili e tolu nei: Aisea e tuuina mai ai ia i tatou meaalofa faaleagaga? O ai e tuuina atu i ai meaalofa faaleagaga? (tagai MF&F 46:9). O a ni faataitaiga o meaalofa faaleagaga? Tofi tamaitai talavou taitasi i se tasi o mau mai lenei otootoga e fesoasoani e tali nei fesili. Fai i a te ia e suesue le mau ma faasoa mai tali na te maua. O fea o nei meaalofa o loo maua e tamaitai talavou? O le fea latou te mananao ia maua? (Afai na maua e ni tamaitai talavou o latou faamanuiaga faapeteriaka, fautua atu e faitau i se taimi o i luma o latou faamanuiaga e iloa ai po o a meaalofa faaleagaga na tuuina atu ia i latou.) Valaaulia tamaitai talavou e faasoa mai o latou lagona pe faapefea ona fesoasoani meaalofa faaleagaga ia i latou i a latou matafaioi ma tiutetauave i le lumanai.

  • Valaaulia tamaitai talavou e faitau le lisi o meaalofa faaleagaga i le 1 Korinito 12:8–10; Moronae 10:9–16; po o le Mataupu Faavae ma Feagaiga 46:13–25 ma sue se meaalofa latou te fiafia e aoao atili i ai. Tuu atu se taimi ia i latou e suesue ai le meaalofa ua latou filifilia, i le faaaogaina o punaoa e pei “ O Meaalofa a le Agaga ” i le Mataupu Faavae o le Talalelei (itulau 135–43), “Meaalofa Faaleagaga” i le Faamaoni i le Faatuatua (itulau 109–11), po o le Taiala i Tusitusiga Paia. Fai i ai e faasoa mai mea ua latou maua. E mafai faapefea ona faaaoga nei meaalofa e fesoasoani ai e fausia le malo o le Atua?

  • Fai i tamaitai talavou e lisi meaalofa o le Agaga latou te iloa (afai latou te manaomia le fesoasoani, faasino ia i latou mau ua fautuaina atu i lenei otootoga). Valaaulia i latou e faitau le lisi o “meaalofa e faatauvaa ma tau le talisapaiaina” i le amataga o le lauga a Elder David A. Bednar “Ia Atamai.” Fai i tamaitai talavou e faasoa mai faataitaiga ua latou vaaia i tagata o faaaoga se tasi o nei meaalofa e faamanuia ai olaga o isi. O a isi “meaalofa e faatauvaa ma le talisapaiaina” e mafai e tamaitai talavou ona mafaufau i ai? Faasoa atu faataitaiga o meaalofa faaleagaga ua e vaaia i tamaitai talavou taitasi i le vasega.

  • Valaaulia tamaitai talavou taitasi e iloilo le lisi o meaalofa faaleagaga i itulau 109–11 o Faamaoni i le Faatuatua ma filifili se tasi po o le sili atu o le a ia manao e atiae. Fai atu ia te ia e faamatala mai pe aisea na ia filifilia ai na meaalofa. E faapefea ona tatou atiae meaalofa faaleagaga? Valaaulia tamaitai talavou e suesue Mataupu Faavae ma Feagaiga 46:7–12 ma le “ E Mafai ona Tatou Atiina Ae a Tatou Meaalofa” i le Mataupu Faavae o le Talalelei, itulau 141–42. Fai i ai e faasoa mai mea ua latou maua.

  • Faaali se tasi o ata vitio o i lenei otootoga  ma valaaulia ia tamaitai talavou e mafaufau ma faasoa atu se taleni po o se meaalofa latou te vaaia i tagata taitasi o le vasega (ia mautinoa o fetufaai atu ia uiga lelei o tamaitai talavou taitasi). Valaaulia ia tamaitai talavou e faitau le Mataio 25:14–30, pe valaaulia se tagata o le vasega e toe faamatala le faataoto i taleni. E faapefea ona faatatau lenei faataoto i meaalofa na tuuina mai e le Atua ia i tatou? E mafai faapefea ona faaaoga a tatou taleni e auauna atu ai i isi ma faataunuu o tatou tiutetauave? Valaaulia ia tamaitai talavou e tusi i lalo ni o latou manatu, ma fai atu i nisi o i latou e faasoa mai i le korama ni mea sa latou tusiaina.

Fai i tamaitai talavou e faasoa mai mea sa latou aoaoina i le aso. O a ni o latou lagona po o ni uunaiga? Pe ua sili atu lo latou malamalama i meaalofa faaleagaga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

  • Tatalo ma le faamaoni ia malamalama i a latou lava meaalofa faaleagaga ma saili e faaaoga na meaalofa ia manuia ai isi.

  • Faatumu le vaega o mea faatonuina e fai mo le tulaga faatauaina o le Taua o le Tagata Lava Ia 7 i le Alualu i Luma o le Tagata Lava Ia.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale o le a fesoasoani i tamaitai talavou e faaaoga mea sa latou aoaoina i lenei lesona.