Te u teuteu fēfē ke fokotuʻuha ʻapi ʻoku fakatefito ʻia Kalaisi?

ʻOku kamata hono langa e puleʻanga ʻo e ʻOtuá ʻaki hono langa ha ʻapi mo ha fāmili māʻoniʻoni. Ko e fāmilí ko e ʻiuniti mahuʻinga taha ia ʻo e Siasí. ʻI heʻetau hoko ko e kāingalotu ʻo e Siasí, ʻoku totonu ke tau fokotuʻu ha ʻapi ʻoku nofoʻia ʻe he Laumālié. ʻOku ʻomi ʻe he ʻapi ʻoku uho ʻaki ʻa Kalaisí kiate kitautolu ha feituʻu malu mei he angahalá, ha ungaʻanga mei māmani, mo ha ʻofa mateaki mo moʻoni. Tatau ai pē pe ko hotau ʻapí ʻoku lahi pe siʻisiʻi, ʻe lava pē ke hoko koha “fale ʻo e lotu, ko ha fale ʻo e ʻaukai, ko ha fale ʻo e tui, ko ha fale ʻo e ako, ko ha fale ʻo e nāunau, ko ha fale ʻo e maau, ko ha fale ʻo e ʻOtua” (T&F 88:119).

Teuteuʻi fakalaumālie koe

Ko e hā ʻokú ke fai ke ngaohi homou ʻapí ko ha maluʻanga mei he angahalá mo ha hūfangaʻanga mei he māmaní? Ko e hā ʻokú ke fai ke akoʻi hoʻo fānaú mo e fāmilí e ongoongoleleí?

Fakakaukau ki he ngaahi ʻapi ʻoku nofo ʻa e kau finemuí. Ko e hā ha ngaahi meʻa ʻoku nau aʻusia taimí ni te tokoniʻi ai kinautolu ke ohi hake honau fāmilí ʻi he māʻoniʻoni?

Ko e hā e ngaahi potufolofolá mo e ngaahi lea ʻe tokoni ki he kau finemuí ke nau teuteu ke fokotuʻu ha ʻapi ʻoku fakatefito ʻia Kalaisí?

ʻIsikeli 16:44 (Ko e mahuʻinga ʻo e sīpinga ʻa ha faʻē)

Saame 127: 3; 2 Nīfai 25: 26; Mōsaia 4: 14–15; T&F 68: 25–28; 88: 119; 93: 40 (ʻOku fekauʻi ʻa e mātuʻá ke akoʻi mo fakatupulekina ʻenau fānaú)

ʻAlamā 53:20–21; 56:47–48 (Naʻe akoʻi e kautau kei talavou ʻa Hilamaní ʻe heʻenau faʻeé)

“Ko e Fāmilí: Ko ha Fanongonongo ki Māmani,” Ensign pe Liahona, Nōvema 2010, 129

Henry B. Eyring, Ki Hoku Makapuná,Ensign pe Liahona, Nōvema 2013

Richard G. Scott, Ke Melino ʻa ʻApi,Ensign pe Liahona, Mē 2013, 29–31

L. Tom Perry, “Ko e Hoko ko e Mātuʻa Leleí,” Ensign pe Liahona, Nōvema 2012, 26–28

“Fāmilí,” Ki Hono Fakamālohia ʻo e Toʻu Tupú (2011), 14–15

Vitiō:“Tuʻunga ko e Faʻeé: Ko ha Hoa Ngāue Taʻengata mo e ʻOtuá”

3:47

Vitiō:“Ko Ha Fale ʻo e Maau, ko ha Fale ʻo e ʻOtuá”

1:38

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki hono mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe te ke fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ‘o e uike ní:

Fakaafeʻi ʻa e kau finemuí ke nau fakamatalaʻi pe ʻoku anga fēfē nai ha ʻapi ʻoku uho ʻaki ʻa Kalaisi. Ko e hā ha meʻa te nau fakatokangaʻi ai? Ko e hā e meʻa ne nau ongoʻi aí? Kole ange ke nau fokotuʻu mai ha ngaahi tali ki he fehuʻi “Te u lava fēfē ʻo teuteu ke fokotuʻu ha ʻapi ʻoku uho ʻaki ʻa Kalaisi?”
ʻEke ki he kau finemuí pe ʻoku nau fakakaukau ko e hā e fatongia ʻo e ngaahi faʻeé ʻi hono langa e puleʻanga ʻo e ʻOtuá. Fakaafeʻi kinautolu ke nau fakakaukau ki heʻenau ngaahi faʻeé mo ha ngaahi faʻē kehe ʻoku nau ʻilo pea vahevahe ha ngaahi lelei ʻoku nau maʻu ʻoku fie faʻifaʻitaki ʻe he kau finemuí (ke maʻu ha ngaahi sīpinga ʻo e ngaahi lelei ko ʻení, vakai, Lea Fakatātā 31:10–31).

Ako fakataha

E tokoni e ngaahi ʻekitivitī takitaha ʻi laló ke mahino ki he kau finemuí ʻa e founga ki hono fokotuʻu ha ʻapi ʻoku fakatefito ʻia Kalaisí. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ngāue lelei taha ki hoʻo kalasí:

Vahevahe e kalasí ki ha kulupu ʻe tolu, pea vahe ki he kulupu takitaha ke lau ha taha ʻo e ngaahi potu folofola ko ʻení: Mōsaia 4: 14–15, ʻAlamā 53: 20–21, 56: 47–48. Fakaafeʻi e kau finemuí ke nau hiki ha lisi ʻi he palakipoé ʻo e ngaahi tefitoʻi moʻoni ʻi he ngaahi veesi ko ʻení ʻa ia ʻe tokoni ke nau fokotuʻu ha ʻapi ʻoku fakatefito ʻia Kalaisí. Huluʻi ʻa e taha pe fakatouʻosi e ongo vitiō ʻoku hiki atu ʻi he lēsoni ko ʻení. Fokotuʻu ange ke fakakaukau e kau finemuí ko ha faʻē kinautolu lolotonga ʻenau mamatá. Hili e vitiō takitaha, kole ange ki he kau finemuí ke nau aleaʻi e tefitoʻi pōpoakí pea mo ha ngaahi tefitoʻi moʻoni naʻa nau ʻilo ʻe tokoni ke nau fokotuʻu ha ʻapi ʻoku fakatefito ʻia Kalaisí. Fakakaukau ke tānaki atu ʻa e ngaahi tefitoʻi moʻoni ko ʻení ki he lisi he palakipoé. Fakaafeʻi kinautolu ke nau vahevahe ha ngaahi sīpinga ʻo e ngaahi tefitoʻi moʻoni ko ʻení mei honau fāmilí pe ko ha fāmili kehe.
Kole ki he kau finemuí ke nau hiki he palakipoé ʻenau faleʻi lelei taha ki ha ongomeʻa ʻoku teu mali. Vahevahe ʻa e lea ʻa Palesiteni Henelī B. ʻAealingi “Ki Hoku Makapuna” ki ha ngaahi kongokonga, pea ʻoange e ngaahi kongokonga ʻo e kau finemui ʻo e leá ke lau. Kole ange ke nau tānaki ki he lisi ʻi he palakipoé ʻa engaahi meʻa ne nau ʻilo ʻi he lea ʻa Palesiteni ʻAealingí, pea aleaʻi e meʻa te nau lava ʻo fai he taimí ni ke teuteu ke fokotuʻu ha ʻapi ʻoku fakatefito ʻia Kalaisí.
Lau fakakalasi ʻa e ngaahi meʻa ʻe nima ʻe lava ke fai ʻe he mātuʻá ke fokotuʻu ha ʻulungaanga fakafāmili mālohi ange ʻo hangē ko ia ʻoku fakamatalaʻi ʻi he lea ʻa ʻEletā L. Tomu Peuli “Ko e Ko e Hoko ko e Mātuʻa Leleí.” Kole ki he finemui takitaha ke fili ha taha ʻo e ngaahi fokotuʻu ʻa ʻEletā Peulí pea vahevahe ha sīpinga kuó ne mamata ai ʻo ha fāmili ʻoku nau ʻahiʻahi fakahoko e fokotuʻú mo founga ʻoku tokoni ai ki hono fokotuʻu ha ʻapi ʻoku fakatefito ʻia Kalaisí. Kole ki he kau finemuí ke nau lau e palakalafi fitu fakaʻosi ʻo e leá pea vahevahe e ʻuhinga ʻoku mahuʻinga ai ke fokotuʻu ha ʻulungaanga fakafāmili mālohí. Ko e hā ʻe lava ke fai ʻe he kau finemuí he taimí ni ke fokotuʻu ha ʻulungaanga fakafāmili mālohi ʻi honau ʻapí?
Ko e hā ʻoku mahuʻinga ai ʻa e ngaahi sīpingá? Ko e hā e sīpinga kuo foaki mai ʻe he Tamai Hēvaní kiate kitautolu ki hono fokotuʻu ha ʻapi ʻoku fakatefito ʻia Kalaisí? (vakai, “Ko e Fāmilí: Ko ha Fanongonongo ki Māmani,” palakalafi 7). Ko e hā ʻe lava ke fai ʻe he kau finemuí he taimí ni ke teuteu ai ke langa ha ʻapi mo e fāmilí ʻo fakatatau ki he sīpinga ko ʻení? ʻEke ki he kau finemuí pe ko e hā te nau leaʻaki ki ha taha ʻoku ʻikai tatau e tūkunga hono fāmilí mo e sīpinga ʻa e Tamai Hēvaní. Ke maʻu ha ngaahi fakakaukau, fakaafeʻi kinautolu ke nau lau e palakalafi fakaʻosi ʻo e “Fāmilí” ʻi he Ki hono Fakamālohia ʻo e toʻu Tupú.
Vahevahe fakakulupu e kalasí, pea vahevahe e lea ʻa ʻEletā Lisiate G. Sikotí “ Ke Melino ʻa ʻApi” ki he ngaahi kulupú. Kole ki he ngaahi kulupú ke nau ako ʻenau konga ʻo e leá, pea fekumi ki he fakamatala pe ʻulungaanga ʻo ha ʻapi ʻoku fakatefito ʻia Kalaisí. Fakaafeʻi kinautolu ke vahevahe ʻa e meʻa ne nau ʻiló ʻaki hono tā ha ngaahi fakatātā ʻo ha ʻapi ʻoku fakatefito ʻia Kalaisí. Ko e hā ʻe lava ke fai ʻe he kau finemuí ke tokoni lahi ange ʻenau fakatefito honau fāmilí ʻia Kalaisí he taimí ni? Te nau lava fēfē ʻo teuteu ke fokotuʻu ʻi he kahaʻú ha ʻapi ʻoku fakatefito ʻia Kalaisi?

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. Ko e hā haʻanau ngaahi ongo pe fakakaukau? ʻOku mahino kiate kinautolu e founga hono fokotuʻu ha ʻapi ʻoku fakatefito ʻia Kalaisí? ʻOku toe ʻi ai nai haʻanau ngaahi fehuʻi kehe? ‘E ‘aonga nai ke fakamoleki ha taimi lahi ange ʻi he tokāteline ko ‘ení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau ki he founga te nau moʻui ʻaki ai e meʻa kuo nau ako he ʻaho ní. Hangē ko ʻení, ʻe lava ke nau:

Tokoni ki heʻenau mātuʻá ʻaki ʻenau hoko ko ha ivi tākiekina ki he leleí ʻi honau ngaahi ʻapí ʻi he taimí ni.
Feinga ke ʻilo ha ngaahi faʻē lelei, ako meiate kinautolu, pea muimui ʻi heʻenau ngaahi sīpingá.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.