Ko e hā e founga ʻoku finangalo e Tamai Hēvaní ke u fakaʻaongaʻi ai ʻeku ngaahi meʻafoaki fakalaumālié?

Ko e ngaahi meʻafoaki fakalaumālié ko ha ngaahi tāpuaki pe ivi ʻoku foaki ʻe he mālohi ʻo e Laumālie Māʻoniʻoní. ʻI heʻetau hoko ko e fānau ʻa e Tamai Hēvaní, ʻoku tau maʻu kotoa ha ngaahi meʻafoaki fakalaumālie. ʻOku foaki mai ʻe he ʻOtuá e ngaahi meʻafoaki ko ʻení koeʻuhí ke tau lava ʻo tokoniʻi ha kakai kehe mo tokoni ʻi hono langa Hono puleʻangá. Kuó Ne fekau ke tau fekumi faivelenga mo fakatupulaki ʻetau ngaahi meʻafoaki fakalaumālié.

Teuteuʻi fakalaumālie koe

Ko e hā e ngaahi meʻafoaki fakalaumālie ʻokú ke maʻú? Kuo nau faitāpuekina fēfē koe mo e niʻihi kehé? Kuo tāpuekina fēfē koe ʻe he ngaahi meʻafoaki fakalaumālie ʻa e niʻihi kehé? Kuó ke ʻiloʻi fēfē hoʻo ngaahi meʻafoakí?

Ko e hā ʻoku mahuʻinga ke ʻiloʻi ʻe he kau finemuí ʻenau ngaahi meʻafoaki fakalaumālié? ʻE tokoni fēfē ʻeni ke teuteuʻi kinautolu ki honau ngaahi fatongia he kahaʻú, ʻapí, mo e fāmilí?

Ko e hā e ngaahi potufolofola mo e ngaahi maʻuʻanga tokoni kehe ʻe tokoni ke mahino ki he kau finemuí ʻa e ngaahi meʻafoaki fakalaumālié mo e founga ʻoku finangalo e Tamai Hēvaní ke fakaʻaongaʻi ai kinautolú?

1 Kolinitō 12:3–27; Molonai 10: 8–18; T&F 46:13–25 (Ko ha ngaahi sīpinga ʻo e ngaahi meʻafoaki fakalaumālié)

T&F 46:8–10 (Ko e hā ʻoku tau maʻu ai e ngaahi meʻafoaki fakalaumālié)

T& F 46:11–12 (ʻOku foaki ki he taha kotoa pē ha ngaahi meʻafoaki fakalaumālie)

Ngaahi Tefito ʻo e Tuí 1:7 (ʻOku tau tui ki he ngaahi meʻafoaki fakalaumālié)

Henry B. Eyring, “Tokoni ke Fokotuʻu ha Taumuʻa Lelei,” Ensign pe Liahona,,Nōvema 2012, 60–67

David A. Bednar, “Mata Poto,” Ensign, Dec. 2006, 31–36; pe Liahona, Tīsema 2006, 14–20

“Ngaahi Meʻafoaki Fakalaumālié,” Tuʻu Maʻu ʻi he Tuí (2004), 139–41

“Ko e Ngaahi Meʻafoaki ʻo e Laumālié,” Ngaahi Tefitoʻi Moʻoni ʻo e Ongoongoleleí (2009), 145–54

Vitiō: “Meʻaʻofa Mātuʻaki Makehé”

4:21

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki hono mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ‘o e uike ní:

Hiki e ngaahi fehuʻi ko ʻení he palakipoé: Ko e hā ʻa e ngaahi meʻafoaki fakalaumālie? Te u ʻilo fēfē ʻa ʻeku ngaahi meʻafoaki fakalaumālié? ʻOku fie maʻu ʻe he Tamai Hēvaní ke u fakaʻaongaʻi fēfē ʻeku ngaahi meʻafoakí? Fakaafeʻi e kau finemuí ke nau fokotuʻu mai ha ngaahi tali ki he ʻū fehuʻi ko ʻení. Fakaafeʻi kinautolu ke nau kumi ha ngaahi ʻilo makehe ʻi he lolotonga ʻo e lēsoní.
ʻOmi ki he kalasí ha puha meʻaʻofa, kuo faʻo ʻi loto ha laʻi pepa kuo hiki ai ʻa e “Tokāteline mo e Ngaahi Fuakava 46:8.” Fakaafeʻi ʻa e kau finemuí ke nau fakakaukau loto pe ko e hā ʻoku ʻi he loto puhá. Kole ki hanau taha ke ne fakaava ʻa e puhá pea lau ʻa e potufolofolá. Ko e hā “ʻa e ngaahi meʻafoaki lelei tahá”? Poupouʻi ʻa e kau finemuí ke nau fakakaukau ki he fehuʻí ni he lolotonga ʻo e lēsoní.

Ako fakataha

‘E lava ke tokoni e ngaahi ‘ekitivitī takitaha ‘i laló ke ako e kau finemuí ʻo kau ki he ngaahi meʻafoaki ʻo e Laumālié. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ngāue lelei taha ki hoʻo kalasí:

Hiki he palakipoé ʻa e ngaahi fehuʻi ʻe tolu ko ʻení: Ko e hā ne foaki mai ai kiate kitautolu ha ngaahi meʻafoaki fakalaumālié? Ko hai ʻoku foaki ki ai e ngaahi meʻafoaki fakalaumālié? (vakai, T&F 46:9). Ko e hā ha ngaahi sīpinga ʻo e ngaahi meʻafoaki fakalaumālié? Vahe ki he finemui takitaha ha taha ʻo e potufolofola mei he lēsoni ko ʻení ke tokoni ki hono tali e ngaahi fehuʻi ko ʻení. Kole ange ke ne ako e potufolofolá pea vahevahe ʻa e ngaahi tali ʻokú ne maʻú. Ko e fē ʻi he ngaahi meʻafoaki ko ʻení ʻoku maʻu ʻe he kau finemuí? Ko e fē ʻa ia ʻoku nau loto ke maʻú? (Kapau ʻoku ʻi ai ha taha ʻo e kau finemuí kuo maʻu hono tāpuaki fakapēteliaké, fokotuʻu ange ke nau lau ʻa honau tāpuakí ʻamuiange ke ʻiloʻi ʻa e ngaahi meʻafoaki fakalaumālie kuo foaki ange kiate kinautolú.) Fakaafeʻi e kau finemuí ke nau vahevahe ʻenau ngaahi fakakaukau ki he founga ʻe lava ke tokoni he taimí ni ʻa e ngaahi meʻafoaki fakalaumālié pea ʻi honau ngaahi ngafa mo e fatongia he kahaʻú.
Fakaafeʻi e kau finemuí ke nau lau ʻa e lisi ʻo e ngaahi meʻafoaki fakalaumālié ʻi he 1 Kolinitō 12:8–10; Molonai 10:9–16; pe Tokātelinhe mo e Ngaahi Fuakava 46:13–25 pea kumi ha meʻafoaki ʻoku nau fie ako lahi ange ki ai. Tuku ange ha taimi ke nau ako ʻa e meʻafoaki ko ia naʻa nau fili ʻaki hono fakaʻaongaʻi e ngaahi maʻuʻanga tokoni hangē ko e “Ko e Ngaahi Meʻafoaki ʻo e Laumālié” ʻi he Ngaahi Tefitoʻi Moʻoni ʻo e Ongoongoleleí (peesi 145–54), Ngaahi Meʻafoaki Fakalaumālié ʻi he Tuʻu Maʻu ʻi he Tuí (peesi 139–41), pe Ko e Fakahinohino ki he Ngaahi Folofolá. Kole ange ke nau vahevahe e meʻa ʻoku nau maʻú. ʻE lava fēfē ke fakaʻaongaʻi e meʻafoaki ko ʻení ke tokoni ʻi hono langa e puleʻanga ʻo e ʻOtuá?
Kole ki he kau finemuí ke nau hiki e ngaahi meʻafoaki ʻo e Laumālié ʻoku nau ʻiló (kapau te nau fie maʻu tokoni, ʻai ke nau sio ki he ngaahi potufolofola ʻoku ʻoatu he lēsoni ko ʻení). Fakaafeʻi kinautolu ke nau lau e lisi ʻo e “ngaahi meʻafoaki fakalaumālie ʻoku ʻikai faʻa fakatokangaʻi” ʻi he kamataʻanga ʻo e lea ʻa ʻEletā Tēvita A. Petinā ko e “Mata Poto.” Kole ki he kau finemuí ke nau vahevahe ha ngaahi sīpinga kuo nau mamata ai ʻi fakaʻaongaʻi ʻe he kakaí ha taha ʻo e ngaahi meʻafoaki ko ʻení ke faitāpuekina e moʻui ʻa e niʻihi kehé. Ko e hā ha “ngaahi meʻafoaki fakalaumālie ʻoku ʻikai faʻa fakatokangaʻi” kehe ʻe lava e kau finemuí ʻo fakakaukau ki aí? Vahevahe ʻa e ngaahi sīpinga ʻo e ngaahi meʻafoaki fakalaumālie kuó ke fakatokangaʻi ʻi he finemui takitaha ʻi he kalasí.
Fakaafeʻi e finemui takitaha ke toe vakaiʻi e lisi ʻo e ngaahi meʻafoaki fakalaumālié ʻi he peesi 139–41 ʻo e Tuʻu Maʻu ʻi he Tuí pea fili ha taha pe lahi ange ʻokú ne loto ke fakatupulaki. Kole ange ke ne fakamatalaʻi e ʻuhinga naʻá ne fili ai e ngaahi meʻafoaki ko iá. ʻOku tau fakatupulaki fēfē ʻa e ngaahi meʻafoaki fakalaumālié? Fakaafeʻi e kau finemuí ke nau fekumi ʻi he Tokāteline mo e Ngaahi Fuakava 46:7–12 mo e “Te Tau lava ʻo Fakatupulaki Hotau Ngaahi Meʻafoakí ʻi he Ngaahi Tefitoʻi Moʻoni ʻo e Ongoongoleleí, ʻi he peesi 151. Kole ange ke nau vahevahe e meʻa ʻoku nau maʻú.
Huluʻi ha taha ʻo e ngaahi vitiō ʻi he fokotuutuʻu ko ʻení pea fakaafeʻi e kau finemuí ke fakakaukauʻi pea vahevahe ha talēniti pe meʻafoaki ʻoku nau fakatokangaʻi ʻi he mēmipa takitaha ʻo e kalasí (fakapapauʻi ʻoku vahevahe ʻa e ngaahi ʻulungaanga lelei ʻo e finemuí takitaha). Fakaafeʻi ʻa e kau finemuí ke lau ʻa e Mātiu 25:14–30, pe fakaafeʻi ha memipa ʻo e kalasí ke toe fakamatalaʻi ʻa e talanoa fakatātā ʻo e ngaahi talēnití. ʻOku fekauʻaki fēfē ʻa e talanoa fakatātā ko ʻení mo e ngaahi meʻafoaki kuo foaki mai ʻe he ʻOtuá kiate kitautolú? Te tau fakaʻaongaʻi fēfē nai hotau talēnití ke tokoniʻi e niʻihi kehé mo fakahoko hotau ngaahi fatongiá? Fakaafeʻi e kau finemuí ke hiki ʻenau ngaahi fakakaukaú, pea kole ki ha niʻihi ʻo kinautolu ke nau vahevahe mo e kalasí e meʻa ne nau tohí.

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. Ko e hā haʻanau ngaahi ongo pe fakakaukau? ʻOku mahino lelei ange kiate kitautolu ʻa e ngaahi meʻafoaki fakalaumālié? ʻOku toe ʻi ai nai haʻanau ngaahi fehuʻi kehe? ‘E ‘aonga nai ke fakamoleki ha taimi lahi ange ʻi he tokāteline ko ‘ení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau ki he founga te nau moʻui ʻaki ai e meʻa kuo nau ako he ʻaho ní. Hangē ko ʻení, ʻe lava ke nau:

Lotu fakamātoato ke ʻilo ʻenau ngaahi meʻa-foaki fakalaumālié pea kumi ke fakaʻaongaʻi kinautolu ke ʻaonga ki he niʻihi kehé.
Fakakakato e meʻa ʻoku fie maʻu ke aʻusia fika 7 ʻo e tuʻunga ʻulungaanga Mahuʻinga Fakatāutahá ʻi he Fakalakalaka Fakatāutahá

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí. c

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe lava tokoni ki he kau finemuí ke fakaʻaongaʻi ʻa e meʻa naʻa nau ako mei he lēsoni koʻení.