Ngaahi Tohí mo e Ngaahi Lēsoní
Vahe 22: Ko e Ngaahi Meʻafoaki ʻo e Laumālié

Vahe 22

Ko e Ngaahi Meʻafoaki ʻo e Laumālié

Two elder missionaries in Korea talking to a young man. They are standing on a sidewalk.

Ko e Ngaahi Meʻafoaki ʻo e Laumālié

  • Ko e hā ha ngaahi meʻafoaki fakalaumālie ʻoku foaki mai ʻe he ʻEikí?

Hili ʻa e papitaisó, naʻe hilifakinima ʻa hotau ʻulú ke tau maʻu e meʻafoaki ʻo e Laumālie Māʻoniʻoní. Kapau ʻoku tau faivelenga, ʻe lava ke tau hokohoko atu hono maʻu ʻEne tākiekiná. ʻOku fakafou ʻiate Ia ʻa e malava ke faitāpuekina fakatāutaha kitautolu ʻaki ha ngaahi mālohi fakalaumālie makehe ʻoku ui ko e ngaahi meʻafoaki ʻo e Laumālié. ʻOku foaki e ngaahi meʻafoaki ko ʻení kiate kinautolu ʻoku tauhi faivelenga kia Kalaisí. “ ʻOku tupu ʻa e ngaahi meʻa-foakí ni kotoa pē mei he ʻOtuá, koeʻuhí ke ʻaonga ki he fānau ʻa e ʻOtuá” (T&F 46:26). ʻOku nau tokoni ke tau ʻiloʻi mo akoʻi e ngaahi moʻoni ʻo e ongoongoleleí. Te nau tokoni ke tau faitāpuekina ʻa e niʻihi kehé. Te nau tataki kitautolu ke tau toe foki atu ki heʻetau Tamai Hēvaní. Ke fakaʻaongaʻi fakapotopoto ʻa e ngaahi meʻafoaki ko ʻení, ʻoku fie maʻu ke tau ʻiloʻi ʻa kinautolu, founga te tau lava ʻo fakatupulaki ai ʻa kinautolú pea mo e founga ʻe lava ke tau ʻiloʻi ai ʻa hono faʻifaʻitakiʻi kinautolu ʻe Sētané.

‘Oku lahi ʻa e ngaahi meʻafoaki ʻo e Laumālié ʻoku fakamatala ki ai ʻa e folofolá. Kuo foaki e ngaahi meʻafoaki ko ʻení ki he kāingalotu ʻo e Siasi moʻoní ʻi he taimi kotoa pē kuó ne ʻi he māmaní ai (vakai, Maʻake 16:16–18). ʻOku kau e ngaahi meʻa ko ʻení ʻi he meʻafoaki ʻo e Laumālié:

Ko e Meʻafoaki ʻo e Lea Kehekehé (T&F 46:24)

ʻOku fie maʻu he taimi ʻe niʻihi ke fakahoko mai e ongoongoleleí ʻi ha lea fakafonua ʻoku ʻikai ke tau angamaheni ki ai. ʻI heʻene hoko ʻa e meʻá ni, ʻe lava ke faitāpuekina kitautolu ʻe he ʻEikí ke tau malava ʻo lea ʻaki e lea fakafonua ko iá. Kuo ʻi ai ha kau faifekau tokolahi kuo nau maʻu ʻa e meʻafoaki ʻo e ngaahi lea kehekehé (vakai ki he fakatātā ʻi he vahe ko ʻení). Hangē ko ʻení, naʻe ngāue fakafaifekau ʻa ʻEletā ʻAlonosō A. Hingikelī ʻi Hōlani pea neongo naʻá ne lotua mo ako mālohi ʻa e lea faka-Hōlaní, naʻe siʻisiʻi ʻaupito pē ʻa e mahino naʻá ne maʻu ki he leá ni pea ʻikai ke ne fuʻu lava ʻo lea ʻaki. ʻI heʻene toe foki ki ha ʻapi naʻá ne tomuʻa ʻaʻahi ki ai, naʻe fakaava mai ʻe ha fefine ʻa e matapaá ʻo lea ʻita mai ki ai ʻi he lea faka-Hōlaní. Naʻá ne ofo ʻi he lava ke mahino kiate ia ʻa e foʻi lea kotoa pē. Naʻá ne maʻu ha ongo mālohi ke fai ange ʻene fakamoʻoní ʻi he lea faka-Hōlaní. Naʻe kamata ke ne lea pea naʻe mahino ʻaupito ʻene puʻaki e lea faka-Hōlaní. Ka ʻi heʻene toe foki ke fakaʻaliʻali ki heʻene palesiteni fakamisioná ʻoku lava ke ne lea faka-Hōlaní, naʻe ʻikai ke ne toe lava. ʻOku ʻi ai ha kāingalotu faivelenga tokolahi kuo faitāpuekina kinautolu ʻaki e ngaahi meʻafoaki ʻo e leá. (Vakai Joseph Fielding Smith, Answers to Gospel Questions, comp. Joseph Fielding Smith Jr., 5 vols. [1957–66], 2:32–33.)

Ko e Meʻafoaki ʻo e Fakamatalaʻi ʻo e Leá (T&F 46:25)

ʻOku faʻa foaki mai ʻa e meʻafoaki ko ʻení ʻi he taimi ʻoku ʻikai mahino ai kiate kitautolu ha lea fakafonua ka ʻoku tau fie maʻu ha pōpoaki mahuʻinga mei he ʻOtua. Hangē ko ʻení, naʻe fakaʻamu lahi ʻa Palesiteni Tēvita O. Makei ke ne lea ki he Kāingalotu ʻi Nuʻu Silá kae ʻoua te ne fakaʻaongaʻi ha fakatonulea. Naʻá ne fakahā ange kiate kinautolu ʻokú ne ʻamanaki pē ʻe faitāpuekina kinautolu ʻe he ʻEikí ke mahino kiate kinautolu ʻene leá. Naʻá ne lea faka-Pilitānia. Naʻe feʻunga ʻene leá mo ha miniti ʻe 40. ʻI heʻene leá, naʻe lava ke ne tala mei honau fofongá pea mo honau loʻimata ne toó, naʻa nau maʻu ʻene pōpoakí. (Vakai, Answers to Gospel Questions, 2:30–31.)

Ko e Meʻafoaki ʻo e Liliu Leá (T&F 5:4)

Kapau kuo uiuiʻi kitautolu ʻe he kau taki ʻo e Siasí ke tau liliu e folofola ʻa e ʻEikí, ʻe lava ke tau maʻu ha meʻafoaki ke liliu lea, ʻo mahulu ange ia ʻi he ʻulungāanga fakaenatula ʻoku tau maʻú. Hangē ko e meʻafoaki kotoa pē, kuo pau ke tau moʻui angatonu, ako mālohi mo lotua ke maʻu ia. ʻI heʻetau fai e ngaahi meʻá ni, ʻe fakatupu ʻe he ʻEikí ke tau ongoʻi māfana ʻi hotau lotó ʻo fekauʻaki mo e tonu ʻa e liliu leá (vakai, T&F 9:8–9). Naʻe maʻu ʻe Siosefa Sāmita ʻa e meʻafoaki ʻo e liliu leá ʻi he taimi naʻá ne liliu ai e Tohi ʻa Molomoná. Naʻe toki hoko mai e meʻafoaki ko ʻení kiate ia he taimi naʻá ne feongoongoi ai mo e Laumālié.

Ko e Meʻafoaki ʻo e Potó (T&F 46:17)

Kuo faitāpuekina ha niʻihi ʻo kitautolu ke lava ʻo mahino kiate kitautolu ʻa e kakaí mo e ngaahi tefitoʻi moʻoni ʻo e ongoongoleleí ʻi heʻetau moʻuiʻaki iá. Kuo fakahā mai:

“Ka ai hamou taha ʻoku masiva ʻi he potó, ke kole ʻe ia ki he ʻOtuá, ʻa ia ʻokú ne foaki lahi ki he kakai kotoa pē, pea ʻoku ʻikai valokiʻi; pea ʻe foaki ia kiate ia.

“Ka ʻe lelei ʻene kole ʻi he tui, ʻo taʻefakataʻetaʻetui. He ko ia ʻoku fakataʻetaʻetuí ʻoku hangē ia ko e peau ʻo e tahí ʻoku fakateka mo felīlīaki ʻe he matangí.

“Ke ʻoua naʻa mahalo ʻe he tangata ko iá ʻe maʻu ʻe ia ha meʻa mei he ʻEikí” (Semesi 1:5–7).

Naʻe folofola ʻa e ʻEikí, “ʻOua ʻe kumi ki he ngaahi koloá, ka ki he potó, pea vakai, ʻe fakahā ʻa e ngaahi meʻa lilo ʻa e ʻOtuá kiate kimoua” (T&F 6:7).

Ko e Meʻafoaki ʻo e ʻIló (T&F 46:18)

Ko e tokotaha kotoa pē ʻoku hangē ko e Tamai Hēvaní, ʻokú ne iku ʻilo ʻa e meʻa kotoa pē. ʻOku fakahaaʻi mai ʻe he Laumālie Māʻoniʻoní ʻa e ʻilo ki he ʻOtuá mo ʻEne ngaahi fonó (vakai, T&F 121:26). He ʻikai lava ke fakamoʻui kitautolu ʻo kapau ʻoku ʻikai ke tau tokanga ki he ngaahi fono ko ʻení (vakai, T&F 131:6).

Naʻe fakahā mai ʻe he ʻEikí, “Kapau ʻe maʻu ʻe ha tokotaha ʻi heʻene faivelengá mo e talangofuá ha ʻilo mo e poto lahi ange ʻi ha tokotaha kehe, te ne maʻu ha tuʻunga māʻolunga lahi ange pehē ʻi he maama ka haʻú” (T&F 130:19). Kuo fekauʻi kitautolu ʻe he ʻEikí ke tau ako e lahi taha te tau lavá ʻo fekauʻaki mo ʻEne ngāué. Ko Hono finangaló ke tau ako ʻo fekauʻaki mo e ngaahi langí, māmaní, ngaahi meʻa kuo ʻosi hoko pe ʻamanaki ke hokó, pea mo e ngaahi meʻa ʻoku hoko ʻi hotau fonuá mo e ngaahi fonua mulí (vakai, T&F 88:78–79). Ka ʻoku ʻi ai foki ha niʻihi ia ʻoku nau ako ʻiate kinautolu pē ke nau maʻu ha ʻilo. ʻOku ʻikai ke nau kole tokoni ki he Laumālie Māʻoniʻoní. Ko kinautolu ia ʻoku ako maʻu pē kae ʻikai ʻaupito ke nau aʻu ki he moʻoní (vakai, 2 Tīmote 3:7). ʻI heʻetau maʻu ʻa e ʻiló ʻi he fakahā ʻa e Laumālie Māʻoniʻoní, ʻoku lea leva ʻa Hono Laumālié ki hotau ʻatamaí mo hotau lotó (vakai, T&F 6:15, 22–24; 8:2; 9:7–9).

Ko e Meʻafoaki ʻo e Akoʻi e Potó mo e ʻIló (Molonai 10:9–10)

ʻOku foaki ki ha kakai ʻe niʻihi ha poto makehe ke nau fakamatalaʻi mo fakamoʻoniʻi e ngaahi moʻoni ʻo e ongoongoleleí. ʻE lava ke fakaʻaongaʻi ʻeni he taimi ʻoku tau faiako ai ʻi ha kalasi. ʻE lava ke fakaʻaongaʻi ia ʻe he ngaahi mātuʻá ke akoʻi ʻaki ʻenau fānaú. ʻE tokoni foki ʻa e meʻafoaki ko ʻení ke tau fakahinohinoʻi e niʻihi kehé ke lava ʻo mahino kiate kinautolu ʻa e ongoongoleleí.

Ko e Meʻafoaki ʻo e ʻIloʻi ko Sīsū Kalaisí ko e ʻAlo Ia ʻo e ʻOtuá (T&F 46:13)

Ko e meʻafoaki ʻeni ʻa e kau palōfita mo e kau ʻaposetolo kuo uiuiʻi ke hoko ko ha kau fakamoʻoni makehe ʻo Sīsū Kalaisí. Ka ʻoku ʻi ai foki mo ha niʻihi kehe kuo foaki ki ai e meʻafoakí ni. ʻE lava ke maʻu ʻe he tokotaha kotoa pē ha fakamoʻoni ʻo fakafou ʻi he ngaahi fanafana ʻa e Laumālie Māʻoniʻoní. Naʻe akonaki mai ʻa Palesiteni Tēvita O. Makei ʻo pehē: “ʻOku pehē ʻe he Tokāteline mo e Ngaahi Fuakavá ʻoku foaki ia ki ha niʻihi, ke nau ʻilo ʻi he Laumālie Māʻoniʻoní ko Sīsuú ko e ʻAlo Ia ʻo e ʻOtuá pea naʻe tutuki Ia koeʻuhí ko e ngaahi angahala ʻa e māmaní [vakai, T&F 46:13]. Ko e niʻihi ʻeni ʻoku ou ʻuhinga ki ai ʻoku nau tuʻu taʻeueʻia ʻi he maka ʻo e maʻu fakahaá, ʻi he fakamoʻoni ʻoku nau fai ki he māmaní” (Ngaahi Akonaki ʻa e Kau Palesiteni ʻo e Siasí: Tēvita O. Makei [2003], 202).

Ko e Meʻafoaki ʻo e Tui ki he Fakamoʻoni ʻa e Niʻihi Kehé (T&F 46:14)

ʻE lava ke tau ʻiloʻi ʻa hono moʻoni ʻo e meʻa kotoa pē ʻi he mālohi ʻo e Laumālie Māʻoniʻoní. Kapau ʻoku tau fie ʻilo pe ʻoku leaʻaki ʻe ha taha ʻa e moʻoní, kuo pau ke tau kole ki he ʻOtuá ʻi he tui. Kapau ʻoku moʻoni ʻa e ngaahi meʻa ʻoku tau lotuá, ʻe fakahū mai ʻe he ʻEikí ha ongo nonga ki hotau ʻatamaí (vakai, T&F 6:22–23). ʻE lava ke tau ʻilo ʻi he foungá ni ʻa e taimi kuo maʻu ai ha fakahā ʻe ha taha, hangē ko e palōfitá. Naʻe kole ʻe Nīfai ki he ʻEikí ke ne lava ʻo mamata, ongoʻi mo ʻiloʻi pe naʻe moʻoni e meʻa-hā-mai ʻa ʻene tamaí (vakai, 1 Nīfai 10:17–19).

Ko e Meʻafoaki ʻo e Kikité (T&F 46:22)

Ko kinautolu kuo nau maʻu ha ngaahi fakahā moʻoni ʻo fekauʻaki mo e kuohilí, lolotongá pe kahaʻú, ʻoku nau maʻu ʻa e meʻafoaki ʻo e kikité. ʻOku maʻu e meʻafoaki ko ʻení ʻe he kau palōfitá ka ʻe lava foki ke tau maʻu ia ke tokoni ke tau puleʻi ʻetau moʻuí (vakai, 1 Kolinitō 14:39). ʻE lava ke tau maʻu ha ngaahi fakahā mei he ʻOtuá maʻatautolu pea mo hotau ngaahi uiuiʻí, ka heʻikai ʻaupito ke tau teitei maʻu ia maʻá e Siasí pe ko hono kau takí. ʻOku fepaki mo e fokotuʻutuʻu ʻo e langí ke maʻu ʻe ha tokotaha ha fakahā maʻá ha taha kehe ʻoku ʻikai ke ne tokangaʻi pe pule ki ai. Kapau ʻoku tau maʻu moʻoni ʻa e meʻafoaki ʻo e kikité, he ʻikai ke tau maʻu ha faʻahinga fakahā ʻoku fepaki mo e folofola kuo fai ʻe he ʻEikí ʻi he ngaahi tohi folofolá.

Ko e Meʻafoaki ʻo e Faifakamoʻuí (T&F 46:19–20)

ʻOku ʻi ai ha niʻihi ʻoku nau maʻu ʻa e tui ke faifakamoʻui, pea maʻu ʻe ha niʻihi kehe ʻa e tui ke fakamoʻui kinautolu. ʻE lava ke tau fakahaaʻi kotoa pē ʻa e tui te tau moʻui ʻi he taimi ʻoku tau puke aí (vakai, T&F 42:48). ʻOku maʻu e meʻafoaki ʻo e fakamoʻui mahakí ʻe ha niʻihi tokolahi ʻo e kau maʻu lakanga fakataulaʻeikí. Ko e niʻihi kehé ʻe lava ke foaki ha ʻilo ki he ngaahi founga ke faitoʻo ʻaki ʻa e mahakí.

Ko e Meʻafoaki ʻo e Fakahoko Ha Ngaahi Meʻa Maná (T&F 46:21)

Kuo tuʻo lahi hono faitāpuekina ʻe he ʻEikí ʻa Hono kakaí ʻi ha ngaahi founga fakaofo. ʻI he taimi naʻe tō ai ʻe he kau paionia ʻIutaá ʻenau fuofua ngoué, naʻe meimei fakaʻauha ia ʻe ha fanga heʻe. Naʻe lotu e kau paioniá ke fakahaofi ʻe he ʻEikí ʻenau ngoué, ko ia naʻá Ne tuku mai ai ha fanga tala ke nau kai e fanga heʻé. ʻI he taimi ʻoku tau fie maʻu tokoni ai pea tau kole ʻi he tuí, ʻe fakahoko ʻe he ʻEikí ha ngaahi mana maʻatautolu ʻo ka lelei ia kiate kitautolu (vakai, Mātiu 17:20; T&F 24:13–14).

Ko e Meʻafoaki ʻo e Tuí (Molonai 10:11)

Naʻe maʻu ʻe he tokoua ʻo Sēletí ha tui lahi. Naʻá ne maʻu ha ngaahi meʻafoaki kehe koeʻuhí ko ʻene tuí. Naʻe lahi fau ʻene tuí ʻo hā ai ʻa e Fakamoʻuí kiate ia (vakai, ʻEta 3:9–15). He ʻikai lava ke foaki mai mo ha meʻafoaki kehe, ʻo ka ʻikai ke tau tui. Naʻe talaʻofa mai ʻa Molonai, “Ko ia ia ʻoku tui kia Kalaisí, ʻo ʻikai fakataʻetaʻetui ʻi ha meʻa ʻe tahá, ko e meʻa kotoa pē te ne kole ki he Tamaí ʻi he huafa ʻo Kalaisí ʻe foaki ia kiate ia” (Molomona 9:21). ʻOku totonu ke tau feinga ke fakatupulaki ʻetau tuí, ʻiloʻi ʻetau ngaahi meʻafoakí pea fakaʻaongaʻi kinautolu.

ʻOku ʻi ai ha kakai ʻoku siʻi ʻenau tuí pea nau fakaʻikaiʻi ʻoku ʻi ai ha ngaahi meʻafoaki peheni ʻo e Laumālié. Naʻe lea ʻa Molonai kiate kinautolu ʻo pehē:

“Pea ʻoku ou toe lea kiate kimoutolu ʻoku fakaʻikaiʻi ʻa e ngaahi fakahā ʻa e ʻOtuá, ʻo pehē kuo ngata iá, pea ʻoku ʻikai ke toe ʻi ai ha ngaahi fakahā, pe ha ngaahi kikite, pe ha ngaahi meʻafoaki pe ha fakamoʻui mahaki, pe ha lea ʻi he ngaahi lea kehekehé mo e fakamatalaʻi ʻo e ngaahi leá;

“Vakai, ʻoku ou pehē kiate kimoutolu, ko ia ia ʻokú ne fakaʻikaiʻi ʻa e ngaahi meʻá ni ʻoku ʻikai te ne ʻiloʻi ʻa e ongoongolelei ʻa Kalaisí; ʻio, kuo ʻikai te ne lau ʻa e ngaahi folofolá; kapau kuó ne fai ia, ʻoku ʻikai mahino ia kiate ia” (Molomona 9:7–8).

  • Ko e hā ʻoku foaki mai ai kiate kitautolu ʻe he ʻEikí ha ngaahi meʻafoaki fakalaumālié?

Te Tau Lava ʻo Fakatupulaki Hotau Ngaahi Meʻafoakí

  • Te tau lava fēfē ʻo “kumi fakamātoato ki he ngaahi meʻafoaki lelei tahá”? (T&F 46:8).

Kuo folofola ʻa e ʻEikí: “He ʻoku ʻikai ke foaki ʻa e meʻafoaki kotoa pē ki he tangata kotoa pē, he ʻoku lahi ʻa e ngaahi meʻafoakí, pea ʻoku foaki ha meʻafoaki ki he tangata takitaha ʻi he Laumālie ʻo e ʻOtuá. ʻOku foaki ki he niʻihi ʻa e meʻafoaki ʻe taha, pea ki he niʻihi ʻa e meʻafoaki kehe, koeʻuhí ke ʻaonga ia ki he kakai kotoa pē” (T&F 46:11–12).

Kuo pau ke tau ʻiloʻi e ngaahi meʻafoaki ʻoku tau maʻú, kae lava ke tau fakatupulaki ia. ʻOku tau fai ʻeni ʻi he lotu mo e ʻaukai. ʻOku totonu ke tau feinga ke maʻu e ngaahi meʻafoaki lelei tahá (vakai, T&F 46:8). ʻOku faʻa tokoni hotau ngaahi tāpuaki fakapēteliaké ke tau ʻiloʻi ʻa e ngaahi meʻafoaki kuo foaki mai kiate kitautolú.

Kuo pau ke tau talangofua mo tui mālohi kae lava ke foaki mai hotau ngaahi meʻafoakí. ʻOku totonu leva ke tau fakaʻaongaʻi e ngaahi meʻafoaki ko ʻení ke fakahoko ʻaki e ngāue ʻa e ʻEikí. ʻOku ʻikai ʻomi ia ke fakafiemālieʻi ʻaki ʻetau fieʻiló pe fakamoʻoniʻi ʻaki ha faʻahinga meʻa kiate kitautolu koeʻuhí ko e siʻi ʻetau tuí. Naʻe folofola ʻa e ʻEikí ʻo fekauʻaki mo e ngaahi meʻafoaki fakalaumālié ʻo pehē, “ ʻOku foaki mai iá ke ʻaonga kiate kinautolu ʻoku ʻofa kiate au mo tauhi ʻeku ngaahi fekaú kotoa pē, pea mo ia ʻoku feinga ke fai peheé” (T&F 46:9).

  • Fakakaukau angé ki ha ngaahi meʻafoaki fakalaumālie te nau fakamālohia fakatāutaha koe pea nau tokoniʻi koe ʻi hoʻo tokoni ki he ʻEikí mo e niʻihi kehe. Ko e hā ha meʻa te ke fai ke fekumi ai ki he ngaahi meʻafoaki ko ʻení?

ʻOku Faʻifaʻitakiʻi ʻe Sētane ʻa e Ngaahi Meʻafoaki ʻo e Laumālié

  • Te tau lava fēfē ʻo fakafaikehekeheʻi ʻa e ngaahi meʻafoaki moʻoni ʻo e Laumālié mei he ngaahi faʻifaʻitaki ʻa Sētané?

ʻOku lava ʻe Sētane ʻo faʻifaʻitakiʻi ʻa e ngaahi meʻafoaki ʻo e leá, kikité, meʻa-hā-maí, fakamoʻui mahakí pea mo ha ngaahi mana kehe. Naʻe pau ke feʻauhi ʻa Mōsese mo e ngaahi founga faʻifaʻitaki ʻa Sētané ʻi he ʻao ʻo Feló (vakai, ʻEkesōtosi 7:8–22). ʻOku loto ʻa Sētane ke tau tui ki he kau palōfita loí, kau faifakamoʻui loí mo e kau fie mana loí. ʻOku nau hā ngali moʻoni kiate kitautolu, ko ia ko e founga pē ke tau ʻiloʻi ʻakí ko haʻatau kole ki he ʻOtuá ke tau maʻu e meʻafoaki ʻo e faʻa ʻiló. ʻOku lava pē ʻa e tēvoló ʻo fotu mai ko ha ʻāngelo ʻo e māmá (vakai, 2 Nīfai 9:9).

ʻOku fakaʻamu ʻa Sētane ke ne fakakuihi kitautolu mei he moʻoní mo ne taʻofi kitautolu ke ʻoua naʻa tau fekumi ki he ngaahi meʻafoaki moʻoni ʻo e Laumālié. ʻOku tākiekina ʻe Sētane ia ʻa kinautolu ʻoku fetuʻutaki mo pulotú, kau tala monūʻiá, mo e kau faimaná, neongo ʻo kapau ʻoku nau tala ʻoku nau muimui ki he ʻOtuá. ʻOku fakalielia ki he ʻEikí ʻenau ngaahi ngāué (vakai, ʻIsaia 47:12–14; Teutalōnome 18:9–10). ʻOku totonu ke tau fakaʻehiʻehi mei ha faʻahinga fengāueʻaki pē mo e ngaahi mālohi ʻo Sētané.

Kuo Pau ke Tau Tokanga Ki Hotau Ngaahi Meʻafoakí

  • Ko e hā ʻa e founga ʻe lava ke tau fakaʻapaʻapaʻi ai e toputapu ʻo e ngaahi meʻafoaki fakalaumālié?

Naʻe folofola ʻa e ʻEikí, “Ka ʻoku ou fai ha fekau kiate kinautolu, ke ʻoua naʻa nau pōlepole ʻa kinautolu ʻi he ngaahi meʻá ni, pea ʻoua foki ʻe leaʻaki ia ʻi he ʻao ʻo e māmaní; he ʻoku foaki ʻa e ngaahi meʻá ni kiate kimoutolú ke ʻaonga kiate kimoutolu pea mou maʻu ai ʻa e fakamoʻuí” (T&F 84:73). Kuo pau ke tau manatuʻi ʻoku toputapu ʻa e ngaahi meʻafoaki fakalaumālié (vakai, T&F 6:10).

ʻOku kole mai ʻe he ʻEikí ʻi Heʻene foaki mai kiate kitautolu ʻa e ngaahi meʻafoaki ko ʻení, ke tau “ʻoatu ʻa e fakafetaʻi ki he ʻOtuá ʻi he Laumālié koeʻuhí ko e tāpuaki kotoa pē ʻe tāpuakiʻi ʻaki [kitautolú]” (T&F 46:32).

Ngaahi Potu Folofola Kehé