Talateú

Ko ha Tohi Fakahinohino Ako mo ha Tohi Lēsoni ʻa e Faiakó

Naʻe hiki ʻa e Ngaahi Tefitoʻi Moʻoni ʻo e Ongoongoleleí ke fakatou hoko ko ha tohi fakahinohino ako pea mo ha tohi lēsoni ʻa e faiakó. ʻE hanga ʻe hoʻo feinga ke maʻu e Laumālie ʻo e ʻEikí ʻi hoʻo ako ia, ʻo fakatupulaki hoʻo mahino mo hoʻo fakamoʻoni ki he ʻOtua ko e Tamaí, Sīsū Kalaisi mo ʻEne Fakaleleí pea mo hono Toe Fakafoki Mai ʻo e ongoongoleleí. Te ke lava ʻo maʻu ai ha ngaahi tali ki he ngaahi fehuʻi ʻo e moʻuí, maʻu ha loto fakapapau ki hoʻo taumuʻá mo ho mahuʻinga fakatāutahá peá ke fehangahangai ai mo e ngaahi faingataʻa fakatāutaha mo fakafāmilí ʻi he loto tui.

Fakahinohino ki he Faiako ʻi he Siasí mo e ʻApí

Ko ‘ete hoko ko ha faiakó ko ha fatongia maʻongoʻonga ia ʻoku kau ai ha ngaahi faingamālie ke fakamālohia ʻa e niʻihi kehé mo fakapapauʻi ʻoku “fafanga ʻa kinautolu ʻaki ʻa e folofola lelei ʻa e ʻOtuá” (Molonai 6:4). ʻE lelei ange hoʻo faiakó ʻo kapau te ke muimui ki he ngaahi tefitoʻi moʻoni ko ʻení:

ʻOfa ʻi he niʻihi ʻokú ke akoʻí.
Faiako ʻaki e Laumālié.
Akoʻi e tokāteliné.
Fakaafeʻi e ako fakamātoató.

ʻOfa ʻi he Niʻihi ʻOkú ke Akoʻí

ʻI he taimi ʻokú ke fakahaaʻi ai ha ʻofa ki he niʻihi ʻokú ke akoʻí, te nau toe fakaongoongo ange ai ki he Laumālie ʻo e ʻEikí. Te nau maʻu ha loto vēkeveke ange ke ako pea nau fie fevahevaheʻaki mo koe pea mo e niʻihi kehé. Feinga ke ke toe maheni lelei ange mo e niʻihi ʻokú ke akoʻí pea ʻai ke nau ʻiloʻi ʻokú ke tokanga fakamātoato ange kiate kinautolu. ‘Iloʻi pea fakatokangaʻi e ngaahi faingataʻaʻia ʻo kinautolu ʻoku ʻi ai haʻanau ngaahi fie maʻu makehé. Fakatupu ha ʻātakai nonga ʻi hoʻo kalasí ke ongoʻi tauʻatāina e kau akó ke nau fai atu ha faʻahinga fehuʻi pē fekauʻaki mo e ngaahi tefitoʻi moʻoni ʻo e ongoongoleleí pea mo e founga ke fakaʻaongaʻi ai kinautolú.

ʻE ʻi ai e Laumālie ʻo e ʻEikí ʻo ka ʻi ai ʻa e ʻofá mo e uouangatahá. Naʻe folofola ʻa e ʻEikí ʻo pehē, “ʻOku ou tuku ʻa e fekau foʻou kiate kimoutolu, koeʻuhí ke mou feʻofaʻaki kiate kimoutolu; pea hangē ko ʻeku ʻofa kiate kimoutolú, ke mou feʻofaʻaki foki kiate kimoutolu” (Sione 13:34).

Ki ha fakamatala lahi ange fekauʻaki mo e tefito ko ʻení, vakai ki he ʻOku ʻIkai Ha Ui ʻe Mahuʻinga Ange ʻi he Faiakó, peesi 33–43.

Faiako ʻaki e Laumālié

Ko e ngaahi meʻa mahuʻinga taha te ke akoʻí ko e ngaahi tokāteline ʻo Kalaisí ʻo hangē ko ia ʻoku fakahā mai ʻe he folofolá mo e kau palōfita ʻo onopōní pea ʻi hono fakamoʻoniʻi ʻe he Laumālie Māʻoniʻoní. Ke fakahoko lelei ʻení, kuo pau ke ke maʻu e Laumālie ʻo e ʻEikí. “ ʻE foaki atu ʻa e Laumālié kiate kimoutolu ʻi he lotu ʻo e tui,” ʻoku pehē ʻe he ʻEikí, “pea kapau ʻe ʻikai te mou maʻu ʻa e Laumālié ʻe ʻikai te mou faiako” (T&F 42:14; vakai foki T&F 50:13–22). Ko e Laumālie Māʻoniʻoní ʻa e faiako moʻoní, ko ia ʻoku mahuʻinga ai ke fakatupu ha ʻātakai ʻe lava ke nofoʻia ʻe he Laumālie ʻo e ʻEikí.

Ki ha fakamatala lahi ange fekauʻaki mo e kaveingá ni, vakai ki he ʻOku ʻIkai Ha Ui ʻe Mahuʻinga Ange ʻi he Faiakó, peesi 45–52.

Akoʻi e Tokāteliné

Ki muʻa peá ke akoʻi ha foʻi vahe, ako fakaʻāuliliki ia ke fakapapauʻi ʻoku mahino kiate koe ʻa e tokāteliné. Ako foki ʻa e ngaahi fakamoʻoni fakafolofola makehe ʻoku hā atu ʻi he fakaʻosinga ʻo e vahe takitaha. ʻE toe fakamātoato mo mālohi ange hoʻo faiakó ʻi he taimi kuo tākiekina fakatāutaha ai koe ʻe he ngaahi akonaki he vahé. ʻOua ʻaupito naʻá ke fakamahamahalo ki ha tokāteline ʻo e Siasí. Akoʻi pē ʻa e meʻa ʻoku poupouʻi ʻe he ngaahi potu folofolá, ngaahi lea ʻa e kau palōfita mo e kau ʻaposetolo ʻi he ngaahi ʻaho kimui ní pea mo e Laumālie Māʻoniʻoní (vakai, T&F 42:12–14; 52:9).

Kapau kuo uiuiʻi koe ke ke faiako ʻi ha kōlomu pe kalasi ʻo fakaʻaongaʻi ki ai e tohí ni, ʻoua naʻá ke toe ʻomi ha nāunau mei tuʻa ke fetongi ʻaki ʻeni, neongo ʻa e ngali mālie e nāunau ko iá. Nofo maʻu pē ʻi he ngaahi potu folofola mo e ngaahi lea ʻi he tohí. ʻO ka feʻunga, pea fakaʻaongaʻi ha ngaahi meʻa fakafoʻituitui ne hoko pe ngaahi fakamatala mei he ngaahi makasini ʻa e Siasí ke tokoni atu ki he lēsoní.

Ki ha fakamatala lahi ange fekauʻaki mo e kaveingá ni, vakai ki he ʻOku ʻIkai Ha Ui ʻe Mahuʻinga Ange ʻi he Faiakó, peesi 54–65.

Fakaafeʻi ʻa e Ako Fakamātoató

ʻI hoʻo faiakó, tokoni ke ʻiloʻi ʻe he niʻihi kehé ʻa e founga ke fakaʻaongaʻi ai e ngaahi tefitoʻi moʻoni ʻo e ongoongoleleí ʻi he moʻui fakaʻahó. Poupouʻi e fevahevaheʻaki fekauʻaki mo e ngaahi founga ʻe lava ke tokoni ai e ngaahi tefitoʻi moʻoni ko ʻení ki he ngaahi ongo ʻoku tau maʻu ki he ʻOtuá, kiate kitautolú pē, ki hotau fāmilí mo hotau kaungāʻapí. Fakalotolahiʻi e kau akó ke nau moʻui ʻo fakatatau mo e ngaahi tefitoʻi moʻoní.

Feinga ke fakakau mai ki he lēsoní ʻa e tokolahi taha te ke lavá. ʻE lava ke ke fai ʻeni ʻaki hano fakaafeʻi kinautolu ke nau lau leʻolahi, tali ʻa e ngaahi fehuʻí pe vahevahe ha ngaahi meʻa kuo nau aʻusia, kae toki fakahoko pē ia he taimi ʻokú ke fakapapauʻi ai he ʻikai ke nau ongoʻi mā hono fai iá. ʻE lava ke ke vahe ange ha ngāue makehe ke fai ʻe he kau akó lolotonga hoʻo teuteu ʻa e lēsoní. ʻIloʻi ʻa e ngaahi fie maʻú pea mo e ongo ʻoku maʻu ʻe he niʻihi kehé. Mahalo naʻa fie maʻu ke ke talanoa fakatāutaha ki ai mo kinautolu ki muʻa hono fai ʻo ha lēsoni ke fakapapauʻi ʻoku nau loto lelei ke kau he fevahevaheʻaki he kalasí.

Ki ha fakamatala lahi ange fekauʻaki mo e kaveingá ni, vakai ki he ʻOku ʻIkai Ha Ui ʻe Mahuʻinga Ange ʻi he Faiakó, peesi 67–83.

Tokoni Makehe maʻá e Kau Faiakó

ʻOku ʻi he vahe takitaha he tohí ni ha kiʻi fakamatala ʻe taha pe ua maʻá e kau faiakó. ʻOku kau he fanga kiʻi fakamatala ko ʻení ha ngaahi fakakaukau ʻe lava ʻo tokoni atu ki hoʻo feinga ke ʻofa ʻiate kinautolu ʻokú ke akoʻí, faiako ʻaki e Laumālié, akoʻi e tokāteliné mo fakaafeʻi e niʻihi ʻokú ke akoʻí ke nau ako fakamātoato.