Te u lava fēfē ʻo hoko ko ha fefine ngāue fakaetauhi lelei ange?

Teuteuʻi Fakalaumālie Koe

Hangē ko ia ʻi he ngaahi meʻa kotoa pē, ko Sīsū Kalaisi ʻa hotau faʻifaʻitakiʻanga haohaoa ʻi he ngāue fakaetauhí. Lolotonga ‘Ene ngāue fakafaifekaú, naʻá Ne tokoniʻi ha niʻihi fakafoʻituitui, feau ha ngaahi fiemaʻu fakatuʻasino mo fakalaumālie, pea mo fakahaaʻi ʻa e ʻofa moʻoni ki he taha kotoa pē. ʻI heʻetau hoko ko e kau muimui ʻo Sīsū Kalaisí, ʻoku fakaafeʻi kitautolu ke tau ngāue fakaetauhi ʻo hangē ko ia naʻá Ne fakahokó, tautautefito kiate kinautolu ʻoku kole mai ke tau hoko ko ha kau fefine ngāue fakaetauhi ki aí. ʻE lava ke tau ʻofa, tokangaʻi, mo fakamālohia ʻa e niʻihi fakafoʻituitui ko ʻení ʻo hangē ko ia naʻe fakahoko ʻe Kalaisí. ʻOku ʻi ai hotau ngaahi talēniti makehe ʻe lava ʻo tokoni mai ʻi heʻetau ngāue tokoní. ʻI heʻetau hoko ko e kau finemui ʻo e Siasí, ʻoku ʻi ai hotau fatongia mahuʻinga ʻi hono fakahoko ʻa e “moʻui taʻe-faʻa-mate mo e moʻui taʻengata ʻa e tangatá” (Mōsese 1:39).

Ngaahi Maʻuʻanga Tokoni ke Tokoni ki Hoʻo Teuteú

ʻOku ʻomi ʻa e ngaahi maʻuʻanga tokoni ko ʻení ke tokoniʻi koe ke ke teuteu ki he konga “Ako fakataha” ʻo e fakatahá.

Mātiu 25:34–40; Luke 10:25–37; 2 Nīfai 25:26; Mōsaia 18:8–9; 3 Nīfai 18:25; Tokāteline mo e Ngaahi Fuakava 81:5 (Ngaahi sīpinga ʻo e ngāue fakaetauhí)
3 Nīfai 17 (Ko e ngāue fakaetauhi fakataautaha ʻa Kalaisi ki he kakai Nīfaí)
Russell M. Nelson, “Ko e Ngāue Fakaetauhi ʻi he Mālohi mo e Mafai ʻo e ʻOtuá,” Ensign pe Liahona, Mē 2018, 68–75
Jeffrey R. Holland, “Ke Ne ʻIate Kinautolu mo Fakamālohia ʻa Kinautolu,” Ensign pe Liahona, Mē 2018, 101–3
Jean B. Bingham, “Ngāue Fakaetauhi ʻo Hangē ko e Fakamoʻuí,” Ensign pe Liahona, Mē 2018, 104–7
Bonnie L. Oscarson, “Kau Finemuí ʻi he Ngāué,” Ensign pe Liahona, Mē 2018, 36–38
“Because I Have Been Given Much” (video)
Ministering.lds.org

Ngaahi Fehuʻi ke Fakalaulaulotoa kimuʻa ʻi Hoʻo Akoʻí

Ko e hā kuó ke fai ʻi hoʻo hoko ko ha fefine ngāue fakaetauhí, ke ke muimui ai ki he sīpinga ʻa e Fakamoʻuí? Kuo tāpuekina fēfē nai ʻe he ngāue fakaetauhi ko ʻení ʻa hoʻo moʻuí mo kinautolu kuó ke tokoniʻí? Ko e hā ha ngaahi meʻa kuó ke aʻusia te ke lava ʻo vahevahe mo e kau finemuí?

Ko e hā ʻa e ongo ʻoku maʻu ʻe he kau finemuí fekauʻaki mo ʻenau hoko ko ha kau fefine ngāue fakaetauhí? Ko e hā ha ngaahi aʻusia ʻe lava ke nau vahevahe mo e niʻihi kehé?

Ko e hā ʻe lava ke fai ʻe he kau finemuí ke teuteu ke akó? Hangē ko ʻení, te nau lava ʻo lau ha lea, sio ʻi ha foʻi vitiō, pe ako ha potufolofola ʻoku fekauʻaki mo e tefito ko ʻení.

Fakatokangaʻi ange: Te ke lava ʻo fakakaukau ʻi hoʻo teuteu ki he lēsoni ko ʻení, ke kole ki he kau mēmipa ʻo e kalasí ʻoku nau hoko ko ha kau fefine ngāue fakaetauhí, ke fakaafeʻi honau hoa ngāue fakaetauhí ke nau kau mai ki he fakataha fakakalasi ko ʻení pea kau atu ki he ngaahi fealēleaʻaki ki he hoko ko ha kau fefine ngāue fakaetauhi lelei angé.

Ko e Faiako ‘i he Founga ‘a e Fakamoʻuí

Ne hoko e Fakamoʻuí ʻi he tūkunga kotoa pē ko e sīpinga haohaoa mo ha faiako kiate kinautolu naʻá Ne akoʻí. ʻE lava fēfē ke ako ʻa e kau finemuí mei hoʻo sīpingá—mo e ngaahi sīpinga ʻo e kau fefine kehé—ʻi heʻenau feinga ke fakahoko honau ngaahi fatongia ko e kau fefine ngāue fakaetauhi anga faka-Kalaisí?

Fokotuʻutuʻu ki he Fakatahá

1. Fealeaʻaki Fakataha mo Vahevahe e Ngaahi Aʻusiá

Tataki ʻe ha mēmipa ʻo e kau palesitenisī ʻo e kalasí; fakafuofua ki he miniti ʻe 5–10

Tataki ha fealeaʻaki kau ki ha ngaahi meʻa hangē ko ʻení:

Ko ʻetau kalasí: Ko hai ʻoku ʻikai ʻi heni he ʻaho ní? Ko e hā ha ngaahi ‘aʻahi ʻoku fie maʻu ke tau fai? Ko hai ʻoku totonu ke tau fakaafeʻi ki ha ʻekitivitī ʻoku ʻamanaki ke fai? Ko hai ʻokú ne fie maʻu ʻetau tokoní mo e ngaahi lotú?
Ko hotau ngaahi fatongiá: Ko e hā ha ngaahi ngāue ʻoku fie maʻu ke tau fai? Ko e hā ha ngaahi ngāue kuo tau fakahoko? Kuo tau fakaafeʻi fēfē nai ʻa e niʻihi kehé ke nau haʻu kia Kalaisí, pea te tau fakaafeʻi fēfē mai e niʻihi kehé he taimí ni?
Ko ʻetau moʻuí: Fakamanatu ki he kalasí ʻa e fealeaʻaki mei he fakataha kuo ʻosí. Ko e hā ha ngaahi meʻa ne tau aʻusia ʻi hono fakaʻaongaʻi e meʻa ne tau akó? Ko e hā ha ngaahi aʻusia kuo tau maʻu ʻi he ngaahi uike kuo hilí ʻa ia ʻokú ne fakamālohia ai ʻetau ngaahi fakamoʻoni ki he ongoongoleleí?

Kapau ʻe lava, aleaʻi ʻa e ngaahi meʻa ko ʻení kimuʻa ʻi ha fakataha ʻa e kau palesitenisī ʻo e kalasí.

2. Ako Fakataha

Tataki ʻe ha takimuʻa pe faiako pe ko ha mēmipa ʻo e kalasí; fakafuofua ki ha miniti ʻe 25–35

Hili hono ako ʻa e ngaahi maʻuʻanga tokoni ʻi ʻolungá pea muimui ki he ueʻi ʻa e Laumālié, te ke lava ʻo fili ha ʻekitivitī ʻe taha pe lahi hake mei lalo ke tokoni ke mahino ʻa e tokāteliné ki he kau mēmipa ʻo e kalasí.

Ko e hā hono ʻuhinga ʻo e foʻi lea ngāue fakaetauhi ki he kau finemui ʻokú ke akoʻí? Ke ʻilo iá, te ke lava ʻo tohiʻi ʻa e Ngāue Fakaetauhi ʻi he palakipoé pea fakaafeʻi e kau finemuí ke nau tohi takatakai ai ha ngaahi foʻi lea ʻoku felāveʻi mo e ngāue fakaetauhí. Te nau lava ʻo maʻu ha ngaahi foʻi lea pe kupuʻi lea ke tānaki atu ki he lisi mei he folofolá ʻo hangē ko ʻení: Mātiu 25:34–40; Luke 10:25–37; 2 Nīfai 25:26; Mōsaia 18:8–9; 3 Nīfai 18:25; mo e Tokāteline mo e Ngaahi Fuakava 81:5. Ko e hā ʻoku nau ako mei he ngaahi veesi ko ʻení ʻo fekauʻaki mo e ngāue fakaetauhí? Te ke lava ʻo kole ki he kau finemuí ke nau vahevahe ha ngaahi sīpinga ʻo e ngāue fakaetauhí kuo nau mātā. Ko e hā ʻe lava ke fai ʻe he kau finemuí ke nau tokoniʻi ai e kakaí ke nau ofi ange kia Kalaisi?
Kole ki he kau finemuí ke nau tautau toko ua pea lau ʻa e 3 Nīfai 17, ʻo kumi e meʻa ʻoku nau ako mei he Fakamoʻuí ʻe lava ʻo tokoni kiate kinautolu ʻi heʻenau hoko ko ha kau fefine ngāue fakaetauhí. Fakaafeʻi leva ʻa e ngaahi hoa takitaha ke vahevahe ha meʻa ne na maʻu. Hangē ko ʻení, naʻe founga fēfē e ngāue fakaetauhi “taki taha” ʻa e Fakamoʻuí? Ko e hā ha ngaahi fiemaʻu naʻá Ne ngāue fakaetauhi ki ai?
Lolotonga e uike kimuʻa pea fai ʻa e kalasí, fakaafeʻi ʻa e kau finemuí ke nau vakai ki he ministering.lds.org pea kumi ha meʻa ʻokú ne ueʻi fakalaumālie kinautolu ke nau anga faka-Kalaisi ange ʻi heʻenau hoko ko e kau fefine ngāue fakaetauhí pea haʻu mateuteu ke vahevahe ʻa e meʻa ne nau maʻú. Ko e hā ha ngaahi aʻusia ʻe lava ke vahevahe ʻe he kau finemuí ʻi he taimi kuo nau mātā ai hono tāpuekina ʻe he kau fefine ngāue fakaetauhí ʻa e moʻui ʻo e niʻihi kehé?
Kole ki he kau finemuí ke nau lau ʻa e Mōsaia 18:8–9 pea aleaʻi ʻa e meʻa ʻokú ne akoʻi mai fekauʻaki mo hotau fatongia ke ngāue fakaetauhi kiate kinautolu ʻoku tau feohí. Fakakaukau ke fakaafeʻi ʻa e pīsopé pe ko ha mēmipa ʻo e kau palesitenisī ʻo e Fineʻofá, ke talanoa ki he kalasí kau ki he founga ke muimui ai ki he sīpinga ʻa Kalaisí ʻi he ngāue fakaetauhi ki he kau mēmipa ʻo e uōtí. ʻE lava ke tomuʻa fakakaukau ʻa e kau finemuí ki ha ngaahi fehuʻi te nau lava ʻo fehuʻi ki he kau taki ko ʻení fekauʻaki mo e ngāue fakaetauhí. Fakaafeʻi ʻa e kau finemuí ke nau faʻu ha ngaahi palani ke fakatupulaki ʻaki ʻenau ngaahi feinga ke ngāue fakaetauhi ki he niʻihi kehe ʻi he uōtí.
Kole ki he finemui takitaha ke lau ha taha ʻo e ngaahi talanoa mei he pōpoaki ʻa ʻEletā Jeffrey R. Hōlani ko e “Ke Ne ʻIate Kinautolu mo Fakamālohia ʻa Kinautolu” pe ko e pōpoaki ʻa Sisitā Sini B. Pingihami ko e “Ngāue Fakaetauhi ʻo Hangē ko e Fakamoʻuí.” Kole ki he finemui takitaha ke haʻu ki muʻa ʻi he lokí, toe fai ʻa e talanoá ʻi heʻene lea pē ʻaʻana, pea vahevahe ʻa e meʻa ʻokú ne akoʻi mai fekauʻaki mo e founga te ne lava ai ʻo hoko ko ha fefine ngāue fakaetauhi lelei angé. Ko e hā mo ha toe meʻa kehe ʻoku ongo makehe ki he kau finemuí ʻi he ngaahi pōpoaki ko ʻení?
Vahevahe ʻa e kalasí ki ha kulupu ʻe ua, pea kole ki he kulupu takitaha ke nau faʻu ha lisi ʻo e ngaahi founga te nau lava ʻo fakatupulaki ai ʻi heʻenau hoko ko e kau fefine ngāue fakaetauhí. Hili ha ngaahi miniti siʻi, fakaafeʻi ʻa e kulupu ʻe taha ke tānaki atu ha ngaahi fakakaukau ki heʻenau lisí mei he pōpoaki ʻa Palesiteni Lāsolo M. Nalesoni ko e “Ngāue Fakaetauhi ʻi he Mālohi mo e Mafai ʻo e ʻOtuá.” Fakaafeʻi ʻa e kulupu ʻe tahá ke tānaki ha ngaahi fakakaukau ki heʻenau lisí mei he pōpoaki ʻa Sisitā Poni L. ʻOsikāsoni ko e “Kau Finemuí ʻi he Ngāué.” Kole ki he ngaahi kulupú ke vahevahe ʻenau ngaahi lisí, pea poupouʻi e finemui takitaha ke fili ha meʻa ʻe taha mei he ngaahi lisí te ne ngāue ki ai.

3. Palani ke Ngāue

Tataki ʻe ha mēmipa ʻo e kau palesitenisī ʻo e kalasí; fakafuofua ki he miniti ʻe 5–10

Kole ki he kau finemuí ke nau aleaʻi ha faʻahinga ongo ne nau maʻu lolotonga ʻa e fakatahá. Ko e hā ha meʻa naʻe mahuʻingamālie kiate kinautolu? ʻOku ʻi ai nai ha meʻa te nau lava ʻo fai fakataautaha pe fakakalasi ke fakaʻaongaʻi ai ʻa e meʻa kuo nau akó?
ʻOange ki he kau finemuí ha ngaahi miniti siʻi ke hiki e meʻa te nau fai ʻi he ngaahi uike ka hokó ke nau ngāueʻi ai ʻa e ngaahi meʻa ne nau ongoʻí. Fakaafeʻi kinautolu ke nau vahevahe ʻenau ngaahi fakakaukaú.
Fakamanatu ki he kau finemuí te nau maʻu ʻa e faingamālie ke vahevahe ʻenau ngaahi aʻusiá ʻi he kamataʻanga ʻo e fakataha hokó.