Te u fakaafeʻi fēfē ʻa e kakai kotoa pē ke nau haʻu kia Kalaisí?
ʻOku ʻi ai e fatongia ʻo e mēmipa takitaha ʻo e Siasí ke tokoniʻi e niʻihi kehé ke haʻu kia Kalaisi pea maʻu ʻa e ngaahi tāpuaki ʻo ʻEne ongoongolelei kuo toe fakafoki maí. ʻE lava ke maʻu ʻe hotau kaungāmeʻá mo e kaungāʻapí ha holi ke ako lahi ange fekauʻaki mo e Fakamoʻuí mo ʻEne ongoongoleleí mei heʻetau ngaahi fakamoʻoní mo e tā sīpinga leleí.
Teuteuʻi fakalaumālie koe
Ko e hā ha ngaahi meʻa kuó ke aʻusia ʻi hono fakaafeʻi ha niʻihi kehe ke haʻu kia Kalaisi? Ko e hā ha ngaahi founga lelei kuó ke ʻilo ke vahevahe ʻaki e ongoongoleleí ki he niʻihi kehé?
Ko e hā ha ngaahi faingamālie ʻoku maʻu ʻe he kau finemuí ke fakaafeʻi ai e niʻihi kehé ke haʻu kia Kalaisi? Ko e hā ha ngaahi meʻa kuo nau aʻusia ʻe lava ke nau fevahevaheʻaki ai?
Ko e hā e ngaahi potufolofola mo e ngaahi maʻuʻanga tokoni kehe te ne ueʻi fakalaumālie e kau finemuí ke nau fakaafeʻi e niʻihi kehé ke haʻu kia Kalaisí?
1 Tīmote 4:12 (Hoko ko e faʻifaʻitakiʻanga ‘o e kakai tuí)
1 Pita 3:15 (Mateuteu maʻu pē ke ʻoange ha tali ki he niʻihi ʻoku nau fehuʻi fekauʻaki mo ʻetau tui fakalotú)
Mōsaia 18:9 (ʻOku tau loto fiemālie ke tuʻu ko e kau fakamoʻoni ʻo e ʻOtuá)
T&F 28:16; 100:3–8 (Kapau te tau fakaava hotau ngutú, ʻe fakafonu ia ʻaki e meʻa ke tau lea ʻakí)
T&F 84:85 (Kapau ʻoku tau mataʻikoloa ʻaki e folofolá, ʻe ʻomi e meʻa ʻoku totonu ke tau lea ʻakí)
Neil L. Andersen, “Ko ha Fakamoʻoni ʻo e ʻOtuá,” Ensign pe Liahona, Nōvema 2016, 35-38
Dallin H. Oaks, “Ko Hono Vahevahe ʻo e Ongoongolelei Kuo Toe Fakafoki Maí,” Ensign pe Liahona, Nōvema 2016, 57-60
David A. Bednar, “Haʻu ʻo Mamata,” Ensign pe Liahona, Nōvema 2014, 107–10
“Ngāue Fakafaifekaú,” ʻi he lēsoni 5 ʻo e Malangaʻaki ʻEku Ongoongoleleí (2004), 97–98
Vitiō: “Kuo Lahi Hoku Tāpuakí”
Ko e faiako ‘i he founga ‘a e Fakamo‘uí
Naʻe fakaafeʻi ʻe he Fakamoʻuí ʻa kinautolu naʻe muimui ʻiate Iá ke nau fakamoʻoni. Te ke tokoniʻi fēfē e kau finemuí ke nau lototoʻa feʻunga ke fakamoʻoniʻi ʻenau tui fakalotú kiate kinautolu ʻoku nau feohí?
Vahevahe ʻo e ngaahi aʻusiá
Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki hono mahuʻinga ʻo e ongoongoleleí ʻi heʻenau moʻui fakaʻahó.
Fakafeʻiloaki e tokāteliné
Fili mei he ngaahi fakakaukau ko ʻení pe te ke fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ‘o e uike ní:
-
Lau fakataha ʻe he kalasí e moto ʻa e Kau Finemuí. ʻEke ki he kau finemuí pe te nau tali fēfē ka fehuʻi ange ʻe hanau kaungāmeʻa ʻoku siasi kehe, “ʻOku ʻuhinga ki he hā hoʻo pehē, ‘Te mau tuʻu ko e kau fakamoʻoni ʻo e ʻOtuá’?”
-
Fakaafeʻi ʻa e kau finemuí ke nau fakaʻaliʻali ha tā ʻo ha kau faifekau taimi kakato mei honau fāmilí (pe vakai, Tohi Fakatātā ʻo e Ongoongoleleí, 109–10). Kole ange ke nau ʻai ha lisi ʻo e ngaahi natula pe ʻulungaanga lelei ʻoku fie maʻu ʻe ha taha ke ne hoko ai ko ha faifekau. Ko e fē ʻi he ngaahi meʻá ni ʻe lava ke maʻu ʻe he kau finemuí he taimí ni? Tokoni ke mahino kiate kinautolu ʻoku ʻikai fie maʻu ia ke ui kinautolu ko ha kau faifekau taimi kakato ka nau toki vahevahe ʻa e ongoongoleleí.
Ako fakataha
ʻE lava ʻo tokoni ʻa e ʻekitivitī takitaha ʻoku hā atu ʻi laló ki he kau finemuí ke nau ʻilo ʻa e founga ke fakaafeʻi ai e niʻihi kehé ke haʻu kia Kalaisí. Muimui ʻi he ueʻi ‘a e Laumālié, ʻo fili ha ʻekitivitī ʻe taha pe toe lahi ange ‘e ‘aonga lahi taha ki hoʻo kalasí:
-
Toe aleaʻi mo e kalasí ʻa e lisi ʻe ua ʻo e ngaahi meʻa te tau lava ʻo fai ke tau vahevahe atu ai ʻa e ongoongoleleí ʻi he lea ʻa ʻEletā Dallin H. Oaks “Ko Hono Vahevahe ʻo e Ongoongolelei Kuo Toe Fakafoki Maí.” Tokoniʻi e kau finemuí ke nau fakakaukau ki ha ngaahi tuʻunga te nau lava ai ʻo fakaʻaongaʻi ha taha pe lahi ange ʻo e ngaahi fokotuʻutuʻu ʻa ʻEletā ʻOakesí. Hangē ko ení, te nau lava ʻo kamataʻi ha fepōtalanoaʻaki ki he ongoongoleleí mo ha taha ʻoku ʻikai ke nau maheni lolotonga ʻenau tali pasí. ʻE malava ke fakafiefia ki he kau finemuí ʻa ʻenau fakatātaaʻi ha niʻihi ʻo e ngaahi tuʻunga ko ení.
-
ʻOmi ha pāsolo fakafihi pea fokotuʻu ʻa e ngaahi kongokongá ʻi ha fokotuʻunga. Kole ki ha finemui ʻe taha ke ne fokotuʻu lelei e pāsoló lolotonga hono lau ʻe he toenga ʻo e kalasí ʻa e talanoa fakatātā ʻa ʻEletā Neil L. Andersen fekauʻaki mo ha pāsolo ʻi he “Ko ha Fakamoʻoni ʻo e ʻOtuá.” ʻOku tatau fēfē ʻa e founga ʻo hono fokotuʻutuʻu ʻo e pāsoló pea mo e ngāue ko hono vahevahe ʻo e ongoongoleleí? Fakaafeʻi e taha kotoa ke ngāue fakataha ʻi he pāsoló lolotonga hoʻomou aleaʻi ha ngaahi founga ʻe malava ke mou ngāue fakataha ʻi he kalasí ke fakahoko ʻa e ngāue fakafaifekaú. ʻI he konga ʻo e fealeaʻakí, ʻe lava ke fakatefito hoʻo tokangá ki he konga ʻi he lea ʻa ʻEletā Andersen ko e “Ko ha Fakaafe ki he Toʻu Tupú.” ʻE faitokonia fēfē ʻe he faleʻi mo e tukupā ʻa ʻEletā ʻEnitasení ʻa e kau finemuí ʻi heʻenau fai ha ngaahi palani ke vahevahe ʻa e ongoongoleleí?
-
ʻI hano fakangofua ʻe he pīsopé, fakaafeʻi ha mēmipa ʻo e uōtí (ha taha ʻo e kau finemuí, kapau ʻe lava) ʻa ia ko ha papi ului ki he Siasí ke vahevahe ʻene ngaahi aʻusia ʻi hono fakafeʻiloaki ia ki he ongoongoleleí. Ko e hā ha ngaahi tā sipinga ʻo hono ngaahi kaungāmeʻa Siasí, naʻa nau tākiekina ʻene fakakaukaú ke fie fanongo ai ki he ongoongoleleí? Ko e hā ha faleʻi te ne ʻoange ki he kau finemuí fekauʻaki mo hono fakaafeʻi ʻo e niʻihi kehé ke nau haʻu kia Kalaisí? Fakaafeʻi e kau finemuí ke nau ʻeke ha faʻahinga fehuʻi pē ʻoku nau maʻu. (Te ke lava ʻo huluʻi e vitiō “Kuo Lahi Hoku Tāpuakí” ko e talifaki, pea aleaʻi ʻa e ivi tākiekina ʻoku lava ke tau maʻu ʻi hono tokoniʻi hotau ngaahi kaungāmeʻá ke nau tali ʻa e ongoongoleleí.)
3:25 -
Hiki ʻa e ngaahi fakamoʻoni fakafolofola mei he lēsoni ko ʻení ʻi he palakipoé. Kole ki he finemui takitaha ke fili ha taha ʻo e ngaahi potufolofolá, ako ia, pea tā ha fakatātā ʻokú ne fakafofongaʻi ʻa e meʻa ʻoku akoʻi mai ʻe he potufolofolá. Kole ki he kau finemuí ke nau vahevahe ʻa e ngaahi pōpoaki ʻo ʻenau potufolofolá, ʻo fakatatau mo ʻenau fakatātaá. Hili iá pea fakaafeʻi e finemui takitaha ke lau ʻene potufolofolá ki he kalasí pea vahevahe e meʻa ʻokú ne palani ke fai ke moʻui ʻaki iá.
-
Fakaafeʻi e finemui takitaha kimuʻa he kalasí ke ne ʻomi ha meʻa pe ha fakatātā ʻokú ne fakafofongaʻi ʻa e founga ʻe taha kuo faitāpuekina ai ʻe he ongoongoleleí ʻene moʻuí. Lolotonga e kalasí, lau fakataha ʻa e talanoa fekauʻaki mo e ngaahi foha ʻo ʻEletā David A. Bednar ʻi heʻene lea “Haʻu ʻo Mamatá.” Ko e hā naʻe fuʻu vēkeveke ai ʻa e tehiná ke peniʻeiti e nima hono kaungāmeʻá? Fakaafeʻi e kau finemuí ke vahevahe ʻa e ngaahi meʻa pe fakatātā ne nau ʻomí pea fakamatalaʻi e ngaahi tāpuaki ʻoku fakafofongaʻi ʻe he ngaahi meʻa ko ʻení. Poupouʻi kinautolu ke nau fakakaukau ki he kakai ʻoku nau ʻiloʻi kuo teʻeki ke nau maʻu ʻa e ngaahi tāpuaki ko ʻení, pea fakaafeʻi kinautolu ke nau faʻu ha palani ke vahevahe ʻa e ongoongoleleí mo kinautolu.
Kole ki he kau finemuí ke nau vahevahe ʻa e meʻa naʻa nau ako ʻi he ʻaho ní. ʻOku mahino nai kiate kinautolu e founga ke fakaafeʻi ai e niʻihi kehé ke haʻu kia Kalaisí? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ‘E ‘aonga nai ke tuku ha taimi lahi ange ʻi he kaveinga ko ‘ení?
Moʻui ʻaki e meʻa ʻoku tau akó
Fakaafeʻi e kau finemuí ke nau fakakaukau ki he founga te nau moʻui ʻaki ai e meʻa kuo nau ako he ʻaho ní. Hangē ko ʻení, ʻe lava ke nau:
-
Lotua ha ngaahi faingamālie ke vahevahe ai e ongoongoleleí mo aleaʻi ʻi ha kalasi he kahaʻú ʻa e ngaahi aʻusia naʻa nau maʻú.
-
Toʻotoʻo ki he akó ha ngaahi kaati tufa pea kumi ha ngaahi faingamālie ke fakaʻaongaʻi ai ia ke vahevahe ʻa e ongoongoleleí.
-
Ako e vahe 3 ʻo e Malangaʻaki ʻeku Ongoongoleleí ke teuteu ha lea ki ha niʻihi kehe fekauʻaki mo e ongoongolelei kuo toe fakafoki maí.
Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.
Ngaahi ʻEkitivitī Felāveʻi mo e Toʻu tupú
Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.