Te u lava fēfē ʻo kau atu ʻi he fakavavevaveʻi ʻo e ngāue ʻa e ʻEikí?

ʻOku tau moʻui ʻi he kuonga fakaʻosí, ʻi ha taimi ʻoku fakakakato ai ʻe he ʻEikí ʻEne talaʻofa: “Vakai, te u fakavavevaveʻi ʻa ʻeku ngāué ʻi hono taimí” (T&F 88: 73). ʻOku fakahoko ʻe he kau finemuí ha fatongia mahuʻinga ʻi he ngāué ni. ʻE lava ke tau kau atu ʻaki hano fakaafeʻi ʻo e kakai kotoa pē ke haʻu kia Kalaisi ʻo fakafou ʻi hono vahevahe ʻo e ongoongoleleí, fai ha tokoni faka-Kalaisi, fakamālohia e kau papi ului foʻoú, fakahaofi e kau māmālohí, mo fakahoko e ngaahi ouau fakamoʻui maʻá e kau pekiá.

Teuteuʻi fakalaumālie koe

Ko e hā ha fakamoʻoni kuó ke mātā ai ʻa hono fakavavevaveʻi ʻe he ʻEikí ʻa ʻEne ngāué ʻi hotau kuongá? Ko e hā ha ngaahi meʻa te ke lava vahevahe te ne malava ʻo ueʻi fakalaumālie e kau talavoú ke nau kau longomoʻui ʻi he ngāue ko ʻení?

Ko e hā e ngaahi talēniti mo e meʻa-foaki ʻokú ke fakatokangaʻi ʻi he kau finemuí te ne lava ʻo ʻai ke lelei ange ʻenau ʻunuaki ki muʻa e ngāue ʻa e ʻEikí? Ko e hā ʻoku nau ʻosi fakahoko ke nau kau ʻi he ngāue?

Ko e hā e ngaahi potufolofola mo e ngaahi maʻuʻanga tokoni kehe te nau fakalaumālie e kau finemuí ke nau kau ʻi he fakavavevaveʻi ʻo e ngāue ʻa e ʻEikí?

ʻIsaia 11:9; 1 Nīfai 13:37; 14:14 (Ngaahi kikite kau ki he ngāue ʻa e ʻEikí)

Mosaia 28:1–3 (ʻOku holi ʻa e ngaahi foha ʻo Mosaiá ke malanga ʻaki ʻa e ongoongoleleí)

Mōsese 1:39 (ʻOku fakamatala ʻe he ʻOtuá ʻEne ngāué)

T&F 138:56 (Ne mateuteu ʻa e fānau faivelenga ʻa e ʻOtuá ʻi he maama fakalaumālié ke ngāue ʻi he ngoue vaine ʻa e ʻEikí)

Bonnie L. Oscarson, “Kau Fefine ʻo Saione, Tuʻu Hake ʻi he Mālohi,” Ensign pe Liahona, Nōvema 2016, 12–14

Carol F. McConkie, “ʻI Hení ke Fai ha Ngāue Māʻoniʻoni,” Ensign or Liahona, Nov. 2015, 12–14

Linda K. Burton, “Fie maʻu Tokoni: Ha Nima mo ha Loto ke Fakavaveʻi e Ngāué,” Ensign pe Liahona, Mē 2014, 122–24

Ko Hono Fakavaveʻi e Ngāue ʻo e Fakamoʻuí

Ko e faiako ‘i he founga ‘a e Fakamo‘uí

Naʻe fai ‘e he Fakamoʻuí ‘a e ngaahi fehuʻi naʻá ne ueʻi Hono kau muimuí ke nau fakakaukau mo ongoʻi moʻoni. Naʻa nau ‘iloʻi naʻá Ne ‘ofa ‘iate kinautolu, pea naʻa nau ongoʻi fiemālie ke fakamatalaʻi ‘enau ngaahi fakakaukaú mo ‘enau ngaahi ongo fakatāutahá. Kapau te ke fakafanongo fakamātoato mo fakahā hoʻo mahuʻingaʻia ‘i he ngaahi tali mo e ngaahi ‘ilo ‘a e kau finemuí, te ke tokoniʻi kinautolu ke nau ongoʻi ‘a e ‘ofa ‘a e Fakamoʻuí.

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki hono mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukau pē ʻaʻau ke fakafeʻiloaki ʻaki e lēsoni ‘o e uike ní:

Tohiʻi e foʻi lea fakavavevaveʻi ʻi he palakipoé, pea kole ki ha tokotaha ke ne lau ʻa e Tokāteline mo e Ngaahi Fuakava 88:73. Fakaafeʻi e kau finemuí ke nau aleaʻi e ʻuhinga ʻo hono fakavavevaveʻi ʻo ha meʻa (ʻo ka ʻaonga, te nau lava ʻo kumi ʻa e foʻi leá ʻi ha tikisinali). Fehuʻi ki he kau finemuí pe ko e hā ʻenau fakakaukau ki he ʻuhinga ʻoku fie maʻu ai ke fakavavevaveʻi ʻa e ngāue ʻa e ʻEikí ʻi hotau kuongá ni.
Hiki he palakipoé, “Ko e Hā ʻa e Ngāue ʻa e ʻEikí?” Fakaafeʻi e kau finemuí ke nau omi ki he palakipoé ʻo tohi ha ngaahi tali ki he fehuʻi ko ʻení. Poupouʻi kinautolu ke tānaki atu ki he lisi ko ʻení ʻi heʻenau ako lahi ange lolotonga e lēsoni ko ʻení.

Ako fakataha

ʻE tokoni ʻa e ngaahi ʻekitivitī takitaha ʻi laló ke ʻiloʻi ʻe he kau finemuí ʻa e founga ʻe lava ke nau kau ai ʻi hono fakavavevaveʻi ʻa e ngāue ʻa e ʻEikí. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

ʻI ha ngaahi ʻaho siʻi kimuʻa, kole ki he kau finemuí ke nau vakai ki he konga ʻi he LDS.org ko e Ko Hono Fakavavevaveʻi e Ngāue ʻo e Fakamoʻuí pea toe vakaiʻi ha niʻihi ʻo e ngaahi maʻuʻanga tokoni aí. Fakaafeʻi kinautolu ke nau haʻu mateuteu ke vahevahe mo e kalasí ha meʻa mei he saití kuó ne ueʻi fakalaumālie kinautolu ke fie tokoni lahi ange ki he ngāue ʻa e ʻEikí.
Fakaafeʻi ʻa e finemui takitaha ke lau (fakataautaha pe ʻi ha ngaahi kulupu iiki) ʻa e taha ʻo e ngaahi talanoa ʻi he lea ʻa Sisitā Carol F. McConkie ko e “ʻI Hení ke Fai ha Ngāue Māʻoniʻoni ”. Te ke lava foki ʻo fakaafeʻi ha mēmipa ʻo e uōtí naʻá ne toki kau ki he Siasí pe naʻe toki mālohi he Siasí ke vahevahe ʻene ngaahi aʻusiá. Kapau ʻe lau ʻe he kau finemuí ʻa e ngaahi leá, ʻeke kiate kinautolu ke nau fakamatala nounou ʻa e ngaahi talanoá maʻá e toenga ʻo e kalasí pea aleaʻi e ngaahi meʻa naʻa nau ako fekauʻaki mo e kau atu ki he ngāue ʻa e ʻEikí. Ko e hā ʻoku akoʻi mai ʻe he ngaahi talanoa ko ʻení fekauʻaki mo e kau ʻi he ngāue ʻo e fakamoʻuí? Ko e hā e ngaahi founga ʻoku tau ʻosi kau ai?
Lau fakataha ʻa e lisi ʻo e ngaahi fakaʻilonga “fie maʻu tokoni” ʻi he lea ʻa Sisitā Linda K. Burton “Fie maʻu Tokoni: Ha Nima mo ha Loto ke Fakavaveʻi e Ngāué.” Fakaafeʻi e kau finemuí ke nau fili ha ngaahi meʻa mei he lisí pea faʻu ha ngaahi tuʻuaki ʻokú ne fakaafeʻi ʻa e kakaí ke nau kau mai ki he konga ko ia ʻo e ngāue ʻa e ʻEikí. Poupouʻi kinautolu ke fakakau ʻi heʻenau ngaahi tuʻuakí ha niʻihi ʻo e ngaahi taukei ʻoku fie maʻu ki hono fai e ngāué ni mo e ngaahi tāpuaki ʻoku maʻu mei aí. Fakaafeʻi kinautolu ke nau fakaʻaliʻali ʻenau ngaahi tuʻuakí pea ke nau vahevahe ha ngaahi aʻusia kuo nau foua ʻi he kau atu ki he ngāue ʻa e ʻEikí.

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. Ko e hā haʻanau ngaahi ongo pe fakakaukau? ʻOku mahino kiate kinautolu ʻa e founga te nau lava ai ʻo kau ʻi hono fakavavevaveʻi ʻa e ngāue e ʻEikí? ʻOku toe ʻi ai nai haʻanau ngaahi fehuʻi kehe? ‘E ‘aonga nai ke tuku ha taimi lahi ange ʻi he tokāteline ko ‘ení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:

Fakaafeʻi ha kaungāmeʻa ki ha ʻekitivitī ʻa e Mutualé pe ha polokalama kehe ʻa e Siasí.
Vahevahe ʻenau fakamoʻoni ki he ongoongoleleí mo ha kaungāmeʻa pe mēmipa ʻo e fāmilí.