Ko e hā ʻa Saione?

ʻOku fekau kitautolu ʻe he ʻEikí ke tau “feinga ke ʻomai pea fokotuʻu ʻa e ngāue ʻo Saioné” (T&F 6:6). ʻOku ʻuhinga ʻa e Saioné ki he kakai ʻo e ʻEikí ʻoku nau loto taha mo fakakaukau taha mo nofo fakataha ʻi he māʻoniʻoní. Te tau lava ʻo fokotuʻu ʻa Saione ʻaki haʻatau tanumaki e uouangatahá mo e ivi fakalaumālié ʻi hotau ngaahi ʻapí, pea mo e koló.

Teuteuʻi fakalaumālie koe

ʻOkú ke feinga fēfē ke moʻui ʻaki e ngaahi tefitoʻi moʻoni ʻo Saioné ʻi hoʻo moʻuí mo e fāmilí? Ko e fē taimi kuó ke ongoʻi ai ha laumālie ʻo e uouangatahá ʻi ha uooti pe ʻi ho fāmilí?

ʻOku uouangataha nai ʻa e kau finemuí ko ha ngaahi tokoua? Ko e hā te nau lava ʻo fai ke fokotuʻu ai ʻa Saioné? Ko e hā e ngaahi faingataʻa te nau ala fehangahangai mo ia?

Ako ʻi he faʻa lotu e ngaahi potufolofola mo e maʻuʻanga tokoni ko ʻení. Ko e hā ʻokú ke ongoʻi ʻe tokoni ke ʻilo ai ʻe he kau finemuí ʻa e founga ke fokotuʻu maʻu ʻaki e ngaahi ngāue ʻo Saioné?

Mōsaia 18:21; T&F 38:26 – 27 (ʻOku totonu ke tau fekumi ki he uouangatahá)

1 Nīfai 13:37; T&F 6:6 (Ko e feinga ke ʻoatu ʻa Saioné)

4 Nīfai 1:1 – 18 (Nofo fakataha e kau Nīfaí mo e kau Leimaná ʻi ha tuʻunga ʻoku hangē ko Saioné)

T&F 97:21; Mōsese 7:18 (Ko e hā ʻa Saione?)

Benjamín De Hoyos, “Ke Hoko ʻEtau Māmá ko ha Fuka ki he Ngaahi Puleʻangá,” Ensign pe Liahona, Mē 2017, 124–26

Jeffrey R. Holland, “Ngaahi Hiva ʻoku Hivaʻi mo ʻIkai Hivaʻí,” Ensign pe Liahona, Mē 2014, 49–51

D. Todd Christofferson, Haʻu ki Saione, Ensign pe Liahona, Nōvema 2008, 37 – 40

Bonnie L. Oscarson, “Feohi Fakatokouá: ʻOku Tau Fie maʻu Moʻoni e Niʻihi Kehé,” Ensign pe Liahona, Mē 2014, 119–121

“Saione, Tuʻu Maʻu ʻi he Tuí (2004), 174–175

“Kau Fefine ʻo Saioné, ”Ngaahi Himí, fika 201.

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki hono mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ‘o e uike ní:

Hiki e foʻi lea “Saioné” ʻi he palakipoé, pea kole ki he kau finemuí ke nau hiki ha ngaahi foʻi lea ʻe haʻu ki heʻenau fakakaukaú ʻi heʻenau fakakaukau ki he Saioné. Fakaafeʻi kinautolu ke nau lau e peesi 174–75 ʻo e Tuʻu Maʻu ʻi he Tuí ʻo tānaki atu ki heʻenau fakaʻuhingá. Ko e hā e fatongia ʻo kitautolu fafiné ʻi hono langa ʻo Saioné?
Hivaʻi fakataha ʻa e veesi ʻuluaki ʻo e “Kau Fefine ʻo Saioné” (Ngaahi Himi, fika 201). Kole ki he kau finemuí ke nau kumi ha ngaahi foʻi lea pe kupuʻi lea he himí ʻokú ne akoʻi fekauʻaki mo Saione. Poupouʻi ʻa e kau finemuí ke nau vahevahe e meʻa ʻoku nau tui ko honau fatongia ia ʻi hono fokotuʻu ha ʻapi, uooti, pe kolo, hangē ha Saioné.

Ako fakataha

ʻE tokoni e ʻekitivitī takitaha ʻi laló ke fakamahino ki he kau finemuí ʻa e ʻuhinga ʻo e Saione. Muimui ki he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

Ko e naʻe akoʻi ʻe ʻEletā Jeffrey R. Holland ʻi heʻene lea “Ngaahi Hiva ʻoku Hivaʻi mo ʻIkai Hivaʻí” ʻo fekauaki mo e founga ʻoku hangē ai e Siasí ko ha kuaeá? Ke tokoni ke mahino ki he kau finemuí e fakatātā ʻa ʻEletā Hōlaní, fakaafeʻi ha tokotaha pe tokolahi ange kuo nau hiva ʻi ha kuaea, ke nau vahevahe atu ʻenau fakakaukau ki he founga ʻoku tokoni ai hono hivaʻi ha kuaeá, ke mahino kiate kinautolu e fie maʻu ke ʻi ai ha kehekehe ʻi he puleʻanga ʻo e ʻOtuá. Te tau langa fēfē hake ʻa Saione ʻaki hono “fakaʻatā” ha feituʻu ʻi heʻetau kalasí, ʻi heʻetau kulupu ʻo e Kau Finemuí pe ʻi he uōtí, maʻá e kakai ʻoku nau ongoʻi hangē ʻoku ʻikai talitali lelei kinautolú? Ko e hā ha faleʻi naʻe fai ʻe ʻEletā Hōlani ʻe ala tokoni ke tau fai ʻeni?
Naʻe fai ʻe ʻEletā Benjamín De Hoyos ʻa e fehuʻi ko ʻení heʻene lea “Ke Hoko ʻEtau Māmá ko ha Fuka ki he Ngaahi Puleʻangá”: “Ko e hā ha ngaahi meʻa mahuʻinga ke fai ʻi he momeniti fakaʻofoʻofa ko ʻeni ko hono langa hake ʻo Saioné mo e tānaki ʻo ʻIsilelí?” Ke tokoni ki hono maʻu ʻe he kau finemuí e ngaahi tali ki he fehuʻí ni, te nau lava ʻo lau e palakalafi ʻe 11 fakamuimuitaha ʻo e lea ʻa ʻEletā De Hoyos. Te tau lava fēfē ʻo langa hake ʻa Saione ke lelei ange ʻi he ngaahi founga ʻe tolu naʻá ne vahevahe maí?
Lau fakakalasi ʻa e T&F 38: 27 mo e Mōsese 7:18. ʻOku ʻuhinga ki he hā ke loto taha mo fakakaukau tahá? Ko e hā ʻoku hoko ai ʻa e uouangatahá ko ha konga mahuʻinga ʻo hono langa hake ʻo Saioné? Vahevahe ʻi he kau finemuí ha taha ʻo e ngaahi lea konifelenisi he lēsoni ko ʻení pea kole ange ke nau kumi ai ha ngaahi tefitoʻi moʻoni ʻe ala tokoni ke tau aʻusia ai ha uouangataha ʻoku lahi angé ʻi hotau fāmilí mo e kalasi ʻo e Kau Finemuí. Fakaafeʻi e kau finemuí ke nau tohiʻi he palakipoé e ngaahi tefitoʻi moʻoni te nau maʻú. Ko e hā ha ngaahi tūkiaʻanga ʻokú ne taʻofi e kau finemuí mei hono aʻusia e uouangatahá? Te nau lava fēfē ʻo ikunaʻi e ngaahi fakatūkiaʻanga ko ʻení? Poupouʻi e kau finemuí ke nau fokotuʻu ha ngaahi taumuʻa fakataautaha ke nau ngāueʻaki ha taha ʻo e ngaahi tefitoʻi moʻoni ko ʻení, ke fakatupulaki ʻaki e uouangataha honau ngaahi fāmilí. Mou ngāue fakataha ke fokotuʻu ha taumuʻa tatau ke mou uouangataha ai ʻi hoʻomou hoko ko ha kalasí.
Lau fakakalasi ʻa e ʻuluaki palakalafi ʻe nima ʻo e lea ʻa ʻEletā D. Todd Christofferson ko e “Haʻu ki Saione,” ke kumi ai e ngaahi tali ki he fehuʻi, “ʻOku ʻuhinga ki he hā ke hola mei Pāpilone ʻo haʻu ki Saioné?” Vahevahe ʻa e kalasí ki ha kulupu ʻe tolu pea vahe ki he kulupu takitaha ke nau lau ʻa e konga he leá ki he “Uouangatahá,” “Māʻoniʻoní” pe ko e “Tokanga ki he Masivá.” Fakaafeʻi ke nau aleaʻi ʻi heʻenau takitaha kulupu, ha ngaahi meʻa ʻe lava ke nau fai ke nau fakaʻaongaʻi ai e ngaahi tefitoʻi moʻoni ko ʻení ke langa ʻaki ʻa Saione ʻi honau takitaha ʻapi he lolotongá ni mo e kahaʻú. Kole ange ke nau vahevahe ki he toenga ʻo e kalasí e ngaahi meʻa naʻa nau aleaʻí.
Vahevahe ʻa e kalasí ki ha kulupu ʻe ua. Kole ki he kulupu ʻe taha ke nau lau mo aleaʻi ʻa e Mōsaia 18:21 mo e Tokāteline mo e Ngaahi Fuakava 97:21, pea kole ki he kulupu ʻe tahá ke nau lau mo aleaʻi ʻa e Tokāteline mo e Ngaahi Fuakava 38:27 pea mo e Mōsese 7:18. Fakaafeʻi e ongo kulupú ke na palani ha lēsoni fakataumuʻa te nau lava ʻo fakaʻaongaʻi ke akoʻi ʻaki ki he toenga ʻo e kalasí ʻa e meʻa ne nau ako mei heʻenau ongo potu folofolá (kapau ʻoku nau fie maʻu tokoni, vahevahe ange ʻa e “Fakaʻaongaʻi e Ngaahi Talanoá mo e Sīpingá ke Akoʻi ʻaki e Ngaahi Tefitoʻi Moʻoni ʻo e Ongoongoleleí” ʻi he peesi 22 ʻo e Ko e Faiako ʻi he Founga ʻa e Fakamoʻuí). Kole ange ke nau fevahevaheʻaki ʻenau ngaahi fakakaukaú. Ko e hā ʻoku nau ako mei he ngaahi potu folofola ko ʻení, ʻe lava ke tokoni ke nau langa hake ai ʻa Saione ʻi honau ngaahi fāmilí, ʻenau kalasí pea mo honau uōtí pe koló?
Fakaafeʻi e kau finemuí ke nau lau e 4 Nīfai 1:1–18 pea hiki ʻi he palakipoé ha ngaahi foʻi lea pe kupuʻi lea ʻokú ne fakamatalaʻi e sosaieti hangē ko Saioné naʻe fokotuʻu ʻe he kau Nīfaí mo e kau Leimaná hili e hāʻele mai ʻa Kalaisí. Fakaafeʻi kinautolu ke nau lisi ha ngaahi meʻa pau ʻe lava ke nau fai fakafoʻituitui pe fakakalasi ke moʻuiʻaki ai e ngaahi tefitoʻi moʻoni ko ʻení pea poupouʻi ʻa e niʻihi kehé ke nau fai foki e meʻa tatau.

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. Ko e hā ʻenau ongoʻi pe fakakaukau ki aí? ʻOku mahino nai kiate kinautolu e meʻa ko e Saione? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui ʻaki fēfē nai ʻa e meʻa kuo nau ako he ʻaho ní. Hangē ko ʻení, te nau lava ʻo:

Tokoni ki ha taha ʻoku ʻikai ke ne ʻongoʻi ʻoku fakakau ia ʻi he feohi ʻa honau kaungāmeʻá.
Fakamālohia ha fetuʻutaki mo ha mēmipa pe kaungāmeʻa ʻo e fāmilí (vakai, ngaahi meʻa ʻoku fie maʻu ke aʻusia ʻi he tuʻunga ʻulungaanga mahuʻinga ʻi he Natula Faka-ʻOtuá fika 3 ʻi he Fakalakalaka Fakatāutahá).

Vahevahe mo e kau finemuí ʻa e meʻa te nau ako ki ai he uike ka hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.