Ko e hā ʻoku mahuʻinga ai e angamaʻá?

Ko e angamaʻá ko e haohaoa fakasekisuale pea ʻoku kau ai e maʻa ʻa e fakakaukaú, leá mo e tōʻongá. Naʻe fokotuʻu ʻe he ʻOtuá ʻa e feohi fakaesinó ki hono fakatupu ʻo e fānaú pea ke fakahaaʻi ai ʻa e feʻofaʻaki ʻi he vā ʻo e husepānití mo e uaifí. Kuo tuʻutuʻuni ʻe he ʻOtuá ke fakatatali e feohi fafale fakasekisualé ki he malí. ʻI heʻetau maʻa fakasekisualé ʻoku tau taau ai ke maʻu e takaua ʻa e Laumālie Māʻoniʻoní, pea ʻoku maluʻi ai kitautolu mei he fakatuʻutāmaki fakaeloto mo fakalaumālie ʻo e angahala fakasekisualé.

Teuteuʻi fakalaumālie koe

Kuo tāpuekina fēfē koe ʻi hono moʻui ʻaki e fono ʻo e angamaʻá?

Ko e hā e ngaahi tokāteline ʻe tokoni lelei taha ki he kau finemuí ke nau ongoʻi e mahuʻinga ʻo e angamaʻá? Ko e hā ha ngaahi akonaki hala ʻoku fakaʻaliʻali kiate kinautolu ke mōlia e mahuʻinga ʻo e angamaʻá?

Ako ʻi he faʻa lotu ʻa e ngaahi maʻuʻanga tokoni ko ʻení. Te ke tokoniʻi fēfē e kau finemuí ke mahino kiate kinautolu mo nau ongoʻi e mahuʻinga ʻo e angamaʻá?

Sēnesi 39:7–21 (Naʻe hola ʻa Siosefa mei he angahala fakasekisualé)

1 Nīfai 10:21 (Kuo pau ke tau haohaoa ke nofo mo e ʻOtuá)

ʻAlamā 39:1–13 (Ko ha meʻa fakalielia ʻa e angahala fakasekisualé)

Molonai 9:9 (ʻOku mahuʻinga mo lelei taha ʻa e Angamaʻá)

T&F 46:33; 121:45–46 (Ko e mahuʻinga ʻo e angamaʻá)

Linda S. Reeves, “Taau mo Hotau Ngaahi Tāpuaki Kuo Tala ʻofa Maí,” Ensign pe Liahona, Nōvema 2015, 9–11

Boyd K. Packer, “Ko e Palani ʻo e Fiefiá,” Ensign pe Liahona, Mē 2015, 26–28.

David A. Bednar, “ ʻOku Mau Tui ki he Angamaʻá,” Ensign pe Liahona, Mē 2013, 41.

Jeffrey R. Holland, “Anga-Maʻa Fakafoʻituituí,” Ensign, Nov. 1998, 75–78; Liahona, Oct. 2000, 40–43

Jeffrey R. Holland, “Tokoniʻi ʻo Kinautolu ʻOku Fefaʻuhi mo e Femanakoʻaki ai pē ʻa Tangata mo Tangata pe Fefine mo e Fefiné,” Ensign pe Liahona, ʻOkatopa 2007, 40–43

“Valá mo e Fōtungá,” “Ko e Haohaoa Fakasekisualé,” Ki Hono Fakamālohia e Toʻu Tupú (2010), 6–8, 35–37

“Angamaʻá,” Tuʻu Maʻu ʻi he Tuí (2004), 7–12

Vitiō: “ʻOku ou Fili Ke u Maʻa”; “Angamaʻá: Ko e hā e Fakangatangatá?”; “Falala Moʻoní”

4:20

NaN:NaN

3:52

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa ku nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteline

Fili mei he ngaahi fakakaukau ko ʻení pe ko ha fakakaukau pē ʻaʻau ke fakafeʻiloaki ʻaki e lēsoni ‘o e uike ní:

Fakaafeʻi e kau finemuí ke nau sio he foʻi vitiō ko e “ʻOku ou Fili Ke u Maʻa”. ʻI he kamata ʻa e kalasí, fakaafeʻi ʻa e kau finemuí ke nau vahevahe e ngaahi meʻa kuo nau akó pe ko haʻanau ngaahi fehuʻi.

4:20
Fakaafeʻi ha finemui ke ne puke hake ha fakatātā ʻo Siosefa ʻokú ne taʻofi e uaifi ʻo Potifaá (vakai, Tohi Fakatātā ʻo e Ongoongoleleí, 11) pea fakamatalaʻi fakanounou ʻa e talanoá ʻi he lea pē ʻaʻana. Ko e hā naʻe fai ʻe Siosefa ke tauhi maʻu ʻene moʻui maʻá? Ko e hā ne fāifai pea hoko ko e ola ia e angatonu ʻa Siosefá? Ko e hā ne mei hokó kapau naʻe ʻikai ke ne tauhi maʻu ʻene ngaahi fuakavá? Ko e hā ʻoku mahuʻinga ai ke tauhi maʻu e angamaʻá?

Ako fakataha

‘E tokoni e ngaahi ‘ekitivitī takitaha ‘i laló ki he kau finemuí ke nau ako kau ki he fono ʻo e angamaʻá. Muimui ʻi he tataki ‘a e Laumālié, ʻo fili ha ʻekitivitī ʻe taha pe toe lahi ange ‘e ‘aonga lahi taha ki hoʻo kalasí:

Fakaafeʻi ha niʻihi ʻo e kau finemuí ke lau ʻa e ngaahi potufolofola kau ki he angamaʻá (hangē ko ia ʻoku fokotuʻu atu ʻi he fokotuʻutuʻu ko ʻení); fakaafeʻi ha niʻihi kehe ke nau lau ʻa e “Ko e Haohaoa Fakasekisuale” ʻi he Ki Hono Fakamālohia ʻo e Toʻu Tupú; pea fakaafeʻi ʻa e toengá ke nau lau ʻa e “Angamaʻá” ʻi he Tuʻu Maʻu ʻi he Tuí. Kole ke nau kumi e ngaahi tali ki he fehuʻi “Ko e hā ʻoku mahuʻinga ai e angamaʻá ki he ʻEikí?” pea vahevahe ʻa e meʻa ʻoku nau maʻú. ʻOku kehekehe fēfē ʻa e ngaahi tefitoʻi moʻoni ʻi he ngaahi potufolofola mo e ngaahi maʻuʻanga tokoni ko ʻení mei he meʻa ʻoku akoʻi ʻe he māmaní kau ki he angamaʻá? Ko e hā ʻoku ako ʻe he kau finemuí mei he ngaahi maʻuʻanga tokoni ko ʻení ʻa ia te nau tokoniʻi kinautolu ke nau ʻiloʻi ʻa e loí ʻi he fakakaukau ʻa e māmaní?
Huluʻi e vitiō “Angamaʻá: Ko e Hā e Fakangatangatá? Hili e vitioó, kole ange ki he kau finemuí ke nau fakamatalaʻi e meʻa ʻoku nau ako mei he ngaahi fakafehoanaki (hangē ko e vaitoó, vakapuná, pe kalokatailé) kau ki he fono ʻo e angamaʻá. Ko e hā mo ha toe meʻa ʻoku nau ako mei he vitiō ko ʻení? Fakaafeʻi ke nau fakakaukau pea vahevahe ha ngaahi meʻa fakafehoanaki kehe ʻoku akoʻi ai e mahuʻinga ʻo e angamaʻá.

NaN:NaN
Fakaafeʻi e kau finemuí ke nau sio ʻi he “ʻOku ou Fili Ke u Maʻa” pe “Falala Moʻoní,” ʻo kumi e ngaahi tali ki he fehuʻi “Ko e hā ʻoku mahuʻinga ai ʻa e angamaʻá?” Kole ange ke nau vahevahe ʻenau ngaahi fakakaukaú mo fakafehoanaki ʻa e ngaahi fakakaukau ʻoku fakahaaʻi ʻi he vitioó mo e meʻa ʻoku fie maʻu ʻe he māmaní ke tui ki ai e kau finemuí. Ko e hā ʻe lava ke fai ʻe he kau finemuí ke nau fepoupouʻaki ai ʻi heʻenau feinga ke talangofua ki he fono ʻo e angamaʻá?

4:20

3:52
Vahevahe fakakulupu e kau finemuí. ʻOange ki he kulupu takitaha taha ha konga e ngaahi vahe ʻo e lea ʻa Palesiteni Boyk K. Packer “Ko e Palani ʻo e Fiefiá,” lea ʻa ʻEletā David A. Bednar “ ʻOku Mau Tui ki he Angamaʻá,” pe lea ʻa Sisitā Linda S. Reeves “Taau mo Hotau Ngaahi Tāpuaki Kuo Tala ʻofa Maí.” ʻAi ke ako ʻe he kulupu takitaha ʻenau kongá pea tali ʻa e fehuʻí ni “Ko e hā ʻoku mahuʻinga ai ke maʻa fakasekisualé?” Fakaafeʻi kinautolu ke vahevahe ha ngaahi fakamatala pe moʻoni ʻoku nau pehē ʻoku ʻuhingamālie pe mahuʻingá. Te nau fakaʻaongaʻi fēfē nai e meʻa ʻoku nau akó ke tokoni ʻi hono fakamahino ki honau kaungāmeʻá e ʻuhinga ʻoku mahuʻinga ai kiate kinautolu e angamaʻá?
Kole ki he kau finemuí ke nau fakaʻaongaʻi ʻa e konga ki he “Valá mo e Fōtungá” ʻi he Ki Hono Fakamālohia ʻo e Toʻu Tupú ke tali e ngaahi fehuʻi hangē “Ko e hā ʻa e ngaahi tuʻunga moʻui ʻa e ʻEikí fekauʻaki mo e vala tāú?” “Ko e hā ʻoku mahuʻinga ai ke ke muimui ki he ngaahi tuʻunga moʻui ko ʻení?” mo e “Ko e hā e founga ʻoku fakahaaʻi pe tākiekina ʻetau tōʻonga fakakaukau ki he fono ʻo e angamaʻá?” Kole ange ke nau vahevahe ʻenau ngaahi talí pea fakalaulauloto ki he meʻa te nau lava ʻo fai ke muimui kakato ange ai ki he ngaahi tuʻunga moʻui ko ʻení.
Fehuʻi ange ki he kau finemuí pe te nau tokoniʻi fēfē ha kaungāmeʻa ʻoku fefaʻuhi mo e fetokangaʻaki ʻa e tangata mo e tangatá pe fefine mo e fefiné. Fakaafeʻi ke nau kumi ha ngaahi fakakaukau mei he fakamatala ʻa ʻEletā Jeffrey R. Holland “Tokoniʻi ʻo Kinautolu ʻoku Fefaʻuhi mo e Femanakoʻaki pē ʻa Tangata mo Tangatá pe Fefine mo Fefiné.” Poupouʻi ke nau fai ha tohi ʻe lava ʻo tokoni ki honau kaungāmeʻá. Ko e hā ha toe meʻa ʻoku nau ako mei he fakamatala ʻa ʻEletā Hōlaní?

Kole ki he kau finemuí ke nau vahevahe ʻa e meʻa naʻa nau ako ʻi he ʻaho ní. ʻOku mahino lelei ange nai kiate kinautolu ʻa e fono ʻo e angamaʻá? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke toe tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:

Fakakakato ha taha ʻo e ngaahi meʻa ke aʻusia ʻi he tuʻunga ʻulungaanga mahuʻinga ʻo e Angamaʻá (Fakalakalaka Fakatāutahá, 69–71).
ʻAi ha lisi ʻo e ngaahi meʻa te nau fai pe taʻe fai ke nau kei maʻa fakasekisuale aí.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.