Ko e hā ʻoku mahuʻinga ai e mali temipalé?

ʻI he palani ʻo e fiefia ʻa ʻetau Tamai Hēvaní, ko e founga pē ʻe taha ke maʻu ai ʻa e hakeakiʻí ko e fuakava foʻou mo taʻengata ʻo e mali fakasilesitialé (vakai, T&F 131:1–3). ʻI he taimi ʻoku sila ai ha tangata mo ha fefine ʻi he temipalé ki taimi mo e kotoa ʻo ʻitānití, ʻokú na fakapapauʻi ai ʻe hokohoko atu hona vā fetuʻutakí ʻo taʻe ngata kapau ʻokú na tauhi moʻoni ʻena ngaahi fuakavá. ʻOkú na ʻilo he ʻikai ha meʻa te ne teitei fakamāvaeʻi kinaua ʻo taʻengata naʻa mo e maté.

Teuteuʻi fakalaumālie koe

Ko e hā ʻoku mahuʻinga ai kiate koe ʻa e mali temipalé? Ko e hā ha ngaahi tāpuaki ʻoku ʻoatu ʻe he ouaú ni kiate koe mo ho fāmilí?

Ko e hā ha ngaahi sīpinga māʻoniʻoni ʻo e mali temipalé ʻoku maʻu ʻe he kau finemuí? Te ke tokoniʻi fēfē kinautolu ke fakatōkakano ha holi lahi ange ke sila ʻi he temipalé?

Ako ʻi he faʻa lotu e ngaahi potufolofola ko ʻení mo e ngaahi maʻuʻanga tokoni kehé. Ko e hā ha ngaahi maʻuʻanga tokoni te ne tokoniʻi e kau finemuí ke mahino kiate kinautolu ʻa e mahuʻinga ʻo e mali temipalé pea fakatupulaki ʻenau fakapapau ke mali ʻi he temipalé ʻi ha ʻaho?

T&F 49:16–17 (ʻOku tokoni e nofomalí ke fakahoko e taumuʻa ʻo e fakatupú)

T&F 131:1–4; 132:15–21 (ʻOku fie maʻu e mali taʻengatá ki he hakeakiʻí)

“Ko e Fāmilí: Ko ha Fanongonongo ki Māmani,” Ensign pe Liahona, Nōvema 2010, 129

L. Tom Perry, “ ʻUhinga ʻOku Mahuʻinga ai e Malí mo e Fāmilí — He Feituʻu Kotoa pē ʻo e Māmaní,” Ensign pe Liahona, Mē 2015, 39 – 42

Henry B. Eyring, “Ngaahi Fāmili kuo Fakafuakavaʻí,” Ensign pe Liahona, Mē 2012, 62–65

Richard G. Scott, “Ko e Ngaahi Tāpuaki Taʻengata ʻo e Malí,” Ensign pe Liahona, Mē 2011, 94–97

“Naʻe Mahuʻinga ʻEma Mali Temipalé ke Ma Fai ha Faʻahinga Meʻa Pē,” Liahona, ʻOkatopa 2010, 69–70

“Malí,” Tuʻu Maʻu ʻi he Tuí (2004), 113–117

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa ku nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko ha fakakaukau pē ʻaʻau ke fakafeʻiloaki ʻaki e lēsoni ‘o e uike ní:

Hiki ʻi he palakipoé, “Ko e hā ʻoku mahuʻinga ai e mali temipalé?” kimuʻa pea toki aʻu mai e kau finemuí ki he kalasí?” Fakaafeʻi ke nau fakakaukau ki he fehuʻí ni ʻi heʻenau lau “Naʻe Mahuʻinga ʻEma Mali Temipalé ke Ma Fai ha Faʻahinga Meʻa Pē.” Ko e hā naʻe fuʻu mahuʻinga ai ʻa e mali temipalé ki he ongomeʻa mali ʻi he talanoa ko ʻení? Poupouʻi e kau finemuí ke vahevahe ʻenau ngaahi fakakaukaú.
Kapau ʻe lava, fakaʻaliʻali ha fakatātā mei he ʻaho naʻá mo sila ai ʻi he temipalé, pea fakamatalaʻi ha niʻihi ʻo e ngaahi fakakaukau mo e ngaahi ongo naʻá ke maʻú (pe fakaʻaliʻali ha fakatātā ʻo ha fefine mo ha tangata mali ʻi muʻa he temipalé [vakai, Tohi Fakatātā ʻo e Ongoongoleleí, 120]). Fehuʻi ange ki he kau finemuí pe ko e hā ʻoku nau tui ai ʻoku mahuʻinga e mali temipalé.

Ako fakataha

ʻE lava ke tokoni e ngaahi ʻekitivitī takitaha ʻi laló ki he kau finemuí ke nau ako e ʻuhinga ʻoku mahuʻinga ai ʻa e mali temipalé. Muimui ʻi he tataki ‘a e Laumālié, ʻo fili ha ʻekitivitī ʻe taha pe toe lahi ange ‘e ‘aonga lahi taha ki hoʻo kalasí:

Fakaafeʻi e kau finemuí ke nau fakakaukauloto ʻoku ʻi ai hanau kaungāmeʻa ʻoku fifili pe ko e hā ʻoku ʻi ai ai ʻenau taumuʻa ki ha mali temipalé kae ʻikai ko ha mali fakapuleʻanga peé. Kole ange ke nau lau ʻa e ngaahi potufolofola ʻoku fokotuʻu mai ʻi he fokotuʻutuʻu ko ʻení pe “Ko e Fuakava Foʻou mo Taʻengata ʻo e Malí” ʻi he Tuʻu Maʻu ʻi he Tuí (peesi 114 - 5) pea kumi e ngaahi foʻi lea mo e ngaahi kupuʻi lea te nau lava ʻo fakaʻaongaʻi ke fai ʻaki ha tohi ki honau kaungāmeʻá. Fakalotolahiʻi kinautolu ke nau fakamatalaʻi ʻi heʻenau tohí ʻa e mahuʻinga ʻo e mali taʻengatá. Fakaafeʻi kinautolu ke nau vahevahe mo e kalasí e meʻa naʻa nau tohi ʻi heʻenau tohí.
ʻOmai ha meʻa ʻe ua pe tolu (pe ha fakatātā ʻo ha ngaahi meʻa) ʻoku nau fakatātaaʻi e ngaahi tuʻunga kehekehe ʻo e tolonga ha meʻa (hangē ko ha sēpuni pelesitiki mo ha sēpuni ukamea). Kole ange ki he kau finemuí ke nau aleaʻi e ʻuhinga ʻoku lelei ange ai e meʻa ʻoku tolongá ʻi he meʻa ʻoku ʻikai tolonga fuoloá. Ko e hā ʻene fekauʻaki mo e houʻeiki fafiné? Kole ki he kau finemui ke lau, mamata, pe fanongo ki ha ngaahi konga ʻo e lea ʻa ʻEletā L. Tom Perry “ ʻUhinga ʻOku Mahuʻinga Ai e Malí mo e Fāmilí — He Feituʻu Kotoa pē ʻo e Māmaní.” Fehuʻi ange ki he kau finemuí pe ko e hā e ʻuhinga ʻoku nau fie mali temipale aí.
ʻOange ki he finemui takitaha ha tatau ʻo e lea ʻa ʻEletā Richard G. Scott “Ko e Ngaahi Tāpuaki Taʻengata ʻo e Malí.” Ko e hā e ongo ʻa ʻEletā Sikoti ʻo kau ki hono hoa taʻengatá? Ko e hā e meʻa ʻoku fakafiefia ki he kau finemuí ʻo kau ki hono vā fetuʻutaki mo hono uaifí? Kole ange ke nau fakalaulauloto ki ha meʻa ke fai ke maʻu ai ha vā fetuʻutaki hangē ko ʻEletā mo Sisitā Sikotí.
Lau fakakalasi ʻa e T&F 131:1–4 mo e “Ko e Fuakava Foʻou mo Taʻengata ʻo e Malí” ʻi he Tuʻu Maʻu ʻi he Tuí (peesi 114), ʻo kumi e ngaahi tali ki he fehuʻí ni “Ko e hā ʻoku mahuʻinga ai e mali temipalé?” Kapau e fie maʻu, tokoniʻi e kau finemuí ke nau fakaʻuhingaʻi ha ngaahi lea pe ngaahi kupuʻi lea ʻoku ʻikai ke nau maheni mo ia. Kole ki he kau mēmipa ʻo e kalasí ke nau hiki ha ngaahi meʻa te nau ala taʻofi e kau finemuí mei he mali he temipalé. Ko e hā te nau lava ʻo fai he taimí ni ke fakapapauʻi ai te nau mali ʻi he temipalé?

Kole ki he kau finemuí ke nau vahevahe e meʻa naʻa nau ako he ʻaho ní. ʻOku mahino nai kiate kinautolu ʻa hono mahuʻinga ʻo e mali temipalé? Ko e hā haʻanau ngaahi ongo pe fakakaukau? ʻOku toe ʻi ai nai mo haʻanau ngaahi fehuʻi kehe? ʻE ʻaonga nai ke toe tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:

Fai ha tohi kiate kinautolu pē ke toki fakaava pē kimuʻa honau ʻaho malí, ʻo fakahaaʻi ai ʻa e mahuʻinga ʻo ha mali temipale pea mo ʻenau ngaahi holi he lolotonga ní ke maʻu e taumuʻa māʻoniʻoni ko ʻení .
Fokotuʻu ha fakatātā ʻo e temipalé ʻi ha feituʻu te nau lava ʻo toutou sio ki ai, pea fokotuʻu ofi ki he fakatātaá ha fakamatala faingofua ʻo fakahaaʻi ai ʻenau taumuʻa mo ʻenau fakapapau ke mali ʻi he temipalé ʻi ha ʻaho.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.