Te u teuteu fēfē he taimí ni ke u hoko ko ha uaifi mo ha faʻē anga māʻoniʻoni?
Ke teuteu ke hoko ko ha uaifi mo ha faʻē anga māʻoniʻoní, ʻoku totonu ke tukutaha e tokanga ʻa e kau finemuí ʻi he Fakamoʻuí mo hono fakatupulaki e ngaahi ʻulungaanga faka-Kalaisí. ʻOku pehē ʻe he fanongonongo ki he fāmilí “ʻoku faʻu mo pukepuke ʻa e nofomalí mo e ngaahi fāmili ʻoku fiefiá ʻi he ngaahi tefitoʻi moʻoni ʻo e tuí, lotú, fakatomalá, faʻa fakamolemolé, fakaʻapaʻapá, ʻofá, manavaʻofá, ngāué pea mo e ngaahi ʻekitivitī ʻoku fakatupulakí. … Ko e tefitoʻi fatongia ʻo e ngaahi faʻeé ke lehilehiʻi hake ʻa ʻenau fānaú” (“Ko e Fāmilí: Ko ha Fanongonongo ki Māmani,” Ensign pe Liahona, Nōvema 2010, 129).
Teuteuʻi fakalaumālie koe
Ko e hā kuó ke fai, pea ko e hā ʻokú ke lolotonga fai, ke teuteuʻi koe ke hoko ko ha uaifi mo ha faʻē? Kuo faitāpuekina fēfē hoʻo moʻuí ʻi hoʻo teuteú?
Ko e hā ʻoku lolotonga fai ʻe he kau finemui ʻi hoʻo kalasí (pe ko e hā naʻa nau lava ke fai) ke teuteu ki he nofomalí mo e fatongia fakafaʻeé? Ko e hā haʻanau ngaahi fehuʻi kau ki he teuteu ki he nofomalí mo e fatongia fakafaʻeé?
Ako ʻi he faʻa lotu e ngaahi potufolofola mo e maʻuʻanga tokoni ko ʻení. Ko e hā e meʻa ʻokú ke ongoʻi ʻe tokoni ki he kau finemuí ke nau teuteu ke hoko ko ha uaifi mo ha faʻeé?
Lea Fakatātā 31:10–31; ʻAlamā 56:47–48; Molonai 7:45–46; T&F 88:123–25 (Ngaahi ʻulungaanga ʻo e kau fafine anga māʻoniʻoní)
T&F 88:78–80, 118; 90:15 (Fekumi ke ako)
Joy D. Jones, “Ko ha Toʻu Tangata ʻOku Nau Fakafepakiʻi e Angahalá, ” Ensign pe Liahona, Mē 2017, 87–90
K. Brett Nattress, “ ʻIkai ha Fiefia Lahi Ange he ʻIloʻi ʻOku Nau ʻIlo Ki aí,” Ensign pe Liahona, Nov. 2016, 119–21
Jeffrey R. Holland, “Vakai ki Hoʻo Faʻeé,” Ensign pe Liahona, Nōvema 2015, 47–50
M. Russell Ballard, “Ngaahi Faʻeé mo e ʻOfefiné,” Ensign pe Liahona, Mē 2010, 18–21
“Akó,” Ki Hono Fakamālohia ʻo e Toʻu Tupú (2011), 9
Vitiō: “Tuʻunga ko e Faʻeé: Ko ha Hoa Ngāue Taʻengata mo e ʻOtuá”; “Loving God’s Children”; “A Mother’s Hope; “Faʻē ʻi ʻIsileli”
Ko e faiako ‘i he founga ‘a e Fakamo‘uí
Hili ha ʻaho ʻe taha ʻo e faiako ʻa e Fakamoʻuí, naʻá Ne fakaafeʻi Hono kau muimuí ke nau foki ki ʻapi pea teuteuʻi kinautolu ke nau foki mai ʻo ako lahi ange. Ko e hā te ke lava ʻo fai ke poupouʻi e kau finemuí ke nau haʻu mateuteu ki he kalasí ke ako fakataha?
Vahevahe ʻo e ngaahi aʻusiá
Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa ku nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó, mo tokoniʻi kinautolu ke nau teuteu ke ako lahi ange.
Fakafeʻiloaki e tokāteliné
Fili mei he ngaahi fakakaukau ko ʻení pe ko ha fakakaukau pē ʻaʻau ke fakafeʻiloaki ʻaki e lēsoni ‘o e uike ní:
-
Huluʻi ha taha ʻo e ngaahi vitiō ʻoku fokotuʻu atu he fokotuʻutuʻu ko ʻení. Fehuʻi ki he kau finemuí, “Ko e hā ʻokú ke fai ke teuteu ke hoko ko ha uaifi mo e faʻē angamāʻoniʻoni?”
-
Toe lau fakataha e tefito ʻa e Kau Finemuí. Poupouʻi ha kau finemui tokosiʻi pē ke nau vahevahe e ʻuhinga ʻo e kupuʻi lea ko e “fakamālohia e ʻapí mo e fāmilí” kiate kinautolú.
Ako fakataha
ʻE lava ke tokoni e ngaahi ʻekitivitī takitaha ʻi laló ki he kau finemuí ke nau teuteu ke hoko ko ha uaifi mo ha faʻē anga māʻoniʻoni. Muimui ʻi he fakahinohino ʻa e Laumālie Māʻoniʻoní, fili ha ʻekitivitī ʻe taha pe lahi ange ʻe ʻaonga taha ki hoʻo kalasí:
-
Te ke lava nai ʻo fakakaukau ki ha lēsoni fakataumuʻa ke tokoniʻi e kau finemuí ke mahino kiate kinautolu ʻa hono ʻuhinga ke nau fakafepakiʻi e angahalá? Hangē ko ʻení, te ke lava ʻo ʻomi ha fakamalu mo ha sponge ki he kalasí pea fakahaaʻi e founga ʻoku tekeʻi ʻe he meʻa ʻe taha e vaí kae mimisi ʻe he meʻa ʻe tahá e vaí. ʻOku felāveʻi fēfē ʻeni mo hono fakafepakiʻi e ʻahiʻahí? Fakaafeʻi e kau finemui ke nau fekumi ʻi he lea ʻa Sisitā Joy D. Jones “Ko ha Toʻu Tangata ʻOku Nau Fakafepakiʻi e Angahalá” pea ʻai ha lisi ʻo e ngaahi meʻa te nau lava ʻi heʻenau hoko ko ha ngaahi faʻeé ke ohi hake ha fānau te nau fakafepakiʻi e angahalá. ʻE lava fēfē ʻe hono fakahoko ʻi he taimí ni ʻa e ngaahi meʻa ʻi heʻenau lisí ʻo teuteuʻi kinautolu ke nau hoko ko ha ngaahi uaifi mo ha faʻē angatonu?
-
Fakaafeʻi e kau finemuí ke lau e lea ʻa ʻEletā K. Brett Nattress ʻo kau ki heʻene faʻeé, “ ʻIkai ha Fiefia Lahi Ange he ʻIloʻi ʻOku Nau ʻIlo Ki ai.” Ko e hā ha ngaahi ʻulungaanga ʻo Sisitā Nattress ʻoku fie maʻu ke maʻu ʻe he kau finemuí, ʻi heʻenau teuteu ke hoko ko ha ngaahi faʻeé? Ko e hā e meʻa naʻá ne fai ke ʻohake ai ha fāmili anga-māʻoniʻoní? Te nau lava foki ʻo mamata ha taha pe ongo vitiō fakatouʻosi ʻoku fokotuʻu atu ʻi he lēsoni ko ʻení pea nau aleaʻi e ngaahi fehuʻi tatau. Ko e hā ha ngaahi sīpinga kehe ʻo ha mātuʻa anga-māʻoniʻoni kuo mātā ʻe he kau finemuí? Ko e hā ʻoku ongoʻi ʻe he kau finemuí te nau lava ʻo fai ke muimui ai ki he ngaahi sīpinga ko ʻení he taimí ni?
-
Vahe ki he finemui takitaha ke ne lau ha ngaahi veesi mei he niʻihi ʻo e ngaahi potufolofola ʻoku fokotuʻu atu ʻi he fokotuʻutuʻu ko ʻení. Fakaafeʻi e finemui takitaha ke ne tā ha fakatātā pe fakaʻilonga pe tohi ha sētesi nounou ʻokú ne fakafofongaʻi ʻa e ngaahi ʻulungaanga ʻo ha uaifi mo ha faʻē anga māʻoniʻoni ʻoku maʻu ʻi heʻene ngaahi veesi ne vahe angé. Vahevahe e ngaahi fakatātaá pe sētesí mo e kalasí, pea aleaʻi fakataha ʻa e founga ʻe lava ke maʻu ai ʻe ha finemui ʻa e ngaahi ʻulungaanga ko ʻení. Kole ki he kau finemuí ke nau vahevahe e ngaahi sīpinga ʻo ha ngaahi faʻē hangē ko kinautolu naʻe fakamatalaʻi ʻi he tohi Lea Fakatātaá. ʻOku tāpuekina fēfē nai e fāmili ʻo e ngaahi faʻē ko ʻení? Ko e hā ʻoku fuʻu mahuʻinga ai ha “fefine fai lelei” ki he ʻEikí (vakai, Lea Fakatātā 31:10)?
-
Kole ki he kau finemuí ke nau hiki he palakipoé ha lisi ʻo ha kau fafine anga māʻoniʻoni ʻi he folofolá (hangē ko, Lute, ʻĒseta, ʻIvi, Hena, ʻEma Sāmita, mo hai fua). Fakaafeʻi kinautolu ke nau fili ha fefine ʻe taha mei he lisí pea lau mei he folofolá ʻo kau ki ai (fakaʻaongaʻi ʻa e Ko e Fakahinohino ki he Ngaahi Folofolá). Poupouʻi e kau finemuí ke nau vahevahe pe ko e hā e ngaahi ʻulungaanga lelei ʻoku nau fakatokangaʻi mo saiʻia ai ʻi he kau fafine ko ʻení pea ʻoku tokoni fēfē e ngaahi ʻulungaanga ko ʻení kiate kinautolu ke nau teuteu ai ke hoko ko ha uaifi mo ha faʻē anga māʻoniʻoni.
-
Mou fakamanatu fakataha ʻa e ngaahi talanoa fekauʻaki mo ha ngaahi faʻee maʻongoʻonga ʻi he lea ʻa ʻEletā Jeffrey R. Holland “Vakai ki Hoʻo Faʻeé.” Kole ki he kau finemuí ke nau hiki ʻenau ngaahi fakakaukau kau ki he ngaahi meʻa ʻoku nau saiʻia ai ʻi heʻenau faʻeé pe ngaahi ʻulungaanga lelei ʻoku maʻu ʻe heʻenau faʻeé ʻoku nau saiʻia ke muimui ki ai ʻi heʻenau teuteu ke hoko ko ha faʻeé. Fakaafeʻi ha niʻihi tokosiʻi ke nau vahevahe e meʻa naʻa nau tohí. Kapau ʻe lava, fakaafeʻi e ngaahi faʻē ʻa e kau finemuí ke nau kau mai ʻi he fealeaʻaki ko ʻení.
Kole ki he kau finemuí ke nau vahevahe ʻa e meʻa naʻa nau ako ʻi he ʻaho ní. ʻOku mahino nai kiate kinautolu ʻa e founga ke teuteu ai ki honau ngaahi fatongia he kahaʻú ko ha uaifi mo ha faʻeé? Ko e hā ha ngaahi ongo pe fakakaukau ʻoku nau maʻu? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke toe tuku ha taimi lahi ange ʻi he tokāteline ko ʻení?
Moʻui ʻaki e meʻa ʻoku tau akó
Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:
-
Fakakakato ha niʻihi ʻo e ngaahi meʻa ko ʻení mei he Fakalakalaka Fakatāutahá: ngāue ʻoku fie maʻu ki he tuʻunga ʻulungaanga mahuʻinga ko e Natula Faka-ʻOtuá, ngaahi meʻa ke aʻusia fika 4 ʻi he tuʻunga ʻulungaanga mahuʻinga Ko Hoto Mahuʻinga Fakatāutahá, ngaahi meʻa ʻoku fie maʻu ke aʻusia fika 7 ʻi he tuʻunga ʻulungaanga mahuʻinga ko e Tauʻatāina ke Filí mo e ʻEkeʻi meiate Kita ʻa e Meʻa ʻOkú te Fai pe Taʻe Faí, ngaahi meʻa ʻoku fie maʻu ke aʻusia fika 2 ʻi he ngaahi tuʻunga ʻulungaanga mahuʻinga ko e Ngaahi Ngāue Leleí.
-
ʻInitaviu ha fefine kau ki he ngaahi fatongiá, ngaahi faingataʻá, mo e ngaahi tāpuaki ʻo e hoko ko ha uaifi pe faʻeé. Fehuʻi ange pe ko e hā e ngaahi taukei mo e ngaahi ʻulungaanga ʻokú ne ʻilo ʻoku mahuʻinga tahá. Hiki ha ngaahi fakakaukau pe ngaahi ongo ʻi ha tohinoa.
Mahalo te ke fie maʻu ke palani mo e kau finemuí ha ʻekitivitī ʻa e Mutualé ʻokú ne fakamamafaʻi e meʻa naʻe ako ʻi he kalasí. Hangē ko ʻení, te nau lava ʻo ako mo fakahoko ha ngaahi taukei ngāue fakaʻapi.
Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.
Ngaahi ʻEkitivitī Felāveʻi mo e Toʻu tupú
Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.