Ko e hā ʻoku mahuʻinga ai ke muimui ki he ngaahi tuʻunga moʻui ʻa e Siasí fekauʻaki mo e teití?

Kuo ʻosi ʻomi ʻe he kau palōfita ʻo e ngaahi ʻaho kimui ní e ngaahi tuʻunga moʻui kau ki he teití te ne maluʻi kitautolu mei he fakatuʻutāmaki fakalaumālié mo tokoniʻi kitautolu ke teuteu ki ha ʻaho ʻe maʻu ai ha hoa ʻoku taau mo taʻengatá. ʻOku kau ʻi he ngaahi tuʻunga moʻui ko ʻení ʻa e ʻikai ke teiti kimuʻa he taʻu 16, fakaʻehiʻehi mei he toutou teiti mo e tokotaha tatau pē, pea teiti pē mo kinautolu ʻoku māʻolunga ʻenau tuʻunga moʻui maʻá.

Teuteuʻi fakalaumālie koe

Ko e hā ha ngaahi sīpinga kuó ke mamata ai kuó ne akoʻi koe ki he mahuʻinga ʻo e talangofua ki he ngaahi tuʻunga moʻui ʻa e ʻEikí fekauʻaki mo e teití?

Ko e hā ha ngaahi aʻusia mo ha ngaahi fakakaukau ʻoku nau filioʻi e fakakaukau ʻa e kau finemuí kau ki he teití? Ko e hā e ngaahi meʻa mafatukituki ʻoku nau ongoʻí? Ko e hā e meʻa ʻoku fie maʻu ke nau ʻilo ke nau tuʻu maʻu ai ʻi he ngaahi tuʻunga moʻui ʻa e ʻEikí?

Ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā e meʻa ʻokú ke ongoʻi ʻoku kaunga lelei taha ki he kau finemuí ʻi heʻenau kamata ke fengāueʻaki mo e kau talavoú?

Teutalōnome 7:3–4 (ʻOua naʻa mali ki tuʻa ʻi he fuakavá)

Tokāteline mo e Ngaahi Fuakava 46:33 (Ngāue ʻaki ʻa e angamaʻá mo e anga māʻoniʻoní ʻi he ʻao ʻo e ʻEikí)

Ko e Ngaahi Tefito ʻo e Tuí 1:13 (Ko e ngaahi ʻulungaanga ʻoku totonu ke tau fakatupulaki ʻiate kitautolu ʻi heʻetau kumi ha hoa ki he taʻengatá)

Thomas S. Monson, “ʻOku ʻOmi ʻe he Teuteú ʻa e Ngaahi Tāpuakí,” Ensign pe Liahona, Mē 2010, 65.

Elaine S. Dalton, “Maluʻi ʻo e Angamaʻá,” Ensign pe Liahona, Mē 2011, 121–24.

“Teití,” Ki Hono Fakamālohia ʻo e Toʻu Tupú (2011), 4–5

Vitiō: “Brand New Year 2010: Dating”

Ko e faiako ‘i he founga ‘a e Fakamo‘uí

Naʻe ʻoange ʻe he Fakamoʻuí kiate kinautolu naʻe muimui ʻiate Iá ha faingamālie ke nau fai ʻenau ngaahi fehuʻí mo vahevahe ʻenau ngaahi fakakaukau ʻanautolú. Naʻá Ne tali ʻenau ngaahi fehuʻí mo fakafanongo ki he ngaahi meʻa ne nau aʻusiá. Koeʻuhí ko ʻEne ʻofá, naʻa nau ongoʻi malu ʻi hono vahevahe ʻenau ngaahi fakakaukaú mo e ngaahi ongo fakatāutahá. Te ke tokoniʻi fēfē e kau finemuí ke nau ongoʻi malu ʻi hono vahevahe ʻenau ngaahi fehuʻí mo e ngaahi ongo fakatāutahá?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa ku nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Vakai ki he ngaahi fakakaukau ki he akó mo e akoʻí.

Fili mei he ngaahi fakakaukau ko ʻení pe ko ha fakakaukau pē ʻaʻau ke fakafeʻiloaki ʻaki e lēsoni ‘o e uike ní:

• ʻEke ki he kau finemuí pe ko e hā haʻanau ngaahi fehuʻi fekauʻaki mo e teití pea hiki kinautolu ʻi he palakipoé. Fakaafeʻi kinautolu ke nau kumi e tali ki heʻenau ngaahi fehuʻí ʻi he lolotonga e lēsoní.

• Kole ki he kau finemuí ke nau hiki he palakipoé ʻa e meʻa ʻoku nau ʻilo kau ki he ngaahi tuʻunga moʻui ʻa e Siasí fekauʻaki mo e teití. Tānaki atu ki he lisí ʻi heʻenau ako lahi ange kau ki he ngaahi tuʻunga moʻui ko ʻení ʻi he lolotonga e lēsoní.

Ako fakataha

Vakai ki he ngaahi fakakaukau ki he akó mo e akoʻí .

ʻE lava ʻo tokoni e ngaahi ʻekitvitī takitaha ʻi laló ki he kau finemuí ke nau ako kau ki he ngaahi tuʻunga moʻui ʻa e Siasí fekauʻaki mo e teití. Muimui ki he fakahinohino ‘a e Laumālié, fili ha ʻekitivitī ‘e taha pe lahi ange ‘e ‘aonga taha ki hoʻo kalasí:

• Fakaafeʻi ʻa e finemui takitaha ke hiki ha lisi fakafoʻituitui ʻo e ngaahi ʻulungāanga lelei ʻokú ne loto ke maʻu ʻe hono husepāniti he kahaʻú. Fakaafeʻi e kau finemuí ke nau vahevahe mo e kalasí ʻenau lisí, ʻo kapau ʻoku feʻunga mo taau ke vahevahe. Kole ki ha taha ʻo e kau finemuí ke nau lau e lea ko ʻeni ʻa ʻEletā Robert D. Hales: “Kapau ʻokú ke fie mali mo ha tokotaha lelei, talavou, faitotonu, fiefia, ngāue mālohi mo fakalaumālie,hoko ko e tokotaha pehē” (“Ko e Fehanghangai mo e Faingataʻa ʻo e Māmaní he ʻAho ní,”EnsignpeLiahona, Nōvema 2015, 46). Hili hono vakaiʻi ʻe he kau finemuí e lisi ʻa ia naʻa nau faʻú, te ke malava ʻo  fehuʻi kiate kinautolu pe te nau ongoʻi fēfē kapau naʻe ʻai ha lisi tatau fekauʻaki mo kinautolu ʻe honau husepāniti he kahaʻú.  Ko e hā ʻoku nau fakahoko he taimí ni ke nau aʻu ki he tuʻunga ʻe fie mali ai honau husepāniti he kahaʻú mo kinautolu? Fakaafeʻi e kau finemuí ke nau aleaʻi ʻa e founga ʻe  lava ke tupulaki fakatāutaha ai e ngaahi ʻulungaanga ko ʻení ʻi he taimí ni mo e anga hono uesia ʻe he ngaahi ʻulungaanga ko ʻení ʻa e faʻahinga kakai te nau teiti mo iá.

• Kole ange ki he finemui takitaha ke ne fili ha foʻi lea pe kupuʻi lea mei he ngaahi tefito ʻo e tuí hono hongofulu mā tolú pea fakamatalaʻi e founga ʻoku fekauʻaki ai ʻene foʻi leá pe kupuʻi leá mo e ngaahi tuʻunga moʻui ʻi he “Teití” konga ʻi he Ki Hono Fakamālohia e Toʻu Tupú. Kole ki he kau finemuí ke nau vahevahe e founga ʻoku totonu ke takiekina ai ʻe he ngaahi tefitoʻi moʻoni ʻi hono hongofulu mā tolu ʻo e ngaahi tefito ʻo e tuí ʻenau ngaahi fetuʻutaki mo e kau talavoú.

• Lau ʻa e palakalafi ʻo e lea ʻa Sisitā Elaine S. Dalton  “Maluʻi ʻo e Angamaʻá” ʻoku kamata ʻaki e fehuʻi “Ko e hā ha meʻa te mou takitaha lava ʻo fai ke mou maluʻi ai e angamaʻá?” Kole ki he kau finemuí ke nau aleaʻi ʻa e founga ʻoku fekauʻaki ai e faleʻi ʻa Sisitā Tolotoní mo e teití. Fakaafeʻi e kau finemuí ke nau lau  ʻAlamā 46:11–14, pea aleaʻi e founga naʻe tokoniʻi ai e hingoa ko e tauʻatāiná ke ne ueʻi fakalaumālie e kau Nīfaí ke maluʻi ʻenau tauʻatāiná.Ke muimui ki he tukupā ʻa Sisitā Tolotoní, fakaafeʻi e kau finemuí ke hiki ha lisi ʻo ha ngaahi meʻa ke nau fai pe ʻikai totonu ke fai ke maluʻi honau angamaʻá. ʻE lava ke fakakau ʻe he kau finemuí ʻi heʻenau lisí ko e hā te nau fai ke maluʻi ai e angamaʻá ʻi heʻenau teití (vakai “Teití“ ʻi he Ki hono Fakamālohia ʻo e Toʻu Tupú, peesi 4–5).

• Huluʻi e ngaahi konga ʻo e  “Brand New Year 2010: Dating,”  pea kiʻi taʻofi ʻa e vitioó ke ʻoange ha taimi ki he kau finemuí ke nau feinga ke ʻiloʻi e ngaahi tuʻunga moʻui ʻo e teití ʻoku lau ki ai e kakai ʻi he vitioó. Kole ki he kau finemuí ke nau toe vakaiʻi ʻa e “Teití” ʻi he Ki Hono Fakamālohia ʻo e Toʻu Tupú   pea kumi ha toe ngaahi tuʻunga moʻui naʻe ʻikai ke aleaʻi ʻi he vitioó. Fakaafeʻi kinautolu ke nau tali ʻa e ngaahi fehuʻi hangē ko ʻení: “Ko e hā e ngaahi tuʻunga moʻui ʻa e Siasí fekauʻaki mo e teití?” “Ko e hā ʻoku mahuʻinga ai ke ke muimui ki he ngaahi tuʻunga moʻuí ni?” pea “Ko e Hā e taumuʻa ʻo e teití?” Fakaafeʻi e kau finemuí ke nau aleaʻi e ngaahi founga te nau lava ke tali ʻakí he taimi ʻoku nau ongoʻi mafasia ai ke fai ha meʻa ʻoku fehangahangai mo e ngaahi tuʻunga moʻui ʻa e Siasí fekauʻaki mo e teití. Fakakaukau ki hono vahevahe e ngaahi sīpinga ʻo e founga ne tāpuekina ai koe ʻaki hono tauhi e ngaahi tuʻunga moʻui ʻa e Siasí ki he teití, pea fakaafeʻi e niʻihi kehé ke vahevahe ha ngaahi aʻusia tatau.

• Fakaafeʻi e kau finemuí ke nau toe vakaiʻi e konga ki he “Teití” ʻi he Ki Hono Fakamālohia ʻo e Toʻu Tupú pea nau hiki haʻanau ngaahi fehuʻi kau ki he teití. Fakaafeʻi ke fai ha pēnolo ʻo e kau talavou matuʻotuʻa angé mo e kau finemuí ke tali ʻenau ngaahi fehuʻí pea aleaʻi e ngaahi tuʻunga moʻui ʻo e teití. Poupouʻi e kau mēmipa he pēnoló ke fakakau e ngaahi sīpinga ʻo e anga ʻenau moʻui ʻaki e ngaahi tuʻunga moʻuí ʻi heʻenau teití, hangē ko e vala tāú, fili e ngaahi ʻekitivitī totonú, pea teiti mo kinautolu ʻoku māʻolunga ʻenau ngaahi tuʻunga moʻuí.

Kole ki he kau finemuí ke nau vahevahe e meʻa ne nau ako ʻi he ʻaho ní. ʻOku mahino nai kiate kinautolu ʻa e ngaahi tuʻunga moʻui ʻa e Siasí fekauʻaki mo e teití? Ko e hā ha faʻahinga ongo pe ngaahi fakakaukau ʻoku nau maʻu? ʻOku ʻi ai haʻanau toe ngaahi fehuʻi kehe? ʻE ʻaonga ke fakamoleki ha toe taimi lahi ange ʻi he tokāteline ko ʻení?

Tokoni fakafaiakó

“Fehuʻi ki hoʻo kau akó pe ko e hā ‘enau fakamatalá kapau ‘e fie ‘ilo ha taha ki he meʻa kuo nau ako mei he lēsoní” (ʻOku ‘Ikai ha Ui ‘e Mahu’inga Ange ‘i he Faiakó [2000], 111).

Moʻui ʻaki e meʻa ʻoku tau akó

Vakai ki he ngaahi fakakaukau ki he akó mo e akoʻí.

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:

• Talanoa ki ha taha kuó ne fakahaaʻi ha sīpinga lelei ʻaki ʻene muimui ki he ngaahi tuʻunga moʻui ʻa e ʻEikí ki he teití, pea feinga ke ʻiloʻi e meʻa kuó ne fai ke taʻofi ʻaki ʻa e ʻahiʻahi ke muimui ki he ngaahi tuʻunga moʻui ʻa e māmaní ki he teití.

• Fokotuʻu ha taumuʻa ke talangofua ki he ngaahi tuʻunga moʻui ʻa e ʻEikí fekauʻaki mo e teití.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.