ʻOku fepoupouʻaki fēfē ʻa e ngaahi fatongia ʻo e kakai tangatá mo fafiné ʻi he fāmilí?

Tuʻunga ʻi ha palani fakalangi, kuo foaki ʻe he Tamai Hēvaní ki he kakai tangata mo fafiné ha ngaahi meʻafoaki mo ha meʻa te nau malava fai ke tokoniʻi ai kinautolu ke nau fakahoko e ngaahi fatongia te nau fepoupouʻaki ai ko ha husepāniti mo ha uaifi. “Ko e tuʻunga tangata pe fefiné ko ha ʻulungaanga mahuʻinga ia ʻoku ʻiloʻi ai ʻa e tuʻunga mo e taumuʻa ʻo e tokotaha fakafoʻituituí, ʻi he maama fakalaumālié, moʻui fakamatelié, pea mo e taʻengatá. … ʻOku ʻa e ngaahi tamaí, ke nau tokangaʻi honau fāmilí ʻi he ʻofa mo e māʻoniʻoni pea ko honau fatongiá ke tokonaki ʻa e ngaahi fie maʻu ʻo e moʻuí pea mo ha maluʻi maʻa honau ngaahi fāmilí. Ko e tefitoʻi fatongia ʻo e ngaahi faʻeé ke lehilehiʻi hake ʻa ʻenau fānaú. ʻI he ngaahi fatongia toputapú ni, ʻoku haʻisia ai ʻa e ngaahi tamaí mo e ngaahi faʻeé ke nau fetokoniʻaki ko ha kaungā-ngāue tuʻunga tatau” (“Ko e Fāmilí: Ko ha Fanongonongo ki Māmani,” Ensign pe Liahona, Nōvema 2010, 129).

Teuteuʻi fakalaumālie koe

Ko e hā ha ngaahi sīpinga kuó ke mamata ai ki ha ngaahi faʻē mo ha ngaahi tamai ʻoku nau ngāue fepoupouʻaki ʻi honau fatongiá? Kuo takiekina fēfē ho fāmilí ʻe ha ʻilo ki he ngaahi fatongia taʻengata ko ʻení?

Te ke tokoniʻi fēfē e kau finemuí ke mahino kiate kinautolu honau fatongia fakalangí ʻi heʻenau hoko ko e ngaahi faʻē ʻi he kahaʻú? Ko e hā te nau lava ʻo fai he taimí ni ke teuteu ki he fatongia ko iá?

Ako ʻi he faʻa lotu e ngaahi potufolofola mo e ngaahi maʻuʻanga tokoni ko ʻení. Ko e hā e ngaahi potufolofola mo e ngaahi lea ʻe tokoni ke mahino ki he kau finemuí ʻa e ngaahi fatongia fepoupouʻaki ʻo e husepānití mo e uaifí?

Lea Fakatātā 22:6; T&F 68:25; 121:41–43; Mōsese 5:1; (Ngaahi fatongia ʻo e mātuʻá)

ʻAlamā 53:21; 56:47–48 (Naʻe akoʻi e kautau kei talavoú ʻe heʻenau ngaahi faʻeé)

T&F 25 (Ko e faleʻi kia ʻEma Sāmita kau ki hono poupouʻi hono husepānití)

“Ko e Fāmilí: Ko ha Fanongonongo ki Māmani,” Ensign pe Liahona, Nōvema 2010, 129

Linda K. Burton, “Te Ta Kaka Fakataha,” Ensign pe Liahona, Mē 2015, 29 – 32

L. Tom Perry, “Ko e Maʻu ʻo e Nonga Tuʻuloá mo e Langa ʻo e Ngaahi Fāmili taʻengatá,” Ensign pe Liahona, Nōvema 2014, 43–45

D. Todd Christofferson, “Ko e Mālohi Fakaivia ʻo e Kakai Fefiné,” Ensign pe Liahona, Nōvema 2013, 29–32

Ngaahi meʻa kehe ke aʻusia ʻi he tuʻunga ʻulungaanga mahuʻinga fika 4 Ko Hoto Mahuʻinga Fakatāutahá, Fakalakalaka Fakatāutahá (2009), 31

Vitiō: ”Ko e Kau Fefine ʻi Heʻetau Moʻuí“

2:43

Ko e faiako ‘i he founga ‘a e Fakamo‘uí

Naʻe falala, teuteuʻi, mo ʻoange ʻe he Fakamoʻuí ha ngaahi fatongia mahuʻinga kiate kinautolu naʻá Ne akoʻí. Te ke tokoni fēfē ki he kau finemui ʻokú ke akoʻí ke nau ongoʻi hoʻo falala kiate kinautolú ʻi heʻenau teuteu ki honau ngaahi fatongia mahuʻingá ʻi heʻenau hoko ko e uaifi mo e faʻē ʻi he kahaʻú?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa ku nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko ha fakakaukau pē ʻaʻau ke fakafeʻiloaki ʻaki e lēsoni ‘o e uike ní:

Vahevahe mo e kau finemuí ʻa e tefito ʻo e lēsoni ko ʻení. Ko e hā ʻoku nau fakakaukau ai ʻoku mahuʻinga e tefito ko ʻení ke fai ha ako ki aí?
ʻOmai ha meʻa ʻe ua ʻe fakaʻaongaʻi fakataha ke aʻusia ha taumuʻa tatau (hangē ko ha penivahevahe mo ha pepa pe hāmala mo e foʻi faʻo). Fakaafeʻi e kau finemuí ke nau fakamatalaʻi e faikehekehe ʻo e ongo meʻá pea mo e founga ʻoku fakaʻaongaʻi fakataha ai kinauá. Fakamatalaʻi ange ʻoku ʻoange ki he houʻeiki tangata mo fafiné ha ngaahi fatongia kehekehe ʻoku fepoupouʻaki (pe “kakato”) ke aʻusia e ngaahi taumuʻa ʻa e ʻOtuá. Fakaafeʻi e kau finemuí ke nau fakamatalaʻi e niʻihi ʻo e ngaahi founga ʻoku fepoupouʻaki ai e houʻeiki tangata mo fafiné.

Ako fakataha

ʻE lava ʻo tokoni ʻa e ngaahi ʻekitivitī takitaha ʻi laló ki he kau finemuí ke nau ako kau ki he ngaahi fatongia fepoupouʻaki ʻo e houʻeiki tangata mo fafine ʻi he fāmilí. Muimui ʻi he ueʻi ‘a e Laumālié, ʻo fili ha ʻekitivitī ʻe taha pe toe lahi ange ‘e ‘aonga lahi taha ki hoʻo kalasí:

Fakaafeʻi ha ongomeʻa mali ke na ʻaʻahi atu ki hoʻo kalasí, ʻo ka fakangofua ʻe he pīsopé. Lau fakataha ʻa e konga ko e “Langaki Hake mo e Tokoni ʻi Hotau Ngaahi Ngafá Kotoa” mei he lea ʻa Linda K. Burton “Te Ta Kaka Fakataha.” Ko e hā ʻoku ako ʻe he kau finemuí fekauʻaki mo e fepoupouaki ʻa e kakai tangatá mo fafine ʻi he ngaahi fāmilí? Kole ki he ongomātuʻa ʻoku ʻaʻahi maí ke na lea kau ki he founga ʻena fetokoniʻaki ke fakahoko hona fatongiá. Fakakaukau ke vahevahe e founga hono tokoniʻi koe ʻe he nofomalí pe kau mēmipa ho fāmilí ke ke hoko ko ha tokotaha lelei angé.
Kole ki he kau finemuí ke nau ʻai ha lisi ʻo e ngaahi fatongia ʻoku ʻamanaki mai ʻa e ʻEikí ke fakahoko ʻe he ngaahi tamaí mo e ngaahi faʻeé. Ke tokoniʻi kinautolu ke hiki ʻa e lisi ko ʻení, fakaafeʻi kinautolu ke nau fekumi ʻi he palakalafi hono fitu ʻo e “Ko e Fāmilí: Ko ha Fanongonongo ki Māmani” mo e ngaahi konga mahuʻinga ʻo e lea ʻa ʻEletā L. Tom Perry “Ko e Maʻu ʻo e Nonga Tuʻuloá mo e Langa ʻo e Ngaahi Fāmili Taʻengatá” mo e lea ʻa ʻEletā D. Todd Christofferson “Ko e Mālohi Fakaivia ʻo e Kakai Fafiné.” Ko e hā te nau lava ʻo ako mei he ngaahi maʻuʻanga tokoni ko ʻení fekauʻaki mo e tuʻunga tangata pe fefine pea mo e ngaahi fatongia fakalangi ʻo e tamaí mo e faʻeé. ʻOku fengāueʻaki fēfē ʻa e ngaahi fatongia ko ʻení? ʻOku kehekehe fēfē ʻa e ngaahi akonaki ko ʻení mei he meʻa ʻoku akoʻi ʻe he māmaní? Fakaafeʻi e kau finemuí ke nau vahevahe ha ngaahi sīpinga ʻo ha taimi ne nau siotonu ai he fengāueʻaki fakataha ʻa e mātuʻá ʻi hono fakahoko honau ngaahi fatongiá.
Feinga ke ʻiloʻi ha ngaahi potufolofola lahi ʻoku nau akoʻi ʻa e ngaahi fatongia ʻo e mātuʻá, hangē ko ia ʻoku fakamatala ki ai ʻi he lēsoni ko ʻení, pea vahevahe ia ʻi he kau finemuí. Fakaafeʻi e finemui takitaha ke ne vahevahe ʻene potufolofolá pea fakamatalaʻi e ngaahi fatongia ʻoku hā aí. Fakaafeʻi kinautolu ke nau vahevahe ʻa e anga ʻo e fepoupouʻaki ʻa e husepānití mo e uaifí ʻi hono fakahoko e ngaahi fatongia ko ʻení pea mo e ngaahi sīpinga kuo nau mātā ʻi hono fakahoko ʻe he mātuʻá e ngaahi fatongia fepoupouʻakí.
Kole ange ki he kau finemuí ke nau fakakaukau ki he ʻuhinga ʻo e foʻi lea duality ʻi heʻenau mamata he foʻi vitiō “The Women in Our Lives.” Kole ange ke nau hiki e ngaahi founga te nau lava ai ʻo hoko ko ha “tokoni ʻoku taau” ki honau husepāniti he kahaʻú (vakai, Sēnesi 2:18). Kole ange ki he kau finemuí ke nau ngāue fakafoʻituitui pe fakakalasi ʻi he Ko Hoto Mahuʻinga Fakatāutahá ʻi he ngaahi meʻa kehe ke aʻusia ʻi he tuʻunga ʻulungaanga mahuʻinga fika 4 Fakalakalaka Fakatāutahá pea hiki ʻi heʻenau tohinoá ʻenau ngaahi ongo kau ki honau fatongia ko ha uaifi ʻokú ne poupou ki hono husepāniti he kahaʻú.

2:43
Fakaafeʻi e kau finemuí ke nau lau ʻa e Tokāteline mo e Ngaahi Fuakava 25 pea kumi e ngaahi meʻa naʻe kole kia ʻEma Sāmita ke ne fai ke poupouʻi hono husepānití mo e ngaahi meʻa naʻe fakahā ʻe he ʻEikí ʻe fakahoko ʻe hono husepānití ke poupou mo faitāpuekina ai iá. Ko e hā ha ngaahi sīpinga ʻe lava ʻe he kau finemuí pe ko koe ʻo vahevahe kau ki ha kakai ʻoku nau muimui ki he faleʻi ko ʻení ʻi heʻenau nofomalí? Poupouʻi e kau finemuí ke nau hiki ʻa e faʻahinga vā fetuʻutaki ʻo e nofomali ʻoku nau fakaʻamu ke nau maʻu ʻi ha ʻaho mo e meʻa te nau lava ʻo fai he taimí ni ke teuteu ai ki aí. Fakaafeʻi ha niʻihi tokosiʻi ke nau vahevahe e meʻa naʻa nau tohí.

Kole ki he kau finemuí ke nau vahevahe e meʻa ne nau ako ʻi he ʻaho ní. ʻOku mahino nai kiate kinautolu ʻa e ngaahi fatongia fepoupouʻaki ʻo e houʻeiki tangata mo fafine ʻi he fāmilí? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ‘E ‘aonga nai ke tuku ha taimi lahi ange ʻi he kaveinga ko ‘ení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:

Fakamālō ki heʻenau ngaahi faʻeé mo ʻenau ngaahi tamaí he ngaahi founga makehe kuo tāpuekina ʻaki kinautolú koeʻuhí ko e fakahoko ʻe heʻenau mātuʻá honau ngaahi fatongia fakalangí.
Fili ha kupuʻi lea mei he “Ko e Fāmilí: Ko ha Fanongonongo ki Māmani” te ne fakamanatu kiate kinautolu honau ngaahi fatongia fakalangí ʻi heʻenau hoko ko ha ngaahi faʻeé.
Fakakakato ʻeni ʻi he Fakalakalaka Fakatāutahá:Ngaahi meʻa ʻoku fie maʻu ke aʻusia fika 2 ʻi he tuʻunga ʻulungaanga mahuʻinga ʻo e Tuí, Ngaahi meʻa ʻoku fie maʻu ke aʻusia fika 2 ʻi he tuʻunga ʻulungaanga mahuʻinga ʻo e Natula Faka-ʻOtuá, Ngaahi meʻa ʻoku fie maʻu ke aʻusia fika 4 ʻi he tuʻunga ʻulungaanga mahuʻinga Ko Hoto Mahuʻinga Fakatāutahá

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.