Te u fakamālohia fēfē nai hoku fāmilí?

“Ko e fiefia ko ia ʻi he moʻui fakafāmilí ʻoku meimei ke toki aʻusia pē ia ʻi he taimi kuo langa ai ʻa e fāmilí ʻi he ngaahi akonaki ʻa e ʻEiki ko Sīsū Kalaisí.” ʻOku faʻu mo pukepuke ʻa e … ngaahi fāmili ʻoku fiefiá ʻi he ngaahi tefitoʻi moʻoni ʻo e tuí, lotú, fakatomalá, faʻa fakamolemolé, fakaʻapaʻapá, ʻofá, manavaʻofá, ngāué, pea mo e ngaahi ʻekitivitī ʻoku fakatupulakí” (“Ko e Fāmilí: Ko ha Fanongonongo ki Māmani,” Ensign pe Liahona, Nōvema 2010, 129). ʻI heʻetau tokoni ki heʻetau mātuʻá ke aʻusia e ngaahi taumuʻa ko ʻení, ʻoku lava ai ke tau tokoni ki hotau fāmilí ke maʻu e fiefia ʻoku finangalo e Tamai Hēvaní ke tau maʻú.

Teuteuʻi fakalaumālie koe

Ko e hā ha ngaahi meʻa kuó ke aʻusia mo ho fāmilí kuó ne ʻoatu ha fiefia kiate kimoutolu? Ko e hā ha ngaahi tāpuaki kuó ke mamata ai ʻi ho fāmilí ʻi hoʻo muimui ki he ngaahi akonaki ʻa e Fakamoʻuí?

Ko e hā ʻokú ke ʻilo kau ki he moʻui fakafāmili ʻa e kau finemui ʻokú ke akoʻí? Te ke tokoni fēfē tokoni ke mahino ki he kau finemuí ʻoku fiefia ange e fāmilí ʻi he taimi ʻoku nau fāifeinga ai ke muimui ki he ngaahi akonaki ʻa e Fakamoʻuí?

Ako ʻi he faʻa lotu e ngaahi potufolofola mo e ngaahi maʻuʻanga tokoni ko ʻení. Ko e hā e ngaahi tefitoʻi moʻoni ʻoku ʻi he folofolá mo e lea ʻa e kau palōfitá te ne ueʻi hake e kau finemuí ke fakamālohia honau fāmilí?

1 Nīfai 8:12 (Naʻe fakaʻamu ʻa Nīfai ke kai hono fāmilí ʻi he fua ʻo e ʻakau ʻo e moʻuí)

1 Nīfai 16:14–32 (ʻOku fakamālohia ʻe Nīfai hono fāmilí)

T&F 88:119 (Sīpinga ki ha ʻapi anga māʻoniʻoni)

“Ko e Fāmilí: Ko ha Fanongonongo ki Māmani,” Ensign pe Liahona, Nōvema 2010, 129 (vakai foki, Tuʻu Maʻu ʻi he Tuí [2004], 56–59)

Dieter F. Uchtdorf, “Ko e Fakahīkihikiʻi ʻo Kinautolu ʻOku Fakahaofí,”EnsignpeLiahona, Mē 2016, 77–80

Bonnie L. Oscarson, “Kau Taukapo ʻo e Fanongonongo Ki he Fāmilí,” Ensign pe Liahona, Mē 2015, 14 – 17

David A. Bednar, “Faivelenga mo Tokanga ʻo Lahi Ange ʻi ʻApi,” Ensign pe Liahona, Nōvema 2009, 17–20.

“Fāmilí,” Ki Hono Fakamālohia ʻo e Toʻu Tupú (2011), 14–15

“Hoko ʻa ʻApi ko e Hēvani,” Ngaahi Himí, fika 188

“Lea ʻaki Heni e ʻOfá,” Tohi Hiva ʻa e Fānaú, 102

Vitiō: “Through Small Things”

NaN:NaN

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa ku nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko ha fakakaukau pē ʻaʻau ke fakafeʻiloaki ʻaki e lēsoni ‘o e uike ní:

Kole ki he kau finemuí ke nau fakakaukau ki ha ngaahi meʻa ʻe lava ke fai ʻe ha fāmili ke maluʻi honau ʻapí mei he fakatuʻutāmaki fakatuʻasinó (hangē ko ha afi pe kaihaʻa). Ko e hā ha ngaahi fakatuʻutāmaki fakalaumālie ʻoku nau fakamanamanaʻi e ngaahi fāmilí? Ko e hā ʻe lava ke fai ʻe he kau finemuí ke tokoni ke maluʻi honau fāmilí mei he ngaahi fakatuʻutāmaki ko ʻení?
Kole ki he kau finemuí ke nau tohi he palakipoé ha ngaahi lea ki he lahi taha te nau lava ʻo fakakaukau ki aí ʻi ha miniti ʻe taha pe ua ʻa ia ʻoku nau fakamatalaʻi e ngaahi meʻa ʻokú ne ʻomi e fiefiá ki he fāmilí.

Ako fakataha

ʻE lava ke tokoni e ngaahi ʻekitivitī takitaha ʻi laló ki he kau finemuí ke nau ako e founga ke fakamālohia ai honau fāmilí. Muimui ʻi he tataki ‘a e Laumālié, ʻo fili ha ʻekitivitī ʻe taha pe toe lahi ange ‘e ‘aonga lahi taha ki hoʻo kalasí:

ʻI heʻene lea “ Ko e Fakahīkihikiʻi ʻo Kinautolu ʻOku Fakahaofí,” naʻe ako ai ʻa Palesiteni Dieter F. Uchtdorf ʻo kau ki he fāmilí: “Mahalo ʻoku tau ʻinasi he tupuʻanga tatau, ka ʻoku ʻikai ke tau faitatau. ʻOku makehe hotau laumālié. … Te tau lava ʻo fili ke fakafiefiaʻi e ngaahi faikehekehe ko ʻení” Ko e hā ha ngaahi ʻulungaanga makehe pe mālohinga ʻoku maʻu ʻe he finemui takitaha? ʻE lava ke fakaʻaongaʻi fēfē ʻe he finemui takitaha hono ngaahi mālohinga makehé ke tāpuakiʻi hono fāmilí? ʻE lava ʻe he mēmipa ʻo e kalasí ʻo fekumi ʻi ha konga ʻo e lea ʻi ha fanga kiʻi kulupu iiki, pea kumi mo vahevahe ʻa e ngaahi meʻa ʻoku makehe kiate kinautolú. Te ke lava foki ʻo fakaafeʻi e kau mēmipa ʻo e kōlomú ke nau sio ʻi ha taha ʻo e ngaahi foʻi vitiō ʻoku hā atu ʻi he lēsoni ko ʻení pea kumi e ngaahi meʻa naʻe fai ʻe he kau mēmipa ʻo e fāmilí ke fakatupulaki ai ʻenau feohí. Ko e hā ha founga ʻe lava ke fiefia ai e kau finemuí ʻi he ngaahi faikehekehé ni ʻi honau fāmilí? Ko e hā ha ngaahi fakakaukau te nau lava ʻo vahevahe fekauʻaki mo e founga te nau lava ʻo fakamālohia ai honau ngaahi vā fetuʻutaki fakafāmilí?
ʻAi ke lau ʻe he kau finemuí ʻa e ngaahi konga ʻo e lea ʻa Bonnie L. Oscarson “Kau Taukapo ʻo e Fanongonongo ki he Fāmilí.” ʻI he lea ko ʻení, ne akoʻi ʻe Sisitā ʻOsikasoni ʻoku “lava ʻe kitautolu kotoa — ʻa e kakai fefine, kakai tangata, toʻu tupu, mo e fānau, tāutaha pe mali — ʻo ngāueʻi ke tau hoko ko ha kau tauhi ʻapi. ʻOku totonu ke tau ‘tauhi hotau ʻapí’ ke hoko ko ha feituʻu maau, hūfangaʻanga, māʻoniʻoni, pea mo malu”(Ensign pe Liahona, Mē 2015, 17). Fakaafeʻi e kau finemuí ke nau fekumi ʻi he lea ʻa Sisitā ʻOsikasoní, pea fekumi ki ha kupuʻi lea te nau lava ʻo fakaʻaliʻali ʻi honau ʻapí pe lokí ʻokú ne ueʻi kinautolu ke fakamālohia honau fāmilí. Ko e hā te nau lava ʻo fai he taimí ni ke tokoni ke hoko honau ʻapí ʻo māʻoniʻoni, maau, mo malu?
Lau fakakalasi, e palakalafi hono fitu ʻo e “Ko e Fāmilí: Ko ha Fanongonongo ki Māmani,” pea kumi e ngaahi tefitoʻi moʻoni ʻe lava ke tokoni ki he kau finemuí ke aʻusia ʻa e fiefiá ʻi he moʻui fakafāmilí. Kole ki he finemui takitaha ke ne lau ʻa e 1 Nīfai 16:14–32 pea vahevahe e ngaahi founga naʻe fakaʻaongaʻi ai ʻe he fāmili ʻo Līhaí ʻa e ngaahi tefitoʻi moʻoni ko ʻení. Kole ange ke nau vahevahe e ngaahi aʻusia kuó ne akoʻi kiate kinautolu e mahuʻinga ʻo e ngaahi tefitoʻi moʻoni ko ʻení ʻi he moʻui fakafāmilí.
Kole ki he kau finemuí ke nau fakafanongo ki he ngaahi founga ke fakatupulaki ai e ʻofa ʻi ʻapí ʻi heʻenau hivaʻi pe fanongo ki he “Hoko ʻa ʻApi ko e Hēvani” (Ngaahi Himí, fika 188) pe “Lea ʻaki Heni e ʻOfá” (Ko e Tohi Hiva ʻa e Fānaú, 102). Kole ange ke nau vahevahe ʻa e meʻa ʻoku nau maʻú. Fakaafeʻi kinautolu ke vahevahe ha meʻa ne nau aʻusia kuo nau ongoʻi fiefia ai koeʻuhí ne fakahaaʻi ange ha ʻofa kiate kinautolu pe koeʻuhí naʻa nau tokoni ke fakatupulaki e ʻofá ʻi honau ʻapí.
Kole ki he kau finemuí ke nau lau ʻa e “Fāmilí” ʻi he Ki Hono Fakamālohia ʻo e Toʻu Tupú pe sio he foʻi vitiō ko e “Through Small Things” pea kumi e ngaahi meʻa te nau lava ʻo fai ke fakamālohia ai honau fāmilí. Ko e hā ha ngaahi sīpinga ʻoku ʻilo ʻe he kau finemuí kau ki ha ngaahi fāmili ʻi he folofolá naʻa nau muimui pe ʻikai muimui ki he ngaahi tefitoʻi moʻoni ko ʻení? Fakaafeʻi e kau finemuí ke nau sio ki he fakahokohoko ʻo e Ki Hono Fakamālohia ʻo e Toʻu Tupú pea aleaʻi e founga ʻoku lava ai ke tokoni hono moʻui ʻaki e ngaahi tuʻunga moʻui kehe ʻi he tohí ni ke fakaafeʻi e Laumālié ki honau ʻapí. Fakaafeʻi kinautolu ke fili ha meʻa ʻe taha te nau fai lolotonga e uike hoko maí ke fakamālohia honau fāmilí.

NaN:NaN
Vahevahe e kalasí ki ha kulupu ʻe tolu, pea kole ki he kulupu takitaha ke nau lau e taha ʻo e ngaahi fokotuʻu ʻa ʻEletā David A. Bednar ʻi heʻene leá “Faivelenga mo Tokanga ʻo Lahi Ange ʻi ʻApi. Kole ki he kulupu takitaha ke nau vahevahe mo e kalasí ʻa e meʻa ne nau akó, fakamatalaʻi e ngaahi meʻa pau te nau lava ʻo fai ke fakaʻaongaʻi e ngaahi fokotuʻu ʻa ʻEletā Petinaá ʻi honau fāmilí. Poupouʻi kinautolu ke vahevahe e ngaahi sīpinga kuo nau mamata kuo fai ʻe he kau mēmipa honau fāmilí e meʻa ʻoku fokotuʻu mai ʻe ʻEletā Petinaá.

Kole ki he kau finemuí ke nau vahevahe ʻa e meʻa naʻa nau ako ʻi he ʻaho ní. ʻOku mahino nai kiate kinautolu ʻa e founga ke fakamālohia ai honau fāmilí? Ko e hā ngaahi meʻa kuo nai ongoʻi pe fakakaukau ki ai? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke toe tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:

Kumi ha ngaahi founga ke fakamālohia ai honau fāmilí ʻo fakafou he ngāue tokoní. ʻE lava ke faingofua pē ʻeni ʻo hangē ko hano teuteuʻi ha meʻatokoni, tokoniʻi ha kiʻi tehina ʻi heʻene ngāue fakaako ke fai mei ʻapí, pe ko e fakafanongo pē. Kole ange ke nau vahevahe ʻenau ngaahi aʻusiá he uike hokó.
Tohi ʻi heʻenau ngaahi tohinoá e ngaahi founga te nau lava ai ʻo poupouʻi honau fāmilí.
Fakakakato ha ʻekitivitī mei he Fakalakalaka Fakatāutahá ʻa ia ʻoku tokoni ki hono fakamālohia honau ngaahi fāmilí, ʻo hangē ko e meʻa ʻoku fie maʻu ke aʻusia fika 3 pe 5 ʻi he tuʻunga ʻulungaanga mahuʻinga ʻo e Natula Faka-ʻOtuá, Ngāue ki he tuʻunga ʻulungaanga mahuʻinga Ko Hoto Mahuʻinga Fakatāutahá, pe meʻa ʻoku fie maʻu ke aʻusia fika 2 ʻi he tuʻunga ʻulungaanga mahuʻinga ʻo e Angamaʻá

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.