Ko e hā ʻa e ngaahi fuakava naʻá ku fai ʻi he papitaisó?

ʻI he taimi ne tau papitaiso aí, ne tau fai ai ha fuakava mo e ʻOtuá. Ne tau palōmesi ke toʻo kiate kitautolu e huafa ʻo Sīsū Kalaisí, manatu maʻu ai pē kiate Ia, tauhi ʻEne ngaahi fekaú, mo tauhi kiate Ia ki he ngataʻangá. ʻOku tau fakafoʻou e fuakavá ni he taimi kotoa pē ʻoku tau maʻu ai e sākalamēnití.

Teuteuʻi fakalaumālie koe

Ko e hā ʻokú ke manatuʻi fekauʻaki mo ho papitaisó? Kuo tākiekina fēfē hoʻo moʻuí ʻe hoʻo ngaahi fuakava he papitaisó?

Te ke tokoniʻi fēfē e kau finemuí ke toe mahino lelei ange ʻenau ngaahi fuakava he papitaisó? Te ke tokoniʻi fēfē kinautolu ke fakamālohia ʻenau tukupā ke tauhi e ngaahi fuakavá ni?

Ko e hā ha ngaahi potufolofola mo e maʻuʻanga tokoni kehe te ne tokoniʻi e kau finemuí ke nau manatuʻi mo tauhi ʻenau ngaahi fuakava he papitaisó?

Sione 3:5; 2 Nīfai 31:4–13, 17 (ʻOku fie maʻu e papitaisó ki he fakamoʻui taʻengatá)

Mosaia 18:8–10; T&F 20:37 (Ko e ngaahi tukupā ʻoku tau fai he taimi ʻoku tau papitaiso aí)

Hugo Montoya, “Siviʻi mo ʻAhiʻahiʻi — Kae Faitokonia,” Liahona, Nōv. 2015, 53–55

Carole M. Stephens, “ʻOku ʻi Ai ha ʻUhinga Maʻongoʻonga ke Tau Fiefia Ai,” Ensign pe Liahona, Nōvema 2013

“Ko Hoʻo Fuakava ʻi ho Papitaisó,” “Ngaahi Tāpuaki Kuo Talaʻofa ki he Papitaisó,” Tuʻu Maʻu ʻi he Tuí (2004), 162–65

Vitiō: “Falani Vaʻinga Tatau,” “Ngaahi Faingamālie ke Fai Leleí”

5:2

4:2

Ko e faiako ‘i he founga ‘a e Fakamo‘uí

Naʻe ʻilo ʻe he Fakamoʻuí ha ngaahi founga makehe ke tokoniʻi ʻaki ʻa kinautolu naʻá Ne akoʻí ke nau tupulaki—ko ha ngaahi founga naʻe fakataumuʻa pē maʻanautolu. Naʻá Ne tokoniʻi kinautolu ke nau ʻiloʻi e ongoongoleleí mei heʻenau ngaahi aʻusiá. Ko e hā te ke fai ke tokoni ki he kau finemui ʻokú ke akoʻí ke nau ʻiloʻi e founga ʻe lava ai heʻenau ngaahi fuakava he papitaisó ʻo tākiekina ʻenau moʻui fakaʻahó?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko ha fakakaukau pē ʻaʻau ke fakafeʻiloaki ʻaki e lēsoni ‘o e uike ní:

Kole ki he kau finemuí ke nau fakakaukauloto ʻoku nau tokoniʻi ha tuongaʻane siʻisiʻi pe tokoua ke teuteu ki hano papitaiso. Te nau tokoniʻi fēfē nai ia ke mahino ki ai e ngaahi fakapapau ʻoku tau fai ʻi he papitaisó? (vakai, Tuʻu Maʻu ʻi he Tuí,peesi 160–66).
Fakaʻaliʻali ha fakatātā ʻo ha papitaiso (hangē ko ia ʻi he Tohi Fakatātā ʻo e Ongoongoleleí, 103–4). Vahevahe ha ngaahi manatu ki he ʻaho ne papitaiso ai koé, kau ai e anga hoʻo ongoʻí. Fakaafeʻi e kau finemuí ke nau vahevahe e meʻa ne nau ongoʻi ʻi he taimi ne papitaiso ai kinautolú. Fehuʻi kiate kinautolu pe ko e hā e ngaahi fuakava ne nau fai he ʻaho ko iá. Fakaafeʻi ke nau lisi ʻenau talí ʻi he palakipoé pea tānaki atu ki he lisí ʻi he lolotonga ʻa e lēsoní ʻi heʻenau ako ha meʻa lahi ange ki heʻenau ngaahi fuakava he papitaisó.

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he kau finemuí e ngaahi fuakava kuo nau fai ʻi he papitaisó. Muimui ʻi he ueʻi ʻa e Laumālié ʻo fili ha meʻa ʻe taha pe lahi ange ʻe tokoni lelei taha ki hoʻo kalasí:

Fakaafeʻi ʻa e kau finemuí ke nau lau ʻa Mōsaia 18:8-10. Ko e hā ʻa e meʻa ʻoku nau ako fekauʻaki mo e anga ne tau palōmesi ke fai ki he niʻihi kehé ʻi he taimi ne tau papitaiso aí? Vahevahe fakakulupu ʻa e kau finemuí pea ʻoange takitaha ha konga ʻo e lea ʻa ʻEletā Hugo Montoya “Siviʻi mo ʻAhiʻahiʻi—Kae Faitokonia,” ke tokoniʻi kinautolu ke ako ki he founga hono fefuaʻaki ʻo ʻetau ngaahi kavengá. Fakaafeʻi ʻa e kulupu takitaha ke vahevahe mo e kalasí ʻa e meʻa naʻa nau akó. ʻE malava pē ke faʻu ʻe he kulupu takitaha ha pousitā ʻo e meʻa naʻa nau akó, vahevahe ha ngaahi aʻusia fakafoʻituitui, pe fai ha ngaahi talanoa mei he folofolá ʻokú ne tokoniʻi hono akoʻi ʻa e tefitoʻi moʻoni tatau pē.
Vahevahe e kalasí ki ha kulupu ʻe tolu, pea vahe ki he kulupu takitaha ke ne lau ha taha ʻo e ngaahi konga iiki ʻe tolu ʻo e “Ko Hoʻo Fuakava ʻi ho Papitaisó” ʻi he Tuʻu Maʻu ʻi he Tuí. Fakaafeʻi e kulupu takitaha ke nau palani ha founga lelei ke akoʻi ʻaki e meʻa ne nau akó (hangē ko ʻení, fakaʻaongaʻi ha tā fakatātā, maau, pe ha vaʻinga). ʻOange ha taimi ke nau feakoʻiʻaki ai. Ko e hā e ʻuhinga ʻoku ongoʻi ai ʻe he kau finemuí ʻoku mahuʻinga ke nau tauhi e ngaahi fuakavá ni?
Fakaafeʻi ha niʻihi ʻo e kau finemuí ke nau lau e Mosaia 18:8–10 pea lau ʻe ha niʻihi kehe e T&F 20:79. Kole ange ke nau sio ki he ngaahi tukupā ʻoku tau fai he taimi ʻoku tau papitaiso aí. ʻOange ha laʻipepa ki he finemui takitaha, pea kole ke ne hiki ha foʻi fili faingataʻa ʻoku fehangahangai mo e toʻu tupú pea faʻo ʻene laʻipepá ki ha foʻi hina. Fakaafeʻi e kau finemuí ke nau taufetongi ʻi hono fili ha laʻipepa mei he foʻi hiná, pea lau e meʻa ʻoku ʻi aí, pea vahevahe ha niʻihi ʻo e ngaahi fakakaukau kehe ki he founga te ne manatuʻi mo tauhi ai ʻene ngaahi fuakava ʻi hono papitaisó lolotonga ʻene fehangahangai mo e ngaahi faingataʻá ni.
Fakaʻaliʻali ha fakatātā ʻo hono papitaiso e Fakamoʻuí (vakai, Tohi Fakatātā ʻo e Ongoongoleleí,35), pea kole ki ha mēmipa ʻo e kalasí ke ne lau e 2 Nīfai 31:4–10. Fakaafeʻi e kau finemuí ke nau vahevahe ha ngaahi sīpinga mei he folofolá ʻoku hā ai e founga hono tauhi ʻe Sīsū Kalaisi ʻEne fuakava mo e Tamaí (te nau lava ke sio he ngaahi fakatātā ʻi he Tohi Fakatātā ʻo e Ongoongoleleí, 36–48, ke maʻu mei ai ha ngaahi fakakaukau). Kole ange ke nau vahevahe ha ngaahi aʻusia ʻa ia ne nau feinga ke muimui ai ki he sīpinga ʻa e Fakamoʻuí.
Fakaafeʻi e kau finemuí ke nau lau e palakalafi ʻe tolu ʻo e lea ʻa ʻEletā Lōpeti D. Heili “ Ko e Fuakava ʻo e Papitaisó: Ke ʻi he Puleʻangá pea ʻo e Puleʻangá,” ʻo kamata mei he “ʻOku tau fai ha fuakava mo ʻetau Tamai Hēvaní ʻi he papitaisó.” Kole ke nau kumi e ngaahi fuakava ʻoku tau fai he taimi ʻoku tau papitaiso aí, pea fakaafeʻi ke nau hiki e meʻa ʻoku nau maʻú ʻi he palakipoé. Ko e hā ha ngaahi founga ʻoku totonu ke liliu ai ʻe he papitaisó ʻetau moʻuí? Kuó ne liliu fēfē e moʻui ʻa e kau finemuí?
Fakaafeʻi e kau finemuí ke nau lau e “Ko Hoʻo Fuakava ʻi ho Papitaisó” ʻi he Tuʻu Maʻu ʻi he Tuí pea ʻiloʻi e ngaahi fakapapau ne tau fai ʻi hotau papitaisó. Fakaafeʻi e kau finemuí ke nau mamataʻi ha taha ʻo e ngaahi vitiō ʻoku fokotuʻu mai ʻe he fokotuʻutuʻu ko ʻení pe lau ʻa e talanoa ʻi he kamataʻanga ʻo e lea ʻa Kalo M. Sitīvení “ʻOku ʻi ai Ha ʻUhinga Maʻongoʻonga ke Tau Fiefia Ai.” Kole ange ke nau kumi ha sīpinga ʻo e kakai ʻoku nau tauhi ʻenau ngaahi fuakava ʻi he papitaisó. ʻOange ki he kau finemuí ha taimi ke vahevahe ai e meʻa ʻoku nau akó. Ko e hā e meʻa ʻoku ongoʻi ʻe he kau finemuí te nau lava ʻo fai ke tauhi kakato ange ai ʻenau ngaahi fuakava ʻi honau papitaisó ʻi he taimi kotoa pē mo e feituʻu kotoa pē?

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino nai kiate kinautolu ʻenau ngaahi fuakava ʻi honau papitaisó? Ko e hā haʻanau ngaahi ongo pe fakakaukau? ʻOku ʻi ai haʻanau toe ngaahi fehuʻi kehe? ʻE ʻaonga ke fakamoleki ha toe taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:

Vakavakaiʻi ʻi he faʻa lotu ʻenau moʻuí ke fakapapauʻi pe ʻoku ʻi ai ha meʻa ʻoku fie maʻu ke nau taʻofi hono faí pe kamata ke fai koeʻuhí ke nau toe faivelenga ange ai ki heʻenau ngaahi fuakava ʻi honau papitaisó. ʻE lava leva ke nau fai ha tukupā fakatāutaha ke ngāue ki ai.
Ngāue fakafoʻituitui pe ko ha kalasi ʻi he meʻa ke aʻusia fika 4 he tuʻunga ʻulungaanga mahuʻinga ʻo e Tuí pe meʻa ke aʻusia fika 4 he tuʻunga ʻulungaanga mahuʻinga Ko e ʻIló ʻi he Fakalakalaka Fakatāutahá.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.