Ko e hā ʻoku mahuʻinga ai ʻa e ngaahi fuakavá ʻi heʻeku moʻuí?

ʻOku tau fai ha ngaahi fuakava ʻi he taimi ʻoku tau tali ai ʻa e ngaahi ouau hangē ko e papitaisó, fakanofo ki he lakanga fakataulaʻeikí, mo e ngaahi ouau ʻo e temipalé. Ko e fuakavá ko ha aleapau toputapu ʻi he vā ʻo e ʻOtuá mo ʻEne fānaú. ʻOku fokotuʻu ʻe he ʻOtuá ha ngaahi tuʻunga mahino, pea ʻokú Ne palōmesi ke tāpuakiʻi kitautolu kapau te tau talangofua ki he ngaahi tuʻunga ko ʻení. ʻOku fakafeʻungaʻi kitautolu ʻi heʻetau fakahoko mo tauhi ʻo e ngaahi fuakavá ke tau maʻu e ngaahi tāpuaki kuo ʻosi talaʻofa ʻe he ʻOtuá. Ko e taimi ʻoku tau fili ai ke ʻoua te tau tauhi e ngaahi fuakavá, he ʻikai ke tau lava maʻu e ngaahi tāpuakí. ʻOku tataki ʻe he ʻetau ngaahi fuakavá ʻa e ngaahi fili ʻoku tau faí mo tokoni ke tau tekeʻi ʻa e fakatauelé.

Teuteuʻi fakalaumālie koe

Kuo takiekina fēfē hoʻo moʻuí ʻe hoʻo ngaahi fuakavá? Ko e hā e ngaahi tāpuaki kuó ke maʻu ʻi hoʻo fakahoko mo tauhi e ngaahi fuakava toputapú?

Te ke tokoniʻi fēfē ke mahino ki he kau finemuí e ngaahi fuakava ne nau faí mo ia te nau fai ʻi he kahaʻú? ʻE takiekina fēfē e kau finemuí ke nau moʻui māʻoniʻoni ange ʻi he mahino ʻa e ngaahi fuakavá?

ʻI hoʻo teuteú, ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā ʻokú ke ongoʻi ʻoku ueʻi koe ke ke vahevahe mo e kau finemuí?

ʻEkesōtosi 19:5; T&F 35:24; 90:24 (ʻOku maʻu ʻa e ngaahi tāpuakí ʻi heʻetau tauhi ʻa e ngaahi fuakavá)

Mōsaia 5; ʻAlamā 53:10–18 ;56:5–8 (Ngaahi sīpinga mei he Tohi ʻa Molomoná ʻo ha kakai ʻoku nau fakahoko mo tauhi e ngaahi fuakavá)

T&F 82:10 (ʻOku haʻisia e ʻEikí ʻi he taimi ʻoku tau talangofua aí)

Henry B. Eyring, “Ngaahi ʻOfefine ʻi he Fuakava,” Ensign pe Liahona, Mē 2014, 125–28

Rosemary M. Wixom, “ʻOku Maluʻi, Teuteuʻi mo Fakamālohia Kitautolu Heʻetau Tauhi e Ngaahi Fuakavá,” Ensign pe Liahona, Mē 2014, 116–18

Jean A. Stevens, “Ngaahi ʻOfefine Fuakava ʻo e ʻOtuá,” Ensign pe Liahona, Nōvema 2014, 114–17

“Fuakavá,” Tuʻu Maʻu ʻi he Tuí (2004), 73-74

Vitiō: “Walk in His Light” “Vilitaki Atu”

4:41

4:12

Ko e faiako ‘i he founga ‘a e Fakamo‘uí

Ne teuteuʻi ʻe he Fakamoʻuí Ia ke faiako ʻaki hono fakamoleki ha taimi fakatāutaha ʻi he lotu mo e ʻaukai. ʻI he ngaahi taimi fakafoʻituituí, naʻá ne fekumi ki he tataki ʻEne Tamaí (vakai, 3 Nīfai 19:19–23). Muimui ki he ueʻi ʻa e Laumālie Māʻoniʻoní ʻi hoʻo teuteu ke akoʻi ki he kau finemuí e ngaahi ouaú mo e fuakavá.

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa ku nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko ha fakakaukau pē ʻaʻau ke fakafeʻiloaki ʻaki e lēsoni ‘o e uike ní:

Kole ki he kau finemuí ke nau hiki e ngaahi fuakava pe fakapapau kuo nau fai mo e ʻOtuá. Kuo takiekina fēfē ʻe he ngaahi fuakavá ni ʻenau moʻuí? Poupouʻi ke hokohoko atu ʻenau fakakaukau ki he fehuʻí ni ʻi heʻenau ako lahi ange kau ki he ngaahi fuakavá lolotonga e lēsoni ko ʻení.
Fakaafeʻi e kau finemuí ke nau fakaʻuhingaʻi e foʻi lea fuakava (kapau ʻoku nau fie maʻu tokoni, ʻai ke nau lau ʻa e fakamatala ʻo e ngaahi fuakavá ʻi he Tuʻu Maʻu ʻi he Tuí). Ko e hā e faitatau mo e faikehekehe ʻo e fuakavá mei ha felotoi, aleapau, pe ko ha fakapapau?

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he kau finemuí e ʻuhinga ʻoku tau maʻu ai e ngaahi ouaú mo fai ha ngaahi fuakavá. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

Fakaʻaliʻali e fakatātā hono tanu ʻe he kakai ʻo ʻĀmoní ʻenau meʻataú. Kole ki ha finemui ke ne talanoaʻi fakanounou e kakai ʻo ʻĀmoní mo e fuakava ne nau faí (vakai, ʻAlamā 53:10–18 ;56:5–8). Ko e hā ne fili ai e kakaí ke tauhi ʻenau ngaahi fuakavá neongo e faingataʻa ne nau fepaki mo iá? Naʻe takiekina fēfē ʻe heʻenau sīpingá ʻa honau ngaahi filí? Naʻá ne takiekina fēfē ʻenau fānaú? Fakaafeʻi e finemui takitaha ke ne tohi he palakipoé e hingoa ʻo ha taha naʻá ne akoʻi ia mei heʻene sīpingá ʻo kau ki hono tauhi e ngaahi fuakavá. Kole ange ke ne vahevahe mo e kalasí e meʻa naʻá ne ako mei he tokotaha ko iá.
Fakaafeʻi e kau finemuí ke nau lau e ngaahi potufolofola (hangē ko ia ʻoku hiki atu ʻi he fokotuʻutuʻu ko ʻení) pea hiki he palakipoé e ngaahi tāpuaki ne talaʻofa mai ʻe he ngaahi potufolofolá maʻanautolu ʻoku nau fakahoko mo tauhi e ngaahi fuakava toputapú. ʻEke ki he kau finemuí pe ʻoku fakahoko fēfē e ngaahi tāpuakí ni ʻi heʻetau moʻuí (poupouʻi ke nau vahevahe ha ngaahi sīpinga). Fakamoʻoni ki ha ngaahi tāpuaki naʻá ke aʻusia ʻi hoʻo tauhi e ngaahi fuakavá.
Fakaafeʻi e kau finemuí ke nau toe vakaiʻi e lea ʻa Palesiteni Henelī B. ʻAealingi ko e “Ngaahi ʻOfefine ʻi he Fuakava” pe lea ʻa Sisitā Seni A. Sitīveni “Ngaahi ʻOfefine Fuakava ʻo e ʻOtuá.” Kole ange ke nau kumi ha ngaahi sīpinga ʻo e kakai fefine mo e fānau fefine tauhi fuakava ʻi he leá pea hiki ʻi he palakipoé e founga tauhi fuakava ʻa e fefine takitaha. Ko e hā ʻoku ako ʻe he kau finemuí mei he kau fafine ko ʻení? Ko e hā ha ngaahi sīpinga ʻo e kakai fefine tauhi fuakavá kuo tākiekina ai ʻenau moʻuí?
Mamataʻi ʻe he kalasí e foʻi vitiō “Walk in His Light.” Fakaafeʻi e kau finemuí ke hiki ha lisi ʻo e ngaahi sīpinga ʻo hono fakahoko mo tauhi e ngaahi fuakavá ʻi heʻenau mamataʻi e vitioó. Ka ʻosi ʻe vitioó, fakaafeʻi kinautolu ke fekumi ʻi he lea ʻa Sisitā Rosemary M. Wixom “ʻOku Maluʻi, Teuteuʻi mo Fakamālohia Kitautolu Heʻetau Tauhi e Ngaahi Fuakavá” ke nau ʻiloʻi ʻa e ngaahi tāpuaki ʻoku maʻu mei he ngaahi fuakava ʻi heʻenau lisí. Kole ki he kau finemuí ke nau vahevahe e meʻa ne na ʻiló pea aleaʻi ha ngaahi tūkunga pau te nau ala fehangahangai mo ia ʻa ia te nau maʻu ai ha mālohi pe malu ʻi heʻenau ngaahi fuakavá.

4:41
Fakaafeʻi e kau finemuí ke nau fakakaukauloto ʻoku nau feinga ke tokoniʻi ha kaungāmeʻa mei ha tui fakalotu kehe ke mahino ki ai e ngaahi fuakavá. Fakaafeʻi ke nau ako e “Fuakavá” ʻi he Tuʻu Maʻu ʻi he Tuí pe ngaahi potufolofola ʻoku hiki atu ʻi he fokotuʻutuʻu ko ʻení mo teuteu ha ngaahi founga ke fakamatalaʻi ai e ngaahi fuakavá ki honau kaungāmeʻá. Fakaafeʻi ke nau fakafaivaʻi ʻenau feakoʻiʻakí. Kole ke fakakau ʻi heʻenau fakamatalá e ngaahi ʻuhinga ʻoku mahuʻinga ai kiate kinautolu ʻenau ngaahi fuakavá.

Kole ki he kau finemuí ke nau vahevahe ʻa e meʻa naʻa nau ako ʻi he ʻaho ní. ʻOku mahino lelei ange nai kiate kinautolu e ngaahi fuakavá? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui ʻaki fēfē nai ʻa e meʻa kuo nau ako he ʻaho ní. Hangē ko ʻení, te nau lava ʻo:

Vakavakaiʻi ʻenau moʻuí he uike hono hokó pea hiki e ngaahi tāpuaki ʻoku maʻu mei hono tauhi ʻenau ngaahi fuakavá. Poupouʻi ke nau vahevahe ʻenau fakakaukaú mo e mahinó ʻi he ngaahi kalasi he kahaʻú.
Ako maʻuloto e T&F 82:10 pea hiki ʻi heʻenau tohinoá e meʻa ʻoku akoʻi kiate kinautolu ʻe he potufolofolá ni kau ki he ngaahi ouaú mo e fuakavá mo e meʻa te nau fai ke teuteu ai ki he ngaahi fuakava te nau fai ʻi he kahaʻú.