Haʻu, ʻo Muimui ʻIate Au
Te u maʻu fēfē e meʻafoaki ʻo e Laumālie Māʻoniʻoní?

Te u maʻu fēfē e meʻafoaki ʻo e Laumālie Māʻoniʻoní?

Hili hotau papitaisó, ʻoku tau maʻu ʻa e ouau ʻo e hilifaki-nimá. Ko e konga ʻo e ouaú ni, ʻoku talamai ai ke tau “maʻu ʻa e Laumālie Māʻoniʻoní.” ʻOku ʻuhinga ʻeni ʻe lava ke hoko ʻa e Laumālie Māʻoniʻoní ko hatau takaua maʻu pē kapau ʻoku tau fie maʻu pea mo fakaafeʻi ʻEne takaofí ki heʻetau moʻuí mo tauhi faivelenga e ngaahi fekaú.

Teuteuʻi fakalaumālie koe

Ko e hā ha ngaahi potufolofola mo ha lea ʻe tokoni ke mahino ki he kau finemuí e founga ʻe tokoniʻi ai kinautolu ʻe he meʻafoaki ʻo e Laumālie Māʻoniʻoní mo tāpuekina kinautolu he toenga ʻenau moʻuí?

Ngāue 8:14–17; T&F 33:15; Ngaahi Tefito ʻo e Tuí 1:4 (ʻOku maʻu e meʻafoaki ʻo e Laumālie Māʻoniʻoní ʻi hono hilifaki ʻo e nimá)

1 Nīfai 2:9–20 (Ko e sīpinga ʻa Nīfai ʻo e fakaongoongo ki he Laumālie Māʻoniʻoní)

1 Nīfai 15:1–11 (ʻI he talangataʻa ki he ngaahi fekaú, ʻokú ne taʻofi kitautolu mei hono maʻu ʻo e Laumālie Māʻoniʻoní.)

1 Nīfai 16:14–29; 18:8–22; ʻAlamā 37:38–46 (Sīpinga ʻo e Liahoná)

T&F 20:77 (ʻOku tau fakafoʻou ʻetau ngaahi fuakavá ʻi hono maʻu ʻo e sākalamēnití, pea lava ke tau maʻu maʻu pē ʻa e Laumālié)

T&F 121:45–46 (Kapau te tau angamaʻa mo angaʻofa, ʻe hoko e Laumālie Māʻoniʻoní ko hotau takaua maʻu pē)

Henry B. Eyring, “Ko e Hoko ʻa e Laumālie Māʻoniʻoní ko Ho Takauá,” Liahona, Nōv. 2015, 104–7

David A. Bednar, “Maʻu ʻa e Laumālie Māʻoniʻoní,” Ensign pe Liahona, Nōvema 2010, 94–97

“Ko e Meʻafoaki ʻo e Laumālie Māʻoniʻoní,” Tuʻu Maʻu ʻi he Tuí (2004), 101-02

“ʻOku Taki ʻa e Laumālié,” Ngaahi Himí, fika 73

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa ku nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko ha fakakaukau pē ʻaʻau ke fakafeʻiloaki ʻaki e lēsoni ‘o e uike ní:

  • Fanongo pe hivaʻi fakakalasi e himi “ʻOku Taki ʻa e Laumālié.” Ko e hā ʻoku ako ʻe he kau finemuí mei he himi ko ʻení kau ki he meʻa kuo pau ke tau fai ke maʻu ai e Laumālie Māʻoniʻoní?

  • Fakaafeʻi e kau finemuí ke nau fakakaukau ki he ʻaho ne hilifakinima ai kinautolu ko e mēmipa ʻo e Siasí pea talaange ke nau “maʻu ʻa e Laumālie Māʻoniʻoní.” Kuo tāpuekina fēfē kinautolu ʻe he meʻafoaki ʻo e Laumālie Māʻoniʻoní? Ko e hā haʻanau ngaahi fehuʻi kau ki he meʻafoaki ʻo e Laumālie Māʻoniʻoní?

Ako fakataha

ʻE tokoni ʻa e ngaahi ʻekitivitī takitaha ʻi laló ki he kau finemuí ke mahino e ʻuhinga ʻo hono maʻu ʻo e Laumālie Māʻoniʻoní. Muimui ʻi he fakahinohino ʻa e Laumālié ʻo fili ha taha pe toe lahi ange ʻa ia ʻe ʻaonga taha ki hoʻo kalasí:

  • Fakaafeʻi ʻa e kau finemuí ke nau fekumi ʻi he lea ʻa Palesiteni Henry B. Eyring “Ko e Hoko ʻa e Laumālie Māʻoniʻoní ko Ho Takauá,” ki ha ngaahi founga te ne tokoniʻi kinautolu ke maʻu lahi ange ai e takaua ʻo e Laumālie Māʻoniʻoní. Fakalotolahiʻi kinautolu ke fakakaukau ki he ʻuhinga ʻoku tau fie maʻu ai ʻa e takaua ʻo e Laumālie Māʻoniʻoní pea mo e founga ʻoku totonu ke tau tali ʻaki ʻEne ngaahi ueʻi fakalaumālié. ʻOku uesia fēfē ʻe he ngaahi meʻa ʻoku vakai ki ai, fakakaukauʻi, mo fakahoko fakaʻaho ʻe he kau finemuí, ʻa ʻenau malava ke ongoʻi e Laumālié? Kole ke nau fakalaulauloto ki ha faʻahinga liliu ʻoku fie maʻu ke fai ʻi heʻenau moʻuí. Fakaafeʻi ke nau vahevahe ʻenau ngaahi fakakaukau ʻe niʻihi kapau ʻoku nau ongoʻi fiemālie ke fai pehē. 

  • Kole ki he kau finemuí ke nau lau fakatāutaha e 1 Nīfai 2:9–19 mo e 1 Nīfai 15:1–11. Fakaafeʻi e vaeua ʻo e kalasí ke nau kumi mo aleaʻi e meʻa naʻe fai ʻe Nīfai ke ne maʻu e Laumālie Māʻoniʻoní. Fakaafeʻi leva e vaeua ʻe tahá ke nau kumi mo aleaʻi e meʻa naʻe fai ʻe Leimana mo Lemiuela ke taʻofi ai ʻena maʻu e Laumālie Māʻoniʻoní. Kole ke nau hiki he palakipoé e meʻa ne nau ʻiló. Ko e hā ʻoku ako ʻe he kau finemuí mei he ngaahi sīpinga ko ʻení te ne tokoniʻi ke nau maʻu ai e Laumālie Māʻoniʻoní ʻi heʻenau moʻuí?

  • Fakapapauʻi ʻoku maʻu ʻe he mēmipa kotoa ʻo e kalasí ha tatau ʻo e Ki Hono Fakamālohia ʻo e Toʻu Tupú. Fakaafeʻi e finemui takitaha ke ne fili ha konga mei he Ki Hono Fakamālohia ʻo e Toʻu Tupú, ʻo lau, pea fakaʻilongaʻi e ngaahi meʻa kuo pau ke nau fai mo ʻikai fai ke maʻu ai e Laumālie Māʻoniʻoní. Fakaafeʻi ke nau vahevahe e meʻa ʻoku nau ako kau ki he Laumālie Māʻoniʻoní mei he meʻa ne nau laú. ʻE tokoniʻi fēfē kinautolu ʻe he meʻá ni ke nau maʻu e Laumālie Māʻoniʻoní ʻi heʻenau moʻuí?

  • ʻAi e kalasí ke lau e palakalafi ʻe tolu fakaʻosi ʻo e konga ʻoku ui ko e “Ko e Meʻafoaki ʻo e Laumālie Māʻoniʻoní” mei he lea ʻa ʻEletā Tēvita A. Petinā “Maʻu e Laumālie Māʻoniʻoní.” Kole ki ha finemui ke ne fakamatala fakanounouʻi mai e tefitoʻi ʻuhinga ʻa ʻEletā Petinaá. Vahe ki he finemui takitaha ke ne lau ha taha ʻo e konga ʻe tolu hono hoko ʻo e leá, ʻo kumi e tali ki he fehuʻi hangē ko ʻení: ʻOku tau feʻunga fēfē ke maʻu e takaua ʻo e Laumālie Māʻoniʻoní? Ko e hā te ne lava taʻofi kitautolu mei hono maʻu ʻo e Laumālie Māʻoniʻoní? Kole ke nau vahevahe e meʻa ʻoku nau ʻilo mo palani ke fai ke nau fakahoko ʻaki e faleʻi ʻa ʻEletā Petinaá.

  • Fakaʻaliʻali ha fakatātā ʻo Līhai pea mo e Liahoná (vakai, Tohi Fakatātā ʻo e Ongoongoleleí,68), pea kole ki he kau finemuí ke nau vahevahe e meʻa ʻoku nau ʻilo ʻo kau ki he Liahoná. Fakaafeʻi e vaeua ʻo e kalasí ke nau lau e 1 Nīfai 16:14–29, pea fakaafeʻi e vaeua ʻe tahá ke nau lau e 1 Nīfai 18:8–22. Kole ke nau kumi e tali ki he fehuʻí ni: “ʻOku faitatau fēfē ʻa e Liahoná mo e Laumālie Māʻoniʻoní?” Fakaafeʻi ke vahevahe ʻenau fakakaukaú. Ko e hā e meʻa ʻoku ako ʻe he kau finemuí mei he ngaahi meʻa ne aʻusia ʻe he fāmili ʻo Līhaí ʻe lava ke ne tokoniʻi kinautolu ke nau maʻu e Laumālie Māʻoniʻoní? Lau fakataha e ʻAlamā 37:38–46 ko ha konga ia ʻo e fealeaʻakí.

  • Lau fakataha e Tokāteline mo e Ngaahi Fuakava 121:45–46. Fehuʻi ki he kau finemuí pe ʻoku ʻi ai ha faʻahinga foʻi lea ʻi he ngaahi veesi ko ʻení ʻoku ʻikai ke mahino kiate kinautolu, pea tokoniʻi ke nau fakaʻuhingaʻi e ngaahi foʻi lea ko iá (hangē ko ʻení, ʻoku ʻuhinga e lotó ki he “konga taupotu taha ʻi lotó”; ʻoku ʻuhinga e ʻai ke fakaʻofoʻofá ki he “fakaleleiʻi” pe “fakatupulaki”; pea ʻuhinga e ʻāsili mālohí ko e “hoko ʻo mālohi ange”). Ko e hā ʻoku ako ʻe he kau finemuí mei he ngaahi veesi ko ʻení ʻo kau ki he founga ke maʻu ai e Laumālie Māʻoniʻoní?

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino nai kiate kinautolu e founga ke maʻu ai e Laumālie Māʻoniʻoní? Ko e hā ha faʻahinga ongo pe ngaahi fakakaukau ʻoku nau maʻu? ʻOku ʻi ai haʻanau toe ngaahi fehuʻi kehe? ʻE ʻaonga ke fakamoleki ha toe taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.