Ko e hā e ʻuhinga hono toʻo kiate au ʻa e huafa ʻo Sīsū Kalaisí?

Ko e taimi ʻoku tau papitaiso aí, ʻoku tau fuakava ke toʻo kiate kitautolu ʻa e huafa ʻo Sīsū Kalaisí. ʻOku tau fakafoʻou ʻa e fuakava ko ʻení ʻi he taimi ʻoku tau maʻu ai ʻa e sākalamēnití (vakai, T&F 20:77). ʻOku tau fakahoko e fuakavá ni ʻaki ʻetau fakamuʻomuʻa e ʻEikí ʻi heʻetau moʻuí, ʻaki ʻetau feinga ke fakakaukau mo tōʻonga hangē ko ia naʻá Ne mei faí, pea ʻaki ʻetau tuʻu “ko e kau fakamoʻoni ʻo e ʻOtuá ʻi he taimi kotoa pē pea ʻi he meʻa kotoa pē, pea ʻi he feituʻu kotoa pē” (Mōsaia 18:9).

Teuteuʻi fakalaumālie koe

Ko e hā ha ngaahi potufolofola mo ha ngaahi maʻuʻanga tokoni ʻe tokoni ke mahino ki he kau finemuí e fuakava ne nau fai ʻi hono toʻo kiate kinautolu e huafa ʻo Kalaisí?

Mosaia 5 (Ko e hā ʻoku mahuʻinga ai ke tau toʻo kiate kitautolu ʻa e huafa ʻo Kalaisí)

3 Nīfai 27:27 (ʻOku totonu ke tau feinga ke hangē ko Sīsū Kalaisí)

T&F 20:37, 77 (Ko ha konga ʻo ʻetau fuakava he papitaisó mo e ouau ʻo e sākalamēnití ʻa hono toʻo ko ia kiate kitautolu ʻa e huafa ʻo Kalaisí)

Robert D. Hales, “Hoko ko ha Kalisitiane ʻoku Anga Faka-Kalaisi Angé,” Ensign pe Liahona, Nōvema 2012, 90–92

Mervyn B. Arnold, “Ko e Hā Kuó Ke Fai ʻAki Hoku Hingoá?” Ensign pe Liahona, Nōvema 2010, 105–7

Vitiō: “Pole ke Tuʻu Toko Taha”

4:20

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa ku nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko ha fakakaukau pē ʻaʻau ke fakafeʻiloaki ʻaki e lēsoni ‘o e uike ní:

Fakaafeʻi ha taha ʻo e kau finemuí ke ne lau e lotu [tāpuakiʻi] ʻo e maá ʻi he sākalamēnití ʻi he T&F 20:77. ʻOku ʻuhinga ki he hā ʻa e meʻa ʻoku nau tui ki aí ke “toʻo [kiate kitautolu] ʻa e huafa ʻo [Sīsū Kalaisí]”?
Fehuʻi ki he kau finemuí pe ʻoku nau ʻiloʻi e ʻuhinga naʻe fili ai ʻe heʻenau mātuʻá honau hingoá. ʻOku takiekina fēfē ʻe honau hingoá ko hai kinautolu mo e founga ʻoku nau feinga ke moʻui ʻakí? Fehuʻi kiate kinautolu pe ʻoku ʻuhinga ki he hā ke toʻo kiate kinautolu ʻa e huafa ʻo Sīsū Kalaisí (vakai, T&F 20:77). ʻOku takiekina fēfē ʻe hono toʻo Hono huafá ko hai kitautolú mo e founga ʻoku tau feinga ke moʻui ʻakí?

Ako fakataha

ʻE tokoni e ngaahi ʻekitivitī takitaha ʻi laló ke mahino ki he kau finemuí e ʻuhinga hono toʻo kiate kinautolu e huafa ʻo Sīsū Kalaisí. Muimui ʻi he fakahinohino ʻa e Laumālié ʻo fili ha taha pe toe lahi ange ʻa ia ʻe ʻaonga taha ki hoʻo kalasí:

Huluʻi e foʻi vitiō “Pole ke Tuʻu Toko Taha”; Ko e hā e meʻa ʻoku ongoʻi ʻe he kau finemuí ko e tefitoʻi pōpoaki ia ʻa Palesiteni Monisoni ʻi he foʻi vitiō ko ʻení? ʻOku fakahaaʻi fēfē mai ʻe he toʻu tupu ʻoku ʻasi he foʻi vitioó kuo nau ʻosi toʻo kiate kinautolu e huafa ʻo e Fakamoʻuí? Fakaafeʻi e kau finemuí ke nau vahevahe haʻanau ngaahi aʻusia tatau.

4:20
Vahevahe e lea ko ʻeni meia Palesiteni Henelī B. ʻAealingi: “ʻOku tau fakapapau ke toʻo kiate kitautolu Hono huafá. ʻOku ʻuhinga iá ko e pau ke tau vakai kiate kitautolu ʻo hangē pē ko Iá. Te tau fakamuʻomuʻa Ia ʻi heʻetau moʻuí. Te tau fie maʻu e meʻa ʻokú Ne fie maʻú kae ʻikai ko e meʻa ʻoku tau fie maʻú pe ko e meʻa ʻoku akoʻi mai ʻe he māmaní ke tau fie maʻú”. Vahevahe e kalasí ki ha kulupu ʻe tolu, pea kole ki he kulupu takitaha ke ne aleaʻi ha taha ʻo e ngaahi fehuʻí ni: Ko e hā hono ʻuhinga ʻo e vakai kiate kitautolu ʻo hangē ko Kalaisí? ʻOku tau fakamuʻomuʻa fēfē e Fakamoʻuí ʻi heʻetau moʻuí? Ko e hā hono ʻuhinga ʻo e fie maʻu e meʻa ʻoku finangalo ki ai e Fakamoʻuí? Kole ki ha taha mei he kulupu takitaha ke ne vahevahe mo e toenga ʻo e kalasí e meʻa ne aleaʻi heʻene kulupú.
Fakaafeʻi e kau finemuí ke nau lau e Mosaia 5, ʻo kumi e tali ki he fehuʻi peheni “Ko e hā e ʻuhinga ʻo e toʻo kiate kitautolu e huafa ʻo Kalaisí?” mo e “Ko e hā ʻoku mahuʻinga ai ke toʻo kiate kitautolu e huafa ʻo Kalaisí?” Kole ke nau vahevahe e meʻa ʻoku nau maʻú pea hiki ha ngaahi meʻa pau te nau lava ʻo fai ke fakahaaʻi ai kuo nau toʻo kiate kinautolu e huafa ʻo e Fakamoʻuí.
Fakaafeʻi ha niʻihi ʻo e kau finemuí ke nau lau e Hilamani 5:6–8, pea fakaafeʻi ha niʻihi kehe ke nau lau e ʻuluaki palakalafi ʻe tolu ʻo e lea ʻa ʻEletā Mevini B. ʻĀnolo “Ko e Hā Kuó Ke Fai ʻAki Hoku Hingoá?” Kole ke nau takitaha fakamatala fakanounouʻi e meʻa kuo nau laú. Naʻe ueʻi fakalaumālie fēfē ʻe he hingoa ʻo Nīfai, Līhai mo Siaosi ʻAlipate Sāmitá e kakaí ni ke nau moʻui angatonú? ʻOku ueʻi fakalaumālie fēfē kitautolu heʻetau fuakava ke toʻo kiate kitautolu e huafa ʻo Sīsū Kalaisí? Lau fakakalasi e ongo palakakafi fakaʻosi ʻo e leá, pea fakaafeʻi e kau finemuí ke nau aleaʻi e founga te nau fakahoko ai e tukupā ʻa ʻEletā ʻĀnoló.
Vahevahe e lea ko ʻeni meia ʻEletā Lōpeti D. Heili: “ʻOku ʻuhinga e foʻi lea Kalisitiané ko hono toʻo kiate kitautolu e huafa ʻo Kalaisí.” Vahevahe ki he kau finemuí e lea ʻa ʻEletā Heili ko e “Hoko ko ha Kalisitiane ʻoku Anga Faka-Kalaisi Angé”. Kole ki he finemui takitaha ke ne lau ʻene kongá, ʻo kumi e tali ki he fehuʻi “Ko e hā e ʻuhinga ʻo e hoko ko ha Kalisitiané?” Kole ke ne vahevahe e meʻa ʻokú ne maʻú pea ʻomi ha sīpinga ʻo ha kakai ʻokú ne ʻiloʻi ʻa ia ʻokú ne fakakaukau ko ha kau Kalisitiane moʻoni.

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino nai kiate kinautolu e ʻuhinga ʻo hono toʻo kiate kinautolu e huafa ʻo Sīsū Kalaisí? Ko e hā ha faʻahinga ongo pe ngaahi fakakaukau ʻoku nau maʻu? ʻOku ʻi ai haʻanau toe ngaahi fehuʻi kehe? ʻE ʻaonga ke fakamoleki ha toe taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukauʻi ha ngaahi founga te nau lava ʻo fakahaaʻi ai mei heʻenau tōʻonga moʻuí kuo nau toʻo kiate kinautolu e huafa ʻo Sīsū Kalaisí. ʻI ha kalasi he kahaʻú, fakaafeʻi kinautolu ke vahevahe ʻenau ngaahi aʻusiá.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.