Ko e hā ʻoku mahuʻinga ai ʻa e ngaahi ouau ʻo e temipalé?

ʻOku fakaiku ʻa e ngaahi ouau fakatemipalé ki he ngaahi tāpuaki maʻongoʻonga taha ʻe ala maʻu ʻe he fānau ʻa e Tamai Hēvaní. ʻOku teuteuʻi kitautolu ʻe he ngaahi ouaú ni ke tau moʻui ʻo taʻengata mo e Tamai Hēvaní pea mo hotau ngaahi fāmilí ʻi he hili ʻo e moʻui ko ʻení. ʻOku nau tāpuekina kitautolu ʻaki e mālohi fakalaumālie mo e fakahinohino he lolotonga e moʻui fakamatelié. Te tau toe lava foki ʻi he temipalé ke maʻu ʻa e ngaahi ouau mahuʻinga maʻa ʻetau ngaahi kui ne pekia kae ʻikai ha faingamālie ke maʻu ʻa e ngaahi ouau ko ʻení maʻanautolu.

Teuteuʻi fakalaumālie koe

Kuo tataki mo tāpuekina fēfē hoʻo moʻuí ʻe he ngaahi ouau fakatemipalé? Ko e hā ha founga kuo hanga ai ʻe hoʻo kau atu ki he ngaahi ouau ko ʻení ʻo ʻai ke ke toe ofi ange ai ki he Tamai Hēvaní?

Ko e hā ha ngaahi meʻa kuo aʻusia ʻe he kau finemuí ʻi he ngaahi ouau fakatemipalé? Te nau fetokoniʻaki fēfē nai ke ako pea mo maʻu ha fakamoʻoni ki he ngaahi ouau fakatemipalé?

Ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení ʻi hoʻo teuteú. Ko e hā ha meʻa ʻe ueʻi fakalaumālie ai e kau finemuí ke nau feʻunga mo taau pea kau ʻi he ngaahi ouau fakatemipalé?

T&F 84:19–22 (ʻOku ʻi he ngaahi ouau ʻo e lakanga fakataulaʻeikí e mālohi ʻo e anga faka-ʻOtuá)

T&F 109 (Fakatapui ʻo e Temipale Ketilaní)

T&F 131:1–4 (ʻOku maʻu ʻa e nāunau māʻolunga tahá ʻi he mali fakasilesitialé)

Kent F. Richards, “Ko e Mālohi ʻo e Anga Faka-ʻOtuá,” Ensign pe Liahona, Mē 2016, 118–20

Thomas S. Monson, “Ngaahi Tāpuaki ʻo e Temipalé,” Ensign pe Liahona, Mē 2015, 91–93

Quentin L. Cook, “Ngaahi Aká mo e Vaʻá,” Ensign pe Liahona, Mē 2014, 44–48

“Ngaahi Temipalé,” Tuʻu Maʻu ʻi he Tuí (2004), 141–46

Vitiō: “Ko e Temipalé ko ha Maama”

2:50

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa ku nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko ha fakakaukau pē ʻaʻau ke fakafeʻiloaki ʻaki e lēsoni ‘o e uike ní:

Fakaafeʻi e kau finemuí ke nau fakakaukau ki ha meʻa ne nau toki aʻusia ʻi he temipalé. Ko e hā e meʻa ne nau ongoʻi aí? Ko e hā ha ngaahi tāpuaki kuo nau maʻu ʻi he ʻalu ki he temipalé? Ko fē ha taimi ne nau ongoʻi ai kuo nau maʻu ha mālohi pe fakahinohino fakalaumālie ʻi he temipalé?
Fakaafeʻi ha finemui ke ne puke hake ha fakatātā ʻo e temipalé. Kole ange ke ne talamai ha niʻihi ʻo e ngaahi ouau he temipalé pea fakamatalaʻi e ʻuhinga ʻoku nau mahuʻinga ai kiate iá.

Ako fakataha

ʻE tokoni e ngaahi ʻekitivitī takitaha ʻi laló ke mahino ki he kau finemuí e ʻuhinga ʻoku mahuʻinga ai e ngaahi ouau fakatemipalé. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

Fakaafeʻi e kau finemuí ke fakaʻosi e sētesi ko ʻení pea vahevahe ʻenau ngaahi talí ki he kalasí: “ ʻI he taimi te u ʻalu ai ki he temipalé, __________.” Ko e hā ha ngaahi tali kehe ʻoku nau maʻu ʻi he ngaahi lisi ʻoku hā he lea ʻa ʻEletā Kent F. Richards “Ko e Mālohi ʻo e Anga Faka-ʻOtuá”? Te nau lava ʻo kumi ʻi he leá mo fakasio ha ngaahi tali ki he fehuʻi “Ko e hā ʻoku mahuʻinga ai ʻa e ngaahi ouau fakatemipalé?” Kole ki he kau finemuí ke nau fakamatala ha meʻa ne nau aʻusia kimuí ni ʻi heʻenau ō ki he temipalé. Ko e hā ha ngaahi tāpuaki kuo nau maʻu mei he ngāue fakatemipalé?
Fakaafeʻi e kau finemuí ke kumi ʻa e ngaahi tāpuaki ʻoku maʻu mei he mōihū ʻi he temipalé ʻi he lea ʻa Palesiteni Thomas S. Monson ko e “Ngaahi Tāpuaki ʻo e Temipalé.” Ko e hā e ngaahi tāpuaki kuo nau maʻu ʻi heʻenau ō ki he temipalé mo kau ʻi he ngaahi ouau ʻo e temipalé? Te ke lava foki ke vahevahe ha ngaahi aʻusia mei hoʻo moʻuí ʻokú ne fakahaaʻi e founga kuo faitāpuekina ai koe ʻe he ngaahi ouau fakatemipalé.
Fakaʻaliʻali ha fakatātā ʻo ha ongo meʻa mali ʻi muʻa ʻi ha temipale (vakai, Tohi Fakatātā ʻo e Ongoongoleleí, 120). Fakaafeʻi e kau finemuí ke lau fakataha e Tokāteline mo e Ngaahi Fuakava 131:1–4 pea kumi e ngaahi tāpuaki naʻe talaʻofa kiate kinautolu ʻoku nau fai e fuakava foʻou mo taʻengata ʻo e malí. Ko e hā e ngaahi tāpuaki ʻe taʻofi meiate kinautolu ʻoku ʻikai ke nau fai e fuakavá ni? ʻOku kehe fēfē ʻa e fakakaukau ʻa e ʻEikí ki he malí mei he fakakaukau ʻa e māmaní? Vahevahe hoʻo fakamoʻoní mo e kau finemuí fekauʻaki mo e ngaahi tāpuaki te nau lava ʻo maʻu mo honau fāmili ʻi he kahaʻú ʻi heʻenau kau ki he ngaahi ouau fakatemipalé.
Huluʻi e vitiō “Ngaahi Temipalé Ko ha Maama Kamo” pea ʻeke ki he kau finemuí pé ʻoku nau pehē ko e hā naʻe loto fiemālie ai e fāmili Mou Tamí ke fai ha ngaahi feilaulau lahi pehē ke ʻalu ki he temipalé. Ko e hā ha ngaahi feilaulau kuo nau fai pe mamata ʻoku fakahoko ʻe he niʻihi kehé ke nau ō ki he temipalé mo maʻu hono ngaahi tāpuakí?

2:50
Vaeua e kalasí, pea kole ki he vaeua ʻe tahá ke nau fakakaukauloto ko e ngaahi kui kinautolu ʻa e vaeua ʻe tahá kuo ʻosi pekia. Fakaafeʻi ke nau fakakaukau ne nau mate ʻoku teʻeki ai ke nau papitaiso ka kuo nau tali ʻa e ongoongoleleí ʻi he maama tataliʻanga ʻo e ngaahi laumālié. Kole ke nau tohi ha pōpoaki ki honau hako ʻoku kei moʻuí pea ʻave ia ki ha taha ʻo e kau finemui ʻi he vaeua ʻe taha ʻo e kalasí. Kole ki he kau mēmipa ʻo e kalasí ke lau leʻolahi e ngaahi pōpoakí. Hiki he palakipoé ʻa e tefito ʻo e lēsoni ko ʻení, pea fakaafeʻi e kau finemuí ke fakakaukau ki he fehuʻi ko ʻení ʻi heʻenau lau e palakalafi hono tolu mo fā ʻi he konga ʻoku ui ko e “Tekinolosia ʻo e Hisitōlia Fakafāmilí” ʻi he lea ʻa ʻEletā Quentin L. Cook “Ngaahi Aká mo e Vaʻá.” Kole ange ke nau vahevahe ʻenau ngaahi fakakaukaú.

Kole ki he kau finemuí ke vahevahe ʻa e meʻa naʻa nau ako ʻi he ʻaho ní. ʻOku mahino nai kiate kinautolu e mahuʻinga ʻo e ngaahi ouau fakatemipalé? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:

Fakahoko e papitaiso maʻae kau pekiá ko ha ʻekitivitī fakakalasi, pea ʻave mo e ngaahi hingoa honau fāmilí kapau ʻe lava. ʻE lava ke nau ngāue ʻaki e meʻa ne nau ako he ʻaho ní ke poupouʻi ʻaki e kau finemui kehé ke nau teuteu ke nau ō fakataha ki he temipalé.
Fakakakato ʻa e meʻa ʻoku fie maʻu ke aʻusia fika 3 he tuʻunga ʻulungaanga mahuʻinga ʻo e Angamaʻá ʻi he Fakalakalaka Fakatāutahá.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.