Ko e hā ʻa e palani ʻo e fakamoʻuí?

Naʻe teuteuʻi ʻe he Tamai Hēvaní ha palani ke tau lava ai ʻo hoko ʻo tatau mo Ia. ʻOku kau ʻi he palaní ʻa e Fakatupú, Hingá, Fakalelei ʻa Sīsū Kalaisí, mo e ngaahi fono, ouau, pea mo e ngaahi tokāteline kotoa ʻo e ongoongoleleí. ʻOku ʻai ʻe he palani ko ʻení ke lava ʻo fakahoahoaʻi kitautolu ʻi he Fakaleleí, maʻu ha fiefia kakato, pea moʻui ʻo taʻe ngata ʻi he ʻao ʻo e ʻOtuá.

Teuteuʻi fakalaumālie koe

Kuo tokoniʻi fēfē ʻe he ʻilo fekauʻaki mo e palani ʻa e Tamai Hēvaní ʻa hoʻo ngaahi filí pea mo hoʻo vakai ki he moʻuí? Ko e hā ha ngaahi tafaʻaki ʻo e palani ʻo e fakamoʻuí ʻokú ke fie maʻu ke ako lahi ange ki ai?

ʻE tokoni fēfē ʻa e mahino ʻo e palani ʻo e fakamoʻuí ki he kau finemuí ke nau fai ʻa e ngaahi fili mahuʻingá?

Ako ʻi he faʻa lotu ʻa e potofolofolá mo e ngaahi maʻuʻanga fakamatala ko ʻení. Ko e hā ʻe tokoni ke mahino ki he kau finemuí ʻa e palani ʻo e fakamoʻuí?

1 Kolinitō 15:20–22 (ʻE mate ʻa e tangata kotoa pē)

Hepelū 12:9 (Ko e ʻOtuá ʻa e Tamai hotau ngaahi laumālié)

Fakahā 20:12–13; 2 Nīfai 9:10–11; ʻAlamā 5:15–21 (ʻE toetuʻu ʻa e tangata kotoa pē ʻo tuʻu ʻi he ʻao ʻo e ʻOtuá ke fakamaauʻi)

2 Nīfai 2:22–25 (Naʻe ʻomi ʻe he Hinga ʻa ʻĀtamá ʻa e tuʻunga matelié)

ʻAlamā 34:32–33 (Ko e moʻuí ko ha taimi ia ke fakatomala)

ʻAlamā 40:11–14 (Ko e tuʻunga ʻo e tangatá ʻi he hili ʻo ʻenau maté)

ʻAlamā 42:5–15 (Ko hono akoʻi ʻe ʻAlamā hono foha ko Kolianitoní fekauʻaki mo e palani ʻo e fakamoʻuí)

T&F 76:30–113 (Ko e fakamatala ʻo e ngaahi puleʻanga ʻo e nāunaú)

Weatherford T. Clayton, “Ko e Palani Nāunauʻia ʻEtau Tamaí,” Ensign pe Liahona, Mē 2017, 26–29

Thomas S. Monson, “Ko e Hala Haohaoa ki he Fiefiá,” Ensign pe Liahona, Nōvema 2016, 80–81

“Palani ʻo e Fakamoʻuí,” Tuʻu Maʻu ʻi he Tuí (2004), 156–58

Vitiō: “ʻE Mole ʻa e Loto ʻo e Tangatá”

3:27

Vitiō: “Ko e Palani ʻo e Fakamoʻuí”; vakai foki, DVD Maʻuʻanga Tokoni Fakavitiō ki he Tokāteline mo e Ngaahi Fuakavá

4:19

Ko e faiako ‘i he founga ‘a e Fakamo‘uí

Naʻe fai ʻe he Fakamoʻuí ha ngaahi fehuʻi naʻá ne fakatupu kinautolu naʻá Ne akoʻí, ke nau fakakaukau lahi. Naʻe mahuʻingaʻia moʻoni ʻi heʻenau ngaahi talí. Te ke fakaʻaongaʻi fēfē ʻa e ngaahi fehuʻi ko ʻení ke tokoni ki he kau finemuí ke nau fakakaukau lahi fekauʻaki mo e ngaahi moʻoni ʻo e ongoongoleleí?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau fakatokangaʻi ʻa e mahuʻinga ʻo e ongoongoleleí ʻi heʻenau moʻu fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:

Hiki ʻi he palakipoé ʻa e “Ko e hā ʻa e palani ʻo e fakamoʻuí?” Kole ki he kau finemuí ke nau fokotuʻu atu ha ngaahi founga te nau lava ai ʻo tali ʻa e fehuʻi ko ʻení. Poupouʻi kinautolu ke nau kei fakakaukau ai pē ki heʻenau ngaahi tali ʻi he lolotonga ʻo ʻenau ako ki he palani ʻo e fakamoʻuí ʻi he lēsoni ʻo e ʻaho ní.
ʻOmai ha ngaahi fakatātā pe ngaahi meʻa ʻe tolu ke nau fakafofongaʻi ʻa e Fakatupú, Hingá, pea mo e Fakaleleí (hangē ko ʻení, kelekele ki he Fakatupú, foʻi ʻāpele ki he Hingá, mo ha ipu sākalamēniti ki he Fakaleleí). Kole ki he kau finemuí ke nau vahevahe ʻa e meʻa ʻoku nau ʻilo fekauʻaki mo e ngaahi meʻa ʻe tolu ko ʻeni ne hokó pea mo e ʻuhinga ʻoku nau mahuʻinga aí.

Ako fakataha

ʻE tokoni ʻa e ngaahi ʻekitivitī takitaha ʻi laló ki he kau finemuí ke nau ʻilo e palani ʻo e fakamoʻuí. Muimuiʻ i he ueʻi ʻa e Laumālié ʻo fili ha ʻekitivitī ʻe taha pe toe lahi ange ʻe ʻaonga taha ki hoʻo kalasí.

Kole ki ha taha ʻo e kau finemuí ke haʻu mateuteu mai ke vahevahe ʻa e talanoa mei he lea ʻa Palesiteni Thomas S. Monson “Ko e Hala Haohaoa ki he Fiefiá.” ʻE tali fēfē ʻe he kau finemuí e ngaahi fehuʻi ko ʻeni fekauʻaki mo e palani ʻo e fakamoʻuí kapau ko haʻanau talanoa mo hanau kaungāmeʻa ʻo ha tui fakalotu kehe: Naʻa tau haʻú nai mei fē? Ko e hā ʻoku tau ʻi heni aí? Te tau ō ki fē ʻi he hili e moʻui ní? Fakaafeʻi kinautolu ke nau fakaʻaongaʻi e lea ʻa ʻEletā Weatherford T. Clayton “Ko e Palani Nāunauʻia ʻa e Tamaí” mo e folofolá ke teuteu ai ha tali ki ha taha ʻo e ngaahi fehuʻí. Ko e hā ʻoku mahuʻinga ai ke ʻilo e tali ʻo e ngaahi fehuʻi ko ʻení?
Kole ki ha kau finemui ʻe niʻihi ʻi ha toe ha ngaahi ʻaho siʻi pea fai e kalasí, ke nau omi mateuteu ke akoʻi e kalasí fekauʻaki mo e konga ʻo e palani ʻo e fakamoʻuí (hangē ko e moʻui ʻi he maama fakalaumālié, moʻui fakamatelié, maama tataliʻanga ʻo e ngaahi laumālié, pea pehē atu ai pē) ʻo fakaʻaongaʻi ʻa e Malangaʻaki ʻEku Ongoongoleleí pe Tuʻu Maʻu ʻi he Tuí. Tā ha meʻa ke ne fakafofongaʻi ʻa e palani ʻo e fakamoʻuí ʻi he palakipoé (hangē ko ʻení, vakai, Malangaʻaki ʻEku Ongoongoleleí,61), pea fakaafeʻi ʻa e finemui takitaha ke ne akoʻi e tefito naʻe vahe ki aí. ʻEke ki he kau finemuí pe ko e hā haʻane ʻaonga ki heʻenau moʻuí ke nau ʻilo ʻa e palani ʻo e fakamoʻuí.
Vahe ki he finemuí takitaha ha potufolofola ʻe taha pe toe lahi ange mei he fokotuʻutuʻu ko ʻení. Kole ange ke ne lau ʻa e fakamatalá ke fakafuofuaʻi pe ko e hā ʻa e konga ʻo e palani ʻo e fakamoʻuí ʻoku ʻuhinga ki ai ʻa e fakamatalá. Fakaafeʻi ia ke ne vahevahe ʻa e meʻa ʻokú ne ako mei he fakamatala naʻe ʻoange ki aí. ʻOku tokoniʻi fēfē ʻe he ʻilo ʻo e palani ʻo e fakamoʻuí ʻa e anga ʻo ʻetau vakai kiate kitautolú, niʻihi kehé, pea mo e māmani ʻoku tau ʻi aí?
Lau fakataha ʻe he kalasí ʻa e ʻAlamā 12:30 mo e ʻAlamā 42:13–15. Fakaafeʻi ʻa e kau finemuí ke nau kumi ʻa e ngaahi kupuʻi lea ʻoku fakaʻaongaʻi ki hono fakamatalaʻi ʻo e palani ʻo e fakamoʻuí. Ko e hā ʻoku akoʻi ʻe he ngaahi kupuʻi lea ko ʻení fekauʻaki mo e palaní? Huluʻi ʻa e vitiō “ʻE Mole ʻa e Loto ʻo e Tangatá,” pea kole ki he kau finemuí ke nau kumi e founga naʻe tāpuakiʻi ai ʻe he ʻilo ʻo e palani ʻo e fakamoʻuí ʻa ʻEletā Lāsolo M. Nalesoní. Fakaafeʻi ʻa e kau finemuí ke nau vahevahe ha ngaahi founga ne tāpuekina ai kinautolu ʻe he ʻilo ko ʻení.

3:27
Fakaafeʻi ʻa e kau finemuí ke nau lau ʻa e ʻAlamā 42:5–15, mo kumi ʻa e ngaahi kupuʻi lea ʻoku fakaʻaongaʻi ʻe ʻAlamā ke fakamatalaʻi ʻaki e palani ʻa e ʻOtuá maʻa ʻEne fānaú. Ko e taimi pē te nau maʻu ai ha kupuʻi lea, kole ange ke nau hiki ia ʻi he palakipoé. Ko e hā ʻoku akoʻi mai ʻe he ngaahi kupuʻi lea ko ʻení fekauʻaki mo e palani ʻa e Tamai Hēvaní?
Fakapapauʻi ʻoku maʻu ʻe he taha kotoa ʻi he kalasí ha tatau ʻo e Tuʻu Maʻu ʻi he Tuí, pea vahe ki he finemui takitaha ha fika ʻo kamata mei he 1 ki he 3. Kole kiate kinautolu ʻoku nau maʻu ʻa e fika 1 ke nau ako ʻa e lahi taha te nau lavá mei he Tuʻu Maʻu ʻi he Tuí fekauʻaki mo e moʻui ʻi he maama fakalaumālié (peesi 157); pea kole kiate kinautolu ʻoku nau maʻu ʻa e fika 2 ke nau ako ki he moʻui fakamatelié (peesi 158); pea kole kiate kinautolu ʻoku fika 3 ke nau ako ki he moʻui ʻi he hili ʻo e maté (peesi 158). Fakangofua ke nau ngāue fakakulupu ʻo fakatatau mo e fika ne ʻoangé, ke teuteu ha kiʻi fakamatala nounou ʻo e meʻa ne nau akó pea fakamatalaʻi ia ki he toenga ʻo e kalasí. Fakaafeʻi ʻa e kau finemuí ke nau fakakaukau pe naʻe mei fēfē ʻenau moʻuí kapau naʻe ʻikai ke nau maʻu ʻa e ʻilo ko ʻeni fekauʻaki mo e palani ʻo e fakamoʻuí.

Kole ki he kau finemuí ke nau vahevahe ʻa e meʻa ne nau ako he ʻaho ní. ʻOku mahino lelei ange kiate kinautolu ʻa e palani ʻo e fakamoʻuí? Ko e hā ha ngaahi ongo pe ngaahi fakakaukau ʻoku nau maʻu? ʻOku ʻi ai mo haʻanau toe ngaahi fehuʻi? ʻE ʻaonga ke toe fakamoleki ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi ʻa e kau finemuí ke nau fakakaukauʻi pe ʻe founga fēfē haʻanau moʻui ʻaki e meʻa ne nau ako ʻi he ʻaho ní. Hangē ko ʻení, te nau lava ʻo:

Vahevahe ʻenau houngaʻia ʻi he palani ʻo e fakamoʻuí.
Akoʻi ha meʻa ne nau ako fekauʻaki mo e palani ʻo e fakamoʻuí ki ha kaungāmeʻa pe mēmipa ʻo e fāmilí. Te nau lava ʻi heʻenau faiakó ʻo fakaʻaongaʻi ha saati pe fakatātā ʻo e palani ʻo e fakamoʻuí ne nau ʻosi teuteu.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.