Ko e Palani ʻo e Fakamoʻuí

“Ko ʻeku ngāué ʻeni mo hoku nāunaú—ke fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39).

Ko e ngaahi fili faingataʻa lahi kuo pau ke fakahoko ʻe ha finemui, ʻoku faingofua ange ia ʻi he taimi ʻoku mahino ai kiate ia ʻa e palani ʻo e fakamoʻuí. ʻE lava ke tokoni ʻene ʻiloʻi naʻá ne nofo fakataha mo ʻene Tamai Hēvaní kimuʻa pea toki fāʻeleʻí pea naʻá Ne ʻomi ia ki heni mo ha taumuʻa fakalangi, ke ne vakai ai ki heʻene ngaahi faingataʻá ʻaki ha fakakaukau taʻengata. ʻE lava ke tokoni kiate ia ʻene ʻiloʻi ko ʻene hoko ko e fefiné ko ha konga ia ʻo hono tuʻunga taʻengata totonú, ke ne fakatupulaki ʻene ngaahi meʻafoaki fakalangí mo teuteu ki hono kahaʻú. ʻE lava ke ueʻi fakalaumālie ia ʻe heʻene ʻiloʻi ko e tauʻatāina ke filí ko ha meʻafoaki ia pea ʻe ʻekeʻi meiate ia ʻa ʻene ngaahi filí, ke ne fai ha ngaahi fili makatuʻunga ʻi ha ngaahi tefitoʻi moʻoni taʻengata.

Ngaahi Fokotuʻutuʻu ke Fili mei ai ʻi he Mahiná Ni

• Ko e hā ʻa e palani ʻo e fakamoʻuí?

• Ko e hā naʻe hoko ʻi heʻeku moʻui ʻi he maama fakalaumālié?

• Ko e hā ʻa e taumuʻa ʻo e moʻuí?

• Ko e hā ʻoku mahuʻinga ai ʻa e ngaahi fili ʻoku ou faí?

• Ko e hā ʻoku tau fepaki ai mo e faingataʻá?

• Te u maʻu fēfē ha fiemālie ʻi ha pekia ha taha ʻoku ou ʻofa ai?

• Ko e hā ʻoku totonu ai ke u tauhi hoku sinó ke hangē ha temipalé?

Fakamatala ki he Faiakó

Te ke ala fakakaukauʻi hano fakaafeʻi ʻa e kau finemuí ke tā ha fakatātā pe saati ʻo e palani ʻo e fakamoʻuí ʻi he kamataʻanga ʻo e ʻiuniti ko ʻení. Te nau lava ʻo toe vakai ki ai ʻi he ʻiunití kotoa pea tānaki ki ai ha ngaahi potufolofola pe ngaahi ʻilo te nau maʻu ʻi heʻenau ako e palani ʻo e fakamoʻuí.

Mutualé

Fakakaukau ki he founga te ke lava ʻo palani ai e ngaahi ʻekitivitī ʻoku fehokotaki mo e meʻa ʻoku ako ʻe he toʻu tupú. ʻOku ʻi ai ha saiti ki he Ngaahi ʻEkitivitī ʻa e Toʻu Tupú ke tokoni atu kiate koe. ʻE lava ke fakaʻaongaʻi e lahi taha ʻo e ngaahi ʻekitivitī ako ʻi he ngaahi fokotuʻutuʻu ko ʻení ko ha ngaahi ʻekitivitī lelei ʻo e Mutualé. Ngāue fakataha mo e kau palesitenisī ʻo e kalasí ke fili mo palani ha ngaahi ʻekitivitī feʻunga ʻoku nau fakamālohia e meʻa ʻoku ako ʻe he kau finemuí ʻi he Sāpaté.

Fakalakalaka Fakatāutahá

ʻOku fekauʻaki e ngaahi ʻekitivitī ko ʻeni mei he Fakalakalaka Fakatāutahá mo e ngaahi lēsoni ʻi he ʻiuniti ko ʻení:

• Aʻusia ʻi he tuʻunga ʻulungaanga ʻo e Mahuʻinga Fakatāutahá 1

• Ngaahi aʻusia ʻi he tuʻunga ʻulungaanga mahuʻinga ʻo e Tauʻatāina ke Filí mo e ʻEkeʻi Meiate Kita ʻa e Meʻa ʻokú Te Fai pe Taʻefai mo e ngaahi ngāue ʻo e tuʻunga ʻulungaanga mahuʻingá

• Ngaahi aʻusia ʻi he tuʻunga ʻulungaanga mahuʻinga ko e Angamaʻá 1 mo e 2