Ko e hā ʻa e taumuʻa ʻo e moʻuí?

ʻOku tau maʻu ha sino fakamatelie ʻi he lolotonga ʻo e moʻui ko ʻení pea mo siviʻi ai pe te tau talangofua ki he ngaahi fekau ʻa e ʻOtuá. Ne tauomi ki he māmaní ke teuteu ke maʻu ha fāmili taʻengata, faitāpuekina e fānau ʻa e ʻOtuá pea mo langa Hono puleʻangá.ʻOku fakataumuʻa e ngaahi meʻa aʻusia lolotonga e moʻui fakamatelié ke tokoniʻi kitautolu ke tau hoko ʻo tatau ange mo ʻetau Tamai Hēvaní.

Teuteuʻi fakalaumālie koe

Kuó ke maʻu fēfē ʻa e fiefiá ʻi he moʻuí ni? Ko e hā ha ngaahi aʻusia kuo nau tokoniʻi koe ke ke tupulaki fakalaumālie ai?

Ko e hā ʻoku fai ʻe he kau finemuí ke nau hoko ai ʻo hangē ko e Tamai Hēvaní?

Ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā ʻoku ueʻi koe ʻe he Laumālié ke vahevahe mo e kau finemuí?

2 Nīfai 2:25 (Naʻe fakatupu kitautolú ke tau maʻu ʻa e fiefiá)

ʻAlamā 12:24; 34:32; 42:4; ʻĒpalahame 3:25–26 (Ko e moʻuí ni ko ha taimi ke siviʻi ai kitautolu mo tau teuteu ke feʻiloaki mo e ʻOtuá)

3 Nīfai 12:3–12 (Ko hono fakamatala ʻe he Fakamoʻuí ha ngaahi ʻulungaanga faka-ʻOtua)

3 Nīfai 12:48 (ʻOku fie maʻu kitautolu ʻe he Tamai Hēvaní ke tau haohaoa ʻo hangē pē ko Iá)

T&F 138:53–56 (ʻOku tau ʻi hení ke tau tokoni ʻi hono langa ʻo e puleʻanga ʻo e ʻOtuá)

“Ko e Fāmilí: Ko ha Fanongonongo ki Māmani,” Ensign pe Liahona, Nōvema 2010, 129

Carol F. McConkie, “Ko e Matamatalelei ʻo e Māʻoniʻoní, ”Ensign pe Liahona, Mē 2017, 9–12

Thomas S. Monson, “Ko e Pue ʻo e Moʻuí,” Ensign pe Liahona, Mē 2012, 90–93

Gary E. Stevenson, “Ko Hoʻo Miniti ʻe Faá,” Ensign pe Liahona, Mē 2014

“Palani ʻo e Fakamoʻuí,” Tuʻu Maʻu ʻi he Tuí (2004), 156–59

Ko e faiako ‘i he founga ‘a e Fakamo‘uí

Naʻe ʻofa ʻa e Fakamoʻuí ʻiate kinautolu naʻá Ne akoʻí. Naʻá Ne ʻafioʻi kinautolu pea mo ia te nau lava ʻo hoko ki aí. Naʻá Ne kumi ha ngaahi founga makehe ke nau tupulaki ai—ha ngaahi founga naʻe fakataumuʻa pē kiate kinautolu. ʻI heʻenau faingataʻaʻiá, naʻe ʻikai ke Ne tukuange kinautolu ka naʻá Ne kei ʻofa pē mo tokoniʻi kinautolu. Ko e hā te ke lava ʻo fai ke ke ʻofa mo tokoniʻi ai ʻa e kau finemuí ʻo hangē ko ia ʻoku fai ʻe he Fakamoʻuí?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau fakatokangaʻi ʻa e mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:

Hiki ʻi he palakipoé, “Ko e hā ʻa e taumuʻa ʻo e moʻuí?” Kole ki he kau finemuí ke nau fokotuʻu atu ha founga siʻi ʻe ala tali ʻaki ʻe he kakaí ʻa e fehuʻi ko ʻení kapau naʻe teʻeki ke nau maʻu ʻa e kakato ʻo e ongoongoleleí. ʻOku kehe fēfē ʻa e ngaahi tali ko ʻení mei he ngaahi tali ʻoku maʻu ʻi he ongoongolelei ʻo Sīsū Kalaisí?
Fakaʻaliʻali ha afo lōloa ʻoku ʻi ai ha foʻi fakapona ʻi loto-mālie, pea aleaʻi pe ʻe anga fēfē hano fakafofongaʻi ʻe he foʻi fakaponá ʻa e moʻui ko ʻení, kae fakafofongaʻi ʻe he meʻa kotoa ʻi he tafaʻaki ʻe taha ʻo e fakaponá ʻa e moʻui ʻi he maama fakalaumālié pea fakafofongaʻi ʻe he tafaʻaki ʻe taha ʻo e foʻi fakaponá ʻa e moʻui ʻi he hili ʻo e moʻui fakamatelié. Ko e hā ha founga ne tokoni ai ʻetau fili ne fai he maama fakalaumālié, ki heʻetau moʻui fakamatelié? ʻOku uesia fēfē heʻetau ngaahi fili he lolotonga ʻo e moʻui ko ʻení ʻa e kahaʻu ʻo ʻetau moʻui ko ʻení pea ʻi ʻitānití?

Ako fakataha

ʻE tokoni ʻa e ngaahi ʻekitivitī takitaha ʻi laló ki he kau finemuí ke nau ʻilo ʻa e taumuʻa ʻo e moʻuí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

ʻOange ki he finemui takitaha ha laʻipepa pea fakaafeʻi ia ke ne tohiʻi e ʻuhinga ʻo e foʻi lea ko e māʻoniʻoni. Fakaafeʻi e kau finemuí ke nau lau e lea ʻe Sisitā Carol F. McConkie “Ko e Matamatalelei ʻo e Māʻoniʻoní” pea tānaki atu ʻene fakamatalaʻi e māʻoniʻoní ki heʻenau fakaʻuhingá. Ko e hā ʻe lava ke tau fai ke tau māʻoniʻoni ange aí? Fakaafeʻi e kau finemuí ke nau fili ha taha ʻo e ngaahi fakaʻuhingaʻi ʻo e māʻoniʻoní ne nau tohiʻí pea vahevahe ʻa e founga te nau lava ʻo faifenga ke toe māʻoniʻoni ange ai he founga ko iá.
Fakaafeʻi ʻa e kau finemuí ke nau lau ʻa e Malanga ʻi he Moʻungá ʻi he 3 Nīfai 12:3–12 mo kumi ʻa e ngaahi ʻulungaanga ʻoku finangalo ʻa e Tamai Hēvaní ke tau fakatupulaki lolotonga ʻetau moʻui fakamatelié. Kole ange ke nau fakakaukau ki ha kakai ʻi he folofolá pe ʻi heʻenau moʻuí ʻoku hāsino mei ai e ngaahi tefitoʻi moʻoni ko ʻení. ʻOku tokoni fēfē ʻa e ngaahi akonaki ʻa e Fakamoʻuí ʻi he vahe ko ʻení ke mahino kiate kitautolu ʻetau ngaahi taumuʻa ko e kakai fefiné?
Vahevahe fakakongokonga e lea ʻa Palesiteni Thomas S. Monson “Ko e Pue ʻo e Moʻuí,” pea fakaafeʻi e kau finemuí ke nau fekumi ʻi ha konga ʻe taha pea nau vahevahe e meʻa ʻoku nau maʻu ʻoku tokoni ke mahino ai kiate kinautolu e taumuʻa ʻo e moʻuí. Kole ange ke nau fakalaulauloto ki he meʻa ʻoku nau faí—mo ia ʻoku totonu ke nau faí—ke fakakakato lelei ange ai ʻenau taumuʻá. Kole ki ha niʻihi tokosiʻi ke nau vahevahe ʻenau ngaahi fakakaukaú.
Fakaafeʻi ʻa e kau finemuí ke nau kumi ha potufolofola pe ngaahi potufolofola te nau lava ʻo fakaʻaongaʻi ke tokoniʻi ha taha ʻoku ʻikai ke ne ʻilo e taumuʻa ʻo e moʻuí (hangē ko ʻení, te nau lava ʻo fakaʻaongaʻi e ngaahi potufolofola ʻoku fokotuʻu atu ʻi he fokotuʻutuʻu ko ʻení). Kole ange ke nau vahevahe ʻa e meʻa ne nau maʻú mo ha taha kehe ʻi he kalasí. Poupouʻi kinautolu ke nau fakakaukauʻi ha ngaahi founga te nau lava ai ʻo vahevahe ʻenau potufolofolá mo ha kaungāmeʻa pe mēmipa ʻo e fāmilí ʻoku ʻikai mahino kakato ki ai ʻa e taumuʻa ʻo e moʻuí.
Kole ki he vaheua ʻe taha ʻo e kalasí ke nau lau ʻa e talanoa ʻo Noeli Paikasi-Peisi ʻi he lea ʻa Pīsope Gary E. Stevenson “Ko Hoʻo Miniti ʻe Faá,” pea kole ki he vaheua ʻe tahá ke nau lau fekauʻaki mo Toaʻila Palaiti ʻi he lea tatau pē. Fakaafeʻi kinautolu ke nau fevahevaheʻaki ʻa e meʻa ne nau ako fekauʻaki mo e taumuʻa ʻo e moʻuí mei he ongo talanoa ko ʻení. Tukuange ha ngaahi miniti siʻi ki he kau finemuí ke toe vakaiʻi ʻa e toenga ʻo e lea ʻa Pīsope Sitivenisoní mo fakalaulauloto ki he tuʻunga ʻoku nau ʻi ai ʻi heʻenau “miniti ʻe faá”—ko e hā ha ngaahi ouau mahuʻinga pe makamaile ʻoku ʻi honau kahaʻú, pea ko e hā e meʻa ʻoku nau fai ke teuteu ai ki aí? Fakaafeʻi ʻa e kau finemuí ke vahevahe ʻenau ngaahi fakakaukaú.
Tufa ki he finemui takitaha ha tatau ʻo e “Ko e Fāmilí: Ko ha Fanongonongo ki Māmani,” pea kole ange ke nau lau mo fakaʻilongaʻi ʻa e ngaahi foʻi lea mo e ngaahi kupuʻi lea ʻoku nau akoʻi ia fekauʻaki mo ʻene taumuʻa ʻi heʻene hoko ko e ʻofefine ʻo e ʻOtuá. Fakaafeʻi ʻa e kau finemuí ke nau vahevahe ʻa e meʻa ne nau maʻú pea fakamatalaʻi ʻa e ʻuhinga ʻoku mahuʻingamālie ai ia kiate kinautolú.

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino lelei ange nai kiate kinautolu ʻa e taumuʻa ʻo e moʻuí? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi ʻa e kau finemuí ke nau fakakaukauʻi ha founga te nau lava ai ʻo moʻui ʻaki ʻa e meʻa ne nau ako ʻi he ʻaho ní. Hangē ko ʻení, te nau lava ʻo:

Vahevahe ha faʻahinga meʻa ne nau ako ʻi he kalasí naʻá ne ueʻi kinautolu ke nau kei hokohoko atu ʻi hono fai ʻo e ngaahi fili leleí pe fai ha ngaahi liliu ʻi heʻenau moʻuí.
Fakakaukauʻi ha meʻa pau te nau fakahoko he uiké ni ke fakahoko lelei ange ai ʻenau taumuʻa taʻengatá.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.