Ko e hā ʻoku tau fepaki ai mo e faingataʻá?

Kuo pau ke tau foua ʻa e faingataʻá he lolotonga ʻetau moʻui fakamatelié, ko ha konga ia ʻo e palani ʻa e Tamai Hēvaní. ʻI he ngaahi meʻa ʻe niʻihi, ʻoku hoko mai ʻa e faingataʻá tuʻunga ʻi heʻetau ngaahi fili taʻe fakapotopotó pe ko e ngaahi fili ʻa e niʻihi kehé. ʻOku ʻi ai ha ngaahi ʻahiʻahi kehe ko ha konga fakanatula pē ia ʻo ʻetau foua ʻa e moʻui fakamatelié. Neongo ʻoku nau faingataʻa, ka ʻe lava ʻo tokoni hotau ngaahi faingataʻá ke tau tupulaki fakalaumālie mo hoko ʻo tatau ange mo Sīsū Kalaisi.

Teuteuʻi fakalaumālie koe

Ko e hā ha ngaahi meʻa fakamamahi kuó ke aʻusia? Ko e hā ha meʻa kuó ke ako mei ai? Ko e hā e meʻa ne tokoni ke ke lavaʻi ai kinautolú? ʻOku ʻi ai ha ngaahi aʻusia ʻoku taau ke ke vahevahe mo e kau finemuí?

Fakakaukauloto mo lotua e kau finemui he kalasí. Ko e hā ʻa e ngaahi palopalema mo e ngaahi faingataʻa ʻoku nau fekuki mo iá? ʻOku founga fēfē ʻenau fekuki mo e faingataʻá ʻi heʻenau moʻuí?

ʻI hoʻo teuteú, ako ʻi he faʻa lotu ʻa e ngaahi potufolofola mo e ngaahi maʻuʻanga fakamatala ko ʻení, pea pehē ki ha ngaahi meʻa kehe naʻe tokoni kiate koe ʻi hoʻo ako fekauʻaki mo e faingataʻá.

1 Samuela 1; 1 Ngaahi Tuʻi 17; Lute 1; ʻĒseta 4 1 Nīfai 5:1–9 (Sīpinga ʻo e kau fefine ʻi he folofolá ne fehangahangai mo e faingataʻá)

2 Nīfai 2:11 (Ko e faingataʻá ko ha konga ia ʻo e palani ʻa e Tamai Hēvaní maʻatautolú)

Mōsaia 23:21 (ʻOku foaki mai ʻe he ʻOtuá ʻa e faingataʻá ke siviʻi ʻetau tuí)

ʻEta 12:27 (ʻOku foaki mai ʻe he ʻOtuá ʻa e vaivaí ke tau loto fakatōkilalo ai)

T&F 58:3–4 (ʻOku hoko mai ʻa e tāpuakí ʻi he hili ʻo e faingataʻá)

T&F 121:7–8 (Kapau te tau kātakiʻi lelei ʻa e faingataʻá, ʻe hākeakiʻi kitautolu ʻe he ʻOtuá)

T&F 122:4–9 (ʻOku ʻomi ʻe he faingataʻá kiate kitautolu ha taukei pea ʻoku lelei ia kiate kitautolu)

Yoon Hwan Choi, “ ʻOua ʻe Toe Sio Holo, Sio ki ʻOlunga!” Ensign pe Liahona Mē 2017, 90-92

Evan A. Schmutz, “ ʻE Holoholoʻi ʻe he ʻOtuá ʻa e Loʻimata Kotoa pē,” Ensign pe Liahona, Nōvema. 2016, 116–18

Dallin H. Oaks, “Fehangahangai ʻi he Meʻa Kotoa Pē,” Ensign pe Liahona, Mē 2016, 114–17

Neil L. Andersen, “Ngaahi Faingataʻa Fakalaumālié,” Ensign pe Liahona, Mē 2014

“ʻAhiʻahí,” Tuʻu Maʻu ʻi he Tuí (2004), 208–12

Vitiō: “ʻE Hiki Hake Kitautolu ʻe he ʻOtuá,” “The Priesthood Can Strengthen Our Families in Trials,” “Rebuilding Lives”

4:58

1:25

1:35

Ko e faiako ‘i he founga ‘a e Fakamo‘uí

Naʻe ʻafioʻi tonu ʻe he Fakamoʻuí ʻa kinautolu naʻá Ne akoʻí—pea mo e tuʻunga te nau lava ʻo aʻusiá. ʻI heʻenau faingataʻaʻiá, naʻe ʻikai ke ne tukuange kinautolu ka naʻe hoko atu ʻEne ʻofaʻi kinautolú. Ko e hā ha ngaahi faingataʻa ʻoku maʻu ʻe he kau finemuí? ʻE founga fēfē haʻo lava ʻo fakahaaʻi ʻokú ke ʻofa mo poupouʻi kinautolu?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau fakatokangaʻi ʻa e mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukau pē ʻaʻau ke fakafeʻiloaki ʻaki e lēsoni ‘o e uike ní:

Fakamanatu mo e kalasí e fakamatala ʻa ʻEletā Niila L. ʻEnitaseni ki he tupu ha fuʻu ʻakau ʻi ha feituʻu havili (ʻi heʻene lea “Ngaahi Faingataʻa Fakalaumālié”). Ko e hā ʻoku akoʻi mai ʻe he fakatātā ko ʻení ki he kau talavoú ʻo kau ki he faingataʻá? Fakaafeʻi kinautolu ke nau fekumi ʻi he lea, pea fekumi ki he faleʻi ʻoku nau ongoʻi ʻe tokoni ke nau matuʻuaki ʻa e ngaahi ʻahiohió fakalaumālié.

Ako fakataha

ʻE tokoni ʻa e ngaahi ʻekitivitī takitaha ʻi laló ki he kau finemuí ke nau ʻilo ʻa e taumuʻa ʻo e ngaahi faingataʻá. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí.

Haʻu ki he kalasí mo ha sēini pe ko ha fakatātā ʻo e sēini. Ko e hā ʻe hoko kapau ʻe motu e ngaahi foʻi hoko ʻo e sēiní? Te tau fakapapauʻi fēfē ko ha ngaahi foʻi hoko mālohi kitautolu ʻi he sēini ʻo e ngaahi toʻu tangatá ʻi hotau fāmili taʻengatá? Fakaafeʻi e kau finemuí ke nau kumi ki he founga naʻe tali ai ʻe ʻEletā Yoon Hwan Choi e fehuʻi ko ʻení ʻi heʻene lea “ʻOua ʻe Toe Sio Holo, Sio ki ʻOlunga” ʻo kamata he palakalafi ʻoku pehē, “ʻOku tau ʻi he lotolotonga kotoa ʻo ha fāmili taʻengata.” Naʻe hanga fēfē ʻa ʻEletā Choi mo hono fāmilí kia Kalaisi ʻi he ngaahi talanoa naʻá ne vahevahé? Ko e hā ha ngaahi taimi ʻoku ʻikai faʻa “faingofua ai ke sio hake ki ʻolungá”? Ko e hā ha ngaahi fokotuʻu naʻe fai ʻe ʻEletā Choi ʻi he palakafi fakaʻosi ʻo ʻene leá, ke tokoni ke tau “sio hake maʻu pē kia [Kalaisi]” lolotonga e faingataʻá?
Vahevahe mo e kau finemuí e talanoa naʻe fai ʻe ʻEletā Evan A. Schmutz fekauʻaki mo Misa Taniela ʻApilata (ʻi heʻene lea “ ʻE Holoholoʻi ʻe he ʻOtuá ʻa e Loʻimata Kotoa pē”). Ko e hā ʻoku ako ʻe he kau finemuí ʻo kau ki he ngaahi taumuʻa faingataʻá mei he talanoa ko ʻení? Ko e hā ha faleʻi ʻoku fai ʻe ʻEletā Schmutz ki he niʻihi ʻoku fehangahangai mo e faingataʻá?
Lau fakataha ha niʻihi ʻo e ngaahi potufolofola naʻe foua ai ʻe he Fakamoʻuí ʻa e faingataʻá (hangē ko e Mātiu 4:1–11; 26:38–39; Luke 23:33–34). Ko e hā ʻe lava ʻo ako ʻe he kau finemuí mei he faingataʻa ʻi he moʻui ʻa e Fakamoʻuí? Naʻá Ne fehangahangai fēfē mo Hono ngaahi faingataʻá? Fakaafeʻi ʻa e finemui takitaha ke ne hiki ha faingataʻa ʻokú ne fehangahangai mo ia pe ko ha taha ʻoku ʻofa ai. Poupouʻi ʻa e kau finemuí ke nau fakalaulauloto ki ha meʻa te nau lava ʻo ako mei he sīpinga ʻa e Fakamoʻuí ʻe lava ʻo tokoni ʻi he faingataʻa ko ʻení.
Fakaafeʻi ʻa e kau finemuí ke nau fakakaukau ki ha ngaahi sīpinga ʻa ha kakai fefine ʻi he folofolá ne nau fehangahangai mo e faingataʻá (vakai, ngaahi sīpinga ʻoku fokotuʻu mai ʻe he fokotuʻutuʻu ko ʻení). Kole ange ke nau laukonga fekauʻaki mo e kakai fefine ko ʻeni ʻi he folofolá pea fakamatalaʻi nounou ʻa e talanoá ki he toenga ʻo e kalasí. Ko e hā ha meʻa ʻoku nau ako fekauʻaki mo e faingataʻá ʻi he ngaahi talanoa ko ʻení, ʻe lava ʻo tokoni ke nau ikunaʻi ai honau faingataʻaʻiá.
Vahevahe ʻa e kalasí ki ha kulupu ʻe ua. Fakaafeʻi ha kulupu ʻe taha ke nau kumi e ngaahi sīpinga ʻi he Tohi ʻa Molomoná ʻo ha niʻihi fakafoʻituitui pe kulupu naʻe fehangahangai mo ha ngaahi faingataʻa (vakai, sīpinga he Mōsaia 24:8–17; 3 Nīfai 1:4–21; Molonai 1). Fakaafeʻi ʻa e kulupu ʻe tahá ke nau kumi ʻi he tohi himí ke maʻu ha himi te ne tokoniʻi kinautolu he lolotonga ʻo ʻenau ngaahi faingataʻaʻiá. Kole ki he ongo kulupú ke nau vahevahe e meʻa ne nau ako ʻe lava ʻo tokoniʻi kinautolu ke nau ikunaʻi ʻa e faingataʻá.
Taaʻi ha laine ʻi he vaeuaʻanga ʻo e palakipoé, pea tohiʻi ʻi ʻolunga ʻi he kōlomu ʻe taha ʻa e “Ko e hā ʻoku tau fehangahangai ai mo e ngaahi faingataʻá?” pea tohiʻi leva ʻi ʻolunga ʻi he kōlomu ʻe tahá ʻa e “Ko e hā e founga te tau lava ʻo fehangahangai ai mo e ngaahi faingataʻa ʻi heʻetau moʻuí?” Vahevahe fakakongokonga ʻa e lea ʻa ʻEletā Dallin H. Oaks ko e “Fehangahangai ʻi he Meʻa Kotoa Pē” pea ʻoange ha konga ki he finemui takitaha ke ne lau. Kole ange ki he kau finemuí ke nau kumi ha ngaahi tali ki he ngaahi fehuʻí ni pea hiki ʻenau talí ʻi he ʻotu ʻoku totonu ke ʻi aí. Ko e hā ha ngaahi ʻilo ʻoku maʻu ʻe he kau finemuí mei he leá? Te ke lava foki ʻo huluʻi e ngaahi vitiō ʻoku fokotuʻu atu ʻi he lēsoni ko ʻení ke tokoni ki hono maʻu ʻe he kau finemuí e tali ki he ngaahi fehuʻi he palakipoé.

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino kiate kinautolu e ʻuhinga ʻoku tau faingataʻaʻia aí? Ko e hā ha ngaahi ongo pe ngaahi fakakaukau ʻoku nau maʻú? ‘Oku ‘i ai nai haʻanau toe ngaahi fehuʻi kehe? ʻE ʻaonga ke fakamoleki ha toe taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi ʻa e kau finemuí ke nau fakakaukauʻi pe ʻe anga fēfē haʻanau moʻui ʻaki ʻa e meʻa kuo nau ako ʻi he ʻaho ní. Hangē ko ʻení, te nau lava ʻo:

Kumi ha founga ke fakafiemālieʻi ai ha taha ʻoku nau ʻofa ai ʻa ia ʻoku fehangahangai mo ha faingataʻa ʻaki haʻanau vahevahe ange ki ai e meʻa ne nau ako fekauʻaki mo e faingataʻá.
Talanoa mo honau ngaahi fāmilí fekauʻaki mo ha kau mēmipa ʻo e fāmilí ne nau ikunaʻi ʻa e faingataʻá.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.