Haʻu, ʻo Muimui ʻIate Au
Ko e hā ʻoku mahuʻinga ai ʻa e ngaahi fili ʻoku ou faí?

Ko e hā ʻoku mahuʻinga ai ʻa e ngaahi fili ʻoku ou faí?

Kuo foaki mai ʻe he Tamai Hēvaní kiate kitautolu ʻa e tauʻatāina ke filí, ʻa ia ko e malava ke fili pea mo ngāue maʻatautolu. Neongo ʻoku tau tauʻatāina ke fai ʻetau ngaahi filí, ka he ʻikai ke tau lava ʻo fili e nunuʻa ʻo e ngaahi fili ko iá. ʻOku fakaiku ʻa e ngaahi fili leleí ki he fiefia ʻoku tuʻuloá pea mo e moʻui taʻengatá. Kapau te tau kole ki he Tamai Hēvaní, te Ne tokoniʻi kitautolu ke tau fai ʻa e ngaahi fili ʻoku fakapotopoto.

Teuteuʻi fakalaumālie koe

Ko e hā ha ngaahi aʻusia mei hoʻo moʻuí kuo akoʻi ai koe fekauʻaki mo e tauʻatāina ke filí? Ko e hā ha founga kuó ke ako ai ke fai ha ngaahi fili lelei ʻi hoʻo moʻuí?

Ko e hā ha ngaahi fili ke fai ʻoku hanganaki atu ki he kau finemuí? Ko e hā te ke lava ʻo akoʻi ange kiate kinautolu ke tokoni ke nau fai e ngaahi fili leleí?

Ako e ngaahi potu folofola ʻi laló pea fakakakato ha taha ʻo e ngaahi meʻa ke aʻusia ʻi he ʻulungaanga mahuʻinga ko e Filí mo e ʻEkeʻi Meiate Kita ʻa e Meʻa ʻOkú te Fai pe Taʻe Faí, ʻi he tohi Fakalakalaka Fakatāutahá. ʻI hoʻo fai iá, fakatokangaʻi e ngaahi meʻa ʻokú ke ako fekauʻaki mo e tauʻatāina ke filí ʻe lava ke ke vahevahe ki he kau finemuí.

Sosiua 24:15 (Te tau lava ʻo fili ke tauhi ki he ʻEikí)

Sione 14:15 (ʻOku fakahaaʻi ʻe heʻetau ngaahi fili leleí ʻa ʻetau ʻofa ki he Tamai Hēvaní pea mo ʻetau holi ke fai Hono finangaló)

2 Nīfai 2:16, 27; Hilamani 14:30–31 (ʻOku tau tauʻatāina ke fili mo fai ha meʻa ʻiate kitautolu pē)

Molonai 7:14–15 (Kuo tuku kiate kitautolu ke tau fili ʻi he leleí mo e koví)

Gary B. Sabin, “Tuʻu Maʻu pea Ului Kakato,” Ensign pe Liahona, Mē 2017, 52–55

Thomas S. Monson, “Ngaahi Filí,” Ensign pe Liahona, Mē 2016, 86

Carole M. Stephens, “Kapau ʻOku Mou ʻOfa Kiate Au, Fai ʻEku Ngaahi Fekau,” Ensign pe Liahona, Nōvema 2015, 118–20

D. Todd Christofferson, “Tauʻatāina ʻo Taʻengata ke Fili Maʻanautolu,” Ensign pe Liahona, Nōvema 2014, 16-19

“Tauʻatāina ke Filí mo e ʻEkeʻi Meiate Kita ʻa e Meʻa ʻOkú te Fai pe Taʻe Faí,” Fakalakalaka Fakatāutahá, 46–49

“Tauʻatāina ke Filí,” Tuʻu Maʻu ʻi he Tuí (2004), 188–189

“Tauʻatāina Ke Filí mo e ʻEkeʻi Meiate Kita ʻa e Meʻa ʻOkú Te Fai pe Taʻe Faí” mo e “Mūsiká mo e Hulohulá,” Ki Hono Fakamālohia ʻo e Toʻu Tupú (2011), 2–3, 22–24

Vitiō: “ʻIkai ha Fakaʻiseʻisa”

5:39

Ko e faiako ‘i he founga ‘a e Fakamo‘uí

Naʻe akoʻi ʻe he Fakamoʻuí e niʻihi kehé ke nau ʻofa mo tokoni ʻaki ʻene ʻofa mo tokoniʻi kinautolú. Naʻá Ne akoʻi kinautolu ke lotu ʻaki ʻEne lotu fakataha mo kinautolu mo ne hūfia kinautolú. Naʻá Ne folofola ki Heʻene kau ākongá, “Haʻu, ʻo muimui ʻiate au” (Luke 18:22). Naʻá ne akoʻi ki he kau Nīfaí ke nau “hangē pē ko aú” (3 Nīfai 27:27). Naʻe hoko ʻEne sīpingá ko ʻEne founga faiako mālohi tahá ia. Ko e hā te ke fai ke faiako ʻi he faʻifaʻitakiʻangá?

Vitiō:“Vahevahe e Ngaahi Talanoá mo e Sīpingá”

3:40

Mamata lahi ange

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau fakatokangaʻi ʻa e mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:

  • Fakaafeʻi ʻa e kau finemuí ke nau fakakaukau ki ha faʻahinga meʻa te nau lava ʻo fai ʻi ha taimi ʻe fakafepakiʻi ai ʻe ha niʻihi ʻenau ngaahi tuʻunga moʻuí. ʻOku founga fēfē ʻa e feinga ʻa Sētane ke fakapuputuʻuʻi kitautolu fekauʻaki mo e ngaahi nunuʻa ʻo ʻetau ngaahi filí? Poupouʻi ke nau kumi ha ngaahi moʻoni ʻi he lolotonga ʻo e lēsoní te ne lava ʻo tokoniʻi kinautolu ke fakafepakiʻi e ngaahi loi ʻa Sētané.

  • Kole ki he kau finemuí ke nau lisi ha ngaahi fili ne nau toki fakahoko kimuí ni. Ne tokoniʻi fēfē kinautolu ʻe heʻenau ngaahi filí? Ne uesia fēfē ʻa e niʻihi kehé ʻe heʻenau ngaahi filí?

Ako fakataha

ʻE tokoni ʻa e ʻekitivitī takitaha ʻi laló ke mahino ki he kau finemuí ʻa e tokāteline ʻo e tauʻatāina ke filí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

  • ʻOkú ke pehē ʻoku ʻuhinga ki he hā e “ului kakató”? ʻOkú ke pehē ʻoku ʻuhinga ki he hā “[ke] tuʻu maʻú?” Fakaafeʻi e kau finemuí ke nau lau e ngaahi sīpinga mo e ngaahi talanoa naʻe fakaʻaongaʻi ʻe ʻEletā Gary B. Sabin ke fakaʻuhingaʻi ʻaki e ongo kupuʻi leá ni ʻi heʻene lea “Tuʻu Maʻu pea Ului Kakató.” Ko e hā ha ngaahi meʻa fakalaumālie ʻe lava ke fai fakamuʻomuʻanima pē ʻe he kakaí? Te tau lava fēfē ʻo fili ke “kau kakato” fakalaumālie atu? ʻE lava ke fakalata ki he kau finemuí ke nau faʻu ha ngaahi pousitā ʻo fakaʻaongaʻi e kupuʻi lea ko e “tuʻu maʻú” pe “ului kakató” pea mo e ngaahi sīpinga naʻe ʻomi ʻe ʻEletā Sabin. Te nau lava ʻo foki ʻo ʻai ʻenau ngaahi sīpinga pē ʻanautolu.

  • Fakaafeʻi e kau finemuí ke fekumi he ngaahi konga mataʻāʻā ko ia ʻe fā e lea ʻa Sisitā Carol M. Stephens ko e “Kapau ʻOku Mou ʻOfa Kiate Au, Tauhi ʻEku Ngaahi Fekau” ʻo kumi ha ngaahi fakakaukau ki hono tauhi e ngaahi fekaú mo hono ʻuhinga ʻoku mahuʻinga ai ke fai ha ngaahi fili māʻoniʻoni. Maʻu ha fakangofua mei he pīsopé, pea fakaafeʻi ha niʻihi ʻo e kau fafine mohu faʻifaʻitakiʻanga ʻi he uōtí ke nau kau atu ki ha fealeaʻaki fekauʻaki mo e founga kuo hanga ai ʻe he fili ke tauhi e ngaahi fekaú ʻo faitāpuekina ʻenau moʻuí. Fakakau ha kau fafine taautaha pea pehē ki ha kau fafine ʻosi mali ʻi he fealeaʻaki ko ʻení.

  • Fakaafeʻi ʻa e kau finemuí ke nau fakakakato ha taha ʻo e ngaahi meʻa ke aʻusia ʻi he tuʻunga ʻulungaanga mahuʻinga ko e Tauʻatāina ke Filí mo e ʻEkeʻi Meiate Kita ʻa e Meʻa ʻOkú te Fai pe Taʻe Faí ʻi he kiʻi tohi Fakalakalaka Fakatāutahá (fakafoʻituitui pe fakakulupu). Kimuʻa pea tuku e kalasí, fakaafeʻi e finemui takitaha ke ne vahevahe ha meʻa naʻá ne ako mei he tauʻatāina ke filí. Fakaafeʻi ha finemui ke vahevahe mo e toenga ʻo e kalasí ʻa e meʻa kuó ne fai ke fakakakato ʻa ʻene ngaahi meʻa ke aʻusia fakataautaha ʻi he tuʻunga ʻulungaanga mahuʻinga ʻi he Tauʻatāina ke Filí mo e ʻEkeʻi Meiate Kita ʻa e Meʻa ʻOkú te Fai pe Taʻe Faí.

  • Fakaafeʻi ʻa e finemui takitaha ke lau fakalongolongo ʻa e “Tauʻatāina ke Filí mo e ʻEkeʻi Meiate Kita ʻa e Meʻa ʻOkú te Fai pe Taʻe Faí” ʻi he Ki Hono Fakamālohia ʻo e Toʻu Tupú pea vahevahe ʻa e meʻa ʻoku ongo kiate iá. ʻE lava leva ke fili ʻe he kau mēmipa ʻo e kalasí ha tuʻunga moʻui ʻe taha ʻi he tohí mo vahevahe ha ngaahi fili ne nau fai fekauʻaki mo e tuʻunga moʻui ko iá pea mo e ngaahi tāpuaki naʻe maʻu mei heʻenau ngaahi filí. Hangē ko ʻení, te nau lava ʻo lau e “Mūsiká mo e Hulohulá” ʻi he Ki Hono Fakamālohia ʻo e Toʻu Tupú pea aleaʻi ʻa e ngaahi tāpuaki kuo nau maʻu ʻi heʻenau muimui ki he akonaki ko ia ke fakaʻehiʻehi pea mei he ngaahi hiva mo e hulohula ʻoku ʻikai tāú.

  • ʻOange ki he finemui takitaha ha ngaahi konga mei he lea ʻa ʻEletā D. Todd Christofferson ko e “Tauʻatāina ʻo Taʻengata ke Fili Maʻanautolu” pe ko e lea ʻa Palesiteni Thomas S. Monson ko e “Ngaahi Filí.” Fakaafeʻi e kau finemuí ke lau ʻiate kinautolu pē pea vahevahe ʻenau ngaaahi fakakaukaú. Te nau lava ʻo fakahoko ʻeni ʻi ha fanga kiʻi kulupu iiki pe fakakātoa mo e kalasí. Ko e hā ʻoku nau ako kau ki he ngaahi nunuʻa ʻo e ngaahi meʻa ʻoku tau tui ki aí mo e ngaahi ngāué? Fakaafeʻi kinautolu ke aleaʻi e founga ʻe tokoniʻi ai kinautolu ʻe he faleʻi kuo nau akó ke fai ha ngaahi fili ʻoku lelei angé. 

  • Fakaafeʻi e finemui takitaha ke ne kumi ha sīpinga ʻo ha taha ʻi he folofolá ʻokú ne fai ha fili (hangē ko ʻení, fakafehoanaki ʻa e ngaahi fili ʻa Mele mo Maʻatá ʻi he Luke 10:38–42). Ko e hā e ngaahi ola pe nunuʻa ʻo e ngaahi fili ko ʻení? Naʻe uesia pe tokoniʻi fēfe ʻe he ngaahi filí ʻa e niʻihi kehé?

  • Huluʻi ha taha ʻo e ngaahi vitiō ʻoku fokotuʻu atu he fokotuʻutuʻu ko ʻení. Fakaafeʻi e kau finemuí ke nau kumi e ngaahi ola ʻo e fili ne fai ʻe he kakai ʻi he vitioó. Kole ange ke nau vahevahe ʻa e meʻa ʻoku nau maʻú. Fakaafeʻi kinautolu ke nau vahevahe ha ngaahi aʻusia ʻa ia ne nau fai ai ha fili naʻe hulutuʻa hono ngaahi nunuʻá. Fakaafeʻi ʻa e finemui  takitaha ke lau ha taha ʻo e ngaahi potufolofola mei he fokotuʻutuʻu ko ʻení pea vahevahe ʻa e founga ʻe lava ke tokoniʻi ai ia ke ne fai e ngaahi fili ʻoku totonú ʻi he kahaʻú. 

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino lelei ange nai kiate kinautolu ʻa e tokāteline ʻo e tauʻatāina ke filí? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke toe tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi ʻa e kau finemuí ke nau fakakaukauʻi pe ʻe anga fēfē haʻanau moʻui ʻaki ʻa e meʻa kuo nau ako ʻi he ʻaho ní. Hangē ko ʻení, te nau lava ʻo:

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.