Ko hai au, pea ko hai te u lava ʻo hangē ko iá?

Ko ha ngaahi ʻofefine ʻofeina kitautolu ʻo ha ongomātuʻa fakalangi, pea ʻi heʻene peheé, ʻoku ʻi ai hatau natula mo ha ikuʻanga fakalangi. Tuʻunga ʻi he palani fakalangí, ʻoku tau maʻu ai ha ngaahi meʻafoaki mo ha ngaahi talēniti makehe ʻe tokoni ke tau aʻusia hotau ikuʻanga fakalangi ko e ngaahi ʻofefine ʻo e ʻOtuá. ʻOku ʻomi ʻe heʻetau ʻilo pe ko hai kitautolú ha taumuʻa ki heʻetau moʻuí mo tokoni ke tau fai ʻa e ngaahi fili ʻoku totonú.

Teuteuʻi fakalaumālie koe

Ko e hā ʻene ʻuhinga kiate koe ke hoko ko ha ʻofefine ʻo e ʻOtuá? ʻOku tāpuekina fēfē koe ʻe he ʻilo ko ha ʻofefine koe ʻo e ʻOtuá pea takiekina ai e ngaahi fili ʻokú ke faí?

Te ke lava ʻo tokoniʻi fēfē e kau finemuí ke mahino kiate kinautolu e mahuʻinga ʻo hono ʻiloʻi ko e ngaahi ʻofefine kinautolu ʻo e ʻOtuá? ʻOku kaunga fēfē ʻa hono ʻiloʻi ʻení ki he ngaahi fili ʻoku nau faí, founga ʻo ʻenau ongo kiate kinautolú, mo e vīsone ki he kahaʻú?

Ko e hā ha ngaahi potufolofola mo ha ngaahi malanga ʻe tokoni ke mahino ki he kau finemuí pe ko hai kinautolu mo e tuʻunga te nau lava ʻo aʻusiá?

Sēnesi 1:26–27 (ʻOku fakatupu kitautolu ʻi he tatau ʻo e ʻOtuá)

Saame 82:6; Mōsese 1:39; ʻĒpalahame 3:22–26 (Ko hotau tuʻunga fakalangi ki he kahaʻú ke maʻu ʻa e moʻui taʻengatá)

Luke 15:4–6, 11–32; Sione 3:16; T&F 18:10–15 (ʻOku mahuʻinga lahi ʻa e laumālié)

Dale G. Renlund, “Kāingalotu ʻOua Naʻa Tuku e Feingá,” Ensign pe Liahona, Mē 2015, 56–58

Rosemary M. Wixom, “Ko Hono ʻIloʻi Hotau Natula Faka-ʻOtuá,” Ensign pe Liahona, Nōvema 2015, 6-8

Dieter F. Uchtdorf, “Ko Hono Moʻui Fiefia ʻAki e Ongoongoleleí,” Ensign pe Liahona, Nōvema 2014, 120–23

D. Todd Christofferson, “Ko e Mālohi Fakaivia ʻo e Kakai Fefiné,” Ensign pe Liahona, Nōvema 2013, 29–32

“Pōpoaki ki he Toʻu Tupú mei he Kau Palesitenisī ʻUluakí,” Ki Hono Fakamālohia ʻo e Toʻu Tupú (2011), ii–iii

Ongo vitiō: “Mahuʻinga ʻi he Tafaʻaki Kotoa peé,” “Tefitoʻi ʻUlungaanga Moʻoni ʻOku ʻIloʻi ai Kitautolú”

2:41

3:40

Ko e faiako ‘i he founga ‘a e Fakamo‘uí

Naʻe tokoni e Fakamoʻuí ki he niʻihi kehé ke ako, tupulaki fakalaumālie pea hoko ʻo ului ki Heʻene ongoongoleleí. Naʻá Ne ʻafioʻi kinautolu pea mo ia te nau lava ʻo hoko ki aí. ʻI hoʻo akoʻi e kau finemuí, tokoniʻi kinautolu ke mahino ko e ngaahi ʻofefine kinautolu ʻo e ʻOtuá pea te nau lava ʻo hoko ʻo hangē ko iá pea toe nofo fakataha mo Ia.

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi meʻa ne nau aʻusia ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi ʻe he meʻá ni ʻa e ului fakatāutahá mo tokoniʻi ʻa e kau finemuí ke nau ʻilo e mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe te ke fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:

Hiki ʻa e hingoa ʻo e kau finemuí ʻi ha ngaahi laʻi pepa mavahevahe. Kole ki he finemui takitaha ke ne fili tavale pē ha taha ʻo e ngaahi laʻi pepá pea talaatu ha ʻulungaanga fakaʻotua ʻoku maʻu ʻe he finemui ʻi heʻene laʻi pepá. Talaange mo ha ngaahi ʻulungaanga fakalangi kehe kuó ke fakatokangaʻi ʻi he kau finemuí.
Hiki ʻi he palakipoé ʻa e, “Ko hai au, pea te u lava ʻo tatau mo hai?” Fakaafeʻi ʻa e kau finemuí ke nau kumi e tali ki he ngaahi fehuʻi ko ʻení ʻi he moto ʻa e Kau Finemuí. Ko e hā ʻoku nau ongoiʻi ʻi heʻenau lau ʻa e moto ko ʻení fekauʻaki mo honau vā mo e Tamai Hēvaní?

Ako fakataha

ʻE tokoni ʻa e ngaahi ʻekitivitī takitaha ʻi laló ki he kau finemuí ke mahino honau tuʻunga totonú pea mo e tuʻunga te nau lava ʻo aʻusiá? Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

Fakakaukau ki ha kiʻi ʻekitivitī faingofua ʻe lava ʻo tokoni ki he kau finemuí ke mahino ʻoku fie maʻu ʻa e faʻa kātakí pea mo e loto vilitakí ka te hoko ʻo hangē ko e ʻOtuá. ʻOku fie maʻu ʻa e ʻekitivitī ko ʻení ke malava ʻa e toutou feingá ke lavaʻi lelei ia. Hangē ko ʻení, ʻe lava ʻe he kau finemuí ʻo toutou feinga ke lī ha meʻa ki he loto kato vevé kae ʻikai sio ki ai. Ko e hā ʻoku akoʻi mai ʻe he ʻekitivitií ni fekauʻaki mo e loto vilitakí? ʻE lava fēfē ke tau fakafekauʻaki ʻa e foungá ni ki heʻetau hoko ʻo hangē ko e Tamai Hēvaní? Fakaafeʻi ʻa e finemui takitaha ke nau fekumi mo vahevahe e ngaahi konga lea mei he lea ʻa ʻEletā Dale G. Renlund ko e “Kāingalotu ʻOua Naʻa Tuku e Feingá” ʻa ia ʻokú ne vahevahe ʻa e ngaahi meʻa naʻa nau ako mei he ʻekitivitií.
Kole ki he kau finemuí ke nau fakakaukauloto ʻoku ʻi ai honau kaungāmeʻa ʻoku fefaʻuhi mo e mahuʻingaʻia ʻiate kitá. Fakaafeʻi kinautolu ke nau fekumi ki he lea ʻa Sisitā Rosemary M. Wixom “Ko Hono ʻIloʻi Hotau Natula Faka-ʻOtuá” ki ha ngaahi fakakaukau ki he founga ke tokoniʻi ʻaki e kaungāmeʻá ni ke mahino ʻa hono mahuʻingá. Ko e hā ʻoku akoʻi mai ʻe Sisitā Wixom fekauʻaki mo hotau natula faka-ʻOtuá? Ko e hā ʻoku fie maʻu ke tau liliu ka tau lava ʻo tauhi moʻoni ai hotau natula faka-ʻOtuá?
Fakaʻaliʻali ki he kau finemuí ha tengaʻi ʻakau, pea fehuʻi ange pe ʻoku nau pehē ko e hā e fuʻu ʻakau ʻe tupu mei aí. Fakaʻaliʻali ange e fuʻu ʻakaú (pe ha fakatātā ʻo e fuʻu ʻakaú) naʻe tupu mei he tengaʻi ʻakaú. Fehuʻi ki he kau finemuí pea ʻoku tau tatau fēfē nai mo e tengaʻi ʻakaú. Fakaafeʻi kinautolu ke fekumi ʻi he ngaahi potufolofola ko ʻení pea vahevahe ʻa e ngaahi meʻa ʻoku nau ʻilo ʻoku akoʻi ange pe ko hai kinautolu mo ia te nau lava ke hoko ki aí: 1 Sione 3:1–3; T&F 84:37–38; 88:107; 132:20. Fakaafeʻi e kau finemuí ke vahevahe e founga ʻoku hagna ai ʻe he ʻilo ko ʻení ʻo tokoniʻi ʻenau ngaahi filí pea mo e meʻa ʻoku nau fai ki he fānau kehe ʻa e ʻOtuá. Fakakaukau ke vahevahe e lea ko ʻeni ʻa Palesiteni Gordon B. Hinckley ko ha konga ko e fealēleaʻaki ko ʻení: “Ko e kotoa ʻo e fokotuʻutuʻu ʻo e ongoongoleleí ke tataki kitautolu ke tau laka atu ki muʻa pea ki ʻolunga ki ha ikuna kāfakafa ange, ʻo aʻu ki hono aʻusia ʻa e tuʻunga faka-ʻOtuá” (“Don’t Drop the Ball,” Ensign pe Liahona, Nov. 1994, 48).
Kimuʻa he kalasí, hiki ʻa e ngaahi foʻi lea ko ʻeni ʻe tolu ʻi he palakipoé: tupuʻanga, taumuʻa, ikuʻanga (mei he lea ʻa Palesiteni ʻUkitofa ko e “Ko Hono Moʻui Fiefia ʻAki e Ongoongoleleí”). Hivaʻi fakataha e “Fānau Au ʻa e ʻOtua” (Ngaahi Himí, fika 193), pea fehuʻi ki he kau finemuí ko e hā ʻoku nau ako kau ki honau tupuʻangá, taumuʻá mo e ikuʻangá mei he foʻi hiva ko ʻení. Fakaafeʻi ke hiki ʻenau ngaahi fakakaukaú ʻi he palakipoé hoko atu ki he ngaahi lea kuó ke tohí. Fakaafeʻi e kau finemuí ke nau lau ʻa e konga “Ko e Ngaahi ʻOfefine ʻo e ʻOtuá” mo e “Ko Hono Moʻui Fiefia ʻAki e Ongoongoleleí” mei he lea ʻa Palesiteni ʻUkitofá pea hiki ha ngaahi moʻoni kehe ʻoku nau ako kau ki honau tupuʻangá, taumuʻá mo e ikuʻangá. ʻOku kaunga fēfē ʻa e ngaahi moʻoni ko ʻení ki he fili ʻoku nau faí?
Kole ki he kau finemuí ke hiki ha niʻihi ʻo e ngaahi pōpoaki ʻoku ʻomi ʻe he māmaní ki he kakai fefiné kau ki hotau tuʻungá pea mo e ngaahi lelei ʻokú ne ʻai ke tau mahuʻingá. Huluʻi e foʻi vitiō “Mahuʻinga ʻi he Tafaʻaki kotoa Pē” pe “Tefitoʻi ʻUlungaanga Moʻoni ʻOku ʻIloʻi ai Kitautolú,” pea kole ki he kau finemuí ke fakafaikehekeheʻi ʻa e pōpoaki ʻi he ngaahi vitiō ko ʻení mo e ngaahi pōpoaki ʻa e māmaní. Fakaafeʻi kinautolu ke kumi ʻa e folofolá, kau ai ʻa e ngaahi talanoa mei he folofolá, ʻokú ne akoʻi kinautolu kau ki honau mahuʻingá ko ha ʻofefine ʻo e ʻOtuá (hangē ko e ngaahi potufolofola ʻoku fokotuʻu mai ʻi he lēsoni ko ʻení). Ko e hā ʻe lava ke fai ʻe he kau finemuí ke nau fepoupouaki ʻi heʻenau feinga ke moʻui ʻo fakatatau mo honau tuʻunga totonú ko e ngaahi ʻofefine ʻo e ʻOtuá?

2:41

3:40
Lau fakakalasi ʻa e ongo ʻuluaki palakalafi ʻo e lea ʻa ʻEletā D. Todd Christofferson ko e “Ko e Mālohi Fakaivia ʻo e Kakai Fefiné” pea feigna ke ʻilo ha ngaahi meʻafoaki kuo foaki ʻe he ʻOtuá ki Hono ngaahi ʻofefiné. ʻI hano fakangofua ʻe he pīsopé, kole ki ha kau fefine he uōtí ke nau toe vakaiʻi ʻa e leá pea vahevahe mo e kau finemuí ʻa e meʻ kuo nau fai ke ikunaʻi ʻa e ngaahi ivi takiekina kovi ki he tuʻugna fakaefefiné pea ke fakatupulaki ʻa honau ngaahi meʻafoaki fakalangí. Kole ki he kau finemuí ke nau vahevahe haʻanau aʻusia ʻi heʻenau maʻu e mahini ki honau tufakanga ko e houʻeiki fafiné pea mo e meʻa te nau fai ke hoko ko ha mālohi fakaivia ki he leleí.

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. Ko e hā haʻanau ngaahi ongo pe fakakaukau? ʻOku mahino kiate kinautolu pe ko hai kinautolu mo ia te nau lava ʻo hoko ki aí? ʻOku toe ʻi ai nai haʻanau ngaahi fehuʻi kehe? ‘E ‘aonga nai ke tuku ha taimi lahi ange ʻi he kaveinga ko ‘ení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:

Fakakakato ʻa e meʻa ʻoku fie maʻu ke aʻusia fika 1, 2, pe 6 he tuʻunga ʻulungaanga mahuʻinga ʻo e Natula Faka-ʻOtuá ʻi he Fakalakalaka Fakatāutahá.
Ako maʻuloto ʻa e Saame 82:6 pea toutou lau ia ke nau manatuʻi honau natula faka-ʻOtuá.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ‘Ekitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.