Ko e hā ʻa e ngaahi fatongia ʻo e Laumālie Māʻoniʻoní?

ʻOku fakamoʻoniʻi ʻe he Laumālie Māʻoniʻoní, ʻa ia ko ha mēmipa ʻo e Toluʻi ʻOtuá, ʻa e Tamai Hēvaní mo Sīsū Kalaisi. Ko e maʻuʻanga Ia ʻo e fakamoʻoni mo e fakahā fakafoʻituituí. Te Ne lava ʻo tataki kitautolu ʻi heʻetau ngaahi filí mo maluʻi kitautolu mei he fakatuʻutāmaki fakatuʻasinó mo fakalaumālié. ʻOku ʻiloa Ia ko e Fakafiemālié, pea te Ne lava ʻo fakanonga ʻetau tailiilí mo fakafonu kitautolu ʻaki ha ʻamanaki lelei. ʻOku fakamāʻoniʻoniʻi kitautolu ʻi heʻetau fakatomalá, ʻi heʻetau maʻu e ngaahi ouau fakahaofí, mo tauhi ʻetau ngaahi fuakavá ʻo fou ʻi Hono mālohí. ʻOku fou ʻi he ivi ʻo e Laumālie Māʻoniʻoní ʻa ʻetau maʻu ʻa e ʻilo ki he Tamai Hēvaní mo Sīsū Kalaisi pea mo ongoʻi Hona mālohí, ʻena anga leleí, mo ʻEna ʻofá.

Teuteuʻi fakalaumālie koe

Ko e hā ha meʻa ne ke aʻusia naʻá ne akoʻi koe fekauʻaki mo e ngaahi fatongia ʻo e Laumālie Māʻoniʻoní?

ʻE founga fēfe hano tokoniʻi ʻe he Laumālie Māʻoniʻoní ʻa e kau finemuí ʻi he ngaahi tafaʻaki kotoa pē ʻo ʻenau moʻuí? ʻE founga fēfē haʻo tokoniʻi kinautolu ke nau fakatokangaʻi Hono mālohí?

Ko e hā ha ngaahi potufolofola mo ha toe ngaahi maʻuʻanga tokoni kehe ʻe tokoni ke mahino ki he kau finemuí ʻa e ngaahi fatongia ʻo e Laumālie Māʻoniʻoní?

1 Ngaahi Tuʻi 19:11–12; Hilamani 5:30; T&F 85:6 (ʻOku lea ʻa e Laumālie Māʻoniʻoní ʻi ha kihiʻi leʻo siʻi mo vanavanaiki)

Sione 14:26 (ʻE lava ʻa e Fakafiemālié ke ne akoʻi kitautolu ʻi he meʻa kotoa pē ke tau manatuʻi)

Loma 8:16 (ʻOku fakamoʻoni ʻa e Laumālié ko e fānau kitautolu ʻa e ʻOtuá)

Kalētia 5:22–23 (Ko hono fakamatalaʻi ʻe Paula ʻa e fua ʻo e Laumālié)

2 Nīfai 32:5 (ʻE fakahā mai ʻe he Laumālie Māʻoniʻoní ʻa e meʻa ʻoku totonu ke tau faí)

3 Nīfai 27:20 (ʻOku fakamāʻoniʻoniʻi ʻe he maʻu ʻo e Laumālie Māʻoniʻoní kitautolu)

Molonai 8:26 (ʻOku fakafonu kitautolu ʻe he Laumālie Māʻoniʻoní ʻaki ha ʻamanaki lelei mo e ʻofa)

Molonai 10:5 (ʻOku akoʻi mai ʻa e moʻoní kiate kitautolu ʻe he Laumālie Māʻoniʻoní)

T&F 42:17; Mōsese 1:24 (ʻOku fakamoʻoni ʻa e Laumālie Māʻoniʻoní ki he Tamaí mo e ʻAló)

Gary E. Stevenson, “ ʻE Tokoniʻi Fēfē Koe ʻe he Laumālie Māʻoniʻoní?” Ensign pe Liahona, Mē 2017, 117–20

Henry B. Eyring, “ ʻOku ou Tuku ʻEku Melinó Kiate Kimoutolu, ”Ensign pe Liahona, Mē 2017, 15–18

Juan A. Uceda, “ ʻOku Akoʻi Kitautolu ʻe he ʻEiki ko Sīsū Kalaisí ke Tau Lotu,” Ensign pe Liahona, Nōvema 2016, 30–32

Robert D. Hales, “Ko e Laumālie Māʻoniʻoní,” Ensign pe Liahona, Mē 2016, 105–7

“Ngaahi Fatongia ʻo e Laumālie Māʻoniʻoní,” Tuʻu Maʻu ʻi he Tuí (2004), 100

Vitiō: “Ko e Leʻo ʻo e Laumālié.”

3:54

Ko e faiako ‘i he founga ‘a e Fakamo‘uí

Naʻe ʻofa ʻa e Fakamoʻuí ʻiate kinautolu naʻá Ne akoʻí. Naʻá Ne hūfia mo tokoniʻi maʻu ai pē kinautolu. ʻE founga fēfē haʻo fakatupulaki hoʻo ʻofa ʻi he kau finemui ʻokú ke akoʻí?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:

Fakaafeʻi ʻa e kau finemuí ke nau tohi fekauʻaki mo ha taimi ne nau ongoʻi ai ʻa e ivi ʻo e Laumālie Māʻoniʻoní ʻi heʻenau moʻuí. Ko e hā naʻa nau fai ke nau maʻu ai ʻa Hono iví? Ko e hā ha tokoni ne fai ʻe Hono mālohí? Kapau ʻoku taau, ʻai hanau niʻihi ke nau fakamatala ki he ngaahi meʻa ne nau aʻusiá.
Fakaafeʻi ʻa e kau finemuí ke nau hivaʻi ʻa e “ʻOku Taki ʻa e Laumālié” (Ngaahi Himi, fika 73) pea nau fakamatalaʻi ʻa e meʻa ʻoku akoʻi ange ʻe he fakaleá kiate kinautolu fekauʻaki mo e ngaahi fatongia ʻo e Laumālie Māʻoniʻoní.

Ako fakataha

ʻE tokoni ʻa e ngaahi ʻekitivitī takitaha ʻi laló ki he kau finemuí ke mahino ʻa e ngaahi fatongia ʻo e Laumālie Māʻoniʻoní. Muimui ʻi he fakahinohino ʻa e Laumālié, ʻo fili ha ʻekitivitī taha pe toe lahi ange ʻe ʻaonga taha ki hoʻo kalasí:

Hiki e ongo fehuʻi ko ʻení ʻi he palakipoé: Ko e hā ʻoku tau fie maʻu ai e Laumālie Māʻoniʻoní? ʻOku tokoniʻi fēfē kitautolu ʻe he Laumālie Māʻoniʻoní? Fakaafeʻi e kau finemuí ke nau fekumi he lea ʻa ʻEletā Gary E. Stevenson “ʻOku Tokoniʻi Fēfē Koe ʻe he Laumālie Māʻoniʻoní?” pe huluʻi e vitiō ko e “Leʻo ʻo e Laumālié,” ʻo kumi ai e ngaahi tali ki he ongo fehuʻi he palakipoé. Kapau ʻe feʻunga, peá ke vahevahe ha ngaahi aʻusia kuó ke maʻu ʻi hoʻo maʻu e ueʻi ʻa e Laumālie Māʻoniʻoní, pea fakaafeʻi ʻa e kau finemuí ke nau vahevahe ha ngaahi aʻusia kuo nau maʻu. Te nau lava foki ke vahevahe ʻa e ngaahi meʻa te nau fai ke lelei ange ai ʻenau fakafanongo mo muimui ki he ngaahi ueʻi ʻa e Laumalie Māʻoniʻoní.

3:54
Vahevahe fakakulupu ʻa e kau finemuí, pea fakaafeʻi ʻa e kulupu takitaha ke ako ha konga ʻo e lea ʻa Palesiteni Henry B. Eyring “Ko e Hoko ʻa e Laumālie Māʻoniʻoní ko Ho Takauá” pe ko e lea ʻa ʻEletā Robert D. Hales “Ko e Laumālie Maʻoniʻoní.” Fakaafeʻi ʻa e kulupu takitaha ke vahevahe mo e kalasí ʻa e meʻa ʻoku nau ako fekauʻaki mo e Laumālie Māʻoniʻoní. Fakaafeʻi ʻa e kau finemuí ke vahevahe ha ngaahi aʻusia ʻi ha taimi naʻe faitokonia ai kinautolu ʻe he Laumālie Māʻoniʻoní pe ko e taimi naʻa nau houngaʻia ai ʻi Heʻene takauá.
Fakaafeʻi ʻa e kau finemuí ke nau kumi ʻi he tohi himí ʻi he fakahokohoko fakamotuʻalea ʻo e “Ngaahi Tefitó” he tefito ko e “Laumālie Māʻoniʻoní” ke maʻu ha himi ʻokú ne akoʻi e founga ʻe lava ai ʻa e Laumālie Māʻoniʻoní ʻo tokoniʻi kitautolú. Kole ange ke nau fakamatalaʻi atu ha ngaahi ʻotu lea mei he ngaahi himi ne nau filí. Fakakaukau ke mou hivaʻi fakakalasi ha taha ʻo e ngaahi himí.
Vahevahe ʻa e kau finemuí ki ha fanga kiʻi kulupu iiki. Kole ki he kulupu takitaha ke nau lau ha ngaahi potufolofola fekauʻaki mo e Laumālie Māʻoniʻoní (hangē ko ia ʻoku fokotuʻu atu ʻi he fokotuʻutuʻu ko ʻení). Fakaafeʻi ha finemui ʻe taha mei he kulupu takitaha ke ne fakamatala ki he kalasí ʻa e meʻa ʻoku akoʻi ʻe he potufolofola ʻa ʻenau kulupú fekauʻaki mo e ngaahi fatongia ʻo e Laumālie Māʻoniʻoní. Fakaafeʻi ʻa e kau finemuí ke nau fakamatala haʻanau ngaahi aʻusia fakafoʻituitui naʻe tokoni ange ai ʻa e Laumālie Māʻoniʻoní ʻi ha taha ʻo e ngaahi founga ko ʻení.
Fakafeʻi ʻa e kau finemuí ke nau lau ʻa e “Ngaahi Fatongia ʻo e Laumālie Māʻoniʻoní”ʻi he Tuʻu Maʻu ʻi he Tuí (peesi 100). Kole ki he finemui takitaha ke ne fili ha taha ʻo e ngaahi fatongia ʻo e Laumālie Māʻoniʻoní pea kumi ha ngaahi potufolofola pe ngaahi talanoa folofola ʻoku nau akoʻi e fatongia ko iá. Fakaafeʻi ʻa e kau finemuí ke nau fevahevaheʻaki ʻa e meʻa ʻoku nau maʻú. Poupouʻi kinautolu ke nau vahevahe ha ngaahi aʻusia ne tokoniʻi ai kinautolu ʻe he Laumālie Māʻoniʻoní ʻi he ngaahi founga ko ʻení. Ko e hā ha ngaahi tūkunga ʻi he kahaʻú te nau fie maʻu ai e tokoni ʻa e Laumālie Māʻoniʻoní?
Kumi ha ngaahi talanoa mei ha ngaahi lea mei he konifelenisi lahi fakamuimuí, ʻoku ne fakatātaaʻi ʻa e ngaahi fatongia ʻo e Laumālie Māʻoniʻoní. Fakakaukau ke ke fakakau atu e meʻa ne aʻusia ʻe Palesiteni Henry B. Eyring mo hono fohá pe ko e Kāingalotu ʻAosituliá ʻi he “ ʻOku ou Tuku ʻEku Melinó Kiate Kimoutolu” pe ko e aʻusia ne maʻu ʻe ʻEletā Elder Juan A. Uceda heʻene ngāue fakafaifekau ʻi Pelū ʻi heʻene lea “ ʻOku Akoʻi Kitautolu ʻe he ʻEiki ko Sīsū Kalaisí ke tau Lotu.” Fakaafeʻi ʻa e finemui takitaha ke ne lau ha taha ʻo e ngaahi talanoá, toe fai e talanoá ki he kalasí ʻi he fakalea pē ʻaʻana mo ne fakamahinoʻi pe ko e hā ʻa e fatongia ʻo e Laumālie Māʻoniʻoní ʻi he talanoá. Fakalotolahiʻi e kau finemuí ke vahevahe ʻenau ngaahi aʻusia naʻe tokoniʻi ai kinautolu ʻe he Laumālie Māʻoniʻoní ʻi ha taha ʻo e ngaahi foungá ni.

Kole ki he kau finemuí ke nau fakamatala ʻa e meʻa ne nau ako he ʻaho ní. Ko e hā ha ngaahi ongo pe ngaahi fakakaukau ʻoku nau maʻu? ʻOku mahino kiate kinautolu ʻa e ngaahi fatongia ʻo e Laumālie Māʻoniʻoní? ʻOku ʻi ai mo haʻanau ngaahi toe fehuʻi kehe? ʻE ʻaonga nai ke toe fakamoleki ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:

Fakapapauʻi ha founga te nau lava ai ʻo teuteu lelei ange ke fanongo ki he kihiʻi leʻo siʻi ʻo e Laumālie Māʻoniʻoní.
Hiki pea mo talangofua ki he ngaahi ongo ʻoku nau maʻu mei he Laumālie Māʻoniʻoní ʻi he lolotonga ʻo e uiké.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.