Ko e hā ʻoku mahuʻinga ai ʻa Sīsū Kalaisi ʻi heʻeku moʻuí?

Naʻe fili ʻa Sīsū Kalaisi ke hoko ko hotau Fakamoʻuí. ʻOku malava ʻi Heʻene fakaleleí ke tau toetuʻu pea fakatomala pea maʻu ha fakamolemole ke tau lava ʻo foki ki he ʻao ʻo ʻetau Tamai Hēvaní. Tānaki atu ki hono fakahaofi kitautolu mei heʻetau ngaahi angahalá, ʻoku toe ʻomai foki ʻe Sīsū Kalaisi ko hotau Fakamoʻuí ʻa e nonga mo e mālohi ʻi he taimi ʻo e faingataʻá. ʻOkú Ne tā ʻa e sīpinga haohaoá maʻatautolu, pea ko ʻEne ngaahi akonakí ko e fakavaʻe ʻo e fiefiá ʻi he moʻuí ni mo e moʻui taʻengatá ʻi he maama ka hoko maí.

Teuteuʻi fakalaumālie koe

Toe vakaiʻi ha niʻihi ʻo hoʻo ngaahi potufolofola manakó kau ki he Fakamoʻuí pea fakalaulauloto ki hoʻo fakamoʻoni kiate Iá. Kuó ke ʻilo fēfē Ia? Ko e hā ha ngaahi aʻusia kuo hoko ʻo ke houngaʻia ai ʻia Sīsū Kalaisi mo ʻEne feilaulau fakaleleí?

ʻE tāpuekina fēfē ʻa e kau finemuí ʻe ha fakamoʻoni mālohi ange ʻo Sīsū Kalaisí? Ko e hā te nau mei fai ke nau falala kakato lahi ange ʻi he ngaahi akonaki mo e Fakalelei ʻa e Fakamoʻuí?

Ko e hā ha ngaahi potufolofola mo ha ngaahi maʻuʻanga fakamatala kehe ʻe tokoni ke mahino ki he kau finemuí ʻa Sīsū Kalaisi mo Hono ivi tākiekina ʻi heʻenau moʻui fakaʻahó?

Sione 14:6 (Ko Sīsū Kalaisi ʻa e halá, moʻoní, pea mo e moʻuí)

Sione 15:4–5 (Ka naʻe taʻeʻoua ʻa Sīsū Kalaisi, he ʻikai ke tau lava ʻo fai ha meʻa)

Mōsaia 3:17; Hilamani 14:15–18; T&F 18:11–12; 76:41–42 (Naʻe ikunaʻi ʻe Kalaisi ʻa e angahalá mo e maté)

Isaia 41:10, 13; Mātiu 11:28–30; Sione 14:27; Filipai 4:13; Mosaia 24:14–15; ʻAlamā 7:11–12; 36:3, 27; ʻEta 12:27 (ʻOku ʻomi ʻe he Fakalelei ʻa Kalaisí e nongá mo e mālohi ʻi he faingataʻá mo e ʻahiʻahí)

David A. Bednar, “Ka Ne Mou ’Ilo Au,” Ensign or Liahona, Nov. 2016, 102–5

“Ko e Kalaisi Moʻuí: Ko e Fakamoʻoni ʻa e Kau ʻAposetoló ” Ensign, Apr. 2000, 2–3 (vakai foki, Tuʻu Maʻu ʻi he Tuí, 182–84; Fakalakalaka Fakatāutahá, 102)

José A. Teixeira, “Ko e Fekumi Ki he ʻEikí,” Ensign pe Liahona, Mē 2015, 96–98

Dallin H. Oaks, “ Ngaahi Akonaki ʻa Sīsuú,” Ensign pe Liahona, Nōvema 2011, 90–93

David A. Bednar, “Ke Nau Lava ʻo Fua Faingofua ʻEnau Ngaahi Kavengá,” Ensign pe Liahona, Mē 2014, 87–90

Vitiō: “Toe Fakafoki Mai,” “Ko e ʻOtua Moʻoni Pē Taha mo Sīsū Kalaisi ʻa ia Naʻá Ne Fekaú,” “#Hallelujah—An Easter Message about Jesus Christ”

NaN:NaN

2:26

2:14

Ko e faiako ‘i he founga ‘a e Fakamo‘uí

Naʻe fakaafeʻi ʻe he Fakamoʻuí Hono kau muimuí ke nau fakamoʻoni, pea ʻi heʻenau fai iá ne ongo e Laumālié ki honau lotó. ʻI hoʻo fakaafeʻi e kau finemuí ke vahevahe ʻenau fakamoʻoni kia Kalaisí mo Hono fatongia ʻi heʻenau moʻuí, ʻe lava ke fakamoʻoni ʻa e Laumālié kiate kinautolu ʻo e moʻoni ʻenau leá. ʻE lava ke fakamālohi e fakamoʻoni ʻa e kau finemuí ʻi he fanongo ki he fakamoʻoni e niʻihi kehé (tautautefito ki honau toʻú ) kau ki he Fakamoʻuí.

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:

Fakaʻaliʻali ha ngaahi fakatātā ʻo e Fakamoʻuí ʻi Heʻene tokoniʻi ha niʻihi kehe (vakai, Tohi Fakatātā ʻo e Ongoongoleleí, 36–60). Tuku ange ki he kau finemuí ha ngaahi miniti siʻi ke nau fakakaukau ai mo vahevahe ha ngaahi founga kehekehe ne tokoniʻi ai kinautolu ʻe he Fakamouí, tokoniʻi honau ngaahi fāmilí, pea mo ha niʻihi kehe ʻoku nau ʻilo. Fakaafeʻi kinautolu ke nau vahevahe ʻenau ngaahi ongo fekauʻaki mo e Fakamoʻuí.
Kole ki he kau finemuí ke nau fakakaukau ki he moʻui pea mo e ngaahi akonaki ʻa e Fakamoʻuí ʻi heʻenau hivaʻi pe fakafanongo ki ha himi fekauʻaki mo Sīsū Kalaisi (hangē ko e “ʻOku Moʻui Hoku Huhuʻí,” Ngaahi Himi, fika 68). Fakaafeʻi kinautolu ke nau takitaha hiki ʻenau tali ki he fehuʻi “Ko e hā ʻoku mahuʻinga ai ʻa Sīsū Kalaisi ʻi heʻeku moʻuí?”

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he kau finemuí ʻa e ʻuhinga ʻoku mahuʻinga ai ʻa Sīsū Kalaisi ʻi heʻenau moʻuí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe toe lahi ange ʻe ʻaonga taha ki hoʻo kalasí:

Fakaafeʻi ha kau mēmipa ʻi he uootí kimuʻa ke nau omi ki he kalasí ʻo vahevahe ha aʻusia naʻe tokoni kiate kinautolu ke nau ʻiloʻi ʻa Sīsū Kalaisi. Vahevahe ʻa e kalasí ki ha ngaahi kulupu ʻe fā pea vahe ki he kulupu takitaha ke lau e taha ʻo e ngaahi konga ʻi he lea ʻa ʻEletā David A. Bednar “Ka Ne Mou ʻIlo Au.” Kole ki he kulupu takitaha ke vakai ki heʻenau ngaahi kongá ki ha ngaahi tali ki he ngaahi fehuʻi ko ʻení: Ko e hā ʻa e faikehekehe ʻi he ʻilo fekauʻaki mo Kalaisí pea mo e ʻiloʻi ʻa Kalaisí? Ko e hā ʻe lava ke tau fai ke tau ʻiloʻi moʻoni ʻa Kalaisi? Ko e hā ha fakahinohino ʻe lava ke ke vahevahe mo ho ngaahi kaungāmeʻa ʻoku nau fie fakamālohia honau vā fetuʻutaki mo e Fakamoʻuí?
Fakaafeʻi ʻa e kau finemuí ke nau vakaiʻi ʻa e lea ʻa ʻEletā José A. Teixeira “Ko e Fekumi Ki he ʻEikí” pea fekumi ki he ngaahi tāpuaki naʻe palōmesi ange ʻe ʻEletā Teixeira kiate kinautolu ʻoku nau fekumi kia Sīsū Kalaisí. Fakaafeʻi kinautolu ke nau vahevahe ʻa e ngaahi meʻa naʻa nau maʻu ʻi he leá pea mo e meʻa ʻoku nau fai fakatāutaha ke ʻai e Fakamoʻuí ke hoko ko e konga mahuʻinga ʻo ʻenau moʻui fakaʻahó. Ko e konga ʻo e aleá ni, te mou lava ʻo vakaiʻi fakataha ʻa e ngaahi tōʻonga iiki ʻoku fokotuʻu mai ʻe ʻEletā Tekisila ʻi heʻene leá. Fakaafeʻi ʻa e kau finemuí ke nau fokotuʻu ha taumuʻa ke fakaʻaongaʻi ʻa e taha ʻo e ngaahi fokotuʻu naʻe aleaʻi ʻi he kalasí ke nau toe ofiange ai kia Kalaisi.
Fakaʻaliʻali ha tā ʻo e Fakamoʻuí. Tohi ʻi he palakipoé ʻa e ngaahi fehuʻi ko ʻení: “Ko hai ʻa Sīsū Kalaisi?” “Ko e hā kuó Ne fai maʻatautolú?” “ʻOku tau ʻiloʻi fēfē ʻokú Ne moʻui he ʻahó ni?” Fakaafeʻi ʻa e kau finemuí ke nau fekumi ʻi he “Ko e Kalaisi Moʻuí: Ko e Fakamoʻoni ʻa e Kau ʻAposetoló” ke maʻu ha tali ki he ngaahi fehuʻi ko ʻení. Kole ange ke nau vahevahe ʻa e meʻa ʻoku nau maʻú. Fakaafeʻi ha niʻihi ʻo kinautolu ke fakamatalaʻi ʻa e founga ne maʻu ai ʻenau fakamoʻoni kia Sīsū Kalaisí. ʻOku kaunga fēfē ʻenau ngaahi fakamoʻoní ki heʻenau moʻui fakaʻahó? Te ke lava foki ʻo huluʻi ʻa e foʻi vitiō “#Hallelujah—An Easter Message fekauʻaki mo Sīsū Kalaisí.”

2:14
Fakaafeʻi ʻa e kau finemuí ke nau kumi hake ʻa e “Sīsū Kalaisi” ʻi he Fakahinohino ki he ngaahi Folofolá pea vakai ki he lisi ʻi lalo he ʻuluʻi tohí. Te nau lava foki ʻo kumi ʻa e “Sīsū Kalaisí-Fakamoʻuí” ʻi he fakahokohoko fakamotuʻalea ʻo e Ngaahi Tefito ʻo e tohi himí ke maʻu ha himi ʻokú ne akoʻi fekauʻaki mo e meʻa naʻe fai ʻe Sīsū Kalaisi maʻanautolú. Kole ange ke nau kumi ha ngaahi lea mo ha ngaahi kupuʻi lea ʻokú ne fakamatalaʻi ʻa e ngaahi fatongia mo e misiona ʻo Kalaisí. Ko e hā ʻoku nau ako fekauʻaki mo Sīsū Kalaisi ʻi heʻenau toe vakaiʻi e lisí ni? Ko e hā ʻenau ongoʻi fekauʻaki mo Ia ʻi he hili hono vakaiʻi ʻo e ngaahi meʻa kuó Ne fai maʻatautolú?
Vahe ki he finemui takitaha ke ne lau ha taha ʻo e ngaahi potufolofola ʻoku fokotuʻu atu ʻi he fokotuʻutuʻu ko ʻení pe ko ha konga mahuʻinga ʻi he lea ʻa ʻEletā David A. Bednar ko e “Ke Nau Lava ʻo Fua Faingofua ʻEnau Ngaahi Kavengá.” Kole ange ke ne fakamatalaʻi ʻi heʻene lea pē ʻaʻana ʻa e tokoni ʻoku ʻomi ʻe Sīsū Kalaisi kiate kinautolu ʻoku muimui ʻiate Iá. Fakaafeʻi e kau finemuí ke nau vahevahe ha ngaahi sīpinga ʻo e founga kuo nau mamata ai ki he nonga pe ivi ʻo e Fakamoʻuí ʻi heʻenau moʻuí pe ko e moʻui ʻa e niʻihi kehé.
Fokotuʻu ʻi he holisí ʻa e fakamoʻoni ʻa e kau mēmipa ʻo e Kau Palesitenisī ʻUluakí kia Sīsū Kalaisí, mei he Ensign pe Liahona ʻo e konifelenisi fakamuimuitahá (ʻoku faʻa ʻasi ʻa e ngaahi fakamoʻoni ko ʻení ʻi he fakaʻosinga ʻ o e ngaahi leá). ‘Eke ange pe ko e hā ʻenau ongo ʻi he taimi ʻoku nau fanongo ai pe lau ʻa e ngaahi fakamoʻoni ʻa e kau fakamoʻoni makehe ʻo e Fakamoʻuí. ʻEke ange pe ʻoku tokoniʻi fēfē heʻenau ngaahi fakamoʻoni kia Kalaisí ʻa ʻenau ngaahi tōʻonga fakaʻahó. Tuku ha taimi ke hanga ai ʻe he kau mēmipa ʻo e kalasí ʻo fakahaaʻi ʻenau ʻofá mo ʻenau fakamoʻoni kia Sīsū Kalaisí.
Lau ʻa e palakalafi ʻi he ʻuluʻi tohi “Ko e Meʻa Naʻá Ne Fai Maʻatautolú” ʻi he lea ʻa ʻEletā Dallin H. Oaks ko e “Ngaahi Akonaki ʻa Sīsuú.” Ko e hā ha lau ʻa e kau finemuí ke tali ʻaki e fehuʻi ʻa e fefiné “Ko e hā ha meʻa kuó Ne fai maʻaku?” Hiki ʻi he palakipoé ʻa e ʻuluʻi tohi ʻe hiva mei he malangá (mei he “Moʻui ʻa Māmaní” ki he “Ko e Fakaleleí”). Fakaafeʻi ʻa e kau finemuí ke nau fili ha ʻuluʻi tohi ʻe taha pe toe lahi ange mei he ngaahi ʻuluʻi tohi ko ʻení pea teuteu ha sētesi ʻe taha pe ua te nau fakaʻaongaʻi ke akoʻi ʻaki e fefiné ʻi he meʻa naʻe fai ʻe Sīsū Kalaisi maʻaná. Te nau lava ʻo fakaʻaongaʻi ʻa e lea ʻa ʻEletā ʻOakesí, ngaahi folofola fekauʻakí (hangē ko ia ʻoku fokotuʻu atu ʻe he fokotuʻutuʻu ko ʻení), pea mo ʻenau ngaahi aʻusiá mo ʻenau fakamoʻoní. Fakaafeʻi kinautolu ke nau vahevahe ʻa e meʻa ne nau teuteú.
Huluʻi ʻa e foʻi vitiō ko e “Toe Fakafoki Mai” Ko e hā e meʻa ʻoku ako ʻe he kau finemuí mei he foʻi vitioó fekauʻaki mo e meʻa ʻe lava ke fai ʻe Sīsū Kalaisi maʻanautolú? Te nau fakaʻaongaʻi fēfē ʻa e pōpoaki ʻo e foʻi vitiō ko ʻení ke tokoni ki he kakai ʻoku faingataʻaʻia ʻi hono fakamolemoleʻi pē kinautolú pe ongoʻi he ʻikai ha toe ʻaonga ange e tokoni ʻa e Fakamoʻuí? Ko e hā ha ngaahi potufolofola te nau fie vahevahe? (hangē ko ʻení, vakai, ʻIsaia 1:18; ʻAlamā 36:3, 27; ʻEta 12:27; T&F 58:42–43).

NaN:NaN

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. Ko e hā haʻanau ngaahi ongo pe fakakaukau? ʻOku mahino nai kiate kinautolu ʻa e ʻuhinga ʻoku mahuʻinga ai ʻa Sīsū Kalaisi ʻi heʻenau moʻuí? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, ʻe lava ke nau:

Fakakakato ʻa e meʻa ʻoku fie maʻu ke aʻusia fika 5 ʻi he ʻulungaanga mahuʻinga ko e Tuí ʻi he Fakalakalaka Fakatāutahá.
Feinga ke moʻui tatau ange hangē ko e Fakamoʻuí pea vahevahe ʻenau ngaahi aʻusiá ʻi ha kalasi he kahaʻú.
Fakakaukau ki ha taha ʻe ala ʻaonga ki ai hono ʻilo ko ia e meʻa naʻe fai ʻe he Fakamoʻuí maʻatautolú pea mo fokotuʻu ha ngaahi founga ke vahevahe ai ʻenau ngaahi fakamoʻoní mo e taha ko iá.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.