Ko e hā ha founga te u lava ʻo ʻiloʻi ai ʻeku Tamai Hēvaní?

Ko e ngaahi ʻofefine kitautolu ʻo ʻetau Tamai Hēvaní, ʻokú Ne ʻofa ʻiate kitautolu pea ʻokú Ne finangalo ke tau toe ofi ange kiate Ia. Kuó ne ʻomi ha faingamālie ke tau lotu ai kiate Ia pea kuó Ne talaʻofa ke fanongo mo tali mai ʻetau ngaahi lotú. ʻE lava foki ke tau ʻilo kiate Ia ʻi heʻetau ako ʻa e folofolá mo e ngaahi lea ʻa e kau palōfita he ʻaho kimui ní pea ʻi heʻetau feinga ke hoko ʻo hangē ko Iá ʻaki ʻetau muimui ki Hono finangaló.

Teuteuʻi fakalaumālie koe

Fakakaukau angé ki ho vā mo hoʻo Tamai Hēvaní. Ko e fē ha taimi kuó ke ongoʻi ofi taha ai kiate Ia? Ko e hā e meʻa naʻá ke fai ʻo tupu ai hoʻo ongoʻi ofi ange kiate Iá?

Ko e hā e ongo ʻa e kau finemui ʻi hoʻo kalasí fekauʻaki mo kinautolu peé? ʻE lava fēfē ʻe ha vā ʻoku mālohi mo e Tamai Hēvaní, ʻo fakamālohia ʻenau ongoʻi ʻoku ʻi ai honau mahuʻingá? Ko e hā ha founga ʻe lava ke ke tokoniʻi ai e kau finemuí ke fakamālohia e vā ko ʻení?

Ko e hā ha ngaahi potufolofola mo ha ngaahi maʻuʻanga tokoni kehe ʻe tokoni ki he kau finemuí ke nau ʻiloʻi ʻa e Tamai Hēvaní?

Sione 17:3 (Ko e mahuʻinga ʻo hono ʻiloʻi ʻo e Tamai Hēvaní)

1 Sione 2:3–5; 4:7–8; ʻĪnosi 1:1–7; Mōsaia 4:9–12; 5:13; T&F 88:63–65; 93:1 (Ko e founga ʻoku tau ʻiloʻi ai ʻa e Tamai Hēvaní)

C. Scott Grow, “Pea Ko ʻeni ʻa e Moʻui Taʻengatá,” Ensign pe Liahona, Mē 2017, 121–24

D. Todd Christofferson, “Nofomaʻu ʻi Heʻeku ʻOfá,” Ensign pe Liahona, Nōvema 2016, 48–51

Robert D. Hales, “Ko e Fekumi ke ʻIloʻi ʻa e ʻOtua ko ʻEtau Tamai Taʻengatá, mo Hono ʻAlo ko Sīsū Kalaisí, ” Ensign pe Liahona, Nōvema 2009, 29–32.

Vitiō: ”ʻOkú Ne ʻAfioʻi Au“, “Lotú”

3:1

4:11

“ʻOku Moʻui ʻEku Tamaí,” Ngaahi Himi, fika 194; “ʻE Tamai ʻi Hēvani ē,” Ngaahi Himi, fika 185

Ko e faiako ‘i he founga ‘a e Fakamo‘uí

Naʻe teuteu e Fakamoʻuí ke faiako ʻaki ʻEne nofo toko taha pē ʻo lotu mo ʻaukai. Naʻá Ne kumi ki he tataki ʻa ʻEne Tamai Hēvaní. ʻI hoʻo teuteu ko ia ke akoʻi ʻa e kau finemuí ʻi he founga ʻe lava ke nau ʻiloʻi ai ʻa e Tamai Hēvaní, muimui ʻi he faʻifaʻitakiʻanga ʻa e Fakamoʻuí pea fakamoleki haʻo taimi ke ke lotu mo ʻaukai ai, mo fekumi ki he tataki ʻa e Tamai Hēvaní. Feinga ʻi he lolotonga hoʻo ngaahi teuteú ke ke ofi kiate Ia, pea vahevahe mo e kau finemuí ʻa hoʻo fakamoʻoni ki he Tamai Hēvaní.

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:

Hivaʻi e “ʻOku Moʻui ʻEku Tamaí” (Ngaahi Himi, fika 194) pe “ʻE Tamai ʻi Hēvani ē” (Ngaahi Himi, fika 185). Aleaʻi mo e kau finemuí e meʻa ʻoku akoʻi mai ʻe he ongo himí ni ʻo kau ki he Tamai Hēvaní mo e founga ʻe lava ke tau ʻiloʻi ai Iá.
Ka fakangofua ʻe he pīsopé pea fakaafeʻi ha tamai ʻa ha taha ʻo e kau finemuí ke ne vahevahe ʻene ngaahi ongo fekauʻaki mo ʻene hoko ko ha tamaí. ʻE lava ke ne fakamatala ki he ngaahi ongo ʻokú ne maʻu ki hono ʻofefiné, mo e meʻa ʻokú ne ʻamanaki te ne lavaʻi ʻi he moʻuí, mo e founga ʻokú ne ʻamanaki ke tokoniʻi ʻaki ia ke ne lavaʻi e meʻa ko iá. Kole ki he kau finemuí ke nau fakafehoanaki e meʻa naʻe lea ʻaki ʻe he tamai ko ʻení mo e ongo ʻoku maʻu heʻenau Tamai ʻi Hēvaní kiate kinautolú.
Hiki e ongo fehuʻi ko ʻení he palakipoé: Ko e fē ha taimi kuó ke ongoʻi ofi taha ai ki he Tamai Hēvaní? Ko e hā hoʻo meʻa naʻe fai ʻo tupu ai hoʻo ongoʻi ofi kiate Iá? Kole ki he kau finemuí ke tohi ʻenau ngaahi talí pea vahevahe mai ʻo kapau te nau ongoʻi fiemālie ke fai ia.

Ako fakataha

ʻE tokoni e ngaahi ʻekitivitī takitaha ʻi laló ke mahino ki he kau finemuí ʻa e founga ʻe lava ke nau ʻiloʻi lelei ange ai ʻenau Tamai Hēvaní. ʻI hoʻo muimui ki he ueʻi ʻa e Laumālié, hanga ʻo fili ha meʻa ʻe taha pe lahi ange ʻe ʻaonga taha ki hoʻo kalasí:

Fakaafeʻi e kau finemuí ke nau ako ki he ngaahi founga ʻe lava ke tau ʻiloʻi lelei ai e Tamai Hēvaní ʻi he lea ʻa ʻEletā C. Scott Grow ko e “Pea Ko ʻeni ʻa e Moʻui Taʻengatá.” Ko e hā ha ngaahi aʻusia ʻe lava ke vahevahe ʻe he kau finemuí kapau naʻe tokoniʻi kinautolu ʻe ha taha ʻo e ngaahi fokotuʻú ni, ke nau ongoʻi ofi ange ki he Tamai Hēvaní? Ko e hā ʻoku mahuʻinga ai ke ʻiloʻi lelei ange ʻa e Tamai Hēvaní?
Fakaafeʻi e kau finemuí ke nau fakakaukauloto ʻoku pehē ange ʻe ha taha honau ngaahi kaungāmeʻá, “ʻOku ʻofeina taʻefakangatangata kotoa kitautolu ʻe he ʻOtuá, ko ia ʻoku ʻikai mahuʻinga ʻetau ngāué—he ʻe fakamoʻui kotoa kitautolu.” Te nau tali fēfē nai ki honau kaungāmeʻá? Fakaafeʻi e kau finemuí ke nau toe aleaʻi e ngaahi konga ʻo e lea ʻa ʻEletā D. Todd Christofferson ko e “Nofomaʻu ʻi Heʻeku ʻOfá,” ʻo kumi ha faleʻi te nau lava ʻo fakaʻaongaʻi ke tokoni ke mahino ki honau kaungāmeʻá ʻa e ʻofa ʻa e ʻOtuá.
Fakaʻaliʻali ha ngaahi meʻa ke nau fakafofongaʻi e lotú, ʻa e Laumālie Māʻoniʻoní, mo e ngaahi lea ʻa e kau palōfitá (hangē ko ha telefoni toʻotoʻo, kasa, mo ha mape). Talaange ki he kau finemuí ʻoku fakafofongaʻi ʻe he ngaahi meʻa takitaha ko ʻení ha meʻa kuo foaki mai ʻe he Tamai Hēvaní ke tokoni ke tau ʻiloʻi lelei ange ai Ia. Fakaafeʻi kinautolu ke nau fokotuʻu mai pe ʻoku fakafofongaʻi ʻe he ngaahi meʻa ko ʻení ʻa e hā. ʻAi ke lau fakataha ʻe he kalasí e lea ʻa ʻEletā Robert D. Hales “Ko e Fekumi ke ʻIloʻi ʻa e ʻOtua ko ʻEtau Tamai Taʻengatá mo Hono ʻAlo ko Sīsū Kalaisí.” (Fakakaukau ke fakaafeʻi e kau finemuí ke nau lau e lea ko ʻení kimuʻa pea nau toki omi ki he kalasí.) Fakaafeʻi e kau finemuí ke nau kumi ʻa e ngaahi fakamatala ʻokú ne akoʻi kiate kinautolu e founga ʻo e lotú, ʻa e Laumālie Māʻoniʻoní, pea ʻe tokoni e ngaahi lea ʻa e kau palōfitá ke nau lava ʻo ʻiloʻi ʻa e Tamai Hēvaní. Ko e hā mo ha toe meʻa ʻoku nau maʻu ʻi he lea ko ʻení ʻokú ne ueʻi kinautolu ke nau toe fie ʻilo lelei ange ʻa e Tamai Hēvaní? Fakaafeʻi kinautolu ke vahevahe ʻenau ngaahi ongo fekauʻaki mo e Tamai Hēvaní.
Vahe ki he finemui takitaha ha taha ʻo e ngaahi potufolofola ko ʻení: 1 Sione 2:3–5; 4:7–8; ʻĪnosi 1:1–7; Mōsaia 4:9–12; 5:13; T&F 88:63–65; 93:1. Kole ki he kau finemuí ke nau ako ʻenau ngaahi potufolofolá mo kumi ha ngaahi founga te nau lava ai ʻo ʻilo ʻa e Tamai Hēvaní. Fakaafeʻi kinautolu ke nau vahevahe ʻa e meʻa ʻoku nau akó mo ha toe ngaahi aʻusia pē fekauʻaki mo hono ʻiloʻi ʻo ʻenau Tamai Hēvaní ʻi he ngaahi founga ko ʻení.
Fakaafeʻi e kau finemuí ke nau lau e Sione 17:3, pea kole ange ke nau fakamatalaʻi e faikehekehe ʻo e ʻilo ki ha tahá, mei hono ʻiloʻi lelei ʻo ha tahá. Fakaafeʻi ke nau fakakaukau ki ha taha ʻoku nau ʻiloʻi lelei. Ko e hā ne nau fai ke nau ʻiloʻi lelei ai e tokotaha ko iá? Hiki ʻenau talí ʻi he palakipoé. Te tau fakaʻaongaʻi fēfē ʻa e ngaahi founga tatau pē ke ʻiloʻi lelei ai e Tamai Hēvaní? Fakaafeʻi e kalasí ke nau lau e ʻĪnosi 1:1–7 pea kole ki he kau finemuí ke nau kumi ha ngaahi founga ʻe lava ke toe lelei ange ai ʻenau fetuʻutaki mo e Tamai Hēvaní. Hili ʻenau aleaʻi e meʻa kuo nau maʻú, fakaafeʻi kinautolu ke nau fakalaulauloto ʻi ha ngaahi miniti siʻi ki honau vā mo e Tamai Hēvaní pea fakakaukauʻi e meʻa te nau lava ʻo fai ke toe lelei ai iá.
Hiki he palakipoé: “ʻOku ʻofeina kitautolu ʻe he Tamai Hēvaní pea ʻokú Ne finangalo ke tau ofi ange kiate Ia. Kuó Ne ʻomi ʻa e faingamālie ke tau lotu ai kiate Ia.” Kole ki ha finemui ke ne lau leʻo lahi e ngaahi lea ko ʻení, pea fakaafeʻi e kalasí ke vahevahe mai haʻanau ngaahi aʻusia fekauʻaki mo e lotú. Huluʻi e foʻi vitiō ko e “Lotú.” Ko e hā e meʻa ne ongo ki he kau finemuí ʻi he fakamoʻoni ʻa Palesiteni Monisoní? Ko e hā e meʻa ʻoku fakatokangaʻi ʻe he kau finemuí fekauʻaki mo e vā ʻo Sisitā Ogando mo e Tamai Hēvaní? Ko e hā e faʻahinga meʻa ʻoku fai ʻe he lotú ʻi he vā ko iá? ʻOange ha ngaahi miniti siʻi ke fakakaukau ai e kau finemuí ki honau vā mo e Tamai Hēvaní pea mo e founga te nau lava ʻo fakaleleiʻi ʻaki e vā ko iá.

4:11

Kole ki he kau finemuí ke vahevahe mai e meʻa kuo nau ako he ʻaho ní. Ko e hā ha ngaahi ongo pe ngaahi fakakaukau ʻoku nau maʻu? ʻOku mahino nai kiate kinautolu ʻa e founga ʻe lava ke nau ʻiloʻi lelei ange ai ʻenau Tamai Hēvaní? ʻOku ʻi ai mo haʻanau ngaahi toe fehuʻi kehe? ʻE ʻaonga nai ke fakamoleki ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui ʻaki fēfē nai ʻa e meʻa kuo nau ako he ʻaho ní. Hangē ko ʻení, te nau lava ʻo:

Hiki ʻi heʻenau ngaahi tohinoá ha meʻa ʻoku nau palani ke fakahoko ke toe lelei ange ai honau vā mo e Tamai Hēvaní pea fakahoko ʻenau palaní.
Fakakakato ʻa e meʻa ke aʻusia fika 1 ʻi he Mahuʻinga Fakatāutahá mei he Fakalakalaka Fakatāutahá.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.