Ko e hā ʻoku tau ʻilo fekauʻaki mo e natula ʻo e Toluʻi ʻOtuá?

ʻOku kau ʻi he Toluʻi ʻOtuá ʻa e ʻOtua ko e Tamai Taʻengatá, ʻa e Fakamoʻui ko Sīsū Kalaisí, pea mo e Laumālie Māʻoniʻoní. Neongo ko e kau mēmipa ʻo e Toluʻi ʻOtuá ʻoku nau māvahevahe mo kehekehe honau ngaahi fatongiá, ka ʻoku Nau taumuʻa taha pē. Nau uouangataha kakato ʻi hono fakahoko ʻa e palani ʻo e fakamoʻui ʻa e Tamaí Hēvaní.

Teuteuʻi fakalaumālie koe

ʻOku tokoniʻi fēfē koe ʻe he mahino ʻo e Toluʻi ʻOtuá, ke ke ʻilo ko hai koe? ʻOku kehe fēfē ʻetau ʻilo ki he Toluʻi ʻOtuá mei he tui ʻa e ngaahi tui fakalotu kehé?

ʻOku mahino nai ki he kau finemuí e founga ʻoku ngāue fakataha ai ʻa e kau mēmipa ʻe toko tolu ʻo e Toluʻi ʻOtuá? ʻE tokoni fēfē ki he kau finemuí ha mahino kiate kinautolu e natula ʻo e Toluʻi ʻOtuá ?

Ko e hā ha ngaahi potufolofola mo ha ngaahi lea ʻe tokoni ke mahino ki he kau finemuí ʻa e natula ʻo e Toluʻi ʻOtuá, mo Honau fatongia ʻoku fakahoko ʻi heʻenau moʻuí?

Sēnesi 1:27 (ʻOku ngaohi ʻa e tangatá ʻi he tatau ʻo e ʻOtuá)

Mātiu 3:16–17; Sione 14:16; Ngāue 7:55–56; 3 Nīfai 11:4–11; Siosefa Sāmita—Hisitōlia 1:17; Ngaahi Tefito ʻo e Tui 1:1 (ʻOku ʻi ai ha mēmipa ʻe toko tolu ʻi he Toluʻi ʻOtuá)

Luke 24:39; Sione 1:14; T&F 130:22 (Ko e mēmipa ʻe toko ua ʻo e Toluʻi ʻOtuá ʻoku ʻi ai Hona sino fakamatelie)

Sione 17:21; 1 Sione 5:7; ʻAlamā 11:44;T&F 20:28 (ʻOku faaitaha e Toluʻi ʻOtuá ʻo nau hoko pē ʻo taha)

“Toluʻi ʻOtuá,” Tuʻu Maʻu ʻi he Tuí (2004), 192–93

Dallin H. Oaks, “Ko e Toluʻi ʻOtuá pea mo e Palani ʻo e Fakamoʻuí, ”Ensign pe Liahona, Mē 2017, 100–103

Boyd K. Packer, “Ko e Fakamoʻoní,” Ensign pe Liahona, Mē 2014, 94–97

Robert D. Hales, “Moʻui Taʻengatá—ke ʻIloʻi ʻEtau Tamai Hēvaní mo Hono ʻAlo ko Sīsū Kalaisí,” Ensign pe Liahona, Nōvema 2014, 80–82

Vitiō: “Ko e Hono Toe Fakafoki Mai ʻo e Ongoongoleleí”

19:16

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:

Hiki ʻi he palakipoé, “Ko e hā ʻoku tau ʻilo fekauʻaki mo e natula ʻo e Toluʻi ʻOtuá?” Fakaafeʻi ʻa e kau finemuí ke nau lau ʻa e Ngaahi Tefito ʻo e Tui 1:1 pe Tokāteline mo e Ngaahi Fuakava 130:22 ke kumi e tali ki he fehuʻi ko ʻení.
Hiki ʻe fakalea ʻo e Tokāteline mo e Ngaahi Fuakava 130:22 ʻi he palakipoé, pea tuku ʻo ʻoua ʻe tohi ha meʻa ʻi he feiuʻu ʻoku ʻi ai e ngaahi foʻi lea mahuʻingá. Fakaafeʻi ʻa e kau finemuí ke nau fakakaukauʻi e ngaahi foʻi lea ʻoku totonu ke ʻi he ngaahi feituʻu ko ʻeni ʻoku ʻataá, pea mou toki fakafonu fakakalasi kinautolu.
Fakaafeʻi ʻa e kau finemuí ke nau fakatātaaʻi e founga te nau akoʻi ai ha taha ʻoku ʻikai ke tau Siasi fekauʻaki mo e kau mēmipa kehekehe ʻo e Toluʻi ʻOtuá. Ko e hā ʻa e ngaahi potufolofola te nau fakaʻaongaʻí? Ko e hā e ʻuhinga ʻoku nau pehē ai ʻoku mahuʻinga e ʻilo ko ʻení?

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he kau finemuí e natula ʻo e Toluʻi ʻOtuá. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

Fakaafeʻi e kau finemuí ke nau fakakaukau ki ha faingataʻa ʻoku fehangahangai mo e kau finemui he ʻaho ní. Ko e hā ʻe lava ke maʻu ʻe he kau finemuí ʻi he konga IV ʻo e lea ʻa ʻEletā Dallin H. Oaks “Ko e Toluʻi ʻOtuá pea mo e Palani ʻo e Fakamoʻuí,” ʻe lava ke tokoni kiate kinautolu ʻi he ngaahi faingataʻá ni? Ke tokoni ke nau ʻilo lahi ange ki he toko Toluʻi ʻOtuá, vahevahe e kau finemuí ki ha kulupu ʻe tolu, pea ʻoange ki he kulupu takitaha ha laʻipepa ʻoku tohiʻi ai e ʻuluʻi tohí ni: “ʻOtua ko e Tamaí,” “Ko e ʻAló,” pea mo e “Ko e Laumālie Māʻoniʻoní.” Fakaafeʻi e kulupu takitaha ke nau kumi ki he konga ʻoku fekauʻaki mo e lea ʻa ʻEletā ʻOakesí pea kumi ʻa e ngaahi potufolofola naʻá ne vahevahé. Kole ki he kau finemuí ke nau hiki heʻenau pepá e meʻa ne nau akó pea vahevahe ki he kalasí ʻenau ngaahi fakakaukaú. ʻE tokoniʻi fēfē kitautolu ʻe he ngaahi moʻoni kuo tau ʻilo fekauʻaki mo e Toluʻi ʻOtuá, ʻi he ngaahi faingataʻa ne tau fakalaú?
Tohiʻi ʻa e “ʻOtua ko e Tamaí,” “Sīsū Kalaisi,” mo e “Ko e Laumālie Māʻoniʻoni” ʻi he palakipoé. Fili ha konga ʻo e lea ʻa Palesiteni Boyd K. Packer “Ko e Fakamoʻoní” ʻe tokoni ke mahino ki he kau finemuí ʻa e Toluʻi ʻOtuá. ʻOange ha konga ki he finemui takitaha ke lau fakalongolongo pea fakamatalaʻi fakanounou ʻi heʻene lea pē ʻaʻaná ki he kalasí. Lolotonga ʻene fakamatalá, ʻai ke ne hiki he palakipoé ʻi lalo he ʻuluʻi tohi totonú ʻa e meʻa naʻá ne ako fekauʻaki mo e mēmipa ko ia ʻo e Toluʻi ʻOtuá. Ko e hā e ʻuhinga ʻoku ongoʻi ai ʻe he kau finemuí ʻoku mahuʻinga ke mahino ʻa e ngaahi moʻoni ko ʻení fekauʻaki mo e Toluʻi ʻOtuá? Te nau fakamatalaʻi fēfē ʻa ʻenau tuí ki he niʻihi ʻoku kehe ʻenau fakaʻuhingaʻi ʻa e Toluʻi ʻOtuá?
Fakaafeʻi e finemui takitaha ke lau e “Toluʻi ʻOtuá” ʻi he Tuʻu Maʻu ʻi he Tuí. Kole ki ha taha ʻo e kau finemuí ke vahevahe e meʻa naʻá ne ako mei he meʻa naʻá ne laú. Pea kole ki ha finemui ʻe taha ke toe lea ʻaki e meʻa naʻe lea ʻaki ʻe he finemui ʻuluakí pea vahevahe ha meʻa naʻá ne ako. Toutou fai ia kae ʻoua kuo maʻu ʻe he finemui takitaha e faingamālie ke vahevahe. Fehuʻi ki he kau finemuí pe ʻoku kehekehe fēfē ʻetau fakakaukau ki he Toluʻi ʻOtuá mo e vakai ʻa e ngaahi tui fakalotu kehé. ʻE tāpuekina fēfē ʻa e kau finemuí ʻe he ʻilo moʻoni ki he Toluʻi ʻOtuá?
Hiki ʻa e ʻuluʻi tohi ʻe tolu ʻi he palakipoé: “ʻOku toko tolu e kau mēmipa ʻo e Toluʻi ʻOtuá,” “ʻOku uouangataha ʻa e Toluʻi ʻOtuá”, mo e “ʻOku maʻu he Tamai Hēvaní mo Sīsū Kalaisi ha sino fakamatelie.” Hili ʻa e ngaahi potufolofola kau ki he Toluʻi ʻOtuá (hangē ko ia ʻoku hiki atu ʻi he fokotuʻutuʻu ko ʻení) ʻi he fanga kiʻi kaati. Fakaafeʻi e kau finemuí ke nau taufetongi ʻi hono fili ʻo ha kātí, lau leʻo lahi e folofolá, pea tohi ʻa e potufolofolá ʻi he ʻuluʻi tohi ʻoku kaunga ki aí ʻi he palakipoé (mahalo ʻe kaunga ʻa e niʻihi ʻo e ngaahi potufolofolá ki ha ʻuluʻi tohi lahi ange ʻi he tahá). ʻE tāpuekina fēfē e kau finemuí ʻe he ʻilo ʻo e ngaahi moʻoni ko ʻeni kau ki he Toluʻi ʻOtuá? Poupouʻi e kau finemuí ke tauhi ha lisi ʻo e ngaahi potufolofola ko ʻení ʻi heʻenau folofolá ke nau lava ʻo fakaʻaongaʻi kinautolu ke akoʻi e niʻihi kehé kau ki he Toluʻi ʻOtuá.
ʻOange ki he kau finemuí ha pepa ʻoku ʻi ai e ngaahi fehuʻi ko ʻení: Te ke fakamatalaʻi fēfē ʻa e vā fetuʻutaki ʻo e Fakamoʻuí mo ʻEne Tamaí? Ko e hā ha founga ʻoku taha ai e Tamaí mo e ʻAló? Ko e hā ʻa e ngaahi fatongia ʻo e Laumālie Māʻoniʻoní? Fakaafeʻi kinautolu ke fakalaulauloto ki he ngaahi fehuʻi ko ʻení ʻi heʻenau mamataʻi, fanongo mo lau e lea ʻa ʻEletā Robert D. Hales “Moʻui Taʻengatá — ke ʻIloʻi ʻEtau Tamai Hēvaní mo Hono ʻAlo ko Sīsū Kalaisí.” Tuku ange ha taimi ke tohi ʻenau ngaahi talí, pea fakaafeʻi kinautolu ke vahevahe e meʻa ne nau hiki.

Kole ki he kau finemuí ke nau vahevahe ʻa e meʻa naʻa nau ako ʻi he ʻaho ní. ʻOku mahino nai kiate kinautolu e natula ʻo e Toluʻi ʻOtuá? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Tokoni Fakafaiakó

Te ke lava ʻo fakaʻaongaʻi e ngaahi ʻekitivitī ako ʻi he konga ko ʻení ke ʻilo e meʻa kuo ʻosi ʻilo ʻe he kau finemuí kau ki he tokāteliné pea mo e meʻa ʻoku kei fie maʻu ke akó. Mateuteu ke fakafeʻungaʻi hoʻo palani ʻo e lēsoní ke feau ʻenau fie maʻú ʻo ka fie maʻu.

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui ʻaki fēfē nai ʻa e meʻa kuo nau ako he ʻaho ní. Hangē ko ʻení, te nau lava ʻo:

Ako maʻuloto mo fakakaukau ki he ʻuluaki tefito ʻo e tuí pea vahevahe ia mo ha taha.
Fakakakato ʻa e meʻa ke aʻusia fika 2 he Natula Faka-Otuá ʻi he Fakalakalaka Fakatāutahá.
Akoʻi ha lēsoni efiafi fakafāmili ʻi ʻapi fekauʻaki mo e Toluʻi ʻOtuá, ʻo fakaʻaongaʻi ʻa e ngaahi potufolofola ne nau ako he lolotonga ʻo e lēsoni ko ʻení.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.