Te u maʻu fēfē ha fiemālie ʻi ha pekia ha taha ʻoku ou ʻofa ai?

Ko e maté ko ha konga mahuʻinga ia ʻo e palani ʻo e fakamoʻuí. Kuo pau ke tau foua ʻa e maté mo maʻu ha sino haohaoa mo toetuʻu ka tau lava ʻo hoko ʻo tatau mo ʻetau Tamai Hēvaní. ʻI he taimi ʻe mahino ai kiate kitautolu ko e maté ko ha konga ia e palani ʻa e Tamai Hēvaní pea naʻe ʻikunaʻi ʻe Sīsū Kalaisi ʻa e maté ʻo fakafou Heʻene Fakaleleí, te tau lava leva ʻo maʻu ha ʻamanaki lelei mo ha nonga ʻi he taimi ʻoku mate ai ha taha ʻoku tau ʻofa ai.

Teuteuʻi fakalaumālie koe

Kuo tāpuekina fēfē hoʻo moʻuí ʻe he ʻilo ʻoku ʻi ai ha moʻui hili ʻa e maté? Ko e hā ha ngaahi potufolofola ne nau tokoniʻi koe ke mahino ʻa e mea ʻoku hoko ʻi he hili ʻo e maté?

Kuo ʻosi foua ʻe ha kau finemui ʻe niʻihi siʻa mate ha taha ʻoku nau ʻofa ai. Te nau foua kotoa ʻa e maté ʻi ha ʻaho. Ko e hā ʻokú ke loto ke nau ʻilo ʻa ia te ne tokoniʻi ai kinautolú?

Ako ʻi he faʻalotu ʻa e ngaahi potufolofolá ni mo e ngaahi maʻuʻanga tokoni ko ʻení. Ko e hā ʻoku ke ongoʻi ʻe ʻaonga ki he kau finemui ʻokú ke akoʻí?

1 Kolinitō 15:22 (Ko e toetuʻú ko ha meʻaʻofa ia meia Kalaisi ki he faʻahinga ʻo e tangatá)

Mōsaia 16:7–8 (ʻOku hanga ʻe he Toetuʻu ʻa Sīsū Kalaisí ʻo toʻo atu e huhu ʻo e maté)

Mōsaia 18:8–10 (ʻOku tau fakafiemālieʻi ʻa kinautolu ʻoku nau fie maʻu ʻa e fakafiemālié)

ʻAlamā 11:42–45 (Te tau toe maʻu hotau sinó koeʻuhí ko e Toetuʻu ʻa e Fakamoʻuí)

ʻAlamā 28:12; T&F 42:45–46 (ʻOku tau tengihia ʻa kinautolu ʻoku maté, ka ʻoku melie ʻa e maté kiate kinautolu ʻoku mate ʻi he ʻEikí)

ʻAlamā 40:11–14 (ʻE kei moʻui atu ai pē hotau laumālié ʻi he hili ʻa e maté)

T&F 137:5–10 (Ko e mamata ʻa Siosefa Sāmita ki hono tokoua ko ʻAlaviní, fānau kei iikí, mo ha niʻihi kehe ʻi he puleʻanga fakasilesitialé)

T&F 138 (Ko e mata meʻa-hā-mai ʻa Palesiteni Siosefa F. Sāmita ki he maama tataliʻanga ʻo e ngaahi laumālié)

Thomas S. Monson, “Mīsisi Pātoni—ko e Hoko atu ʻo e Talanoá,” Ensign pe Liahona, Nōvema 2007, 21–24; vakai foki, vitiō “Kae ʻOua Ke Tau Toe Feʻiloaki”

Shayne M. Bowen, “‘Koeʻuhí ʻOku Ou Moʻui, ʻE Moʻui mo Kimoutolu Foki,’” Ensign pe Liahona, Nōvema 2012, 15–17

Vitiō: “ ʻOku Tau Kei Hoko pē Ko ha Fāmili,” “Te Ne Tokoniʻi Koe”

Ko e Faiako ‘i he Founga ‘a e Fakamo‘uí

Naʻe fai ʻe he Fakamoʻuí ha ngaahi fehuʻi naʻe fakatupu fakakaukau mo ongo moʻoni ki Hono kau muimuí. Te ke fakaafeʻi fēfē e kau finemuí ke nau fakalaulauloto mo feinga ke maʻu ha ueʻi fakalaumālie? Te ke tokoniʻi fēfē kinautolu ke nau ongoʻi tauʻatāina ke vahevahe ʻenau ngaahi ongo fakafoʻituituí?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau fakatokangaʻi ʻa e mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Vakai ki he ngaahi fakakaukau ki he akó mo e akoʻí.

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:

• Vahevahe ha meʻa ne ke aʻusia ʻiate koe pē, pe ko ha aʻusia ʻa ha taha kehe, fekauʻaki mo hono maʻu ha nonga ʻi he hili ha mate ʻa ha taha naʻe ʻofa ai. Fakaafeʻi ʻa e kau finemuí ke nau vahevahe ʻenau ngaahi aʻusiá.

• Fakaafeʻi ʻa e kau finemuí ke nau vahevahe ha ngaahi meʻa ne nau aʻusia ʻi ha mate ʻa ha taha ne nau ʻofa ai. Naʻe tokoniʻi fēfē kinautolu ʻe heʻenau ʻilo e Fakaleleí mo e palani ʻo e fakamoʻuí ke nau maʻu ha fakafiemāalie?

Ako fakataha

Vakai ki he ngaahi fakakaukau ki he akó mo e akoʻí .

ʻE tokoni e ngaahi ʻekitivitī takitaha ʻi laló ki he kau finemuí ke nau ʻilo fekauʻaki mo e moʻui ʻi he hili ʻa e maté. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí.

• Fakaafeʻi e kau finemuí ke nau hiki ʻenau ngaahi fehuʻí, fakakaukaú, pe tailiili kau ki he maté pea kumi e ngaahi talí ʻi he ngaahi potufolofola ʻoku fokotuʻu atu. Poupouʻi ke nau fakaʻilongaʻi e ngaahi potufolofola pe fakamatala ʻokú ne fakamatalaʻi lelei e fatongia ʻo e Fakamoʻuí ʻi hono tokoniʻi kitautolu ke tau ikunaʻi e maté. Kole ke nau vahevahe e meʻa ʻoku nau akó. Fakaafeʻi ke nau vahevahe ʻenau ongo kau ki he meʻa ʻoku fai ʻe he Fakamoʻuí maʻatautolú.

• Huluʻi ʻa e vitiō “Te Ne Tokoniʻi Koe,” pea fakaafeʻi e kau finemuí ke nau vahevahe ʻa ʻenau ngaahi ongó. Kole ki he kau finemuí ke nau fakakaukau pe naʻe mei fēfē ha makehe ʻa e māmaní kapau ne ʻilo ʻe he taha kotoa ʻa e meʻa naʻe ʻilo ʻe he talavou ʻi he vitioó. ʻOku tokoniʻi fēfē ʻe he ʻilo ko ʻení ʻetau moʻui fakaʻahó? Fakaafeʻi ha finemui ke ne vahevahe ʻene fakamoʻoni fekauʻaki mo e moʻui hili ʻa e maté pea mo e meʻa ʻokú ne maʻu ai ha ʻamanaki leleí.

• Vahevahe e talanoa fekauʻaki mo Mīsisi Pātoni ʻi he lea ʻa Palesiteni Thomas S. Monson “Mīsisi Pātoni—ko e Hokoatu ʻo e Talanoá,” pe huluʻi ʻa e vitiō “Kae ʻOua ke Tau Toe Feʻiloaki.” ʻEke ki he kau finemuí pe naʻa nau mei tali fēfē e fehuʻi naʻe fai ʻe Mīsisi Pātoni kia Tōmasi Monisoni heʻene kei talavoú. Lau fakakalasi e Mōsaia 18:8–10. Aleaʻi e fatongia ʻoku tau maʻu kotoa ko hono fai ha fakafiemālie, tokoni, pea mo ha ngāue tokoni kehe ki he ngaahi fāmili ʻoku mate ha taha ʻoku nau ʻofa ai. Fakakaukau ke fakaafeʻi ha mēmipa ʻo e kau palesitenisī ʻo e Fineʻofá ke kau ʻi he fealēleaʻaki ko ʻení.

• Fakaafeʻi ha vaheua ʻe taha ʻo e kalasí ke nau lau ʻa e talanoa fekauʻaki mo Sisitā Lamelasi ʻi he lea ʻa ʻEletā Shayne M. Bowen ko e “‘Koeʻuhí ʻOku Ou Moʻui, ʻE Moʻui mo Kimoutolu Foki,’” pea fakaafeʻi ʻa e vaheua ʻe tahá ke nau lau ʻa e talanoa fekauʻaki mo e foha ʻo ʻEletā Poueni ko Taisoní. Kole ange ke nau vahevahe ʻa e meʻa ne nau ako kau ki he founga ke maʻu ai ha fakafiemālie ʻi he taimi ʻoku mate ai ha taha ʻoku nau ʻofa aí pea mo e founga ke fakafiemālieʻi ai e niʻihi kehé. Fakaafeʻi ʻa e kau talavoú ke nau vahevahe ha ngaahi meʻa ne nau aʻusia ʻa ia ne mate ai ha taha ne nau ʻofa ai. Naʻe tokoniʻi fēfē kinautolu ʻe he ʻilo ki he Fakaleleí pea mo e palani ʻo e fakamoʻuí ke nau maʻu ha fiemālié? Kapau ʻoku taau, vahevahe ange haʻo aʻusia.

• Vahevahe e kalasí ki ha kulupu ʻe ua. Tuku ke lau ʻe ha kulupu ʻe taha e Tokāteline mo e Ngaahi Fuakava 137:5–10 pea lau ʻe he kulupu ʻe tahá ʻa e Tokāteline mo e Ngaahi Fuakava 138:57–58. Fakaafeʻi e kau finemuí ke nau aleaʻi ʻi heʻenau kulupú e ngaahi meʻa ʻoku akoʻi ʻe he potufolofolá ʻo kau ki he meʻa ʻoku hoko hili ʻetau maté. Aleaʻi fakakalasi e anga hono tokoniʻi ʻe he ʻilo ko ʻení ha taha ne mole ha taha ʻoku ʻofa ai. ʻOku fekauʻaki fēfē ʻa e ʻilo ko ʻení mo hotau fatongia ki he ngāue fakatemipalé mo e hisitōlia fakafāmilí?

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino nai kiate kinautolu ʻa e founga ke maʻu ai ha fakafiemālie ʻi he taimi ʻoku mate ai ha taha ʻoku nau ʻofa aí? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke toe fakamoleki ha taimi lahi ange ʻi he tokāteline ko ʻení?

Tokoni fakafaiako

“ʻE tokoni hono hiki e ngaahi fehuʻí ʻi he palakipoé kimuʻa pea kamata e kalasí ke kamata fakakaukau e kau akó ki he ngaahi taumuʻá ʻoku teʻeki ai kamata e lēsoní” (ʻOku ʻIkai ha Ui ʻe Mahuʻinga Ange ʻi he Faiakó, [2000],109–110).

Moʻui ʻaki e meʻa ʻoku tau akó

Vakai ki he ngaahi fakakaukau ki he akó mo e akoʻí.

Fehuʻi ki he kau finemuí pē ʻe anga fēfē haʻanau fakahaaʻi ha ʻofa ki ha taha kuo mole ha taha ne ʻofa ai. ʻOku ʻi ai nai ha kau uitou pe ha niʻihi kehe ʻi he uōtí pe koló te nau fie maʻu ha faʻahinga tokoni?

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.