Ko e hā ʻoku totonu ai ke u tauhi hoku sinó ke hangē ha temipalé?
Naʻe ngaohi hotau sinó ʻi he tatau ʻo e ʻOtuá. Ko e meʻaʻofa ia mei he Tamai Hēvaní ke tau lava ai ʻo foua ʻa e moʻui fakamatelié pea hoko atu ke hoko ʻo tatau ange mo Ia. ʻOku tokonʻi ʻe he ʻilo ko ʻení ʻa e anga ʻo ʻetau ngaohi hotau sinó pea mo ʻetau ongo ki he Tamai Hēvaní pea mo kitautolú. ʻI he taimi ʻoku tau ʻai ai hotau sinó ko ha temipale ʻo e ʻOtuá, ʻoku tau maʻu leva ha ngaahi tāpuaki fakatuʻasino, fakaeloto, mo fakalaumālie.
Teuteuʻi fakalaumālie koe
Ko e hā ha ngaahi tāpuaki kuó ke maʻu ʻi hoʻo tauhi homou sinó ko ha temipale ʻo e ʻOtuá? Kuo tupulaki fēfē hoʻo mahino ki he toputapu ho sinó ʻi hoʻo foua ʻa e moʻuí mo mamata ʻi he moʻui ʻa e kakai kehé?
Ko e hā ha ngaahi palopalema ʻoku fehangahangai mo e kau finemuí ʻi heʻenau feinga ke tauhi honau sinó ko ha meʻaʻofa toputapu mei he ʻOtuá? Te ke lava fēfē ʻo tokoni ke mahino kiate kinautolu hono mahuʻinga honau sinó ʻi he palani ʻo e fakamoʻuí?
Ako ʻi he faʻa lotu ʻa e ngaahi potufolofola mo e ngaahi maʻuʻanga fakamatala ko ʻení. Ko e hā ʻoku ueʻi koe ʻe he Laumālié ke ke vahevahe mo e kau finemuí?
Sēnesi 39:1–21; Taniela 1:3–21 (Ko hono fakahaaʻi ʻe Siosefa mo Taniela e fakaʻapaʻapa ki hona sinó)
1 Kolinitō 6:19–20; T&F 93:33–35 (Ko e temipale kitautolu ʻo e ʻOtuá)
T&F 88:15–16 (Ko e laumālié mo e sinó ko e moʻoniʻi laumālie ia ʻo e tangatá)
T&F 130:22; Mōsese 6:9 (ʻOku fakatupu kitautolu ʻi he tatau ʻo e ʻOtuá)
Gordon B. Hinckley, “Pea ʻe Lahi ʻa e Fiemālié ʻi Hoʻo Fānaú,” Liahona, Sānuali 2001, 61
Susan W. Tanner, “Ko e Toputapu ʻo e Sinó,” Ensign pe Liahona, Nōvema 2005, 13–15
“Angamaʻá,” Fakalakalaka Fakatāutaha ʻa e Kau Finemuí (2009), 69–72
Vitiō: “Angamaʻá: Ko e Hā Hono Ngaahi Fakangatangatá?”
Vitiō: “Kofu ʻe 195”
Ko e faiako ‘i he founga ‘a e Fakamo‘uí
Naʻe ʻofa ʻa e Fakamoʻuí ʻiate kinautolu naʻá Ne akoʻí. Naʻá Ne ʻafioʻi pe ko hai kinautolu pea mo e tuʻunga te nau lava ʻo aʻusiá. Naʻá Ne kumi ha ngaahi founga makehe ke nau tupulaki ai—ʻa e ngaahi founga naʻe fakataumuʻa pē kiate kinautolú. Ko e taimi ne nau faingataʻaʻia aí, naʻe ʻikai ke foʻi ka naʻe kei hoko atu pē ʻEne ʻofeina mo tokoniʻi kinautolú. Ko e hā te ke lava ʻo fai ke ʻofa ai mo tokoniʻi ʻa e kau finemuí ʻo hangē ko ia ʻoku fai ʻe he Fakamoʻuí?
Vahevahe ʻo e ngaahi aʻusiá
Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau fakatokangaʻi ʻa e mahuʻinga ʻo e ongoongoleleí ʻi heʻenau moʻui fakaʻahó.
Fakafeʻiloaki e tokāteliné
Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:
-
Huluʻi ʻa e vitiō “Kofu ʻe 195,” mo kole ki he kau finemuí ke nau kumi ʻa e ngaahi tāpuaki ʻoku maʻu mei he teunga tāú. Ko e hā te nau talaange ki ha taha ʻoku fehuʻi pe ko e hā ʻoku mahuʻinga pehē ai ʻa e teunga tāú?
-
Fakaʻaliʻali ha fakatātā ʻo ha temipale. Fehuʻi ki he kau finemuí pe ko e hā ʻoku fuʻu fakaʻofoʻofa pehē ai ʻa e temipalé pea ʻoku tatau fēfē hotau sinó mo ha ngaahi temipale ʻo e ʻOtuá. Fakaafeʻi kinautolu ke nau kumi e tali ki he fehuʻi ko ʻení “Ko e hā ʻoku totonu ai ke u tauhi hoku sinó ke hangē ha temipalé?” ʻi he lēsoní kotoa.
Ako fakataha
ʻE tokoni ʻa e ngaahi ʻekitivitī takitaha ʻi laló ki he kau finemuí ke mahino ʻoku toputapu honau sinó. Muimuiʻ i he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí.
-
Vahe ki he finemui takitaha ha taha ʻo e ngaahi fakamatala fakafolofola ʻi he fokotuʻutuʻu ko ʻení. Fakaafeʻi ia ke ne ako ʻa e fakamatalá pea fakamatalaʻi nounou ʻi ha foʻi sētesi e meʻa naʻá ne ako fekauʻaki mo e ʻuhinga ʻoku toputapu ai hotau sinó. Kole ki he kau finemuí ke nau fakakaukau ki ha ngaahi founga ʻoku feinga ai ʻa Sētane ke ne kākaaʻi ʻa e kau finemuí fekauʻaki mo e ngaahi moʻoni ko ʻení. Ko e hā ha meʻa te nau lava ʻo fai ke nau fepoupouaki ai ʻi heʻenau feinga ke tauhi honau sinó ke toputapú?
-
Lau, mamata, pe fanongo fakakalasi ki ha taha ʻo e ngaahi malanga ʻoku fokotuʻu atu ʻi he fokotuʻutuʻu ko ʻení. Kole ki he kau finemuí ke nau fakakaukau ki ha taha ʻoku nau ʻiloʻi ʻe ʻaonga ki ai e ngaahi pōpoaki ko ʻeni fekauʻaki mo e toputapu ʻo e sinó. (fakamanatu ange ke ʻoua naʻa nau lau ki ha taha fakafoʻituitui ʻi he kalasí). Ko e hā ha ngaahi konga ʻo e malangá ʻe ʻaonga taha ki he taha ko iá? Fakafeʻi kinautolu ke nau palani ha ngaahi founga te nau lava ai ʻo vahevahe ʻa e pōpoaki ko ʻení mo e taha ne nau fakakaukau ki aí. Poupouʻi kinautolu ke nau fakaʻaongaʻi ha kupuʻi lea mei he malangá fakataha mo ʻenau ngaahi aʻusia mo ʻenau ngaahi fakamoʻoni fakafoʻituituí.
-
Lau mo e kalasí ʻa e 1 Kolinitō 6:19–20 mo e Tokāteline mo e Ngaahi Fuakava 93:33–35. Vahevahe ʻa e kau finemuí ki ha ngaahi kulupu pea kole ki he kulupu takitaha ke nau hiki ha lisi ʻo e ngaahi founga ʻoku tatau ai hotau sinó mo ha temipale ʻo e ʻOtuá. Fakatahaʻi ʻa e ngaahi lisí ke taha pē, pea fakaafeʻi ʻa e kalasí ke nau aleaʻi ha niʻihi ʻo e ngaahi palopalema ʻoku fehangahangai mo e kau finemuí ʻi hono tauhi honau sinó ke hangē ha temipalé. Ko e hā te nau lava ʻo fai ke ikunaʻi ai ʻa e ngaahi palopalema ko ʻení?
-
ʻAi ʻa e kau finemuí ke nau tauhoa. Vahe ki ha taha ‘i he ngaahi hoá takitaha ke ne lau ʻa e Sēnesi 39:1–21 pea ke lau ʻe he taha ko ʻeé ʻa e Taniela 1:3–21 (ko e ngaahi fakatātā ki he ongo talanoa ko ʻení, vakai, Tohi Fakatātā ʻo e Ongoongoleleí, 11, 23). Kole ange ke nau kumi ha ngaahi founga naʻe fakahaaʻi ai ʻe Siosefa mo Taniela ʻena fakaʻapaʻapa ki hona sinó pea nau toki fevahevaheʻaki ʻa e meʻa ne nau maʻú. ʻE anga fēfē haʻanau muimui ʻi he sīpinga ʻa Siosefa mo Tanielá?
-
Fakaafeʻi ʻa e kau finemuí ke nau vakai ki he fakahokohoko ʻo e tohi Ki Hono Fakamālohia ʻo e Toʻu Tupú pea nau fakahā pe ko e fē ʻa e ngaahi tuʻunga moʻui ʻoku fekauʻaki mo hono tauhi ʻenau fakakaukaú mo honau sinó ke maʻá. Vahevahe ʻa e kau finemuí ki ha ngaahi kulupu, pea ʻai ke nau fakatotolo ʻi he ngaahi konga ko ʻení ke maʻu ʻa e tali ki he fehuʻi “Ko e hā ʻoku toputapu ai hoku sinó?” Fakaafeʻi kinautolu ke nau vahevahe ʻa e ngaahi meʻa te nau lava ʻo fai ke moʻui ʻaki ai ʻa e ngaahi tuʻunga moʻui ko ʻení.
-
Hiki ʻa e ngaahi fehuʻi ko ʻení ʻi he palakipoé, pea fakaafeʻi e finemui takitaha ke ne fili ha fehuʻi te ne fie kumi hono talí: Ko e hā ʻa e ngaahi tuʻunga moʻui ʻa e ʻEikí fekauʻaki mo e teunga tāú? Ko e hā ʻoku mahuʻinga ai ke u muimui ʻi he ngaahi tuʻunga moʻui ko ʻení? ʻOku tokoniʻi fēfē ʻe he teunga tāú ʻa ʻetau fakakaukau ki he fono ʻo e angamaʻá? Kole ki he kau finemuí ke nau fakaʻaongaʻi ʻa e konga ko e “Valá mo e Fōtungá ” ʻi he Ki Hono Fakamālohia ʻo e Toʻu Tupú ke maʻu ai ʻa e tali ki he fehuʻi ne nau filí. Fakaafeʻi kinautolu ke nau vahevahe ʻa e meʻa ne nau maʻú.
Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino nai kiate kinautolu ʻa e toputapu honau sino fakamatelié? Ko e hā ha ngaahi ongo pe ngaahi fakakaukau ʻoku nau maʻu? ʻOku ʻi ai mo haʻanau toe ngaahi fehuʻi? ʻE ʻaonga ke toe fakamoleki ha taimi lahi ange ʻi he tokāteline ko ʻení?
Moʻui ʻaki e meʻa ʻoku tau akó
Fakaafeʻi ʻa e kau finemuí ke nau fakakaukauʻi pe ʻe anga fēfē haʻanau moʻui ʻaki ʻa e meʻa kuo nau ako ʻi he ʻaho ní. Hangē ko ʻení, te nau lava ʻo:
-
Tukupā ke fai ha ngaahi liliu ʻi he anga ʻo ʻenau tauhi honau ngaahi sinó, ʻo fakatatau mo e meʻa ne nau ako he ʻaho ní.
-
Fakakakato ʻa e meʻa ʻoku fie maʻu ke aʻusia fika 1 pe 2 ʻi he tuʻunga ʻulungaanga mahuʻinga ʻo e Angamaʻá ʻi he Fakalakalaka Fakatāutahá.
Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.
Ngaahi ʻEkitivitī Felāveʻi mo e Toʻu tupú
Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.