E faapefea ona ou mauaina le mana ma faamanuiaga o le perisitua i lou olaga?

O le perisitua, ua mafai ai ona tatou maua sauniga o le faaolataga, e aofia ai le papatisoga ma le faamauga ma sauniga o le malumalu lea e faamau ai o tatou aiga e faavavau. O le tausia o feagaiga e o faatasi ma nei sauniga e aumaia ai le mana o le perisitua—o le mana o le Atua—i totonu o o tatou olaga. E mafai ona tatou iloa le galueaiina o o tatou olaga e lenei mana pe a tatou salamo faamaoni ma maua le faamagaloga, nofouta atili i uunaiga ma le taitaiga a le Agaga Paia, ma mauaina le malosi mai sauniga o le talalelei. O le perisitua ua tatou maua ai faamanuiaga faapitoa o le faamafanafanaga ma le faamalologa, e aofia ai faamanuiaga faaletama ma faamanuiaga faapeteriaka. O folafolaga i nei faamanuiaga ua iloa e ala i lo tatou faatuatua.

Saunia oe lava ia faaleagaga

O anafea na e iloa ai le mana o le perisitua i lou olaga ao e tausia au feagaiga? Pe i ai ni ou aafiaga e mafai ona e faasoa atu i tamaitai talavou?

Na faapefea ona faamanuiaina tamaitai talavou i lau vasega e le mana o le perisitua? O le a se mea e mafai ona e faia e fesoasoani ai ia i latou ia iloa le mana o le perisitua i o latou olaga?

Ia mautinoa ua iloa e tamaitai talavou e mafai ona latou maua faamanuiaga o le perisitua e tusa lava po o a o latou tulaga. O nei faamanuiaga e mafai ona oo mai e ala mai tagata o le aiga, taitai perisitua, ma faiaoga o aiga.

Ao e sauniuni, ia suesue ma le agaga tatalo ia mau ma punaoa nei. O le a sou lagona i le mea o le a anoa i tamaitai talavou?

Mataio 3:1–6, 13–17; Galuega 3:1–10; Mosaea 18:7–18; 3 Nifae 18:1–5 (O auala e faamanuiaina ai i tatou e le perisitua)

Russell M. Nelson, “O Le Tau o le Mana o le Perisitua,” Ensign po o le Liahona, Me 2016, 66–69

Dallin H. Oaks, “Pule o le Perisitua i le Aiga ma le Ekalesia,” Ensign po o le Liahona, Nov. 2005, 24–27

Neil L. Andersen, “Mana o le Perisitua,” Ensign po o le Liahona, Nov. 2013

Carole M. Stephens, “Pe O Tatou Iloa Ea Mea Ua Tatou Maua?” Ensign po o le Liahona, Nov. 2013, 12–14

“O Faamanuiaga o le Perisitua e mo Tagata Uma: O se Sootaga e le Mavavaeeseina ma le Perisitua,” O Afafine i Lo’u Malo: O Le Talafaasolopito o le Galuega a le Aualofa (2011), 137–53

Vitio: “O Le Toefuataiina o le Perisitua”

3:4

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni o oe lava manatu e faalauiloa atu ai le lesona o lenei vaiaso:

Afai e mafai, aumai se fata o le faamanatuga o avanoa i le vasega. Fai i tamaitai talavou e faasoa mai ni o latou manatu e uiga i le auala e mafai ona fesoasoani ai ia feagaiga sa latou osia i le taimi o le faamanatuga i le aumaia o le mana o le perisitua i o latou olaga ma aiga.
Valaaulia se tamaitai talavou e sau i le laupapa ma tusi se ata pe tusi se fuaitau e suitulaga i se auala se tasi ua faamanuiaina ai o ia e le perisitua. Ao faagasolo le lesona, fai atu i tamaitai talavou e faaopoopo ni ata po o ni fuaitau ao latou aoao e uiga i nisi faamanuiaga e oo mai ona o le perisitua.

Aoao faatasi

O le a fesoasoani gaoioiga taitasi nei i tamaitai talavou e malamalama ai i le auala na faamanuiaina ai i latou e le perisitua. I le mulimuli ai i le musumusuga a le Agaga, filifili se gaoioiga se tasi pe sili atu o le a sili ona aoga mo lau vasega:

Tuu atu i tamaitai talavou taitasi e faitau se tala faatusipaia o loo faailoa mai ai le auala na faamanuiaina i tatou e le perisitua (mo se faataitaiga, tagai i mau o loo lisi atu i lenei otootoga). E mafai foi ona suesue tamaitai talavou i le tala e uiga i teneiti e toalua o loo i le lauga a Peresitene Russell M. Nelson “O Le Tau o le Mana o le Perisitua.” Fai atu i tamaitai talavou e toe faamatala mai le tala ia latou lava upu ma faamatala mai ni faamanuiaga na oo mai ona o le perisitua. Uunaia foi i latou e faasoa mai ni faataitaiga patino o ni faamanuiaga sa latou mauaina e ala atu i le perisitua. Valaaulia ia tamaitai talavou taitasi e faamaumau i totonu o a latou tusi o talaaga po o tamaitusi o le O Lou Aiga ni tala e uiga i le auala na faamanuia ai e le perisitua lona aiga. E mafai ona latou talosagaina o latou matua po o tagata o le aiga e fesoasoani atu.
Aumai i le vasega se mea faitino e suitulaga i se faamanuiaga lea na sau mai le perisitua, e pei o se faamalu e suitulaga i le malupuipuia. Fai i tamaitai talavou po o a nisi mea faitino e mafai ona suitulaga i isi faamanuiaga o le perisitua. Faitau faatasi o se vasega, e uiga i le asiasiga a Sister Carole M. Stephens i Honduras e pei ona ta’ua i lana lauga “Pe O Tatou Iloa Ea Mea Ua Tatou Maua?” O a faamanuiaga ua leva ona fiafia i ai nei tuafafine ma o latou aiga? O a nisi faamanuiaga e mafai ona latou maua e ala i le perisitua? O le a se mea e mafai ona fai e tamaitai talavou ina ia maua ai faamanuiaga o le perisitua i o latou aiga i le taimi nei ma i o latou aiga i le lumanai?
Vaevae le mataupu “O Faamanuiaga o le Perisitua e mo Tagata Uma: O Se Sootaga e Le Mavavaeeseina ma le Perisitua” i le O Afafine i Lo’u Malo i ni vaega, ma valaaulia ia tamaitai talavou e vaavaai mo ni tala lea na faamanuia ai tagata e le mana o le perisitua. Fai i tamaitai talavou e faasoa mai i le vasega atoa se tala na taua ia i latou.
Fai i tamaitai talavou e matamata i “O Faamanuiaga o le Perisitua” ma fai se lisi o faamanuiaga na ta’ua e Elder Hales lea e oo mai i sauniga o le perisitua. Fai atu ia i latou e faasoa mai a latou lisi ma talanoa i mea e mafai ona latou faia e olioli ai i nei faamanuiaga i aso taitasi. O a aafiaga e mafai ona latou faasoa mai e faailoa mai ai le ala o faamalosia ai pea i latou e le aunoa e le mana o le perisitua?

3:4
Fai atu i tamaitai talavou e faitau le faamatalaga lenei ma tagai mo auala na faamanuiaina ai e le perisitua i latou: “Tuafafine e, o le a i ai nisi e taumafai e faatauanau outou faapea, talu ai e le faauuina outou i le perisitua, o se faiga faaituau.Ua matua sese lava i latou, ma e latou te le malamalama foi i le talalelei a Iesu Keriso. O loo avanoa faamanuiaga o le perisitua mo alii ma tamaitai amiotonu uma. E mafai ona tatou mauaina uma le Agaga Paia, maua faaaliga e patino i le tagata lava ia, ma maua faaeega paia i le malumalu, lea tatou te tulai mai ai ua ‘faaauupegaina’ i le mana. O le mana o le perisitua e faamalolo ai, puipui, ma puipuia ai ē amiotonu uma mai mana o le pogisa. O le mea e aupito sili ona taua, o le atoaga o le perisitua o loo i ai i sauniga e aupito sili ona maualuga i le maota o le Alii, e na o le tuufaatasia o se alii ma se tamaitai e mauaina ai” (Sheri Dew, i O Afafine i Lo’u Malo, 138). Fai i tamaitai talavou e faasoa mai ni faataitaiga o nei faamanuiaga i o latou olaga po o olaga o tagata latou te iloa.

Fai i tamaitai talavou e faasoa mai mea na latou aoaoina i le aso. Pe ua latou malamalama atili ea i auala e faamanuiaina ai i latou e le perisitua? O a ni o latou lagona po o ni manatu? E i ai nisi a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Fai atu i tagata o le aiga po o uo e faasoa mai ni a latou molimau i le perisitua ma le auala o faamanuia ai o latou aiga ma aafia ai a latou filifiliga o aso taitasi.
Tagai mo ni faataitaiga i le aluga o le vaiaso i le auala o galue ai le mana o le perisitua i o latou olaga.
Faaali atu le agaga faafetai i e umia le perisitua o e na i ai se uunaiga lelei i o latou olaga.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.