Te u maʻu fēfē e mālohi mo e ngaahi tāpuaki ʻo e lakanga fakataulaʻeikí ʻi heʻeku moʻuí?

ʻE lava ke tau maʻu ʻa e ngaahi ouau ʻo e fakamoʻuí, kau ai e papitaisó mo e hilifakinimá mo e ngaahi ouau fakatemipalé ʻa ia ʻoku silaʻi ai hotau ngaahi fāmilí ki he taʻengatá, ʻo fakafou ʻi he lakanga fakataulaʻeikí. ʻOku ʻomi ʻe he tauhi ʻo e ngaahi fuakava ʻoku fekauʻaki mo e ngaahi ouau ko ʻení, ʻa e mālohi ʻo e lakanga fakataulaʻeikí—ʻa e mālohi ʻo e ʻOtuá—ki heʻetau moʻuí. Te tau lava ʻo fakatokangaʻi ʻa e ngāue ʻa e mālohi ko ʻení ʻi heʻetau moʻuí ʻi heʻetau fakatomala fakamātoato mo maʻu ʻa e fakamolemolé, hoko ʻo ongoʻingofua ki he ngaahi ueʻi mo e tataki ʻa e Laumālie Māʻoniʻoní, mo maʻu ivi mei he ngaahi ouau ʻo e ongoongoleleí. ʻE lava foki ke tau maʻu mo e ngaahi tāpuaki makehe ʻo e fakafiemālié mo e fakamoʻuí, kau ai e ngaahi tāpuaki fakatamaí mo e ngaahi tāpuaki fakapēteliaké ʻo fakafou ʻi he lakanga fakataulaʻeikí. ʻOku fakakakato e ngaahi talaʻofa ʻi he ngaahi tāpuakí ni ʻo fakafou ʻi heʻetau tuí.

Teuteuʻi Fakalaumālie Koe

Ko e fē ha taimi kuó ke fakatokangaʻi ai e mālohi ʻo e lakanga fakataulaʻeikí ʻi hoʻo moʻuí ʻi hoʻo tauhi hoʻo ngaahi fuakavá? ʻOku ʻi ai nai ha meʻa naʻá ke aʻusia te ke lava ke vahevahe mo e kau finemuí?

Kuo tāpuekina fēfē e kau finemui ʻi hoʻo kalasí ʻe he lakanga fakataulaʻeikí? Ko e hā te ke lava ʻo fai ke tokoniʻi kinautolu ke nau ʻiloʻi ʻa e mālohi ʻo e lakanga fakataulaʻeikí ʻi heʻenau moʻuí?

Fakapapauʻi ʻoku fakatokangaʻi ʻe he kau finemuí ʻoku nau maʻu e ngaahi tāpuaki ʻo e lakanga fakataulaʻeikí ʻo tatau ai pē pe ko e hā honau tūkungá. ʻE lava ke maʻu e ngaahi tāpuakí ni mei he kau mēmipa ʻo e fāmilí, kau taki lakanga fakataulaʻeikí, mo e kau faiako fakaʻapí.

ʻI hoʻo teuteú, ako ʻi he faʻa lotu e ngaahi potufolofola mo e ngaahi maʻuʻanga tokoni ko ʻení. Ko e hā e meʻa ʻokú ke ongoʻi ʻe mahuʻingamālie ki he kau finemuí?

Mātiu 3:1–6, 13–17; Ngāue 3:1–10; Mōsaia 18:7–18; 3 Nīfai 18:1–5 (Ko e anga hono tāpuekina kitautolu ʻe he lakanga fakataulaʻeikí)

Russell M. Nelson, “Ko Hono Ngāueʻi ʻo e Mālohi ʻo e Lakanga Fakataulaʻeikí,” Ensign pe Liahona, Mē 2016, 66–69

Dallin H. Oaks, “Mafai ʻo e Lakanga Fakataulaʻeikí ʻi he Fāmilí mo e Siasí,” Ensign pe Liahona, Nōvema 2005, 24–27

Neil L. Andersen, “Mālohi ʻi he Lakanga Fakataulaʻeikí,”Ensign pe Liahona, Nōvema 2013, 92–95

Carole M. Stephens, “ʻOku Tau ʻIlo Nai ʻa e Meʻa ʻOku Tau Maʻú?” Ensign pe Liahona, Nōvema 2013, 12–14

“Ngaahi Tāpuaki ʻo e Lakanga Fakataulaʻeikí Maʻá e Kakai Kotoa pē: Ko ha Fehokotaki mo e Lakanga Fakataulaʻeikí he ʻIkai Lava ke Veteki,” Ngaahi ʻOfefine ʻi Hoku Puleʻangá: Ko e Hisitōlia mo e Ngāue ʻa e Fineʻofá (2011), 147–65

Vitiō: “Ko e Ngaahi Tāpuaki ʻo e Lakanga Fakataulaʻeikí”

3:4

Vahevahe ʻo e ngaahi meʻa ne nau aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻuí.

Fakafeʻiloaki e tokāteliné

Fili mei he ngaahi fakakaukau ko ʻení pe ko haʻo fakakaukau pē ʻaʻau ke fakafeʻiloaki ʻaki e lēsoni ʻo e uike ní:

ʻOmi ha laulau sākalamēniti teʻeki fakafonu ki he kalasí, kapau ʻe lava. Fakaafeʻi e kau finemuí ke vahevahe ʻenau ngaahi fakakaukau fekauʻaki mo e founga ʻoku tokoni ai e fuakava ʻoku nau fai lolotonga e sākalamēnití ke ʻomi e mālohi ʻo e lakanga fakataulaʻeikí ki heʻenau moʻuí mo e ʻapí.
Fakaafeʻi ha finemui ke haʻu ʻo tā ha fakatātā pe tohi ha kupuʻi lea ʻi he palakipoé te ne fakafofongaʻi ha founga ʻe taha ʻoku tāpuekina ai ia ʻe he lakanga fakataulaʻeikí. Tuku ke toe tānaki atu ʻe he kau finemuí ha ngaahi fakatātā pe ngaahi kupuʻi lea lolotonga e lēsoní ʻi heʻenau ako kau ki he ngaahi tāpuaki kehe ʻoku fakafou mai ʻi he lakanga fakataulaʻeikí.

Ako Fakataha

ʻE tokoni e ngaahi ʻekitivitī takitaha ʻi laló ke mahino ki he kau finemuí e anga hono tāpuekina kinautolu ʻe he lakanga fakataulaʻeikí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

Vahe e finemui takitaha ke ne lau ha talanoa mei he folofolá ʻoku hā ai e anga hono tāpuekina kitautolu ʻe he lakanga fakataulaʻeikí (vakai ki he ngaahi potufolofola ʻoku lisi ʻi he lēsoni ko ʻení, ki ha ngaahi sīpinga). ʻE lava ʻe he kau finemuí ʻo toe vakaiʻi e talanoa ʻo kau ki he ongo finemui ʻi he lea ʻa Palesiteni Russell M. Nelson “Ko Hono Ngāueʻi ʻo e Mālohi ʻo e Lakanga Fakataulaʻeikí.” Kole ki he kau finemuí ke nau toe fai e foʻi talanoá he lea pē ʻanautolú pea fakamatalaʻi e ngaahi tāpuaki ʻoku maʻu mei he lakanga fakataulaʻeikí. Toe poupouʻi kinautolu ke nau vahevahe ha ngaahi sīpinga fakatāutaha ʻo ha ngaahi tāpuaki ʻoku nau maʻu mei he lakanga fakataulaʻeikí. Poupouʻi e finemui takitaha ke lekooti, ʻi ha tohinoa pe ʻi he kiʻi tohi Ko Hoku Fāmilí e ngaahi talanoa kau ki he founga kuo faitāpuekina ai ʻe he lakanga fakataulaʻeikí ʻa hono fāmilí. ʻE lava ke kole ʻe he kau finemuí ki heʻenau mātuʻá pe kau mēmipa kehe ʻo e fāmilí ke nau tokoni.
ʻOmai ki he kalasí ha faʻahinga meʻa ʻokú ne fakafofongaʻi ha tāpuaki ʻoku maʻu mei he lakanga fakataulaʻeikí, hangē ko ha fakamalu ke fakafofonga ʻaki ʻa e maluʻangá. ʻEke ki he kau finemuí pe ko e hā ha ngaahi meʻa kehe te nau lava ʻo fakafofongaʻi e ngaahi tāpuaki kehe ʻo e lakanga fakataulaʻeikí. Lau fakakātoa ʻe he kalasí fekauʻaki mo e ʻaʻahi ʻa Sisitā Kalo M. Sitifení ki he kau fafine ʻi Honitulasí ʻa ia naʻá ne talanoa ki ai ʻi heʻene leá “ʻOku Tau ʻIlo Nai ʻa e Meʻa ʻOku Tau Maʻú?.” Ko e hā e ngaahi tāpuaki naʻe ʻosi fiefia ai e kau fafine ko ʻení mo honau ngaahi fāmilí? Ko e hā mo ha toe ngaahi tāpuaki ʻe lava ke nau maʻu mei he lakanga fakataulaʻeikí? Ko e hā ʻe lava ke fai ʻe he kau finemuí ke nau maʻu ai e ngaahi tāpuaki ʻo e lakanga fakataulaʻeikí ʻi honau ngaahi fāmilí he taimí ni pea ʻi honau fāmili ʻi he kahaʻú?
Vahevahe ʻa e vahe [8] ʻo e Ngaahi ʻOfefine ʻi Hoku Puleʻangá ko e “Ngaahi Tāpuaki ʻo e Lakanga Fakataulaʻeikí maʻá e Kakai Kotoa pē: Ko ha Fehokotaki mo e Lakanga Fakataulaʻeikí He ʻIkai Lava ke Veteki” ki ha ngaahi konga, pea fakaafeʻi e kau finemuí ke nau kumi ha ngaahi talanoa naʻe tāpuekina ai e kakaí ʻe he mālohi ʻo e lakanga fakataulaʻeikí. Fakaafeʻi e kau finemuí ke nau vahevahe ki he toenga ʻo e kalasí ha talanoa naʻe mahuʻingamālie kiate kinautolu.
Fakaafeʻi e kau finemuí ke nau mamata ʻi he “Ngaahi Tāpuaki ʻo e Lakanga Fakataulaʻeikí” pea hiki ha lisi ʻo e ngaahi tāpuaki mei he ngaahi ouau ʻo e lakanga fakataulaʻeikí naʻe fakamatalaʻi ʻe ʻEletā Heilé. Kole ange ke nau fevahevaheʻaki ʻenau ngaahi lisí pea aleaʻi e meʻa te nau lava ʻo fai ke nau fiefia ai ʻi he ngaahi tāpuaki ko ʻení he ʻaho takitaha. Ko e hā ha ngaahi aʻusia te nau lava ʻo vahevahe ʻa ia ʻoku nau fakatātaaʻi e founga hono fakamālohia maʻu pē kinautolu ʻe he mālohi ʻo e lakanga fakataulaʻeikí?

3:4
Kole ki he kau finemuí ke nau lau e fakamatala ko ʻení pea kumi ha ngaahi founga ʻoku tāpuekina ai kinautolu ʻe he lakanga fakataulaʻeikí: “Siʻi ngaahi tokoua, koeʻuhí ʻoku ʻikai fakanofo ʻa kimoutolu ki he lakanga fakataulaʻeikí, ko ia ʻe feinga ai ha niʻihi ke fakalotoa kimoutolu ʻo pehē kuo kākaaʻi kimoutolu. ʻOku nau hala ʻaupito pea taʻemahino kia[te] kinautolu ʻa e ongoongolelei ʻo Sīsū Kalaisí. ʻOku lava ke maʻu ʻa e ngaahi tāpuaki ʻo e lakanga fakataulaʻeikí ʻe he tangata mo e fefine angatonu kotoa pē. Te tau lava kotoa ʻo maʻu ʻa e Laumālie Māʻoniʻoní, maʻu ha fakahā fakafoʻituitui pea fakakoloaʻi kitautolu ʻi he temipalé, ʻa ia ʻoku tau hū mei ai kuo ʻfakateunga’ kitautolu ʻaki ha mālohi. ʻOku hanga ʻe he mālohi ʻo e lakanga fakataulaʻeikí ʻo fakamoʻui, maluʻi mo fakafeʻungaʻi ʻa e mālohi kotoa ʻo e māʻoniʻoní ʻi hono fakafepakiʻi ʻo e ngaahi mālohi ʻo Sētané. Kae mahuʻinga tahá, ʻe lava ke toki maʻu fakataha pē ʻe ha tangata mo ha fefine ʻa e kakato ʻo e lakanga fakataulaʻeikí ʻi he ngaahi ouau māʻolunga taha ʻo e fale ʻo e ʻEikí” (Sheri Dew, ʻi he Ngaahi ʻOfefine ʻi Hoku Puleʻangá, 148-49). Kole ki he kau finemuí ke nau vahevahe ha ngaahi sīpinga ʻo e ngaahi tāpuakí ni ʻi heʻenau moʻuí pe moʻui ʻa ha kakai ʻoku nau ʻilo.

Kole ki he kau finemuí ke nau vahevahe e meʻa naʻa nau ako he ʻaho ní. ʻOku mahino lelei ange nai kiate kinautolu ʻa e anga hono tāpuekina kinautolu ʻe he lakanga fakataulaʻeikí? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui ʻaki fēfē ʻa e meʻa kuo nau ako he ʻaho ní. Hangē ko ʻení, te nau lava ʻo:

Kole ange ki ha kau mēmipa ʻo e fāmilí pe ngaahi kaungāmeʻa ke vahevahe ʻenau fakamoʻoni ki he lakanga fakataulaʻeikí mo e anga ʻene tāpuekina honau ngaahi fāmilí mo ʻene kaunga ki heʻenau ngaahi fili fakaʻahó.
Feinga ke fakatokangaʻi ha ngaahi sīpinga ʻo e founga ʻoku ngāue ai e mālohi ʻo e lakanga fakataulaʻeikí ʻi heʻenau moʻuí lolotonga ʻa e uiké kotoa.
Fakahaaʻi ʻenau loto houngaʻiá ki he kau maʻu lakanga fakataulaʻeiki kuo nau fai ha tākiekina lelei ʻi heʻenau moʻuí.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke ako? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku felāveʻi mo e lēsoni ʻo e uike hoko maí.