Ko e hā ʻa e ngaahi kī ʻo e lakanga fakataulaʻeikí?

Kuo foaki ʻe he Tamai Hēvaní ʻa e mafai ʻo e ngaahi kī ʻo e lakanga fakataulaʻeikí ki he kau taki lakanga fakataulaʻeikí ke nau tataki ʻaki e fakaʻaongaʻi Hono lakanga fakataulaʻeikí ʻi he māmaní. ʻOku maʻu ʻe Sīsū Kalaisi ʻa e ngaahi kī kotoa ʻo e lakanga fakataulaʻeikí. Naʻe foaki ʻa e “ngaahi kī ʻo e kuonga ko ʻení” ki he Palōfita ko Siosefa Sāmitá, ʻa ia ʻoku fie maʻu ke tataki ʻaki e Siasí (vakai, T&F 110:16). ʻOku maʻu ʻe he kau mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi kī ko ʻení ʻi he ʻahó ni. ʻOku toe foaki foki ʻa e ngaahi kī ʻo e lakanga fakataulaʻeikí ki he Kau Palesitenisī ʻo e Kau Fitungofulú; kau palesiteni ʻo e ngaahi temipalé, misioná, siteikí, mo e vahefonuá; kau pīsopé; kau palesiteni fakakoló; mo e kau palesiteni fakakōlomú—kau ai e kau palesiteni ʻo e ngaahi kōlomu ʻo e Lakanga Taulaʻeiki Faka-ʻĒloné.

Teuteuʻi fakalaumālie koe

Fakakaukau ki he kau taki lakanga fakataulaʻeiki ʻi hoʻo moʻuí. Naʻá ke maʻu fēfē ha fakamoʻoni naʻe uiuiʻi kinautolu ʻe he ʻOtuá? Ko e hā ʻoku mahuʻinga ai ke ke poupouʻi ʻa kinautolu ʻoku nau maʻu e ngaahi kī ʻo e lakanga fakataulaʻeikí?

Ko e hā e meʻa te ke lava ʻo fai ke tokoni ke mahino ki he kau finemuí e mahuʻinga ʻo e ngaahi kī ʻo e lakanga fakataulaʻeikí ʻi he Siasí? Ko e hā ha ngaahi founga kuo faitāpuekina ai e kau finemuí ʻe he ngāue tokoni ʻa kinautolu ʻoku nau maʻu e ngaahi kī ʻo e lakanga fakataulaʻeikí?

Ako ʻi he faʻa lotu e ngaahi folofola mo e maʻuʻanga tokoni ko ʻení. Ko e hā e meʻa ʻe tokoni ke mahino ki he kau finemuí e ngaahi kī ʻo e lakanga fakataulaʻeikí?

Mātiu 16:18–19 (Naʻe talaʻofa kia Pita e ngaahi kī e puleʻanga ʻo e ʻOtuá)

Mōsaia 25:19 (ʻOku fakamafaiʻi ʻe Mōsaia ʻa ʻAlamā ke ne fokotuʻu e Siasí)

T&F 65:2 (ʻOku mahuʻinga e ngaahi kī ʻo e lakanga fakataulaʻeikí ki hono fakamafola ʻo e ongoongoleleí)

T&F 124:123, 142–43 (ʻOku maʻu ʻe he kau palesitení e ngaahi kī ʻo e lakanga fakataulaʻeikí ki hono tokangaʻi e ngāué)

T&F 132:7 (Ko e Palesiteni pē ʻo e Siasí ʻa e tokotaha ʻi he māmaní ʻoku fakamafaiʻi ke ne ngāue kotoa ʻaki e ngaahi kī ʻo e lakanga fakataulaʻeikí)

Gary E. Stevenson, “ ʻOku ʻi Fē ʻa e Ngaahi Kī mo e Mafai ʻo e Lakanga Fakataulaʻeikí?” Ensign pe Liahona, Mē 2016, 29–32

Boyd K. Packer, “Ko e Toko Hongofulu Mā Uá,” Ensign mo e Liahona, Mē 2008, 83–87.

“Ngaahi Kī ʻo e Lakanga Fakataulaʻeikí,” Tuʻu Maʻu ʻi he Tuí (2004) 97–98

Vitiō: “Ko e Ngaahi Kií ko e Mafai ʻo e ʻOtuá”

2:8

Vahevahe ʻo e ngaahi meʻa ne nau aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻuí.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukau pē ʻaʻau ke fakafeʻiloaki ʻaki e lēsoni ʻo e uike ní:

ʻEke ki he kau finemuí, “Ko e hā e ngaahi kī ʻo e lakanga fakataulaʻeikí?” Hili iá pea lau ki he kau finemuí ʻa e palakalafi ʻi he kamataʻanga ʻo e fokotuʻutuʻu ko ʻení, pea fehuʻi kiate kinautolu e ʻuhinga ʻoku tokoni ai e foʻi lea ko e ngaahi kī ke fakamatalaʻi ʻaki e founga hono puleʻi ʻo e lakanga fakataulaʻeikí.
Fakaafeʻi e kau finemuí ke nau fakalaulauloto mo tali e ngaahi fehuʻi hangē ko ʻení: Ko e hā e ngaahi kī ʻo e lakanga fakataulaʻeikí? Ko hai ʻokú ne maʻu e ngaahi kī ʻo e lakanga fakataulaʻeikí ʻi he Siasí? Poupouʻi kinautolu ke nau kumi e talí ʻi he “Ngaahi Kī ʻo e Lakanga Fakataulaʻeikí,” ʻi he Tuʻu Maʻu ʻi he Tuí, 97–98.

Ako fakataha

ʻE tokoni e ngaahi ʻekitivitī takitaha ʻi laló ke mahino ki he kau finemuí e ngaahi kī ʻo e lakanga fakataulaʻeikí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

ʻI heʻene lea “ʻOku ʻi Fē ʻa e Ngaahi Kī mo e Mafai ʻo e Lakanga Fakataulaʻeikí?” Ko e fakafehokotaki ʻe ʻEletā Gary E. Stevenson e ngaahi kī ʻo e lakanga fakataulaʻeikí ki he kī ʻo ha kā. ʻI he lau ʻe he kau finemuí e tala fakatātaá, fakahinohinoʻi kinautolu ke nau fekumi ʻi he tala fakatātaá pe ko e hā e meʻa ʻokú ne fakafofongaʻi e lakanga fakataulaʻeikí, ngaahi kī ʻo e lakanga fakataulaʻeikí pea mo e kau taki ʻo e lakanga fakataulaʻeiki ʻoku nau maʻu e ngaahi kií. Ko e hā ha ngaahi founga ʻoku fokotuʻu mai ʻe ʻEletā Stevenson ʻe malava ai ʻe he kakai kei talavoú ʻo “ʻilo e kií”? Te tau muimui fēfē ki heʻene akonakí? Fakaafeʻi e kau finemuí ke nau fakakaukauʻi ha lēsoni ʻanautolu pē ʻe lava ke nau fakaʻaongaʻi ke fakamatalaʻi ʻaki e ngaahi kī ʻo e lakanga fakataulaʻeikí.
Tohi e ngaahi fakamoʻoni fakafolofola ko ʻení he palakipoé: Mātiu 16:18–19; T&F 124:123, 142–43; T&F 132:7. Fakaafeʻi e kau finemuí ke nau lau e potufolofola takitaha pea tohi ha sētesi ʻe taha ʻokú ne fakamāʻopoʻopo e meʻa ʻoku nau ako mei he ngaahi vēsí ʻo kau ki he ngaahi kī ʻo e lakanga fakataulaʻeikí. Kole ki he finemui takitaha ke ne lau leʻolahi ha taha ʻo ʻene fakamatala fakanounoú, pea kole ki he kau finemui kehé ke nau feinga ke ʻiloʻi e potufolofola ʻokú ne fakanounouʻí. Fehuʻi ki he kau finemuí e ʻuhinga ʻoku mahuʻinga ai kiate kinautolu ke ʻi māmani he ʻahó ni e ngaahi kī ʻo e lakanga fakataulaʻeikí.
Kole ki he kau finemuí ke lau e ʻuluaki palakalafi ʻe tolú pea mo e talanoa kau ki he ʻaʻahi ki ha siasi ʻi Tenimaʻake mei he lea ʻa Palesiteni Boyd K. Packer “Ko e Toko Hongofulu Mā Uá” (pe ko ʻenau mamataʻi e foʻi vitiō “Ko Hono Toe Fakafoki Mai ʻo e Ngaahi Kī ʻo e Lakanga Fakataulaʻeikí”). Fakaafeʻi kinautolu ke nau feakoʻiʻaki e meʻa ʻoku nau ako fekauʻaki mo e ngaahi kī ʻo e lakanga fakataulaʻeikí mei he ngaahi leá ni. Ko e hā e ngaahi tāpuaki kuo nau maʻu ʻo fakafou ʻi he ngāue tokoni ʻa kinautolu ʻoku nau maʻu e ngaahi kī ʻo e lakanga fakataulaʻeikí?

2:8
Fakaafeʻi e finemui takitaha ke ne lau ʻa e konga III ʻo e lea ʻa ʻEletā Dallin H. Oaks “Ko e Ngaahi Kī mo e Mafai ʻo e Lakanga Fakataulaʻeikí” pea hiki ha fakamatala nounou ʻo fakamāʻopoʻopo ʻi he lea pē ʻaʻaná, ʻa e meʻa naʻá ne ako fekauʻaki mo e ngaahi kī ʻo e lakanga fakataulaʻeikí. Tukuange ha taimi ki he kau finemuí ke nau vahevahe e meʻa ʻoku nau hikí pea ʻeke ha faʻahinga fehuʻi pē fekauʻaki mo e ngaahi kī ʻo e lakanga fakataulaʻeikí.

Kole ki he kau finemuí ke nau vahevahe e meʻa naʻa nau ako he ʻaho ní. ʻOku toe mahino lelei ange nai kiate kinautolu e ngaahi kī ʻo e lakanga fakataulaʻeikí? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tokāteline ko ʻení?

Moʻui ʻaki e meʻa ʻoku tau akó

Fakaafeʻi ʻa e kau finemuí ke nau fakakaukauʻi pe te nau moʻui ʻaki fēfē ʻa e meʻa kuo nau ako ʻi he ʻaho ní. Hangē ko ʻení, te nau lava ʻo:

Kumi ha ngaahi founga ʻoku tāpuekina ai kinautolu ʻi he ngāue ʻa kinautolu ʻoku nau maʻu ʻa e ngaahi kī ʻo e lakanga fakataulaʻeikí.
Akoʻi ha mēmipa ʻo e fāmilí ʻi he meʻa naʻa nau ako fekauʻaki mo e ngaahi kī ʻo e lakanga fakataulaʻeikí.

Vahevahe mo e kau finemuí ʻa e meʻa te nau ako ʻi he uike hoko maí. Ko e hā te nau lava ʻo fai ke teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku felāveʻi mo e lēsoni ʻi he uike hoko maí.

Ngaahi ʻEkitivitī Felāveʻi mo e Toʻu Tupú

Palani ha ʻekitivitī Mutuale ʻe lava ʻo tokoni ki he kau finemuí ke fakaʻaongaʻi e meʻa naʻa nau ako ʻi he lēsoni ko ʻení.