Ko e hā hoku ngaahi fatongia ʻi he ngāue ʻo e lakanga fakataulaʻeikí?

Ko e ngāue ʻo e lakanga fakataulaʻeikí ʻoku mahulu hake iaʻi he fatongia ʻataʻatā pē ʻo e kau maʻu lakanga fakataulaʻeikí. Ko e ngāue ia ʻa e ʻOtuá —ʻa e ngāue ko hono tāpuakiʻi mo hakeakiʻi ʻEne fānaú—ʻoku fakahoko ʻe Heʻene fānau tauhi fuakavá. ʻOku mahuʻinga ʻa e kakai fefiné ki hono fakahoko e ngāue ʻo e lakanga fakataulaʻeikí. ʻOku tau tokoni kiate kinautolu ʻoku faingataʻaʻiá, akoʻi ʻa e ongoongoleleí, pea fakaafeʻi ʻa e kakai kotoa pē ke haʻu kia Kalaisi.

Teuteuʻi fakalaumālie koe

ʻOkú ke kau fēfē nai ʻi he ngāue ʻo e lakanga fakataulaʻeikí? Ko e hā ha ngaahi aʻusia te ke lava ʻo vahevahe ʻe tokoni ke mahino ki he kau finemuí honau ngaahi fatongia ʻi he ngāue ʻa e ʻEikí?

ʻOku lau nai ʻe he kau finemui ʻi hoʻo kalasí ko e konga mahuʻinga kinautolu ʻi he ngāue ʻo e lakanga fakataulaʻeikí? Ko e hā ha ngaahi meʻa kuo nau fai ʻi he ngāue ʻa e ʻEikí—ʻi honau ngaahi ʻapí, ʻi he lotú, pea ʻi honau ngaahi kaungāmeʻá—ʻe lava ke nau vahevahe mo e niʻihi kehé?

ʻI hoʻo teuteú, ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā ʻokú ke ongoʻi ʻoku ueʻi koe ke ke vahevahe mo e kau finemuí?

T&F 20:38–60 (Ngaahi fatongia ʻo e kau maʻu lakanga fakataulaʻeikí)

Luke 8:1–3; Ngāue 9:36–40; Loma 16:1–2 (Ngaahi sīpinga ʻo e tauhi ki he niʻihi kehé)

ʻAlamā 56:47–48; 57: 21; T&F 25:6–8; Mōsese 5:11–12 (Ngaahi sīpinga ʻo hono akoʻi ʻo e ongoongoleleí)

Luke 2:36–38; Sione 20:11–18; ʻAlamā 19:16–17 (Ngaahi sīpinga ʻo hono fakaafeʻi ʻo e niʻihi kehé ke nau haʻu kia Kalaisí)

Henry B. Eyring, “Ko e Fakafiemālié,” Ensign pe Liahona, Mē 2015, 17–21

Dallin H. Oaks, “Ko e Ngaahi Kī mo e Mafai ʻo e Lakanga Fakataulaʻeikí,” Ensign pe Liahona, Mē 2014

“Fineʻofá: Ko Hono Toe Fakafoki Mai ʻo ha Sīpinga ʻo e Kuonga Muʻá,” Ngaahi ʻOfefine ʻi Hoku Puleʻangá: Ko e Hisitōlia mo e Ngāue ʻa e Fineʻofá (2011), 3 – 7

Ko e faiako ‘i he founga ‘a e Fakamo‘uí

Naʻe fakaafeʻi ʻe he Fakamoʻuí Hono kau muimuí ke nau fakamoʻoni, pea ʻi heʻenau fai iá ne ongo e Laumālié ki honau lotó. Ko e hā ha ngaahi meʻa kuó ke aʻusia ʻi he lakanga fakataulaʻeikí te ke lava ʻo vahevahe mo e kau finemuí?

Vahevahe ʻo e ngaahi meʻa ne nau aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻuí.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukau pe ʻaʻau ke fakafeʻiloaki ʻaki e lēsoni ‘o e uike ní:

Hiki he palakipoé, “Ko e hā ʻa e ngaahi fatongia ʻo e kau maʻu lakanga fakataulaʻeikí?” Kole ki he kau finemuí ke nau lisi ʻa e lahi taha ʻo e ngaahi fatongia te nau lava ʻo fakakaukau ki aí pea tānaki atu ki heʻenau lisí ʻa e ngaahi meʻa te nau ʻilo ʻi he Tokāteline mo e Ngaahi Fuakava 20:46–60. Fakaafeʻi kinautolu ke nau fakakaukau ko e fē ʻi he ngaahi fatongia ko ʻení ʻoku nau vahevahe mo e kau talavoú.
Lau fakataha ʻe he kalasí ʻa e palakalafi ʻi he kamataʻanga ʻo e fokotuʻutuʻu ko ʻení, pea fakaafeʻi e kau finemuí ke nau hiki ʻi he palakipoé ʻa e ngaahi lea pe kupuʻi lea ʻe tokoni ke mahino kiate kinautolu ko e hā e ngāue ʻo e lakanga fakataulaʻeikí. Ko e hā ha ngaahi meʻa ʻoku nau ako ʻi he Tokāteline mo e Ngaahi Fuakava 20:46 –60 ʻoku felaveʻi ai e kaveinga ʻo e Kau Finemuí mo e ngaahi fatongia ʻo e kau maʻu lakanga fakataulaʻeikí.

Ako fakataha

ʻE tokoni e ngaahi ʻekitivitī takitaha ʻi laló ke ueʻi fakalaumālie ʻa e kau finemuí ke nau kau atu ki he ngāue ʻo e lakanga fakataulaʻeikí. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

ʻOku tau ako ʻi he Tokāteline mo e Ngaahi Fuakava 20:53, mo e 59, ʻoku kau ʻi he ngaahi fatongia ʻo e lakanga fakataulaʻeikí ʻa e kau fakataha mo hono fakamālohia e kāingalotu ʻo e Siasí mo fakaafeʻi e taha kotoa pē ke haʻu kia Kalaisi. Fakaafeʻi e kau finemuí ke nau vakaiʻi e ngaahi konga ʻo e lea ʻa Palesiteni Henelī B. ʻAealingi “Ko e Fakafiemālié.” Ko e hā ʻokú ne akoʻi fekauʻaki mo e founga ʻe lava ke tokoniʻi ai kitautolu ʻe he Laumalie Māʻoniʻoní ke tauhi ʻetau ngaahi fuakavá, pea kau atu ki he ngāue ʻo e lakanga fakataulaʻeikí?
Kimuʻa ʻi he kalasí, fakaafeʻi e kau finemuí ke nau ako kau ki ha fefine ʻoku ʻiloa—ʻi he folofolá (hangē ko e niʻihi ʻoku fokotuʻu atu ʻi he fokotuʻutuʻu ko ʻení), ʻi he hisitōlia ʻo e Siasí, pe ʻi honau ngaahi fāmilí—ʻa ia kuo hoko ko ha faʻifaʻitakiʻanga ʻo e ngāue tokoní, akoʻi ʻo e ongoongoleleí, pe fakaafeʻi ʻo ha niʻihi kehe ke nau haʻu kia Kalaisi. ʻI he kamataʻanga ʻo e kalasí, fakaafeʻi kinautolu ke nau vahevahe e meʻa ne nau akó. Ko e hā ha ngaahi founga naʻe kau ai e kau fafine ko ʻení ʻi he ngāue ʻo e lakanga fakataulaʻeikí? Ko e hā e meʻa ʻi he ngaahi talanoa ní ʻokú ne fakamālohia e kau finemuí? Ko e hā ʻenau fakakaukau ki heʻenau kau atu ʻi he ngāue ʻo e lakanga fakataulaʻeikí?
Lau fakataha ʻe he kalasí, ʻa e “Fineʻofá: Ko Hono Toe Fakafoki Mai ʻo ha Sīpinga ʻo e Kuonga Muʻá.” Fakaafeʻi e kau finemuí ke nau vahevahe ʻenau ngaahi ongo fekauʻaki mo e fatongia ʻo e houʻeiki fafiné ʻi he ngāue ʻo e lakanga fakataulaʻeikí. Kuo fakamālohia fēfē ʻa e kau finemuí he ʻahó ni, ke nau kau atu ʻi he ngāue ko ʻení ʻi heʻenau lau fekauʻaki mo e ngaahi ngāue ne fai ʻe he kau fafiné ʻi he hisitōlia kotoa ʻo e Siasí? Poupouʻi e kau finemuí ke nau lau ʻiate kinautolu pē ʻa e toenga ʻo e Ngaahi ʻOfefine ʻi Hoku Puleʻangá. ʻO ka faingamālie, te ke lava ʻo tufa ange haʻanau ngaahi tatau.
Lau fakataha ʻa e konga IV ʻi he lea ʻa ʻEletā Dallin H. Oaks “Ko e Ngaahi Kī mo e Mafai ʻo e Lakanga Fakataulaʻeikí”, pea kole ki he kau finemuí ke nau vahevahe ʻa e ngaahi fakamatala ʻoku ongo kiate kinautolú. ʻI hano fakangofua ʻe he pīsopé, fakaafeʻi ha fefine ʻi he uōtí ke ne vahevahe mo e kalasí fekauʻaki mo e founga kuo tupulaki ai ʻene malava ke fakahoko hono fatongiá koeʻuhí ko e mafai ʻo e lakanga fakataulaʻeikí. Mahalo te ke fie kole ange ki he fefiné ni ʻi ha ngaahi ʻaho siʻi kimuʻa.
Huluʻi ha taha ʻo e ngaahi foʻi vitiō ʻoku fokotuʻu atu ʻi he lēsoni ko ʻení pea fakaafeʻi ʻa e kau finemuí ke nau fakahā ha ngaahi founga ʻoku kau atu ai ʻa e kakai fefine ʻi he vitioó ki he ngāue ʻo e lakanga fakataulaʻeikí. Ko e hā e founga ʻoku hanga ai ʻe he ngaahi sīpinga ko ʻení mo e akonaki ʻa e kau taki ʻo e Siasí ʻi he ongo vitiō ko ʻení ʻo ueʻi kinautolu ke toe kau kakato ange ai ki he ngaué ni?

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino nai kiate kinautolu ʻa e founga te nau lava ai ʻo kau atu ki he ngāue ʻo e lakanga fakataulaʻeikí? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ‘E ‘aonga nai ke tuku ha taimi lahi ange ʻi he tokāteline ko ‘ení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui ʻaki fēfē ʻa e meʻa kuo nau ako he ʻaho ní. Hangē ko ʻení, te nau lava ʻo:

Faʻu ha palani ke fakahoko honau ngaahi fatongia ʻi he ngāue ʻo e lakanga fakataulaʻeikí.
Vahevahe mo honau ngaahi fāmilí ʻa e meʻa ne nau ako he ʻahó ni fekauʻaki mo e ngāue ʻo e lakanga fakataulaʻeikí.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.