ʻOku ʻuhinga ki he hā ke poupouʻi hoku kau taki faka-Siasí?

‘I heʻetau hoko ko e kāingalotu ʻo e Siasí, ʻoku tau maʻu ʻa e faingamālie ke poupouʻi ʻa kinautolu kuo ui ʻe he ʻEikí. ʻOku tau hiki hotau nimá ke fakahā ʻoku tau poupouʻi e Kau Taki Māʻolunga mo e kau ʻōfisa ʻo e Siasí pea mo e kau taki kotoa ʻi hotau ngaahi uōtí mo e ngaahi siteikí—kau ai ʻa e kau palesitenisī fakakalasi ʻo e Kau Finemuí. Ko hono poupouʻi ʻo e kau takí ʻoku ʻikai ko hono hiki hake pē hotau nimá—ka ʻoku ʻuhinga ia ʻoku tau poupou mei mui, lotua kinautolu, tali ʻa e ngaahi fatongia mo e ngaahi uiuiʻi meiate kinautolú, talangofua ki heʻenau faleʻí, pea fakaʻehiʻehi mei hono fakaangaʻi kinautolú.

Teuteuʻi fakalaumālie koe

Ko e hā hoʻo maʻa ʻoku fai ke poupouʻi e kau taki ʻo e Siasí? Kuo tāpuekina fēfē koe ʻi hoʻo fai iá? Te ke tokoniʻi fēfē e kau finemuí ke ongoʻi e ʻofa ʻokú ke maʻu ko e taki maʻanautolú?

Ko e fē ha taimi kuó ke mamata ai ki he kau finemui ʻi hoʻo kalasí ʻoku nau poupouʻi e kau taki ʻo e Siasí—kau ai e kau palesitenisī ʻo e kalasí? Ko e hā ha ngaahi aʻusia ʻe lava ke nau vahevahe mo e niʻihi kehé?

Ako ʻi he faʻa lotu e ngaahi potufolofola mo e maʻuʻanga tokoni ko ʻení. Ko e hā ha meʻa te ne ueʻi fakalaumālie e kau finemuí ke nau poupouʻi honau kau taki ʻo e Siasí?

ʻEkesōtosi 17:8–12 (ʻOku puke hake ʻe ʻĒlone mo Hua e ongo nima ʻo Mōsesé)

T&F 21:1–6; 124:45–46 (ʻE tāpuekina ʻa kinautolu ʻoku fanongo ki he leʻo o e kau tamaioʻeiki ʻa e ʻEikí)

1 Nīfai 18:8–20; T&F 84:23–25 (Ngaahi sīpinga ʻo e kakai naʻa nau fakafisingaʻi honau kau takí)

1 Ngaahi Tuʻi 17:8–16; 2 Ngaahi Tuʻi 5:1–14 (Ngaahi sīpinga ʻo e kakai naʻa nau muimui ki he faleʻi ʻa e kau tamaioʻeiki ʻa e ʻEikí)

Henery B. Eyring, “Naʻe Ui ʻe he ʻOtuá pea Poupouʻi ʻe he Kakaí,” Ensign pe Liahona, Sune 2012, 4–5

Russell M. Nelson, “Ko Hono Poupouʻi ʻo e Kau Palōfitá,” Ensign pe Liahona, Nōvema 2014, 74–77

Vahevahe ʻo e ngaahi meʻa ne nau aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻuí.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukau pē ʻaʻau ke fakafeʻiloaki ʻaki e lēsoni ‘o e uike ní:

Hiki e taumuʻa ʻo e lēsoní ʻi he palakipoé, pea kole ki he kau finemuí ke nau fakakaukau ki ha ngaahi foʻi lea ʻoku ʻuhinga tatau mo e poupouʻí. Hili iá pea fakaafeʻi kinautolu ke nau hiki he palakipoé ʻa e ngaahi hingoa ʻo e kau taki ʻi he uōtí, kau ai ʻa e kau palesiteni ʻo e Fineʻofá, Kau Finemuí, Palaimelí, mo e ngaahi kalasi ʻo e Kau Finemuí. Ko e hā ʻoku fai ʻe he kau finemuí ke poupouʻi ʻa e kakai ko ʻení?
Kole ki he kau finemuí ke nau lau fakafoʻituitui e ʻEkesōtosi 17:8–12, pea fakaafeʻi ha tokotaha ke ne fakamatalaʻi fakanounou e talanoá ʻi he lea pē ʻaʻana. ʻOku fekauʻaki fēfē e talanoa ko ʻení mo kitautolu ʻi heʻetau poupouʻi e kau taki ʻo e Siasí? ʻOku tau tatau fēfē mo ʻĒlone mo Hua ʻi he taimi ʻoku tau poupouʻi ai ʻetau kau palesitenisī fakakalasí mo e kau taki kehé?

Ako fakataha

ʻE tokoni e ngaahi ʻekitivitī takitaha ʻi laló ke mahino ki he kau finemuí ʻa e ʻuhinga ke poupouʻi e kau taki ʻo e Siasí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

Kimuʻa he kalasí, fakaafeʻi e kau finemuí ke lau e lea ʻa Palesiteni Russell M. Nelson “Ko Hono Poupouʻi ʻo e Kau Palōfitá” pea haʻu mateuteu ke vahevahe ha meʻa mei he leá ni ʻokú ne ueʻi kinautolu ke nau poupouʻi ʻa Palesiteni Tōmasi S. Monisoní.
Vahevahe fakakulupu e kalasí pea vahe ki he kulupu takitaha ha konga e lea ʻa Palesiteni Sēmisi E. Fausi “Called and Chosen” pe Tokāteline mo e Ngaahi Fuakava 124:45–46. Kole ke nau kumi e ngaahi tāpuaki naʻe talaʻofa maʻanautolu ʻoku nau poupouʻi honau kau takí mo e fakatokanga kiate kinautolu ʻoku ʻikai poupoú. Fakaafeʻi ke nau vahevahe e meʻa ʻoku nau ʻiló. Kapau te nau vakaiʻi ʻa e leá, kole ange ke nau vahevahe ʻa e ngaahi talanoa mei he leá ʻokú ne fakahaaʻi ʻa e ngaahi tāpuaki mo e ngaahi fakatokanga ko ʻení.
Fakaafeʻi ha niʻihi ʻo e kau finemuí ke nau kumi ha sīpinga ʻo ha kakai ʻi he folofolá naʻe ʻikai ke nau tali honau kau takí, hangē ko Leimana mo Lemiuela (vakai, 1 Nīfai 18:9–14), pea mo e fānau ʻo ʻIsilelí (vakai, T&F 84:23–25). Kole ki he toenga ʻo e kau finemuí ke nau kumi ha ngaahi sīpinga ʻo e kakai naʻe muimui ʻi he kau tamaioʻeiki ʻa e ʻEikí, hangē ko e fefine uitou ʻo Salifatí (vakai ki he Ngaahi Tuʻi 17:8–16) mo Neamani (vakai, 2 Ngaahi Tuʻi 5:8–14). Kole ange ke vahevahe ʻenau ngaahi talanoá pea fakamatalaʻi ʻa e meʻa ʻoku nau akoʻi kau ki he ngaahi ola ʻo hono fakasītuʻaʻi pe fakaʻapaʻapaʻi e kau taki ʻo e Siasí.
Fakaafeʻi ʻa e kau finemuí ke nau lau ʻa e fakamatala ʻa Palesiteni Henelī B. ʻAealingi “Naʻe Ui ʻe he ʻOtuá pea Poupouʻi ʻe he Kakaí,” ʻo kumi ha sīpinga ʻo e ngaahi founga ke tau poupouʻi ai hotau kau taki ʻo e Siasí. ʻOmi ha tatau ʻo e ngaahi makasini ʻa e Siasí, pea kole ki he kau finemuí ke nau kumi pea mo vahevahe ha ngaahi fakatātā ʻi he ngaahi makasiní ʻoku nau fakafofongaʻi e ngaahi founga ke poupouʻi ai e kau taki ʻo e Siasí. Ko e hā ʻe lava ke lea ʻaki ʻe he kau finemuí ʻi haʻanau fanongo ki hano fakaangaʻi ʻe ha taha honau kau takí? Ko e hā ʻoku nau fai ke poupouʻi honau kau takí, kau ai ʻa honau kau palesitenisī ʻo e kalasí? Fakaafeʻi e palesiteni ʻo e kalasí ke vahevahe ʻene ngaahi ongo kau ki hono uiuiʻí pea mo e kau finemui ʻokú ne tokoniʻí.

Kole ki he kau finemuí ke nau vahevahe ʻa e meʻa naʻa nau ako ʻi he ʻaho ní. ʻOku mahino nai kiate kinautolu e ʻuhinga ʻo hono poupouʻi e kau taki ʻo e Siasí? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui ʻaki fēfē nai ʻa e meʻa kuo nau ako he ʻaho ní. Hangē ko ʻení, te nau lava ʻo:

Lotu maʻá e kau taki ʻo e Siasí.
Fakahaaʻi ʻenau houngaʻiá ki ha taki ʻo e Siasí ʻokú ne fakahoko ʻosikiavelenga hono uiuiʻí.

Vahevahe mo e kau finemuí ʻa e meʻa te nau ako ki ai ʻi he uike ka hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.