O le a le uiga o le ola tutoatasi?

A tatou ola tutoatasi, ua tatou faaaogaina faamanuiaga ma malosiaga ua tuuina mai e le Atua ia i tatou e tausia ai i tatou lava ma o tatou aiga ma maua ai fofo i o tatou lava faafitauli.A tatou ola tutoatasi, ua mafai foi ona tatou auauna atu ma tausia isi. E finagalo le Alii ia tatou maua uma le ola tutoatasi faaleagaga ma le faaletino.

Saunia oe lava ia faaleagaga

Na faapefea ona e faaaogaina faamanuiaga ma malosiaga ua tuuina mai e le Atua ia te oe e tausia ai oe lava ia ma lou aiga? Na faapefea e le ola tutoatasi ona faatagaina oe e faamanuia isi? O a isi faamanuiaga o le ola tutoatasi ua e aafia ai?

Aisea e taua ai mo tamaitai talavou ona ola tutoatasi? O le a faapefea ona fesoasoani le ola tutoatasi ia i latou e onosaia ai taimi faigata? O le a faapefea ona ia faamanuiaina o latou aiga i le lumanai?

O a mau ma isi punaoa o le a fesoasoan i tamaitai talavou e malamalama ai i le uiga o le ola tutoatasi?

Mataio 25:1–13 (O le faataoto i taupou e toasefulu)

Mataio 25:14–29 (Faataoto i taleni)

2 Tesalonia 3:10–13; Kalatia 6:3–5 (Taua o le galue ma le ola tutoatasi)

MF&F 58:26–28 (Ua pule i tatou ia i tatou lava)

MF&F 88:118 (Saili le aoaoina e ala i le suesue ma le faatuatua)

MF&F 89:18–20 (O folafolaga ia i latou o e usiusitai i le Upu o le Poto)

MF&F 104:78 (Totogi aitalafu)

Henry B. Eyring, “Sauniuniga Faaleagaga: Ia Vave Amata ma Ia Tumau Ai,” Ensign po o le Liahona, Nov. 2005, 37–40

“Galue ma le Faalagolago o le Tagata ia te Ia Lava,” Mo Le Malosi o le Autalavou (2011), 40–41

“Avea ma se Tagata Ola Faalagolago ia te oe lava,”Faamaoni i le Faatuatua (2004), 196–97

“Ola Faalagolago o le Tagata ia te ia Lava,” Tusitaulima 2: Taitaiina o le Ekalesia (2010), 6.1.1

“ Faalagolago o le Tagata ia Te Ia Lava i La Le Tino, ” O Afafine i Lo’u Malo: O Le Talafaasolopito ma le Galuega a le Aualofa (2011), 55–61

Robert D. Hales, “Fetaiai ma Luitau o le Lalolagi i Lenei Vaitaimi,” Ensign po o le Liahona, Nov. 2015, 44–47

Aoao atu i le ala a le Faaola

Na faatuatuaina e le Faaola Ona soo. Na ia saunia i latou ma tuuina atu ia i latou tiutetauave taua e aoao atu ai, faamanuia, ma auauna atu ai i isi. E mafai faapefea ona e uunaia tamaitai talavou i lau vasega ia faamanuiaina i latou o loo siomia i latou e ala atu i a latou aoaoga ma auaunaga?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Faasoa i tamaitai talavou le uiga o le ola tutoatasi o loo tuuina mai i le amataga o lenei otootoga. Fai i tamaitai talavou e faitau MF&F 58:26–28, ma fai atu fesili nei: O le a le uiga o le “pule ai ia te i [tatou] lava”? E mafai faapefea ona avea i tatou ma e sili atu ona “auai ma le naunautai i se faamoemoega lelei”? O le a le mea ua aoao mai e nei fuaiupu ia i tatou e uiga i le ola tutoatasi? Talanoaina tali faatasi o se vasega.
Tusi le upu “Ola Faalagolago” i le itu tauagavale o le laupapa ma le upu “Ola Tutoatasi” i le itu taumatau. Fai i tamaitai talavou e faamatala mai uiga o upu uma e lua (afai latou te manaomia se fesoasoani, faasino i latou i itulau 195–97 o Faamaoni i le Faatuatua). Fai ia i latou e fai se lisi o auala latou te faalagolago ai i isi ma auala latou te ola tutoatasi ai. Aisea e finagalo ai le Alii ia tatou faatupulaia i le ola tutoatasi?

Aoao faatasi

O gaoioiga taitasi nei o le a fesoasoani i tamaitai talavou ina ia malamalama i le uiga o le ola tutoatasi. I le mulimuli ai i le uunaiga a le Agaga, filifili se tasi pe sili atu e aoga mo lau vasega:

Vaevae tamaitai talavou i ni vaega ma atofa atu i vaega taitasi se tasi o vaega nei o le ola tutoatasi: aoga, tupe, fegalegaleaiga, ma le malosi faaleagaga. Valaaulia vaega taitasi e iloilo ia vaega o le saunoaga a Elder Robert D. Hales “Fetaiai ma Luitau o le Lalolagi i Lenei Vaitaimi” lea e talanoaina ai ia autu nei. Valaaulia tamaitai talavou e faasoa mai mea sa latou aoaoina ma se mea o le a latou faia ia ola tutoatasi atili ai i se tasi o nei eria.
Tusi i ni fasi pepa eseese autu nei e fesootai i le ola tutoatasi: soifua maloloina, aoaoga, galuega, teuina o taumafa a le aiga, tupe, ma malosi faaleagaga. Faataga tamaitai talavou taitasi e filifili se tasi e fiafia i ai, ma valaaulia o ia e faitau e uiga i lana autu i se kopi o vaega 6.1.1 o Tusitaulima 2 (itulau 34–35). Fai i tamaitai talavou e aoao faapuupuu le vasega i mea na ia aoaoina e uiga i lana autu, pe faapefea ona fesootai i le ola tutoatasi, ma le mea e mafai ona ia faia nei e saunia ai ina ia tutoatasi i lena vaega. E mafai faapefea e taumafaiga a tamaitai talavou i o latou olaga talavou ona faamanuiaina o latou lava lumanai? E mafai faapefea e nei taumafaiga ona faamanuiaina o latou aiga pe afai e avea i latou ma ni ava ma ni tina?
Valaaulia tamaitai talavou taitasi e faitau se tasi o tala i O Afafine i Lou Malo (itulau 55–61) e uiga i tamaitai o e na ola tutoatasi i le talafaasolopito o le popofou o le Ekalesia. Fai i tamaitai talavou e toe faamatala a latou tala i a latou lava upu ma faasoa mai mea na latou aoaoina e uiga i le ola tutoatasi. O a mea e mafai e tamaitai talavou ona fai ina ia mulimuli ai i nei faataitaiga a o i ai i latou i lo latou talavou?
Vaevae ia tamaitai talavou ia tofu paga. Tofi paga taitasi i se mau e uiga i le ola tutoatasi, e pei o na o loo i lenei otootoga. Valaaulia paga ia faitau a la fuaitau o mau ona fatu lea o se Savali Faamamona e uiga i le ola tutoatasi. Atonu e te manao e faaali atu se faataitaiga o se Savali Faamamona mai le New Era po o le Liahona. Tuu atu i tamaitai talavou le avanoa e faasoa mai ai a latou Savali Faamamona i le vasega. Fautuaina i latou e faapipii Savali Faamamona i se mea i le fale e faamanatu ai ia i latou se mea na latou aoaoina.
Tuu atu i tamaitai talavou taitasi po o le lima ni tupe siliva, pe lua tupe siliva, po o le tasi le tupe siliva. Tuu atu ia i latou e faitau le Mataio 25:14–29 e saili ai le mea na tupu i le tagata i le faataoto lea na tuuina atu i ai le aofai lava lea na tuuina atu ia i latou. Talanoaina fesili e pei “O a mea a auauna e toatolu na fai i tupe na tuuina atu ia i latou?” ma “E faapefea ona fesootai lenei faataoto i le ola tutoatasi?” Valaaulia tamaitai talavou e mafaufau loloto i mea ua tuuina mai e le Atua ia i latou o le a fesoasoani ia i latou ina ia ola tutoatasi, e pei o taleni, uiga faaletagata, ma malosiaga. E mafai faapefea ona latou faaaogaina nei uiga ina ia ola tutoatasi ai? E mafai faapefea ona latou faaaogaina na uiga e faamanuia ai o latou aiga i le lumanai?
Fai i tamaitai talavou pe o a mea e fai e i latou ma o latou aiga e saunia ai mo se mala faalenatura (e pei o se mafuie po o se afa). Faitau faatasi o se vasega, palakalafa muamua e tolu o le lauga a Peresitene Henry B. Eyring “ Sauniuniga Faaleagaga: Ia Vave Amata ma Ia Tumau Ai .” O a nisi o “mala faaleagaga” po o tofotofoga atonu tatou te feagai? O le a se mea e mafai ona tatou faia e saunia ai faaleagaga? Tuu atu i tamaitai talavou taitasi se vaega o le vaega o totoe o le lauga a Peresitene Eyring, ma fai atu ia i latou e vaai mo ni tali i nei fesili. Valaaulia i latou e faasoa mai mea na latou maua.

Fai i tamaitai talavou e faasoa mai mea sa latou aoaoina i le aso. Pe ua lava lo latou malamalama i le ola tutoatasi e faamatala atu ai i se tasi? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Tautino atu e fai se mea se tasi i lenei vaiaso ia sili atu ai le ola tutoatasi ma faasoa mai o latou aafiaga i le vasega i le vaiaso a sau.
Faatumu se tasi po o le sili atu o vaega nei mai le Alualu i Luma o le Tagata Lava Ia: galuega faatino o le tulaga faatauaina o le Amio Atua 1 po o le 4, O mea faatonuina po o galuega faatino o le tulaga faatauaina o le Poto, o mea faatonuina mo le tulaga faatauaina o le Filifiliga ma le Tali Atu mo A’u Lava 1 po o le 7

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.