ʻOku ʻuhinga ki he hā ʻa e moʻui fakafalala pē kiate kitá?

ʻI he taimi ʻoku tau moʻui fakafalala ai pē kiate kitautolú, ʻoku tau ngāue ʻaki e ngaahi tāpuaki mo e lavameʻa ʻoku ʻomi ʻe he ʻOtuá maʻatautolú ke tokangaʻi ʻaki kitautolu mo hotau fāmilípea maʻu mo e ngaahi tali ki heʻetau palopalemá. ʻI heʻetau lava ʻo moʻui fakafalala pē kiate kitautolú, ʻoku tau lava lelei ange ai ʻo tokoniʻi mo tokangaʻi e niʻihi kehé. ʻOku finangalo e ʻEikí ke tau fakatou moʻui fakafalala fakalaumālie mo fakatuʻasino pē kiate kitautolu.

Teuteuʻi fakalaumālie koe

Ko e hā ha founga kuó ke fakaʻaongaʻi ai e ngaahi tāpuaki mo e meʻa ʻokú ke malava ne foaki atu ʻe he ʻOtuá ke tokangaʻi ʻaki koe mo ho fāmilí? Ko e hā ha founga kuo tāpuekina ai koe mo e niʻihi kehé ʻe he moʻui fakafalala pē kiate kitá? Ko e hā ha ngaahi tāpuaki kehe kuó ke aʻusia ʻi he moʻui fakafalala pē kiate kitá?

Ko e hā ʻoku mahuʻinga ai ki he kau finemuí ke nau moʻui fakafalala pē kiate kinautolú? Ko e hā ha founga ʻe tokoniʻi ai kinautolu ʻe he moʻui fakafalala pē kiate kinautolú ʻi he ngaahi taimi ʻo e faingataʻá? Ko e hā ha founga te ne tāpuekina ai honau ngaahi fāmili ʻi he kahaʻú?

Ko e hā ha ngaahi potufolofola mo ha maʻuʻanga tokoni kehe ʻe tokoni ke mahino ki he kau finemuí ʻa e ʻuhinga ʻo e moʻui fakafalala pē kiate kinautolú?

Mātiu 25:1–13 (Ko e talanoa fakatātā ʻo e kau taupoʻou ʻe toko hongofulú)

Mātiu 25:14–29 (Talanoa fakatātā ʻo e ngaahi talēnití)

2 Tesalonika 3:10–13; Kalētia 6:3–5 (Mahuʻinga ʻo e ngāué mo e moʻui fakafalala pē kiate kitá)

T&F 58:26–28 (ʻOku tau hoko ko e kau fakafofonga pē kiate kitautolu)

T&F 88:118 (Fekumi ki he ʻiló ʻi he ako pea ʻi he tui)

T&F 89:18–20 (Ngaahi talaʻofa kiate kinautolu ʻoku talangofua ki he Lea ʻo e Potó)

T&F 104:78 (Totongi e ngaahi moʻuá)

“Ngāué mo e Moʻui Fakafalala pē Kiate Kitá,” Ki Hono Fakamālohia ʻo e Toʻu Tupú (2011), 40–41

“Hoko ʻo Moʻui Fakafalala pē Kiate Kita,” Tuʻu Maʻu ʻi he Tuí (2004), 198–99

“Moʻui Fakafalala pē Kiate Kitá,” Tohi Tuʻutuʻuni Fika 2: Ko Hono Puleʻi ʻo e Siasí (2010), 6.1.1

“Moʻui Fakafalala Fakatuʻasino Kiate Kitá,” Ngaahi ʻOfefine ʻi Hoku Puleʻangá: Ko e Hisitōlia mo e Ngāue ʻa e Fineʻofá (2011), 59–65

Robert D. Hales, “Ko e Fehangahangai mo e Faingataʻa
ʻo e Māmaní he ʻAho Ní,” Ensign or Liahona, Nov. 2015, 44–47

Ko e faiako ʻi he founga ʻa e Fakamoʻuí

Naʻe falala ʻa e Fakamoʻuí ki Heʻene kau ākongá. Naʻá Ne teuteuʻi mo ʻoange kiate kinautolu ha ngaahi fatongia mahuʻinga ke nau akoʻi, tāpuakiʻi, mo tokoniʻi ʻa e niʻihi kehé. Ko e hā ha founga te ke poupouʻi ai e kau finemui ʻi hoʻo kalasí ke nau tāpuekina kinautolu ʻoku nau feohí ʻi heʻenau faiakó mo e tokoní?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko haʻo fakakaukau pē ʻaʻau ke fakafeʻiloaki ʻaki e lēsoni ʻo e uike ní:

Vahevahe mo e kau finemuí ʻa e ʻuhinga ʻo e moʻui fakafalala pē kiate kitá ʻoku hā ʻi he kamataʻanga ʻo e fokotuʻutuʻu ko ʻení.Kole ki he kau finemuí ke nau lau e T&F 58:26–28, pea fai e ngaahi fehuʻi ko ʻení: Ko e hā hono ʻuhinga ʻo e “fili tauʻatāina [ʻatautolu peé]”? Ko e hā ha founga te tau lava ai ʻo “femoʻuekina ʻi he holi lahi ki ha ngāue lelei”? Ko e hā e meʻa ʻoku akoʻi mai ʻe he ngaahi veesi ko ʻení kau ki he moʻui fakafalala pē kiate kitá? Aleaʻi ʻe he kalasí e talí.
Hiki e foʻi lea ko e “Fakafalala” he tafaʻaki toʻohema ʻo e palakipoé pea mo e foʻi lea ko e “Moʻui fakafalala pē kiate kitá” ʻi he tafaʻaki toʻomataʻú. Kole ki he kau finemuí ke nau fakaʻuhingaʻi e ongo foʻi leá fakatouʻosi (kapau te nau fie maʻu ha tokoni, ʻai ke nau sio ki he peesi 198–99 ʻo e Tuʻu Maʻu ʻi he Tuí). Kole ke nau hiki e ngaahi founga ʻoku nau fakafalala ai ki he niʻihi kehé mo e founga ʻoku nau moʻui fakafalala ai pē kiate kinautolú. Ko e hā ʻoku finangalo ai e ʻEikí ke tau tupulaki ʻo moʻui fakafalala pē kiate kitautolú?

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he kau finemuí ʻa e ʻuhinga ʻo e moʻui fakafalala pē kiate kinautolú. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

Vahevahe ʻa e kau finemuí ki ha ngaahi kulupu pea vahe ki he kulupu takitaha ʻa e taha ʻo e ngaahi tafaʻaki ʻo e fakafalala kiate kitá: akó, ngaahi meʻa fakapaʻangá, ngaahi vā fetuʻutakí, pea mo e mālohi fakalaumālié. Fakaafeʻi ʻa e kulupu takitaha ke toe vakaiʻi ʻa e ngaahi konga lea ʻa ʻEletā Robert D. Hales “Ko e Fehangahangai mo e Faingataʻa
ʻo e Māmaní he ʻAho Ní” ʻoku ne fakahoko mai ʻa e ngaahi taumuʻá ni. Fakaafeʻi ʻa e kau finemuí ke nau vahevahe ʻa e meʻa naʻa nau akó pea mo ha meʻa te nau fai ke nau hoko ʻo falala ai kiate kinautolu pē ʻi he taha ʻ o e ngaahi ʻēliá ni.
Hiki ʻi ha ngaahi laʻipepa kehekehe e ngaahi tefito ko ʻeni ʻoku fekauʻaki mo e moʻui fakafalala pē kiate kitá: moʻui leleí, akó, ngāueʻangá, fakatolonga meʻakai ʻi ʻapí, meʻa fakapaʻangá, mo emālohinga fakalaumālié. Fakangofua e finemui takitaha ke ne fili ha taha ʻo e tefito ʻokú ne saiʻia aí, pea fakaafeʻi ia ke ne lau ʻo kau ki heʻene tefitó ʻi ha tatau ʻo e konga 6.1.1 ʻo e Tohi Tuʻutuʻuni Fika 2 (peesi 40–41). Kole ki he finemui takitaha ke ne akoʻi nounou ki he kalasí e meʻa naʻá ne ako kau ki heʻene tefitó, founga ʻoku fekauʻaki ai mo e moʻui fakafalala pē kiate kitá, mo e meʻa te ne lava ʻo fai he taimí ni ke ne teuteu ai ke moʻui fakafalala pē kiate ia ʻi he konga ko ia ʻo ʻene moʻuí. Ko e hā ha founga ʻe lava ke tāpuekina ai ʻe he ngaahi ngāue ʻa e kau finemuí ʻi heʻenau kei talavoú honau kahaʻú? Ko e hā ha founga ʻoku lava ai ʻe he ngaahi ngāue ko ʻení ʻo tāpuekina honau fāmilí ʻi he taimi te nau hoko ai ko ha ngaahi uaifi mo ha faʻeé?
Fakaafeʻi e finemui takitaha ke ne lau ha taha ʻo e ngaahi talanoa ʻi he Ngaahi ʻOfefine ʻi Hoku Puleʻangá (peesi 59–65) kau ki he kakai fefine he kamataʻanga e hisitōlia ʻo e Siasí ne nau moʻui fakafalala pē kiate kinautolú. Kole ki he kau finemuí ke nau toe talanoaʻi ʻenau ngaahi talanoá ʻi he lea pē ʻanautolu pea vahevahe e meʻa ʻoku nau ako kau ki he moʻui fakafalala pē kiate kinautolú. Ko e hā ha meʻa ʻe lava ke fai ʻe he kau finemuí ke nau muimui ai he ngaahi sīpinga ko ʻení ʻi heʻenau kei talavoú?
Vahevahe e kau finemuí ke tautau toko ua. Vahe ki he hoa takitaha ha potufolofola kau ki he moʻui fakafalala pē kiate kitá, hangē ko ia ʻoku hā atu he fokotuʻutuʻu ko ʻení. Fakaafeʻi e ngaahi hoá ke nau lau ʻenau kupuʻi folofolá pea faʻu ha pōpoaki faka-Māmonga kau ki he moʻui fakafalala pē kiate kitá. Mahalo te ke loto ke fakaʻaliʻali ange ha sīpinga ʻo ha Pōpoaki Faka-Māmonga mei he New Era pe Liahoná. ʻOange ha faingamālie ki he kau finemuí ke nau vahevahe ʻenau pōpoaki faka-Māmongá ki he kalasí. Poupouʻi ke nau fakapipiki ʻenau pōpoaki faka-Māmongá ʻi ha feituʻu ʻi ʻapi ke ne fakamanatu kiate kinautolu e meʻa ne nau akó.
ʻOange ki he finemui takitaha ha paʻanga maka ʻe nima, paʻanga maka ʻe ua, pe paʻanga maka ʻe taha. ʻAi ke nau lau e Mātiu 25:14–29 ke nau ʻilo e meʻa naʻe hoko ki he tokotaha he talanoa fakatātaá naʻe ʻoange ki ai e paʻanga lahi tatau mo ia naʻe ʻoange kiate kinautolú. Aleaʻi e fehuʻi hangē “Ko e hā e meʻa naʻe fai ʻe he kau tamaioʻeiki ʻe toko tolú ki he paʻanga naʻe ʻoange kiate kinautolú?” mo e “Ko e hā ha founga ʻoku fekauʻaki ai e talanoa fakatātā ko ʻení mo e moʻui fakafalala pē kiate kitá?” Fakaafeʻi e kau finemuí ke nau fakalaulauloto ki he ngaahi meʻa kuo foaki ange ʻe he ʻOtuá maʻanautolú ʻe tokoniʻi ai kinautolu ke nau moʻui fakafalala pē kiate kinautolu, hangē ko e ngaahi talēnití, ʻulungaanga fakatāutahá, mo e ngaahi meʻa ʻoku nau malavá. Ko e hā ha founga te nau fakaʻaongaʻi ai e ngaahi ʻulungaanga ko ʻení ke nau moʻui fakafalala lahi ange ai kiate kinautolú? Ko e hā ha founga te nau lava ke ngāue ʻaki kinautolu ke tāpuekina ai honau fāmili he kahaʻú?

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku feʻunga nai e mahino ʻoku nau maʻu ki he moʻui fakafalala pē kiate kitá ke nau fakamatalaʻi ia ki ha taha kehe? Ko e hā haʻanau ngaahi ongo pe fakakaukau?ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau ki he founga te nau moʻui ʻaki ai e meʻa kuo nau ako he ʻaho ní. Hangē ko ʻení, ʻe lava ke nau:

Tukupā ke fakahoko ha meʻa ʻe taha ʻi he uiké ni ke nau toe falala lahi ange pē kiate kinautolu pea vahevahe ʻenau ngaahi aʻusiá ʻi he kalasi ʻo e uike hoko maí.
Fakakakato ha meʻa ʻe taha pe lahi ange ʻi he meʻá ni mei he Fakalakalaka Fakatāutahá: ngāue ke fakahoko ki he tuʻunga ʻulungaanga mahuʻingá fika 1 pe 4 ʻi he Natula Faka-ʻOtuá, ngaahi meʻa ʻoku fie maʻu ke aʻusia pe ngaahi ngāue ki he tuʻunga ʻulungaanga mahuʻinga Ko e ʻIló, meʻa ʻoku fie maʻu ke aʻusia fika 1 pe 7 ʻi he tuʻunga ʻulungaanga mahuʻinga ko e Tauʻatāina ke Filí mo e ʻEkeʻi Meiate Kita ʻa e Meʻa ʻOkú te Fai pe Taʻe Faí

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.