Moʻui Fakafalala Fakalaumālie mo Fakatuʻasino pē Kiate Kita

“He ʻoku ʻiate kinautolu ʻa e mālohi, ʻa ia ʻoku nau hoko ai ko e niʻihi ke fili maʻanautolu” (Tokāteline mo e Ngaahi Fuakava 58:28).

ʻE tokoni ʻa e ngaahi fokotuʻutuʻu ʻi he ʻiuniti ko ʻení ke mahino ki he kau finemuí ʻa e mahuʻinga ʻo e moʻui fakafalala fakalaumālie mo fakatuʻasino pē kiate kitá. Neongo ʻoku nau kei ʻi he toʻu tupú, ka kuo tāpuekina e kau finemui ko ʻení ʻaki e meʻa foaki ʻo e tauʻatāina ke filí, pea ʻoku nau ako e founga hono fokotuʻu honau ngaahi halá pea kumi ke ʻilo e ngaahi tali ki heʻenau ngaahi palopalemá ʻi he ongoongolelei ʻa Sīsū Kalaisí. Ko e lahi ange ʻenau moʻui fakafalala pe kiate kinautolú, ko e lahi ange ia ʻenau moʻui tauʻatāiná. Te nau toe mateuteu lelei ange ke tokoni ki he ʻEikí, fakamālohia honau ngaahi fāmilí, pea fakahoko honau ngaahi ngafa ʻi he kahaʻú ko e uaifi mo e faʻē.

Ngaahi Fokotuʻutuʻu ke Fili mei ai ʻi he Mahiná Ni

• ʻOku ʻuhinga ki he hā ke moʻui fakafalala pē kiate kita?

• Te u ʻilo fēfē pe ʻoku ou ului?

• Ko e hā ʻoku mahuʻinga ai ke u ako mo fakatupulaki e ngaahi pōtoʻi ngāue?

• Ko e hā ʻoku hoko ai e ngāué ko ha tefitoʻi moʻoni mahuʻinga ʻo e ongoongoleleí?

• Ko e hā ʻoku finangalo ai e ʻEikí ke u moʻuileleí?

• Ko e hā e founga ʻa e ʻEikí ki hono tokangaʻi ʻo e paeá mo e masivá?

• Te u maʻu fēfē ha tali ki hoku ngaahi faingataʻaʻiá mo e palopalemá?

Mutualé

Fakakaukau ki he founga te ke lava ʻo palani ai e ngaahi ʻekitivitī ʻoku fehokotaki mo e meʻa ʻoku ako ʻe he toʻu tupú. ʻOku ʻi ai ha saiti ki he Ngaahi ʻEkitivitī ʻa e Toʻu Tupú ke tokoni atu kiate koe. ʻE lava ke fakaʻaongaʻi e lahi taha ʻo e ngaahi ʻekitivitī ako ʻi he ngaahi fokotuʻutuʻu ko ʻení ko ha ngaahi ʻekitivitī lelei ʻo e Mutualé. Ngāue fakataha mo e kau palesitenisī fakakalasí ke fili mo palani ha ngaahi ʻekitivitī feʻunga ʻoku nau fakamālohia e meʻa ʻoku ako ʻe he kau finemuí ʻi he Sāpaté.

Fakalakalaka Fakatāutahá

ʻOku fekauʻaki ʻa e ngaahi ʻekitivitī ko ʻeni mei he Fakalakalaka Fakatāutahá mo e ngaahi lēsoni ʻi he ʻiuniti ko ʻení:

• Ngaahi ngāue ʻi he tuʻunga ʻulungaanga mahuʻinga ʻo e Natula faka-ʻOtuá 1 mo e 4

• Aʻusia ʻi he tuʻunga ʻulungaanga ʻo e Mahuʻinga Fakatāutahá 4, ngaahi ngāue ʻo e tuʻunga ʻulungaanga mahuʻinga 3 mo e 5

• Ngaahi aʻusia ʻi he tuʻunga ʻulungaanga mahuʻinga ʻo e ʻIló pe ngaahi ngāue ʻo e tuʻunga ʻulungaanga mahuʻingá

• Ngaahi aʻusia ʻi he tuʻunga ʻulungaanga mahuʻinga ʻo e Tauʻatāina ke Filí mo ʻEkeʻi Meiate Kita ʻa e Meʻa ʻokú Te Fai pe Taʻefai 1 mo e 7, ngāue ʻo e tuʻunga ʻulungaanga mahuʻingá 5

• Aʻusia ʻi he tuʻunga ʻulungaanga mahuʻinga ʻo e Ngaahi Ngāue Leleí 6

Ki Hono Fakamālohia ʻo e Toʻu Tupú

ʻOku fekauʻaki ʻa e ngaahi tuʻunga ʻulungaanga ko ʻeni mei he Ki Hono Fakamālohia ʻo e Toʻu Tupú mo e ngaahi lēsoni ʻi he ʻiuniti ko ʻení:

• Akó

• Vahehongofulú mo e Ngaahi Foakí

• Ngāué mo e Moʻui Fakafalala Pē Kiate Kitá