Ko e hā ʻoku mahuʻinga ai ke u ako mo fakatupulaki ha ngaahi taukei fakangāué?

Ko ha konga mahuʻinga ʻa e ako ki he palani ʻetau Tamai Hēvaní ke tokoniʻi kitautolu ke tau hangē lahi ange ai ko Iá. ʻOku ʻomi ʻe he akó ha mahino mo ha taukei fakangāue te ne lava ʻo tokoniʻi kitautolu ke tau moʻui fakafalala pē kiate kitautolu. ʻOku toe teuteuʻi kitautolu ʻe he akó ki ha ngāue tokoni lahi ange ʻi hotau fāmilí, Siasí, pea mo e māmaní.

Teuteuʻi fakalaumālie koe

Ko e hā ha founga kuo tokoniʻi ai koe ʻe hoʻo akó ke ke mateuteu ki he ngaahi meʻa te ke aʻusia ʻi he moʻuí? Ko e hā ha founga kuó ne tokoniʻi koe ke ke moʻui fakafalala lahi ange ai kiate koé?

Ko e hā ʻoku mahuʻinga ai ke ako e kau finemuí? ʻOku fēfē ʻenau ongo kau ki he akó? Ko e hā ha founga ʻe tokoni ai ki he kau finemuí hono fakatupulaki ʻo e akó mo e potoʻi ngāué ki honau ngaahi ngafa ʻi he kahaʻú?

Ko e hā ha ngaahi potufolofola mo ha lea te ne tokoniʻi ke mahino ki he kau finemuí e mahuʻinga ʻo e akó?

Lea Fakatātā 4:7; 2 Nīfai 9:29; T&F 88:76–80, 118; 90:15; 93:36; 130:18–19 (ʻOku totonu ke tau fekumi ki he potó mo e ʻiló)

Lea Fakatātā 31:10–31 (ʻOku fekumi e fefine angamaʻá ki he potó mo e taukei fakangāué ke tokangaʻi ʻaki hono ʻapí mo e fāmilí)

Siosefa Sāmita—Hisitōlia 1:11–17; 1 Nīfai 11:1–6; T&F 138:1–11 (Ko e ngaahi sīpinga ʻo e kakai ʻi he folofolá ne nau fekumi ki he ʻiló)

Mary N. Cook, ”Fekumi ki he ʻIló: ʻOku ʻi ai ha Ngāue ke ke Fai,“ Ensign pe Liahona, Mē 2012, 120–22

“Akó,” Ki Hono Fakamālohia ʻo e Toʻu Tupú (2011), 9–10

Ko e faiako ʻi he founga ʻa e Fakamoʻuí

Naʻe fakaʻaongaʻi ʻe he Fakamoʻuí ʻa e folofolá ke akoʻi mo fakamoʻoniʻi ʻaki Hono misioná. Naʻá Ne akoʻi ʻa e kakaí ke nau fakakaukauʻi ʻa e folofolá ʻiate kinautolu pē pea mo fakaʻaongaʻi ia ke maʻu ai e tali ki heʻenau ngaahi fehuʻí. Ko e hā te ke lava ʻo fai ke ueʻi e kau finemuí ke nau ako mo fakalaulauloto ki he folofolá?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko haʻo fakakaukau pē ʻaʻau ke fakafeʻiloaki ʻaki e lēsoni ʻo e uike ní:

Lau ʻe he kalasí e Tokāteline mo e Ngaahi Fuakava 88:118, pea aleaʻi e ʻuhinga ʻoku hoko ai e akó ko ha tefitoʻi moʻoni mahuʻinga ʻo e ongoongoleleí.
Fakaafeʻi e kau finemuí ke nau fakakaukau ʻoku talaange kiate kinautolu ʻe ha kaungāmeʻa mei he siasí te ne nofo ia mei he ako, ʻo ne fakamatalaʻi ange, “Te u mali au ʻi ha ʻaho, pea ʻe tokoniʻi au ʻe hoku husepānití, pea ʻoku ʻikai leva fie maʻu ke u toe ʻalu au ʻo ako.” Ko e hā ha founga ʻe lava ke poupouʻi ai ia ʻe he kau finemuí ke hoko atu pē ʻene akó? Kole ange ke hiki ʻenau ngaahi talí ʻi ha laʻipepa. Tānaki e laʻipepá, pea lau mo aleaʻi mo e kalasí e ngaahi talí. ʻI he fakaʻosinga ʻo e kalasí, ʻoange kiate kinautolu ha faingamālie ke tānaki ki heʻenau talí ʻo fakatefito he meʻa ne nau ako he lolotonga ʻo e lēsoní.

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he kau finemuí e mahuʻinga ʻo e akó. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

Vahevahe e ngaahi konga ʻo e lea ʻa Mary N. Cook “Fekumi ki he ʻIló: ʻOku ʻi ai ha Ngāue ke ke Fai” ʻi he kau finemuí, pea fakaafeʻi ke nau lau ʻenau kongá mo laineʻi e ngaahi fakakaukau ʻoku mahuʻinga kiate kinautolú (te nau lava foki ke mamata ʻi ha foʻi vitiō ʻo e leá pea hiki ʻenau ngaahi fakakaukau mahuʻingá). Fakaafeʻi ke nau vahevahe e meʻa ne nau laineʻí ki he kalasí pea fakamatalaʻi e founga ʻe lava ʻe heʻenau akó ʻo tāpuekina honau ngaahi fāmili he kahaʻú.
Vahe e kau finemuí ke nau lau tahataha ha taha ʻo e ngaahi palakalafi ʻe nima mei he konga ʻo e “Akó” ʻi he Ki Hono Fakamālohia ʻo e Toʻu Tupú pe fakamatala ʻa Palesiteni Gordon B. Hinckley mo Palesiteni Thomas S. Monson ʻi he kamataʻanga ʻo e lea “Fekumi ki he ʻIló: ʻOku ʻi ai ha Ngāue ke ke Fai.”Kole ke nau fakamatalaʻi ki he kalasí e meʻa ne nau laú, pea aleaʻi e ʻuhinga ʻoku mahuʻinga ai ke ngāue faivelenga he taimí ni ke maʻu ha ako leleí. Fakaafeʻi e kau finemuí ke nau fakakaukau mo vahevahe ʻenau taumuʻa ki hono fai ʻo ha akó.
Vahevahe e kalasí ki ha kulupu ʻe tolu. Kole ki he kulupu ʻuluakí ke nau lau e Lea Fakatātā 31:10–31, kole ki he kulupu uá ke nau lau e potufolofola ʻi he fokotuʻutuʻu ko ʻení ʻokú ne akoʻi ʻoku totonu ke tau fekumi ki he potó mo e ʻiló, pea kole ki he kulupu hono tolú ke nau lau e potufolofola ʻi he fokotuʻutuʻu ko ʻení ʻoku ʻomi ai ha ngaahi sīpinga ʻo e kakai ne nau fekumi ki he ʻiló. Kole ki he kulupu takitaha ke nau aleaʻi e meʻa ʻoku akoʻi ʻe he potufolofola ne vahe kiate kinautolú ʻo kau ki hono fai ʻo e akó mo hono fakatupulaki e ngaahi taukei fakangāué. Kole ki he kulupu takitaha ke nau vahevahe mo e toenga ʻo e kalasí e meʻa ne nau aleaʻí.Ko e hā ha founga ʻe tokoni ai e akó ki he moʻui ʻa e kau finemuí? Ko e hā ha founga te ne tokoniʻi kinautolu ke nau hoko ko ha ngaahi uaifi mo ha faʻē lelei angé?
ʻI hano fakangofua ʻe he pīsopé, fakaafeʻi ha kau fafine tokosiʻi mei he uōtí ke nau vahevahe e founga kuo tāpuekina ai kinautolu mo honau fāmilí ʻe he akó. Ko e hā ha founga kuó ne tokoniʻi kinautolu ke nau hoko ko ha mēmipa ʻoku tokoni ki he puleʻanga ʻo e ʻOtuá? Poupouʻi e kau finemuí ke fai haʻanau faʻahinga fehuʻi kau ki hono fai ʻo e akó.

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino nai kiate kinautolu e mahuʻinga ʻo hono fai ʻo e akó? Ko e hā haʻanau ngaahi ongo pe fakakaukau?ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau ki he founga te nau moʻui ʻaki ai e meʻa kuo nau ako he ʻaho ní. Hangē ko ʻení, ʻe lava ke nau:

Fakakakato ha meʻa ʻe taha pe lahi ange ʻo e ngaahi meʻá ni mei he Fakalakalaka Fakatāutahá: meʻa ke aʻusia fika 4 ʻi he tuʻunga ʻulungaanga mahuʻinga ʻo e Ko Hoto Mahuʻinga Fakatāutahá, ngāue fika 5 ʻi he tuʻunga ʻulungaanga mahuʻinga ʻo e Ko Hoto Mahuʻinga Fakatāutahá, meʻa ʻoku fie maʻu ke aʻusia fika 1 ʻi he tuʻunga ʻulungaanga mahuʻinga Ko e ʻIló pe fika 5 pe ngāue ki he tuʻunga ʻulungaanga mahuʻinga fika 2
ʻAi ha lisi ʻo e ngaahi meʻa ʻoku nau fie maʻu ke akó pea ʻai ha ngaahi palani ke ako ia. Hili ʻenau fakakakato ʻenau ngaahi palaní, te nau lava ʻo vahevahe ʻenau ngaahi aʻusiá mo e kau finemui kehé.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.