Te u ʻilo fēfē pe ʻoku ou ului?
Ko e uluí ko ha aʻusia ʻi ha vahaʻataimi lōloa ʻi he moʻuí ke hoko ʻo hangē ange ko Kalaisí ʻo fakafou ʻi he Fakalelei ʻa Sīsū Kalaisí. ʻOku kau ai ha liliu ʻoku ʻikai ngata pē ʻi hotau ʻulungāngá, ka ʻi he ngaahi holi foki hotau lotó, ʻetau ngaahi fakakaukaú, mo hotau ʻulungāngá. Ko ha liliu lahi ʻoku fakafelaveʻi ʻe he ʻEikí ki he fanauʻi foʻoú mo ha fuʻu liliu lahi ʻo e lotó (vakai, Mosaia 27: 25; ʻAlamā 5:14). ʻE lava ke tau ʻiloʻi ʻoku tau kamata ului ki he ʻEikí ʻi he taimi ʻoku mole ai meiate kitautolu ʻa e holi ke fai angahalá, fonu hotau lotó ʻi he ʻofá, pea tau fekumi ke vahevahe ʻa e ongoongoleleí mo e niʻihi kehé.
Teuteuʻi fakalaumālie koe
Ko e hā ha ngaahi aʻusia kuo nau fakaloloto ange hoʻo uluí? Ko e hā e ngaahi liliu kuó ke fakatokangaʻi ʻi hoʻo moʻuí ʻi hoʻo ngāue faivelenga ke moʻui ʻaki e ongoongoleleí?
Ko e hā ha fakamoʻoni ʻokú ke mamata ai ʻi he kau finemuí ʻoku kamata ke nau ului? Ko e hā ha meʻa fekauʻaki mo e uluí ʻoku fie maʻu ke mahino kiate kinautolu?
Ko e hā ha ngaahi potu folofola mo e ngaahi maʻuʻanga tokoni kehe ʻe tokoni ki he kau finemuí ke nau fakatokangaʻi ai ʻenau ului ki he ʻEikí?
ʻĪnosi 1:1–19, 26–27; Mosaia 5:1–5; 27: 23–37; ʻAlamā 23:6–7; Hilamani 3:35; 4 Nīfai 1:1–4, 15 (Ngaahi sīpinga ʻo e uluí)
Linda K. Burton, “Kau Fefine Pau,” Ensign pe Liahona, Mē 2017, 12–15
Bonnie L. Oscarson, “ʻOku ou Tui Nai?” Ensign pe Liahona, Mē 2016, 87–89
David A. Bednar, “Ului ki he ʻEikí,” Ensign pe Liahona, Nōvema 2012, 106–9
“Ului,” Tuʻu Maʻu ʻi he Tuí (2004), 200–204
Vitiō: “Ko e Tatali ʻi he Hala ki Tāmasikusí”
Ko e faiako ‘i he founga ‘a e Fakamo‘uí
Naʻe tuku e falala ʻa e Fakamoʻuí ki Heʻene kau ākongá fekauʻaki mo e ngaahi fatongia mahuʻinga ʻo e akoʻí, tokoniʻi mo faitāpuekina e niʻihi kehé. Ko ʻEne taumuʻá ke tokoniʻi kinautolu ke nau ului ʻi heʻenau ngāue tokoni ki he niʻihi kehé. Ko e hā ha ngaahi faingamālie ki he tokoní mo e fakatupulakí ʻe lava ke tau ʻoatu ki he kau finemui ko ia ʻokú ke akoʻí?
Vahevahe ʻo e ngaahi aʻusiá
Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻui fakaʻahó.
Fakafeʻiloaki e tokāteliné
Fili mei he ngaahi fakakaukau ko ʻení pe fakakaukau pē ʻaʻau ke fakafeʻiloaki ʻaki e lēsoni ‘o e uike ní:
-
Fakaafeʻi e kau finemuí ke nau hiki ha lisi ʻo ha ngaahi meʻa ʻoku liliu hili ha vahaʻataimi (hangē ko ha tengaʻi ʻakau ʻoku liliu ki ha fuʻu ʻakau pe ko ha ikeikaʻāvai ʻoku liliu ki ha kiʻi poto).Te nau fakaʻaongaʻi fēfē nai ʻa e ngaahi meʻá ni ke akoʻi ha niʻihi fekauʻaki mo e uluí?
-
Hiki e foʻi lea ko e ului ʻi he palakipoé, pea fakaafeʻi e kau finemuí ke nau kumi ʻa e ngaahi foʻi lea mo e ngaahi kupuʻi lea ʻi he Mosaia 27:25–26 ʻe tokoni ke mahino kiate kinautolu ko e hā ʻa e ului. Fakaafeʻi kinautolu ke nau aleaʻi e meʻa ne nau ako fekauʻaki mo e uluí mei he ngaahi lea mo e ngaahi kupuʻi lea ko ʻení.
Ako fakataha
ʻE tokoni e ngaahi ʻekitivitī takitaha ʻi laló ke ako ʻa e kau finemuí fekauʻaki mo e uluí pea fakatokangaʻi ʻa e taimi ʻoku hāsino ai e uluí ʻiate kinautolu peé. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:
-
Fakaafeʻi e kau finemuí ke nau fekumi ʻi he lea ʻa Sisitā Linda K. Burton ko e “Kau Fefine Pau” ki he founga ʻokú ne fakamatalaʻi ʻaki e “kau fefine paú,” pea hiki e meʻa ne nau maʻú ʻi he palakipoé. Ko e hā ha toe meʻa te tau lava ʻo ako mei he ngaahi sīpinga ʻo e kau fefine ʻi he lea ʻa Sisitā Peatoní ke tau hoko ko ha kau ākonga lelei ange ʻo e Fakamoʻuí? Kole ki he kau finemuí ke nau fakakakato ʻa e “ ʻEkitivitī ki he ʻUlungāngá” ʻi he Malangaʻaki ʻEku Ongoongoleleí, ʻi he peesi 126, pea vakavakaiʻi ʻenau fakatupulaki honau ʻulungaanga faka-Kalaisí. Ko e hā te nau lava ʻo fai ke nau hoko ko ha “kau fefine pau” ʻoku nau moʻui māteaki ko ha kau ākonga ʻo Sīsū Kalaisi?
-
ʻI ha ngaahi ʻaho siʻi kimuʻa, fakaafeʻi ha finemui ke haʻu mateuteu mai ke ne vahevahe ki he kalasí e meʻa ne hoko kia Mīseli Kaniseká he taimi naʻe puke lahi ai ʻene tama tangata ko ʻĒtané, ʻoku hā he lea ʻa Sisitā Bonnie L. Oscarson ko e “ʻOku ou Tui Nai?” Te ke lava ʻo tohiʻi he palakipoé ʻa e fehuʻi, “ʻOku ou tui nai ki ai pe ʻikai?” Fakaafeʻi e kau finemuí ke nau fakalaulauloto ki he fehuʻi ko ʻení lolotonga hono lau ʻe he kalasí e fakamatala ʻa Sisitā ʻOsikāsoni ki he ngaahi meʻa ʻoku tau tui ki aí. ʻI he fakaʻosinga e kalasí, ʻoange ha faingamālie ki he kau finemuí ke fai ai ʻenau fakamoʻoni ki he ngaahi akonaki ʻo e ongoongoleleí ʻoku nau tui ki ai ʻoku maʻu he lea ko ʻení. Ko e hā e founga ne nau tui ai ʻiate kinautolu pē ki he ngaahi meʻá ni?
-
Fakaafeʻi e kau finemuí ke nau fili ha lea ʻe taha mei he lēsoni ko ʻení, lau ha konga ʻo e leá, pea fakaʻaongaʻi e fakamatala ko iá ke tā ʻaki ha pousitā te ne tali e fehuʻi “Te u ʻilo fēfē pe ʻoku ou ului?” Kole ki he kau finemuí ke nau feakoʻiʻaki fekauʻaki mo e uluí ʻaki hano fakaʻaongaʻi ʻenau ngaahi pousitaá mo e ngaahi lea naʻa nau akó.
-
Fakaafeʻi e kau finemuí ke nau ako ʻa e Ului ʻi he Tuʻu Maʻu ʻi he Tuí pe ko e ngaahi folofola ʻi he fokotuʻutuʻu ko ʻení pea hiki ki ha lisi ʻo e ngaahi fehuʻi te nau lava ʻo fai kiate kinautolu pē ke vakaiʻi ʻaki ʻenau fakalakalaka ʻi he uluí. Tuku ha taimi ki he kalasí ke nau vahevahe e meʻa te nau fakakau ʻi heʻenau lisí pea mo hono ʻuhingá. Poupouʻi kinautolu ke nau fakalaulauloto ki he founga te nau tali ʻaki ʻa e ngaahi fehuʻi ko ʻení.
-
Huluʻi ha taha ʻo e ngaahi vitiō ʻi he lēsoni ko ʻení, pea fakaafeʻi e kau finemuí ke nau vahevahe e meʻa ne nau ako fekauʻaki mo e uluí mei he vitioó. Vahevahe ki he kau finemuí ha ngaahi aʻusia kuo nau tokoniʻi koe ke ke ului lahi ange, pea fakaafeʻi kinautolu ke nau vahevahe ʻenau ngaahi aʻusiá.
Kole ki he kau finemuí ke nau vahevahe ʻa e meʻa ne nau ako ʻi he ʻaho ní. Ko e hā haʻanau ngaahi ongo pe fakakaukau? ʻOku mahino nai e founga ke nau fakatokangaʻi ai ʻa e uluí ʻi heʻenau moʻuí? ʻOku toe ʻi ai nai haʻanau ngaahi fehuʻi kehe? ‘E ‘aonga nai ke tuku ha taimi lahi ange ʻi he tokāteline ko ‘ení?
Moʻui ʻaki e meʻa ʻoku tau akó
Fakaafeʻi e kau finemuí ke nau fakakaukau pe te nau moʻui ʻaki fēfē nai ʻa e meʻa kuo nau ako he ʻaho ní. Hangē ko ʻení, te nau lava ʻo:
-
Fili ha meʻa pau te nau ngāueʻi ke fakalakalaka ai ʻi heʻenau feinga ke uluí.
-
Hiki ʻi heʻenau tohinoá ʻenau ngaahi ongo ki he tuʻunga ʻoku nau ʻi ai he taimi ní ʻi heʻenau faifeinga ke uluí. Te nau lava foki ʻo hiki ʻi heʻenau ngaahi tohinoá, ʻi he taimi ʻe hoko aí, ʻa e ngaahi aʻusia te ne fakamālohia ʻenau uluí.
Vahevahe mo e kau finemuí ʻa e meʻa te nau ako ki ai ʻi he uike hoko maí. Ko e hā ʻenau fakakaukau mo e ngaahi fehuʻi ʻi he tefito ko ʻení? Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.