Te u lava fēfē ke maʻu ha tali ki hoku ngaahi faingataʻaʻiá mo e palopalemá?

ʻOku kau ʻi he moʻui fakafalala pē kiate kitá ʻa e malava ke maʻu e tali ki heʻetau ngaahi palopalemá mo e faingataʻaʻiá. ʻOku lahi hono maʻu ʻo e ngaahi tali ko ʻení ʻi he ongoongolelei ʻo Sīsū Kalaisi kuo toe fakafoki maí. ʻOku ʻafioʻi lelei ʻe heʻetau Tamai Hēvaní e ngaahi faingataʻa ʻoku tau fehangahangai mo iá. ʻOkú Ne ʻofeina kitautolu mo finangalo ke tokoniʻi kitautolu. ʻOku totonu ke tau lotua ha tataki ʻi heʻetau fekumi ʻi he folofolá mo e lea ʻa e kau palōfitá mo e kau ʻaposetoló ki ha ngaahi tali ki hotau faingataʻaʻiá.

Teuteuʻi fakalaumālie koe

Ko e hā ha founga kuo ʻomi ai ʻe he ongoongoleleí ha ngaahi tali mo e fakafiemālie lolotonga hoʻo ngaahi taimi faingataʻá?

Ko e hā e ngaahi meʻa pe ngaahi faingataʻa ʻoku fehangahangai mo e kau finemuí? Ko e hā ha ngaahi faingataʻa ʻe malava ke nau fehangahangai mo ia ʻi he kahaʻú? Ko e hā ha ngaahi tefitoʻi moʻoni ʻo e ongoongoleleí te ne tokoniʻi kinautolu ke ikunaʻi lelei e ngaahi faingataʻa ko ʻení?

Ko e hā e ngaahi potufolofola mo ha ngaahi maʻuʻanga tokoni kehe ʻe tokoni ke mahino ki he kau finemuí, ʻa e founga ʻe lava ke tokoni ai ʻa e ongoongoleleí ki he ngaahi faingataʻa ʻo e moʻuí?

Lea Fakatātā 3:5–6; Mātiu 11:28–30; Maʻake 4:36–39; ʻAlamā 7:11–13;38:5; ʻAlamā 37:35–37; (Fekumi ki he tokoni ʻa e ʻEikí ʻi he ngaahi faingataʻa mo e palopalemá)

Thomas S. Monson, “ʻOku ʻIkai ʻAupito ke Tau Tuenoa,” Ensign pe Liahona, Nōvema 2013, 121-24

Richard G. Scott, “Fakamuʻomuʻa Hoʻo Ngāueʻi e Tuí,” Ensign pe Liahona, Nōvema 2014, 92–95

Jeffrey R. Holland, “Hangē ha Ipu Kuo Maumaú,” Ensign pe Liahona, Nōvema 2013, 40-42

“Moʻui Lelei Fakaesino mo Fakaelotó,” Ki hono Fakamālohia ʻo e Toʻu Tupú (2012), 25–27

Ko e faiako ‘i he founga ‘a e Fakamo‘uí

Naʻe akoʻi ‘e he Fakamoʻuí ʻEne kau muimuí ke nau fakakaukau ki he folofolá ‘iate kinautolu pē pea ngāue ʻaki ia ke maʻu ai e tali ki heʻenau fehuʻí. Te ke lava fēfē o tokoniʻi a e kau finemuí ke nau holi ke tafoki ki he folofolá mo e ngaahi lea ʻa e kau palōfitá ʻi heʻenau fekumi ki he ngaahi tali ki honau ngaahi faingataʻaʻiá?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ‘o e uike ní:

Fakaafeʻi e kau finemuí ke nau talamai ha ngaahi faingataʻa pe palopalema ʻoku fehangahangai mo e toʻu tupu ʻi honau toʻú, pea hiki ʻenau talí he palakipoé. Kole ki he kau finemuí ke nau feinga ke ʻilo ha ngaahi meʻa ʻoku ʻikai sai ki he moʻui leleí pe taʻeʻaonga ʻe lava ke fai ʻe he toʻu tupú ke fehangahangai mo e ngaahi palopalema ko ʻení. Lolotonga e lēsoní, fakaafeʻi e kau finemuí ke nau kumi ha ngaahi founga ʻe lava ke tokoni ai e ngaahi moʻoni ʻo e ongoongoleleí.
Vahevahe ha aʻusia mei hoʻo moʻuí ne ʻoatu ai ʻe he ongoongoleleí ha tali pe tokoni ki ha ngaahi palopalema pe faingataʻa pau. Fakaafeʻi e kau finemuí ke nau vahevahe ha ngaahi aʻusia meimei tatau mei heʻenau moʻuí.

Ako fakataha

ʻE lava ke tokoni e ʻekitivitī takitaha ʻi laló ke ʻilo ʻe he kau finemuí ʻa e founga ke maʻu e tali ki honau ngaahi faingataʻaʻiá. Muimui ʻi he ueʻi ‘a e Laumālié, ʻo fili ha ʻekitivitī ʻe taha pe toe lahi ange ‘e ‘aonga lahi taha ki hoʻo kalasí:

Fakaafeʻi e kau finemuí ke nau fakakaukau ki ha faingataʻa pe palopalema ʻoku fehangahangai mo e kau finemui he ʻaho ní. Kole ange ke nau vakai vave ki he fakahokohoko fakamotuʻalea ʻo e tefitó ʻi he makasini ʻo e konifelenisi lahi fakamuimuitaha ʻo e Liahoná, pea kumi ki he ngaahi tefito ʻe ala tokoni ki he palopalema ko iá. Fakaafeʻi kinautolu ke nau kumi ha taha ʻo e ngaahi lea ʻoku fekauʻaki mo e ngaahi tefito ko iá pea vahevahe mo e kalasí ha lea ʻe lava ke tokoni ki ha finemui ke ikunaʻi hono ngaahi faingataʻaʻiá. Poupouʻi e kau finemuí ke nau fakaʻaongaʻi ʻa e fakahokohoko fakamotuʻalea ʻo e tefitó ke maʻu ha tokoni ki honau ngaahi faingataʻaʻiá.
Fakaafeʻi e kau finemuí ke nau lau ʻa e ongo palakalafi fakamuimuitaha ʻo e “Moʻui Lelei Fakaesino mo Fakaelotó” ʻi he Ki Hono Fakamālohia ʻo e Toʻu Tupú mo fekumi ki he faleʻi ʻe lava ʻo tokoni kiate kinautolu pe ko e kakai ʻoku nau ʻiló. Ko e hā ha ngaahi sīpinga ʻo e “founga veteki ʻoku moʻui leleí” ʻoku totonu ke tau fekumi ki ai ʻi he ʻi ai haʻatau palopalemá? Ko e hā e ngaahi founga veteki ʻoku ʻomi ʻe he ongoongolelei ʻo Sīsū Kalaisí?
Vahevahe e lea ko ʻeni ne fai ʻe Palesiteni Tōmasi S. Monisoni: “Siʻi tuofāfine ʻofeina, ʻoku ʻofa atu hoʻomou Tamai Hēvaní kiate kimoutolu—fakafoʻituitui. Kuo teʻeki ai liliu e ʻofa ko iá. ʻOku ʻikai kaunga ia ki ho fōtungá, hoʻo koloá, pe ko e lahi e paʻanga ʻi hoʻo ʻakauni he pangikeé. ʻOku ʻikai liliu ia ʻi ho ngaahi talēnití pe meʻa ʻokú ke lavá. ʻOku ʻi ai ia. ʻOku ʻi ai maʻu pē ia ʻi he taimi ʻokú ke loto mamahi pe fiefia aí, loto foʻi pe fakatuʻamelie aí. ʻOku ʻi ai e ofa ʻa e ʻOtuá maʻau ʻo taau ai pē pe ʻokú ke taau ke maʻu [ia] pe ʻikai. ʻOku ʻi ai maʻu ai pē ia” (“ʻOku ʻIkai ʻAupito ke Tau Tuēnoa,” Ensign pe Liahona, Nōvema 2013, 123). Fakaafeʻi e kau finemuí ke nau vahevahe ha ngaahi meʻa ne nau aʻusia ʻa ia ne nau ongoʻi ai e ʻofa ʻa e ʻOtuá lolotonga ha ʻahiʻahi faingataʻa. Kole ki he finemui takitaha ke lau ha taha ʻo e potufolofola mei he lēsoni ko ʻení pea vahevahe ʻa e founga ʻe lava ke tokoni ai ia ki ha taha ʻoku fehangahangai mo ha faingataʻa pe palopalema ʻa ia ʻoku angamaheni ʻaki pē ʻi he lotolotonga ʻo e toʻu tupú he ʻahó ni. Ko e hā ʻa e ʻuhinga ke “falala ki he ʻEikí” pe ko e haʻu kia Kalaisi ʻi he taimi ʻoku tau fie maʻu tokoni aí? ʻOku ʻi ai nai ha ngaahi potufolofola kehe ʻe lava ke fakakaukau ki ai e kau finemuí ʻe lava ʻo tokoni ki ha ngaahi faingataʻa pe palopalema pau?
Kole ki he kau finemuí ke nau fakakaukau ki ha taha ʻoku nau ʻilo ʻoku fefaʻuhi mo e ngaahi faingataʻaʻia fakaeʻatamai pe fakaelotó. ʻOange ki he finemui takitaha ha tatau ʻo e lea ʻa ʻEletā Jeffrey R. Holland ko e “Hangē ha Ipu Kuo Maumaú.“ Kole ange ke nau kumi e tali ki heʻene fehuʻí “Ko e hā ʻa e founga lelei taha ke tali ʻaki e ngaahi faingataʻa fakaʻatamai mo fakaeloto ʻokú ke fehangahangai mo iá pe niʻihi ʻokú ke ʻofa aí?” Fakaafeʻi e kau finemuí ke vahevahe e meʻa ne nau akó pea aleaʻi e founga ʻe lava ʻo tokoni ai e ngaahi akonakí ni ki he tokotaha ʻoku nau fakakaukau ki aí.
Kole ki he kau mēmipa ʻo e kalasí ke fakakaukau ki he ngaahi faingataʻa pe palopalema fakatāutaha ʻoku nau fehangahangai mo iá. Lisi ʻi he palakipoé e founga ʻe fā ne talanoa ki ai ʻa ʻEletā Richard G. Scott ʻi heʻene leá “Fakamuʻomuʻa Hoʻo Ngāueʻi e Tuí,” pea kole ki he kau mēmipa ʻo e kōlomú ke ako ki ha founga ʻe taha ʻoku nau ongoʻi te ne tokoniʻi kinautolu ʻi heʻenau ngaahi faingataʻá. Fakaafeʻi kinautolu ke vahevahe e meʻa ne nau ako mei he faleʻi ʻa ʻEletā Sikotí.

Kole ki he kau finemuí ke nau vahevahe ʻa e meʻa naʻa nau ako ʻi he ʻaho ní. ʻOku mahino nai kiate kinautolu e founga ke maʻu ʻa e tali ki he ngaahi faingataʻa ʻo e moʻuí ʻi he ongoongolelei ʻo Sīsū Kalaisí? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe ko e hā e founga te nau moʻui ʻaki ai e meʻa kuo nau ako he ʻaho ní. Hangē ko ʻení, te nau lava ʻo:

Ako e ngaahi potufolofolá ʻaki ha fehuʻi pau pe palopalema ʻoku fai ha fakakaukau ki ai. Hiki ʻi ha tohinoa ha ngaahi ongo mo e tali mei he Laumālié.
Fili ha tefito ʻi he tohitufa Ki Hono Fakamālohia ʻo e Toʻu Tupú ʻoku nau loto ke fakatupulaki. Tauhi ha tohinoa ʻo ʻenau ngaahi ngāué mo e lavameʻa he uike ka hokó.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.